Медициналык кызматкерлер кишилерди өткөзүп жатышат. Архив

Обсервацияга жатпай, үйүнө кетишти. "Гансидеги" жаңжалдын видео хронологиясы

(жаңыланган 01:14 19.05.2020)
Обсервацияда 11 күндөн бери жатканына нааразы болгондор чуу салып отуруп, акыры үй карантинине чыгып кетишти.

БИШКЕК, 18-май — Sputnik. "Манас" аэропортунун жанындагы Американын мурдагы "Ганси" авиабазасынын аймагында жайгашкан "Семетей" обсервациясында жаткандар жаңжал чыгарды. Бул жайга Соль-Илецкиден алып келинген жарандар жайгаштырылган болчу.

Жаңжалдын себеби эмнеде?

Обсервациядагы жарандар "чогуу келгендердин айрымдары үй карантинине чыгып кетти" деп нааразы болуп, баарын коё берүүнү талап кылып чыгышканын айтты. Бирок ички иштер министринин орун басары Мирлан Каниметов кимдир бирөө жалган маалымат таратканын билдирди. Чынында үй карантинге эч ким чыккан эмес, COVID-19 жуктурганы аныкталгандар ооруканага которулган. Бүгүнкү күндө ал жерде 432 мекендеш жашап жаткан.

Медиктерге кол салуу

Ал арада Саламаттык сактоо министрлиги обсервациядагы мекендештердин дарыгерлерге кол салган фактылары да катталганын кабарлады.

"Жарандар өзүн агрессивдүү алып жүрүшөт. Тез жардам кызматынын өкүлдөрү дагы жабыркады, медиктердин кийимдерин айрып, тез жардам унаасын оодарууга да аракет кылышты", — деп айтылат маалыматта.

Айрымдары обсервацияга келгенден тарта медицина кызматкерлерине каршылык көрсөтүп жаткан.

Абылгазиевдин кайрылуусу

Түзүлгөн кырдаалга байланыштуу премьер-министр Мухаммедкалый Абылгазиев кайрылуу жасады.

"Башкалардын саламаттыгына коркунуч жаратып, тынчын алып, тартип бузууда. Кайталап алынган анализи вирус жок экендигин көрсөткөндө гана үйүнө чыгарыларын белгилеп кетким келет! Жарандарыбыз кандай оорчулуктарга туш болгонун түшүнүп турабыз. Мекенине келүүнү көпкө күтүшкөн, бирок биз үчүн эң башкысы — оорунун жайылышына жол бербөө. Үй карантинге чыкканда аларды жашаган жерлерине жеткирүү уюштурулат", — деди Абылгазиев.

Ошондой эле ал биринчи кезекте туугандардын жана жакындардын, коомдун алдындагы жоопкерчиликти эстен чыгарбоого чакырды.

Чуу салгандардын талабы аткарылды

Жаңжалдын чоо-жайын тактоо үчүн саламаттык сактоо министринин орун басары Нурболот Үсөнбаев баштаган министрликтин өкүлдөрү "Семетей" обсервациясына барышты.

Анын натыйжасында чуу салган мекендештердин талабы аткарылып, бүгүн үй карантинине чыгарууга уруксат берилди. Ошентип 432 жарандын ичинен 19у гана калтырылды. Алар өткөн суткада коронавирус жуктурганы тастыкталган 43 адам менен жакын байланышта болгондор.

Белгилей кетсек, Россиянын Соль-Илецк районунда бир айдан ашык кармалып турган кыргызстандыктар 7-май күнү автобус менен алып келинген. Учурда алардын ичиндеги 101 адамдан коронавирус аныкталды.

Белгилер:
мигранттар, чыгаруу, Жаңжал, обсервация, карантин, Соль-Илецк
Тема:
Коронавируска байланыштуу Кыргызстандагы кырдаал (2652)
Тема боюнча
Үй карантиндин эрежесин бузган 10 кишиге иш козголду
Оренбургдан келген 55 жарандан COVID-19 чыкты. Алар жаңжал чыгарганы айтылды
Бишкек мэриясы. Архив

УКМК Бишкек шаарынын казынасынан 43 миллион сом уурдалганын таап чыкты

(жаңыланган 13:32 16.04.2021)
Атайын кызмат белгилегендей, каражат 2020-жылы кабыл алынган токтомдор аркылуу эсептен чыгарылган. УКМК окуянын чоо-жайын ачыктады.

