Акын. Архивдик сүрөт

Элдин сөзүн угуп чыйралдым! Буту баспай ооруп жаткан Малик Аликеевдин абалы

5884
(жаңыланган 09:14 02.06.2020)
Сабырбек Жумабековдун айтымында, сөөктөн кальций жуулуп, сөөк жумшарып кеткен. Ушундан улам кайра жасалуучу операция улам кийинкиге жылдырылууда.

БИШКЕК, 1-июн. — Sputnik. Жакшы болуп кетсем, кайрадан чыгармачылыгымды улантам. Бул тууралуу ушу тапта ооруп, баса албай жаткан белгилүү ырчы, аткаруучу Малик Аликеев Sputnik Кыргызстан агенттигине билдирди.

Барпы Алыкуловдун "Мөлмөлүмү" менен таанылып, эл оозуна алынган өнөрпоз дартка чалдыкканы тууралуу Facebook тармагына жарыяланган видеодон билүүгө болот. Анда Аликеев төшөктө жатып комуз менен сөзү Сооронбай Жусуевге, обону Кожокмат Абдыралиевге таандык  өзү иштеп чыккан “Өмүр жолундагы ой толгоо” чыгармасын аткарган. Видео жарыялангандан кийин коомчулукта талкууланып, соцтармак колдонуучулары ырчынын сакайып кетишин каалашууда.

Sputnik Кыргызстан агенттиги Малик Аликеев менен байланышып, учурда анын Таластын Көпүрө-Базар айылында жашап жаткандыгы белгилүү болду.

“Ооба, азыр ооруп, баса албай төшөктө жатам. Мындан төрт жыл мурда бутума операция жасаткам. Андан кийин атайын жабдуу (ходунок — ред.) менен басып жүрүп жакшы болуп кеткем. Бир жолу кышында тепкичтен жыгылып кетип, операция болгон жерге доо кетип калыптыр. Ошондон кийин баса албай калдым. Эми буюрса жакында кайра операция жасатам. Негизи ушул жылдын март айында жасалмак, бирок кальцийим нормадан аз болуп, улам жылып калууда”, — деди Аликеев.

Ал үч жылдан бери кичи мекенинде жашап, борборго концерт, чыгармачылык кечелерге катышып келип-кетип турган. Бирок бир жарым жылдан бери ден соолугуна  байланыштуу төшөктө жатып калган. 

“Ооруп жаткан киши кээде ар кандай санааларга батып, ойлор келет. Эки-үч күндөн бери көп киши акыбалымды сурап, телефон чалып жатат. Элиңдин эсинде экениңди, алардын каалоо-тилектерин угуп киши чыйралат экен. Элден айланса болот. “Чыгармачылыкка кайтып кел, сахнадан күтөбүз” деп чалгандар болууда. Буюрса, жакшы болуп кетсем, кайрадан чыгармачылыгымды улантам”, — деди ал.

Малик Аликеевге операцияны белгилүү хирург-ортопед Сабырбек Жумабеков жасай турганы айтылууда. Дарыгердин айтымында, ал буга чейин да Аликеевге кашка жилик менен жамбаштын ашташкан жерине (эки жагына тең) операция жасап берген экен.

“Мындан үч-төрт жыл мурун айылдаштары менен өзүм да демөөрчү болуп, бекер операция жасап бергем. Андан кийин жакшынакай бийлеп-ырдап, кадимкидей эле басып  жүргөн. Азыр ооруп калганынын бир себеби — сөөктөн кальций жуулуп, сөөк жумшарып кеткен. Ошол себептен койгон тетиктер шалкылдап бошоп калган. Учурда кальций нормага жетип, сөөктөр катымайынча операция жасоого болбойт”, — деди Жумабеков. 

Малик Аликеев 35 жылдан бери сахнада жүрүп, элинин жүрөгүнөн түнөк тапса дагы буга чейин эч кандай мамлекеттик сыйлыкка көрсөтүлгөн эмес. Болгону Роза Отунбаеванын колунан президенттин Ардак грамотасын алган.

Маданият, маалымат  жана туризм министри Азамат Жаманкуловго суроо салганыбызда, быйыл Эгемендүүлүк күнүнө карата аталган министрликтин алдындагы түзүлгөн атайын комиссия Малик Аликеевди “Кыргыз Республикасынын Эмгек сиңирген артисти” наамына сунуштай турганын билдирди.

Ал Малик Аликеев уникалдуу таланттардын бири экенин белгилеп, жагымдуу үнү, мыкты аткаруучулук чеберчилиги менен кыргыз элинин жүрөгүнөн түнөк тапканына токтолду. 

