Өлгөн ата-энесинин сөөгүн ташыган балдар жүрдү... Согуштагы кыргызстандык баатырлар

555
(жаңыланган 17:25 07.05.2020)
9-майда Улуу Жеңиштин 75 жылдыгы белгиленет. Бул согушка 360 миңден ашуун кыргызстандык жоокер башын канжыгага байлап, канын көөкөргө куюп кан майданга аттанган.

Ата Мекенди коргоого жөнөгөндөрдүн арасында 1395 аял бар эле. Зейнат Киргизбаева күйөөсү Мукаштын аркасынан кан майданга кетип, өмүрлүк жары сыяктуу снайпер болгон. Ал эми жердешибиз Гүлбара Егембердиева санитардык батальондун командири болуп, Кенисберг шаарына чейин жеткен. 76 кыргызстандык жоокер Советтер Союзунун Баатыры деген наамга татыган. Улуу Ата Мекендик согуш учурундагы кыргызстандыктардын эрдиги тууралуу колумнист Алмаз Батилов Ысык-Көл облустук мамлекеттик архивдин жана ардагерлердин балдарынын маалыматына таянып чагылдырууга аракеттенди.

Нина Соколова (1929-2007): жыгач чаптачу клей менен кайыш курларды жедик

Ветеран Великой Отечественной Войны Нина Соколова
© Фото / Государственный архив Иссык-Кульской области
Ардагер Нина Соколова

(Архивдеги кол жазмасы)

— Улуу Ата Мекендик согуш башталганда 12 жашта болчумун. Ленинградды фашисттик авиация тынбай бомбалап жатты. Апам иштеген заводго бомба түшүп талкаланып, дайынсыз жоголду. Буга карабастан өзүм курактуу өспүрүмдөр менен шаарды коргогонго катышып жаттым. Майыптар менен кары-картаңдарды жөлөп-таяп жер төлөгө түшүрчүбүз, өрттү козгоочу бомбаларды үйлөрдүн чатырынан ылдый карай ыргытчыбуз. Каза болгондорду Володар көпүрөсүнүн жанындагы чиркөөгө жеткирчүбүз. Бул чиркөөгө канчалаган бала курман болгон ата-энесинин сөөгүн алып бара жатканын да көрдүк. Ачкачылык менен сууктун айынан канча көз жаш төгүлдү, таш жүрөк болот экенсиң, үй менен подъезддин ичиндеги толо өлгөн адамдарга көңүл бурбай каласың. Күнүнө болгону ар бир кишиге 125 грамм нан берилчү. Кардыбызды тойгузуш үчүн жыгач чаптачу клей менен кайыш курларды жедик. Ошентсе да фашисттик авиация бомбалаганына карабастан улууларга кошулуп окоп да каздык. Жеңиш биз тарапта болот деген ишеничтен тайган жокпуз. Ошентип Ленинград фашисттерге багынган жок.

Бакас Жапаров (1923-2004). Сталинграддан Маньчжурияга чейинки Жеңиш жол

Ветеран Великой Отечественной Войны Бакас Жапаров
© Фото / Государственный архив Иссык-Кульской области
Ардагер Бакас Жапаров

(архивдик материал)

— 1942-жылы майда 19 жаштагы Бакас советтик армиянын катарына чакырылат. Адегенде ал Фрунзе шаарындагы жөө аскер училищесинде окуйт. Аны бүткөн соң Жапаровго сержант наамы ыйгарылып, белгилүү генерал Афанасий Белобородовдун 9-гвардиялык аткычтар дивизиясынын миномёттук расчётунун командири болуп дайындалат. 1942-жылы ушул дивизия Сталинград шаарын айыгыша коргойт. Бакас салгылашуунун биринде оор жарадар болот. Миномёт расчётундагы жети жоокердин ичинен экөө гана аман калат. Аскердик госпиталдан дарылангандан кийин фронтко кайтат. Аскердик жетекчилик ага кичи лейтенат наамын ыйгарат. Жапаров Калинин, Батыш жана 2-Белорус фронтунда аскердик жолун улантат. 1944-жылы жайында Белоруссиянын Орша шаарын бошотуп жаткан учурда кайрадан оор жарадар болот. Иркутск облусундагы Усолье-Сибирское шаарындагы санаторийде дарыланат. 1945-жылы 9-майда ал үчүн согуш бүткөн эмес. Лейтенант Жапаров Түндүк Кытайдын Маньчжурия аймагын япон баскынчылардан бошотууга да катышат.

