Сахнадагы кыз. Архив

Жаш балдар менен бүлөлүү эркектердин "сунушу" чарчатты. Ырчы кыздын каты

1247
(жаңыланган 13:08 23.05.2020)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасына бул ирет жалгыздыктан тажап, жашоосун өзгөрткүсү келген кыздын каты жарыяланды.

Саламатсыздарбы? Башкалардай эле мен дагы бир маселе менен психологго кайрылайын деп жүрдүм эле. Туура көрсөңүздөр психологдон кеңеш алып бериңиздерчи.

Азыр 34 жаштамын. Атайын билим алып аяктап, учурда ырдап жүрөм. 5-курстан ала качып кетишип, кызыл камчы жигитке туш болдум. Белимди бекем бууп, алты ай жашагандан кийин баса бергем.

"Мындан кийин турмушка чыкпайм" деген ой менен жалаң окуу, чыгармачылык менен жүрдүм. Эркектин баарын жаман көрдүм.

Учурда Кудайга шүгүр, баары жакшы. Ажырашып кеткениме өкүнбөйм. Өмүр бою башыман таяк кетмек эмес.

Ага-тууган, ата-энем турмуш куруп алсаң боло дешет. Аларга көкүрөктөгү оюмду жеткире албайм. Менин деле турмуш куруп, үй-бүлө күтүү тилегим бар. Бирок мен ага, ал мага төп келген түгөйүмдү такыр жолуктура албай койдум. Тойлорго барып, аймактарды кыдырып, гастролдорго көп чыгам. Жигиттер ырчы экенимди биле электе жакшы мамиле жасашат. "Бул ушинтип эле тентип жүрсө аял болуп жыргатмак беле?" дешеби, билбейм. Ырдаарымды, тойлордо жүргөнүмдү укканда эле акырындап жоголот же көңүл ачуу ниетин билдирет. Башында мындай мамиле ызалантчу. Азыр "стресске туруктуу" болуп, ар кандай сөздөрдү кулактын сыртынан кетирүүгө өзүмдү тарбияладым.

Колумду сурагандар деле болду. Алардын койгон шарты мага туура келген жок. Ырдаганыма таптакыр каршы экен. Ушуга чейин алган билимимди, эмгегимди талаага таштап эле басып кете албайм. Анткени убагында мага колдоо көрсөткөн бир да адам болгон эмес. Жедеп көкүрөктөгү чыгармачылык шыгымды жерде калтырбоо үчүн белгилүү музыканттардан сабак алып, өзүмдү өстүрүп жатам. "Колуңду сураганда эле кете бербейт белең, ириде кесип эмес, үй-бүлө да" дегендер көп. Аларды угуп "элден башкача ойлонот окшойм" деп да калдым. Бирок мени жактырган адам кесибимди да кабыл алышы керек да.

Акыркы кезде жаш балдар же үй-бүлөлүү кишилер тийишип калат. Баарынын ою жеңил-желпи, көңүл ачуу.

Эмнеге элде ушундай принцип калыптанып калган? Же менталитетпи? Болбосо эркектердин психологиясы ушундайбы? Мүмкүн жашым өтүп кеттиби? Же үй-бүлө курууну таптакыр эле ойдон чыгарып койсомбу? Балким, турмушка чыкпай эле өзүм үчүн төрөп алсамчы? Ушундай ойлор келчү болду. Өзгөчө карантинде үйдө отуруп калганда көп ойлондум.

Апам эч болбосо өзүңө төрөп ал деп калды. Мен ага да каршы болчумун, бирок карантинде ойлонуп, анализдеп чыктым. Турмушка чыкпаганым азырынча мен үчүн анчалык деле трагедиядай сезилбейт, бирок айрымдар "үй-бүлө курбасаң, кийин куурайсың" дей берип, эми алдыда бир тозок күтүп жаткандай эле кабатырлана берчү болдум.