“31-август — Эгемендүүлүк күнүнө карата Малик Аликеевди сыйлоо боюнча сунушубузду президентке киргизебиз. Сыйлык тапшырууда эки этап бар. Алгач министрликтин алдындагы түзүлгөн комиссия карайт, экинчисинде президенттин алдындагы комиссиянын кароосунан өтөт. Биз Малик Аликеевди “КРдин Эмгек сиңирген артисти” наамына көрсөткөн сунушту өлкө башчынын алдындагы комиссияга жиберебиз”, — деди Жаманкулов.

Малик Аликеев он алты жашынан бери сахнаны байырлап келе жатат.

5884
Белгилер:
Азамат Жаманкулов, бут, оору, ырчы, операция, Сабырбек Жумабеков
Тема боюнча
Буулуккан булбул жайын тапты... Эл уулу Элмирбек менен коштошуудагы ирмемдер
Өспүрүм бала. Архив

Акыйкатчы институту: Чүйдөгү балдар үйүндө өспүрүм белгисиз жагдайда каза болду

14
Маалыматка караганда, Военно-Антоновкадагы балдар үйүнүн тарбиялануучусу, 6-класстын окуучусу Игорь Якуниндин өлүмү боюнча факт Сокулук райондук милициясы тарабынан 1-июнда катталган.

БИШКЕК, 13-июн. — Sputnik. Военно-Антоновкадагы балдар үйүндө 13 жашар өспүрүм көз жумуп, мындан улам өлкө акыйкатчысы аталган мекеменин жетекчисинин кызматтан четтетилишин талап кылып жатат. Бул тууралуу окуяны өз көзөмөлүнө алган Акыйкатчы институтунан билдиришти.

Маалыматка караганда, Военно-Антоновкадагы балдар үйүнүн тарбиялануучусу, 6-класстын окуучусу Игорь Якуниндин өлүмү боюнча факт Сокулук райондук милициясы тарабынан 1-июнда катталган. 2-июнда Кылмыш жана жоруктардын бирдиктүү реестрине каттоого алынган.

"Баланы багып алууга ниеттенип жүргөн АКШлык үй-бүлө жактоочу жалдаган. Анын маалыматы боюнча, тергөө амалдарын жүргүзүүдө бир катар мыйзам бузуулар болгон. КР Акыйкатчы институту ИИМге ишти министрликтин Башкы тергөө башкармалыгына өткөрүп берүү тууралуу, ошондой эле Билим берүү жана илим министрлигине балдар үйүнүн директорун тергөө учурунда кызматынын четтетүү тууралуу кат жолдоду", — деп айтылат билдирүүдө.

Акыйкатчы институтунан билдиришкендей, каза болгон өспүрүм буга чейин өзүн асырап алуучулар менен төрт жолу жолуккан.

"Якуниндин трагедияга чейин ден соолугу чың болгону тууралуу медициналык маалым каттар бар. Дагы бир маанилүү нерсе, 2020-жылы февралда КР Акыйкатчы аппаратынын балдарды коргоо бөлүмү балдар мекемелерине, анын ичинде Военно-Антоновкадагы балдар үйүнө да мониторинг жүргүзгөн эле. Жыйынтыгында бир катар сунуштамалар берилген. Бирок алар өз убагында аткарылган эмес. Бул фактылар боюнча да күнөөлүү адамдарды жоопкерчиликке тартуу боюнча иштер жүргүзүлүүдө", — деп айтылат билдирүүдө.

Мекемеден кошумчалашкандай, бул фактыны иликтөө боюнча өкмөттүк комиссия түздүрүү боюнча аракеттер көрүлүп жатат.

Ал эми өлкө президентинин маалымат кызматынан билдиришкендей, аталган окуя боюнча ведомстволор аралык комиссия түзүлүп, маселени Кыргызстандын Балдар укугу боюнча ыйгарым укуктуу өкүлү Жыпариса Рысбекова өз көзөмөлүнө алды. Учурда окуянын чоо-жайы такталып жатат.

14
Белгилер:
иликтөө, Акыйкатчы институту, өлүм, өспүрүм, балдар үйү
Тема боюнча
Айзаданы ала качууга шектүүлөрдүн бири окуянын чоо-жайын айтып берди
New Shepard кемесинде Blue Origin жана Amazon ишканаларынын негиздөөчүсү Жефф Безос. Архив

11 мүнөт үчүн 28 миллион доллар. Безос менен космоско учуучу орун сатылды