Степан Костромин (1916-2003). 35 күн душмандын тылында жүргөн чалгынчы

Ветеран Великой Отечественной Войны Степан Костромин
© Фото / Государственный архив Иссык-Кульской области
Ардагер Степан Костромин

(архивдик материал)

— 1942-жылы Костромин радист жана мина тапкыч адистигин өздөштүрөт. 1943-жылдын март-апрель айында ага сержант Степан Демянск курчоосундагы миналарды издеп, жок кылат. Күзүндө командачылык анын тобун Псков аймагындагы партизандарга көмөк көрсөтүүгө жиберет. Алар Калинин фронтунун сызыгынан жашыруун өтүп, фашисттик армиянын тылына кирип, партизандардын гитлерчилерге каршы диверсияларына катышат. Ошол эле маалда бул чөлкөмдөгү фашисттик армиянын штабы жана коргонуу системасы тууралуу чалгындап маалымат топтошкон. Костромин дароо борборго рация менен маалыматты жөнөтүп турчу. 1944-жылы Новгород менен Псков облустарын баскынчылардан бошоткондон кийин анын тобун командачылык Батыш Латвияга жөнөтөт. Бул аймакта Гитлердин "Түндүк" армиясы каршылык көрсөтүп жаткан учур эле. Командачылык Гитлердин ушул армиясында канча жоокер жана курал-жарак бар экенин билүүнү көздөгөн. Ошондуктан алар фашисттердин тылына самолёттон парашют менен түшүшөт. Чалгынчылар 35 күн душманга эч сыр алдырбастан маалымат топтошот. Костромин борборго бүт маалыматты үзгүлтүксүз жөнөтүп турган. Командачылыктын тапшырмасы ийгиликтүү аткарылган соң кайтууга буйрук берилет. Бир күндө фронттун сызыгынан өтүшөт. Ошондо да кур кол келишпей үч фашистти туткунга түшүрө келишкен. Кан майдандан Степандын төрт бир тууганы кайткан жок...

Жумабек Рахманов (1921-2011). Бакта отурган снайперди атып түшүрүп...

Ветеран Великой Отечественной Войны Жумабек Рахманов
© Фото / Государственный архив Иссык-Кульской области
Ардагер Жумабек Рахманов

(архивдик материал)

— Волхов фронтунда Ленинградды блокададан бошотууга катышкам. 1943-жылы июнь айында Кыргыз ССРинин өкмөтү Ленинград фронтунда салгылашып жаткан аскерлерге бир эшелон белек жибериптир. Анын ичинде жылуу кийим, мээлей, байпак, тумак, жүз аарчы жана түрлүү тамак-аш бар экен. Бул белектерди Кыргыз ССРинин министрлер кеңешинин төрагасы Кусейин Көлбаев, Ысык-Көл облусунун жетекчиси Райымбек Табалдиев жана башка жердештерибиз жеткирип келген. Мага тийгенин карасам саймаланган жүз аарчы экен. Ага ооруктагы белгисиз келин “Баатыр жоокерге” деген ыр жазыптыр. Ошол келиндин ыры дагы да эсимде. Ленинградды блокададан бошотууга катышканым үчүн “Эрдик” медалы менен сыйлангам.