БИШКЕК, 16-апр. — Sputnik. УКМК Бишкек мэриясынын кызмат адамдары 43 миллион сомдон ашык бюджеттик каражатты өзүнө мыйзамсыз ыйгарып алганын аныктады. Бул тууралуу УКМКдан билдиришти.

Атайын кызмат Бишкек шаардык кеңешинин жана шаардык администрациясынын жооптуу кызматкерлерине Кылмыш-жаза кодексинин 205-беренесинин 3-бөлүмү ("Ишенип берилген мүлктү ыйгарып алуу же коротуу") боюнча кылмыш ишин козгогон. Бул факты Кылмыш жана жоруктардын бирдиктүү реестрине катталып, сотко чейинки өндүрүшкө алынган.

УКМКнын белгилешинче, бюджеттик каражатты парламенттик шайлоо алдында үгүт иштерине жана жеке кызыкчылыктарына пайдалануу максатында тийиштүү кызматкерлер тарабынан каражатты эсептен чыгаруу боюнча мыйзамсыз механизм түзүлгөн.

Бул максатта мэриянын 2020-жылдын 8-июнундагы №60 "Бишкек шаарында жарандык демилгелердин долбоорлорун ишке ашыруу тартиби тууралуу Убактылуу жобону бекитүү жөнүндө" токтому кабыл алынган.

"Ошол эле учурда, бул жарандык долбоорлор жалаң гана шаардык кеңештин жана Бишкек мэриясынын жооптуу кызматкерлеринин демилгеси менен ишке ашырылып, натыйжада 43 миллион сомдон ашык суммадагы бюджеттик каражатты мыйзамсыз ыйгарып алуу иштери жүргүзүлгөн", — деп айтылат билдирүүдө.

Ошондой эле долбоорлор Бишкек мэриясы эмес, түзүмдүк бөлүмдөр тарабынан ишке ашырылган. Учурда тиешелүү ыкчам-иликтөө иш-чаралары жүргүзүлүп жатат.

Белгилер:
кылмыш, шектүү, УКМК, коррупция, бюджет, Бишкек мэриясы, Бишкек
Тема боюнча
Депутат Кубанычбек Жумалиев бюджетке 1 млрд. сом төлөдү
Матраимовдун кылмыш иши кыскартылып, эркиндикке чыкты
Медициналык кызматкер Бишкектеги ооруканада COVID-19 менен оруган бейтаптар менен

Министр: былтыр ооругандар кайра вирус жуктуруп алууда, вакцина алгыла

(жаңыланган 13:33 16.04.2021)
Министр бардык аймактарда коронавируска кабылгандар жана андан көз жумгандар көбөйүп жатканын эске салды. Себеби антитело сегиз айдан бир жылга чейин жетерин айтты.

БИШКЕК, 16-апр. — Sputnik. Былтыр коронавирус менен ооругандар быйыл кайра ооруну жуктура баштады. Бул тууралуу саламаттык сактоо жана социалдык өнүктүрүү министри Алымкадыр Бейшеналиев маалымат жыйын учурунда билдирди.

"Бардык облустарда ооругандардын саны жогорулап жатат, каза болгондор да көбөйүүдө. Былтыр жайында жуктургандар кайра ооруп жатат. Себеби иммунитет жок болуп баратат. Окумуштуулар антитело сегиз айдан бир жылга чейин жетерин айтышат. Ошондуктан вакцина алуу керек, жамааттык иммунитетти пайда кылышыбыз керек. Президент жана өкмөт башчы менен сүйлөшкөндө экономикалык абалга байланыштуу карантин киргизе албайбыз дешкен. Карыздарыбыз көп, кыйналып калат экенбиз", — деди министр.

Министр элди санитардык жана гигиеналык эрежени сактоого чакырды. Ошондой эле өлкөгө вакциналарды алып келүү боюнча иштер жүрүп жатканын айтты.

Белгилер:
антитело, вакцина, коронавирус, Кыргызстан
Тема:
Кыргызстандагы коронавирус жуктуруп алгандар
Тема боюнча
Барыктабасова: "Ысык-Көл тамыры" элдин саламаттыгын коркунучка кептейт
Министр уу коргошун боюнча: президент экөөбүз кайнатмасын даярдап жатабыз
230 кишиден вирус табылып, төрт адам каза болду. COVID боюнча статистика