Гүлнара Жасоолова, психолог:

— Негизи карантин маалында адам үчүн баарына ой-жүгүртүп, өзү, турмушу тууралуу анализ жасоого мүмкүнчүлүк түзүлдү. Ар бир адамдын жүрөгүнө жакын кесиби болот. "Чыгармачылыкка бир топ эмгек жумшадым. Турмуш курсам эле ушунун баары калып калат" деп ойлоодон алыс болуу керек. Эгер колуңузду сурагандар ырчылыгыңызга каршы болсо, анда өзүңүз ойлонуп, алдыга туура максаттарды коюп, ошого жараша кадам жасаңыз. "Бардык адамдар эле ырчылыгыма терс карашат" деп кабыл ала берсеңиз, бирөөлөрдүн оюн окуган болуп каласыз. Жок, сиз ага көңүл бурбашыңыз керек. Эгер олуттуу мамилеңиздер үй-бүлө курууга жетсе, анда ачык сүйлөшүп, кесибиңиз тууралуу кенен түшүндүрүп, кесип менен үй-бүлөнү бирге алып кете ала турганыңызды туюндуруңуз. Чыгармачылыгын таштабай, бактылуу турмуш куруп кеткен ырчылар көп. Турмушка чыгып наристелүү болгондо, баланын өзүнүн гармониясы бар экенин сезесиз.

Апаңыз да сизге жамандык каалабайт. Чечим өзүңүздө, бирок толук кандуу үй-бүлө болуу үчүн өзүңүздүн гана шартыңызды айта бербеңиз. Эки адам мамиле түзгөндө ал тараптан гана кадам күтө бербей, жакшы мамиле жасап, сый көрсөтө билген туура болот. Мамиле күзгү болуп чагылышат.

Эркектердин психологиясына суроо салыпсыз. Эркек киши жакшынакай аялзатын көрсө тийишкиси келиши мүмкүн. Бирок муну эркектердин баары ушундай же менталитет деп кабыл алууга болбойт. Эркек менен аялдын психологиясы бирдей эле, болгону ой-жүгүртүүлөрү жана темпераменти ар башка болот.

34 жаш дасыккан эле курак. Чын эле жашыңыз өтүп баратат. Баарын ойлонуп, бир чечимге келиңиз. Адамда өзүмчүлдүк көбөйүп кеткенде эч кимди укпай калат. "Мен эле кыйын турбаймынбы" деп өзүнө өтө ишенип, башка адам менен эсептешпейт. Бул да турмуш курууга тоскоолдук жаратат. Өз оюн тыңдабай, башка бирөөнү уга бергенге да болбойт. Анда инсандын өзүн-өзү баалоосу төмөндөп кетет. Мамиледе баланс сакталып турушу керек. Дагы башка маселелериңиз болсо, жеке психологго кайрылыңыз.

1247
Белгилер:
кесип, мамиле, жигит, карантин, турмуш, ырчы, психолог
Тема:
Психолог менен баарлашуу (147)
Тема боюнча
Аял болгондон кийин эркектин жытын сагынат экенсиң... Жесир келиндин каты
Бир басып келбеген атам эми жанымды койбой жатат. Ызаланган жигиттин каты
Кыргызстан менен Тажикстандын чек арасындагы кыргыз аскер кызматкери

Лейлекте чек арада жүргөн тажик аскерлери боюнча милиция түшүндүрмө берди

406
(жаңыланган 00:11 08.05.2021)
Милициянын айтымында, бул маалыматтар тиешелүү кызматтар тарабынан ыкчам текшерилген. Кырдаал туруктуу. Күч түзүмдөрү күчөтүлгөн тартипте иш алып барууда.

БИШКЕК, 8-май — Sputnik. Лейлек районунун Арка айылына тажик чек ара аскерлери келди деген маалымат боюнча облустук милиция билдирүү таратты.

Бүгүн түштөн кийин социалдык тармактарда “Арка айылына тажик аскерлери кайра келе баштады...” деген видеолор тараган. Анда чек арага жакын жерде автомат асынган эки аскер турганын көрүүгө болот.

Милициянын айтымында, бул маалыматтар тиешелүү кызматтар тарабынан ыкчам текшерилген.

“Бүгүн мамлекеттик чек ара аймагынын Баткен облусунун Лейлек районуна караштуу Арка-1 аймагында тажик тарап чек ара кезметин коюуга аракет кылган. Кыргызстандын чек арачылары тез арада буга чара көрүп, мамлекеттик чек аранын такталбаган аймагында чек ара кезметин алуу талабын койгон. Тажик тарап ошол эле замат бул талапты аткарган”, — деп айтылат билдирүүдө.