Давлет Халитов (1925-2004). Аба десант аскеринин тайманбас чалгынчысы Толик

Ветеран Великой Отечественной Войны Давлет Халитов
© Фото / Государственный архив Иссык-Кульской области
Ардагер Давлет Халитов

(архивдик материал)

— 1943-жылы март айында Давлет Кызыл армиянын катарына чакырылып, 300-гвардиялык аба-десант аскер полкунун курамына кошулат. Аны полктоштору Толик деп аташат. 1944-жылы июлда сержант Халитов сегиз полктошу менен чогуу Карелиядагы Свирь дарыясынын боюнда фин лахтерлеринен (баш кесерлер) куралган отряддын курчоосунда калат. Лахтерлер советтик аскерлерди жок кылыш үчүн токойду өрттөшкөн. Ошондо да тогуз баатыр жанын тиштеп, финн баш кесерлерине айыгышкан каршылык көрсөтүшөт. Бул салгылашта Давлеттин үч жолдошу курман болот. Аларды курчоодон танкисттер менен полктоштору алып чыгып кетишкен. Бул каармандыгы үчүн Халитов "Эрдик" медалы менен сыйланат. 1945-жылдын апрель айында Австрияда аталган полктун 72 чалгынчысынан турган топ түзүлөт. Алардын катарында жердешибиз Халитов да бар эле. Топтун максаты фашисттик армиянын тылында диверсиялык иш-чараларды уюштуруу болчу. Булар гитлерчилердин тылында рейд жүргүзгөнгө өтүшкөн. Давлет биринчилерден болуп австриялык антифашисттердин отряды менен байланышат. Австриялык патриоттор менен советтик чалгынчылар биргелешип Пернитц шаарындагы СС дивизиясынын штабын талкалап, ок-дары зат сакталган кампаны жардырып, 300 фашистти жок кылышкан. Ушул эрдиги үчүн Халитов "Аскердик Кызыл Туу" ордени менен сыйланган.

Габи Абдуллаев. Германиядан алып келген дасторкон

Ветеран Великой Отечественной Войны Габи Абдуллаев
© Фото / из личного архива Габи Абдуллаева
Ардагер Габи Абдуллаев (үстүнкү катарга оң жактан биринчи)

Габи Абдуллаевдин азыр, тилекке каршы, көзү көрбөй, кулагы укпай калыптыр. Эки жылдан бери төшөктө экенин уулу Салихар айтып отуруп, Габи атанын кан күйгөн согуштан ала келген таберик буюму тууралуу да кеп салды.

— Атам Жети-Өгүз районунун Ырдык айылынын кулуну. Аскердик сапары 1943-жылы Курск догосундагы салгылашууда башталган. Ал 358-гвардиялык зенит полкунун аткычы экен. Бул салгылашуу кырк күндөн ашык убакытка созулган эмеспи. 6-июлда атамдын полку фашисттердин он бир чабуулунун мизин кайтарган. Курск догосунда көрсөткөн эрдиги үчүн "Эрдик" медалы менен сыйланат. Андан кийин август айында Белгород шаарын баскынчылардан бошотууда көрсөткөн каармандыгы үчүн "Кызыл Жылдыз" ордени берилген. Украинадагы салгылашуунун биринде ал ушул орденин жоготуп жиберет. Бирок атам эч кимге айткан эмес экен. Себеби соттолуп кетмек. Польша менен Чехословакияны фашисттердин запкысынан бошотууга катышат. Согуш бүткөндөн кийин Германияда дагы эки жыл аскердик кызматын өтөйт. Кан төгүп жүрүп ал жактан тапкан олжосу бир жарым метр кездеме жана дасторкон болуптур. 1947-жылы майда демобилизация болуп, Кыргызстанга жеткенде акчасы түгөнөт. Айласы кетип Фрунзенин автовокзалына келип жүк ташуучу автоунаанын (ГАЗ АА полуторканын) жашы улгайган айдоочусуна "аксакал, армиядан келе жатам, акчам түгөндү, жол киренин ордуна кездеме берейин" деп өтүнөт. Ал макул болот. Ошентип Гитлерди жеңген жоокер жүк ташуучу автоунаанын үстүндө туулуп өскөн айылы Ырдыкка жетет. 73 жылдан бери атам Германиядан алып келген дасторконду үйүбүздө таберик буюм катары сактап келе жатабыз.

