БИШКЕК, 20-май — Sputnik. Бүгүн, 20-майда, Россиянын Оренбург шаарынан Бишкекке 164 кыргызстандык учуп келгенин Республикалык штабдан билдиришти.
Ага ылайык, мекендештер “Манас” эл аралык аба майданына Tez Jet авиакомпаниясынын Оренбург — Бишкек чартердик каттамы менен келди.
Бардык жарандардын обсервацияга жайгаштырылары айтылды.
Бүгүн ТИМ азыркы чартердик каттамдын артынан эле жарандарыбызды мекенине кайтаруу үчүн автобустардан колонна дагы уюштуруларын кабарлаган.
Буга чейин биринчи вице-премьер Кубатбек Боронов 17-апрелден тарта, тагыраагы, акыркы бир айдын ичинде жалпы 17 авиарейс менен 3 500 жаран өлкөгө алып келингенин билдирген.
Коронавирус кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Ушу тапта өлкө аймагында абал кандай болуп жатканын Sputnik жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
