БИШКЕК, 11-июн. — Sputnik. Өлкө аймагында дагы бир нече мобилдүү вирусологиялык лаборатория ачыларын брифинг учурунда саламаттык сактоо министринин орун басары Нурболот Үсөнбаев билдирди.
Буга туристтик сезондун жана жүк ташуу үчүн айрым чек ара көзөмөл-өткөрүү пунктуларынын ачылышы себеп болууда.
Алар:
- "Чалдовар" өткөрмө пунктунун ишке киришине байланыштуу Чүй облусунун Панфилов районунда мобилдик лаборатория ачылат. Бул үчүн Нарын облусундагы лаборатория алып келинди;
- Нарын шаарында Ветеринардык жана фитосанитардык коопсуздук мамлекеттик инспекциясынын лабораториясынын базасында коронавирусту аныктоочу лаборатория иштей баштайт;
- Аталган инспекциянын Ысык-Көлдүн Каракол жана Балыкчы шаарларындагы лабораториясынын базасында дагы вирусологиялык лабораториялар ачылат.
Буга чейин туристтик сезондун башталышына байланыштуу Чолпон-Ата шаарында дагы лаборатория иштээри айтылган.