Рысбек Өкөмбаев. Кеңеш өкмөтүнө таарынычын унутуп, мекенин коргогон

Дочь Ветерана Великой Отечественной Войны Рысбека Окомбаева Зууракан Рысбекова
© Фото / из личного архива Асель Эгембердиевой
Ардагер Рыспек Өкөмбаевдин кызы Зууракан Рысбекова(солдо)

Согуштан кайтпай калган Рыспек Өкөмбаев жөнүндө анын кызы Зууракан Рысбекова айтып берди.

— Атам Рысбек 1913-жылы Ак-Суу районунун Ичке-Жергез айылында төрөлгөн. Анын атасы Өкөмбай жана бир туугандары бай адамдар экен. Ошондуктан 1930-жылдары чоң атамды Кеңеш өкмөтү кулакка тартып, Россияга сүргүнгө айдайт. Анын эки баласы менен бир туугандары, Кытайдын курамындагы Текес өрөөнүнө качканга үлгүрөт. Чоң энем Кишимжан эки уулу Рысбек, Ырыскелди менен Кыргызстанда калат. 1939-жылы Ырыскелди Кызыл армиянын катарына чакырылат. Улуу Ата Мекендик согуштун алдында ал "атамды таптым, жакында чогуу келебиз" деп кат жазган экен. Кан майданда дайынсыз жоголду...

1942-жылы 25-ноябрда атам өз ыктыяры менен фронтко кетип, 125-гвардиялык аткычтар дивизиясынын катарына кошулат. Ал пулемётчик болуптур. 1943-жылы март айында баатырларча каза болгону жөнүндө кара кагаз келди. Анда: "1943-жылы 12-мартта Ленинград облусунун Старорусский районундагы Сычево айылын басып алган фашисттерге биздин полк каршы чабуул коёт. Өкөмбаев үч ирет жарадар болгон. Командири тылга кайт деп буйрук берсе да баш тартып, пулемёттон аткылаганын улантат. Салгылаш учурунда төртүнчү жолу жарадар болот. Ошондо да согуш талаасынан кетпей жараатын өзү таңып, кайрадан пулемёттон аткылаганын улантат. Салгылаш бүткөндөн кийин полктоштору сөөгүн табышат. Алар Рыспектин 17 жолу жарадар болгонун көрүшөт. Ушул баатырдыгы үчүн Өкөмбаев "Ленин" ордени менен сыйлоого сунушталды", — деп 125-гвардиялык аткычтар полкунун командири атамдын эрдиги жөнүндө жазган. Ошол эле жылы 20-майда ал СССРдин Жогорку Кеңешинин президиумунун жарлыгынын негизинде "Ленин" ордени менен сыйланат. Согушка чейин бизди кулак, эл душманы деп айыптаган айылыбыздагы комсомолдун айрым активисттери армиядан качышты. Булар Чыңгыз Айтматовдун "Бетме-бет" чыгармасындагы Ысмайыл болушту. Менин атам менен агам Кеңеш өкмөтүнө таарынычын унутуп, Ата Журтун кашык каны калганча коргошту.

Жаманкул Жээнчураев (1907-1990). Жибектен тигилген халат үшүктөн сактап...

Ветеран Великой Отечественной Войны Жаманкул Жээнчураев
© Фото / из личного архива Розалии Джээнчураевой
Ардагер Жаманкул Жээнчураев

Даңазалуу советтик чек арачы Жаманкул Жээнчураевдин кызы Розалия атасы тууралуу кызыктуу окуя айтып берди.