Саат 23.15ке карата берилген маалымат боюнча, Лейлек районунун Арка, Достук, Борбордук, Жаштык, Максат, Интернационал, Саада, Кулунду, Эски-Оочу айылдарында коомдук жана ыкчам кырдаал туруктуу. Коомдук коопсуздук ички иштер органдарынын кызматкерлери тарабынан көзөмөлдөнүүдө. Кыргыз-тажик мамлекеттик чек ара аймагындагы кырдаал туруктуу.

Милиция тараткан маалыматта, азыркы учурда кыргыз-тажик мамлекеттик чек ара аймагында ар бир мамлекеттик органдар өз милдеттеринин алкагында коомдук коопсуздукту камсыз кылуу боюнча тийиштүү иш-чараларды жүргүзүп жатканы айтылды.

406
Белгилер:
Дамира Юсупова, кыргыз-тажик чек арасы, Баткен
Тема:
Баткендеги кыргыз-тажик жаңжалы
Тема боюнча
Лейлектеги бир катар жолдорду оңдоо жана куруу иштери башталды
Ташиев: бир дагы метр жерибизди бербейбиз, Ворухка коридор ачылбайт
Рух-Ордо комплекси. Архив

Ташкул Керексизов дүйнө салды

216
(жаңыланган 21:36 07.05.2021)
Керексизов Бишкектеги ооруканада дарыланып жаткан. Маркумдун сөөгү "Ала-Арча" көрүстөнүнө коюлат.

БИШКЕК, 7-май — Sputnik. Коомдук ишмер, айтылуу "Рух-Ордо" комплексинин негиздөөчүсү Ташкул Керексизов 73 жашында каза болду. Кабарды маркумдун жакындары тастыктады.

Керексизов Бишкектеги жугуштуу илдеттер ооруканасында дарыланып жаткан.

Ташкул Керексизов 1948-жылы Ысык-Көлдүн Балыкчы шаарында туулган. 1972-жылы Кыргыз мамлекеттик университетин аяктап, жогорку билимге ээ болгон. Райондук акимчиликтеги кызматкерден тартып президенттин кеңешчисине чейин жеткен. Талас облусунун губернатору, Мамлекеттик мүлк фондунун, Бажы кызматынын башчысы кызматтарын аркалаган.

Маркумдун сөөгү 9-майда Бишкектеги "Ала-Арча" көрүстөнүнө коюлат.

216
Белгилер:
Ташкул Керексизов, илдет, оору, өлүм
Тема боюнча
Футболдук союз чек арада көз жумган футзалчы Султанбектин жакындарына көңүл айтты
Кумтөр алтын кени. Архив

Сот "Кумтөр" компаниясын мамлекетке 262 млрд. сом төлөөгө милдеттендирди

79
(жаңыланган 00:20 08.05.2021)
Жергиликтүү тургундар чет өлкөлүк компания экологияга зыян келтирди деген доомат менен сотко кайрылган.

БИШКЕК, 8-май — Sputnik. Бишкектин Октябрь райондук соту "Кумтөр Голд Компани" компаниясын мамлекетке 261 миллиард 719 миллион 674 сом төлөөгө милдеттендирди. Бул тууралуу Жогорку соттун маалымат кызматы кабарлады.

Сот "Кумтөр Голд Компани" ишканасынын Кумтөр кенин иштетүүдөн чыккан калдыктарды Давыдов жана Лысый мөңгүлөрүнө жыйып келгенин мыйзамсыз деп тапкан. Дээрлик 262 миллиард сомго жеткен негизги суммадан тышкары сот компаниядан 1 миллиард 308 миллион 653 миң 370 сом мамлекеттик алым өндүрүүнү чечкен.

Маалыматта ишкананын үстүнөн сотко Ысык-Көлдүн тургундары арызданганы айтылат. Жергиликтүү жашоочулар "Кумтөр Голд Компани" Кыргызстандын экологиялык мыйзамдарын бузду деп даттанган. Мөңгүлөргө чыгарылган 1 миллиард 200 миллион тонна калдыктан 183 миллион куб муз талкаланганы белгиленди.

Доого жыгылган тарап 30 күндүн ичинде Бишкек шаардык сотуна кайрылса болот.

79
Белгилер:
токтом, чечим, сот, айып, компания, Кумтөр
Тема боюнча
"Кумтөрдү" Акылбек Жапаров жетектеген мамлекеттик комиссия текшермей болду
Үч милдет бар. Президент Жапаров экономика кандай реформаланарын айтты