— 1939-жылы атам Брест аймагындагы Негорелое станциясынын комендатурасына комендант болуп дайындалыптыр. Биз ал жерге көчүп барып, бат эле көнүп кеттик. Улуу Ата Мекендик согуштун алдында атам апама жибектен тигилген кооз халат белек кылды. 22-июнда фашисттик Германия кол салганда атам заставадагы аялдар менен балдарды тылга жиберүүгө үлгүрөт. Жанын аябай каршылык көрсөтүшүп, акыры күч тең эмес экенине атамдын көзү жетет. Ал аман калган жоокерлери менен артка чегинмей болот. Ошонун алдында атам үйгө кирип, апамдын халаты менен сайма түшкөн кол аарчыларынын бирин койнуна салып чыгып кетет. Москвага чейин чегинишет. Биздин тылга жеткенибизди атам көпкө чейин билген жок. 1941-жылы кышында советтик армия фашисттерге чабуул коюп жаткан учурда күн абдан суук эле. Атам досу менен апамдын халатын айрып, буттарына чулгоо кылып орошот. Ошентип экөө буттарын үшүккө алдырбайт. Ал эми апамдын кол аарчысын төш чөнтөгүнө салып, тумар катары алып жүрчү экен. Кийин "кол аарчыны карап үй-бүлөм тылга жетти, мен да сөзсүз согуштан алты саным аман кайтам деп жүрдүм" деп айтып берди эле. Чынында эле кан майдандан аман-эсен келди.

555
Белгилер:
согуш, эрдик, жоокер, ардагер, Улуу Ата Мекендик согуш
Тема:
Улуу Ата Мекендик согуштагы Жеңиштин 75 жылдыгы (107)
Тема боюнча
Жүрөк тилген видео! Аталардын Улуу Ата Мекендик согуштагы эрдиги
Бишкектин чок ортосунда жанган кызыл жылдыз. Мэриянын майрамга белеги
Мамлекеттик салык кызматынын маалыматтык камсыздоо бөлүмүнүн башчысы Эркин Сазыков. Архив

Сазыков: учурда 230 миңден ашуун адам салыкты онлайт төлөп жатат

8
(жаңыланган 16:26 25.02.2021)
Мамлекеттик салык кызматынын маалыматтык камсыздоо бөлүмүнүн башчысы Эркин Сазыков бирдиктүү салык декларациясын юридикалык жактар 1-мартка чейин тапшырышы зарыл деди.

Салык төлөөдөгү, декларация толтуруудагы электрондук кызматтарды онлайн колдонуу ыңгайлуу жана акысыз. Бул тууралуу Эркин Сазыков Sputnik Кыргызстан радиосуна маек куруп жатып билдирди.

Сазыков: учурда 230 миңден ашуун адам салыкты онлайт төлөп жатат

Анын айтымында, быйыл жеке жактар салык декларациясын 2019-2020-жылдарга тапшырат.

"Азыркы убакта 230 миңден ашык салык төлөөчү электрондук форматка өткөн. Бул жарандардын өзү үчүн эле ыңгайлуу болот. Биринчиден, убактысы үнөмдөлөт жана 24 саат ичинде өзү каалаган учурда кызматтан пайдалануу мүмкүнчүлүгү түзүлөт. Экинчиден, азыркы эпидемиологиялык абалда коопсуздукту камсыздайт. Ошондой эле бул таптакыр акысыз көрсөтүлүүчү кызмат. Анан да анда электрондук эсептегичтер болуп, программа өзү жардам берет. Электрондук кызматтардан колдонуу үчүн болгону бир ирет тиешелүү мекемеге келип, логин алып, сыр сөзүн бекитип, https://salyk.kg/ сайтынан жеке кабинетке ээ болот", — деди Сазыков.

Ал жеке жактар бирдиктүү салык декларациясын 1-апрелге чейин тапшыруу зарылдыгын кошумчалады.

8
Белгилер:
онлайн, салык, декларация, Эркин Сазыков
Тема боюнча
Бирдиктүү салык декларациясы түн ортосуна чейин кабыл алына баштады
Офистеги аял. Архив

Бишкекте кайсы мектептин директору кызматында 20 жылдан ашык отурат? Тизме

438
(жаңыланган 15:07 25.02.2021)
Ордо калаадагы мектеп жетекчилеринин ичинен билим берүү жайын 15 жылдан ашык башкарып келе жаткандар аз эмес. Муниципалдык мектептер боюнча маалыматты материалдан окуңуздар.

Буга чейин билим берүү жана илим министри Алмазбек Бейшеналиев Кыргызстанда мектеп директорлорун ректорлор сыяктуу эле беш жылга шайлоо механизмин киргизүү боюнча эксперттик топ иштеп жатканын айткан.

Билим уясын жетектей турган адамды кандай жол менен тандашары азырынча белгисиз. Министр буга чейин мектеп директорлору боюнча көптөгөн суроолор келип жатканын айткан.

Председатель регионального института Центральной Азии Алмазбек Бейшеналиев
© Sputnik / Асель Сыдыкова
Билим берүү жана илим министри Алмазбек Бейшеналиев
"Өлкөдө жашы 70-80ге таяп калган жүздөгөн директор бар. Кээ бирлери ондогон жылдардан бери иштеп, өз каалоосу менен креслосун тапшыргылары келбейт. Себеби бул мамлекеттик кызмат катары эсептелбегендиктен чектөө жок. Коррупциялык схемалар бар, жаңылануу жок. Ошол эле учурда алардын арасында мыкты иштеп жаткандары дагы бар", — деди Бейшеналиев.

Sputnik Кыргызстан агенттигинин кабарчысы Бишкек шаарындагы мектеп жетекчилеринин тизмесин Шаардык билим берүү башкармалыгынан алып, буга чейин даярдалган макала менен ачык булактарда жазылган маалыматтарды кошуп таблица түздү.

Анда мектеп жетекчилеринин жаш курагы, канча жылдан бери билим берүү мекемесин башкарып келе жаткандыгы тууралуу жазылган.

Мектепти азыр башкарып жаткан жетекчилердин арасында Бишкек шаардык кеңешинин депутаты, БШК мүчөсү, Бишкектин мурдагы вице-мэри жана башка муниципалитеттин аткаминерлери бар.

Бир эле билим берүү жайын 20 жылдан ашык башкарып келе жаткан жетекчилердин катарында №7 мектептин директору Чолпон Бердалиев, №10 мектептин директору Кулжан Үмөталиева, №20 окуу-тарбия комплексин башкарган Чолпон Кудайбергенова, №23 мектеп-гимназиясынын директору Андрей Ситоленко, №27 орто мектебинин жетекчиси Бермет Носинова, №31 мектеп-гимназиясынын жетекчиси Тажыбүбү Өмүрзакова, №34 жардамчы мектебин башкарган Гүлизат Карасартова, №51 орто мектебин жетектеген Суусар Мураталиева бар.

Мындан сырткары, №59 мектептин директору Маргарита Ситникова, №61 физика-математикалык мектеп-лицейинин директору Юрий Низовский, №66 окуу-тарбия комплексинин жетекчиси Минара Якупова, №67 окуу тарбия комплексинин жетекчиси Светлана Керимкулова, №68 окуу-тарбия комплексинин директору Канымжан Өмүрова, №73 орто мектебин жетектеген Раушан Ниязбеков, №74 мектеп-лицейинин директору Гүлжан Абдуллаева, №1 гимназия-интернатын жетектеген Нуркалый Байматов жана №7 жумушчу жаштар мектебинин директору Назгүл Көөдөковалар 20 жылдан бери иштеп келишет.

Билим берүү жана илим министринин орун басары Надира Жусупбекованын айтымында, директорлорду дайындоо боюнча азыркы механизм коррупциялык тобокелчиликке алып келет.

Заместитель министра образования КР Надира Джусупбекова во время интервью корреспонденту Sputnik Кыргызстан
© Sputnik / Табылды Кадырбеков
Билим берүү жана илим министринин орун басары Надира Жусупбекова
"Билим берүү деңгээлин жогорулатуу үчүн ар бир мектепке компетенттүү директор керек. Азыр мектеп жетекчилерин дайындоо иштери менен билим берүү бөлүмдөрү иш алып барат. Өкмөттүн токтомуна ылайык, 2014-жылдан бери мектеп жетекчилери келишимди узартуу мүмкүнчүлүгү менен 5 жылга дайындалышат. Көпчүлүк директорлор 2014-жылга чейин шашылыш эмес келишимдерди түзүшкөн. Ошол себептен билим берүү башкармалыктары жана райондук бөлүмдөр алар менен келишимдерди токтотуп кое алышпайт. Азыр биз директорлор жетекчилик кызматка келиши үчүн тесттен өткүдөй жобону иштеп жатабыз. Мектеп жетекчилеринин жаш курагы жана иштөө мөөнөтү боюнча дискриминацияга каршыбыз. Бирок коррупциялык тобокелчиликти жокко чыгарган так механизмди киргизүүгө убакыт келди", — деди Жусупбекова.

Ал мектеп директорлорун баалоо критерийлери менен жумушка алуу же иштен кетирүү боюнча жаңы механизм быйылкы окуу жылында ишке кирет деген ишеничин кошумчалады.

438
Белгилер:
кызмат, жетекчи, мектеп, билим берүү, Бишкек
Тема боюнча
Сайназаров: мектеп директорлорун тандоодо үч багытка көңүл буруу зарыл
Россия рубли. Архив

Россия Кыргызстанга экономиканы көмүскөдөн чыгарууга 623 млн. сом берет

0
(жаңыланган 16:39 25.02.2021)
Кыргыз өкмөтү 2019-жылы жардам сурап кайрылган. Бул боюнча тийиштүү документтер даярдалып, президент Садыр Жапаровдун сапарынын алкагында келишимге кол коюлду.

БИШКЕК, 25-фев. — Sputnik. Россия техникалык жардам катары Кыргызстанга товарларды маркировкалоо системасын түзүү үчүн 623 миллион рублга идентификациялоо жабдууларын алып берет. Бул тууралуу аталган өлкөнүн Өнөр жай жана соода министрлигинин сайтында маалымдалат.

Билдирүүгө ылайык, кыргыз өкмөтү 2019-жылы жардам сурап кайрылган. Бул боюнча тийиштүү документтер даярдалып, президент Садыр Жапаровдун сапарынын алкагында өкмөттөр аралык келишимге кол коюлду.

Өнөр жай жана соода министри Денис Мантуров Россияда бул система ийгиликтүү иштеп жатканын белгилеген.

"Бул бюджетке кошумча салыктардын түшүшүн, рыноктун тазалыгын камсыздап жана ак ниет өндүрүшчүлөрдүн көмүскө сегменттин атаандаштыгынан коркпой рынокко чыгышына шарт түзөт. Ал эми керектөөчүлөр үчүн сапаттуу жана ден соолукка коопсуз товар алууга, келечекте ЕАЭБдин аймагындагы бардык товарды бирдиктүү система менен текшерүүгө мүмкүнчүлүк жаралат", — деди министр.

Ал эми Кыргызстандын экономика жана финансы министри Улукбек Кармышаков бул макулдашуу эки тараптуу байланыштарды жандандырууга маанилүү кадам болоруна ишеним артты.

Аталган системаны түзүүгө 1,5 жыл убакыт кетет. Бул жумуштарды Россиянын Өнөр жай жана соода министрлиги мамлекеттик келишимдер аркылуу аткарат.

0
Белгилер:
Улукбек Кармышаков, товар, жардам, Россия, Кыргызстан
Тема:
Садыр Жапаровдун Россияга сапары
Тема боюнча
Россия Кыргызстанга кайтарымсыз 5,2 млн. доллар бөлдү
Садыр Жапаров Россияга барганда Евразия фондунан 100 млн. доллар кредит сурайт