Колун кармап турган келин. Архив

Жашоону эмнеден баштоону билбей турам. Күйөөсү башкага кетип калган келиндин каты

2931
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасына бул ирет күйөөсү башка аялга кетип калган келиндин каты жарыяланды.

Жолдошум менен бирге түтүн булатып келе жатканыбызга 12 жыл болду. 20 жашка толо электе ага турмушка чыккам. Менден беш жаш улуу. Азыр 30дан аштым. Бул мезгил ичинде баштан көп эле нерсе өттү. Бирок жолдошум мени ар дайым канатына калкалап, жакшы көрөрүн айтып бакты.

Тилекке каршы, экөөбүз балалуу боло алган жокпуз. Бирок "төрөбөйсүң" деп мени бир да жолу ызалантып, ыйлаткан эмес. Ар дайым "буюрса балалуу болобуз" деп колдоп турчу. Анын сүйүүсүнө магдырап жүрүп окуган да жокмун, өз алдымча иштеп да кеткен жокмун. Айтор, таап, алып келгенине, өзүнүн бар экенине сүйүнүп жүрө бердим. Жолдошумду аябай жакшы көрчүмүн, азыр да жакшы көрөм. Балалуу болобуз деп барбаган дарыгер, көрүнбөгөн көз ачык калган жок. Бирок жыйынтык чыкпады. Акыры бала багып алууну чечтик. Бирок ал дагы оңой чечилчү маселе эмес экен. Ошентип жүрүп 10 жыл көз ачып-жумганча өтүп кетти. Үйдө отуруп зериккенде тырмак жасап, каш тергендин курсун окудум. Бирок көңүлүм чаппай аны таштап салдым. Кийин жолдошум менен дүкөн иштете баштадык. Ал буга чейин эле чакан ишкерлик менен алектенчү. Экөөбүз чогулуп кездеме саткан дүкөн ачып, ага жардамдашып жүрдүм. Ошентип жүргөн учурда туугандарыбыздын биринин кызынын боюна бүтүп калганын уктум. Бирок ал баланы каалабаптыр. Күйөөм экөөбүз ата-энеси, өзү менен сүйлөшүп багып алмай болдук. Бардыгын макулдашып, баланы төрөөрү менен өзүбүзгө жаздырып багып алдык. Азыр ал уулубуз бирге чыгайын деп калды. Жашообуз ушундай жакшы нукта уланып келе жатып эле үйдөн кут качты. Тагыраагы, күйөөм башка аял менен мамиле кура баштаганын билип калдым. Ал биз иштеген соода жайдагы келин экенин да билдим. Кийин тааныштарыман угуп, жолдошумдун аны менен кат жазышып жүргөнүн телефонунан окуп калдым. Асманым жерге кулап, бутум баспай калды. Ушунчалык ишенип, сүйгөн күйөөмдөн негедир мындай жорукту күтпөптүрмүн. Бир ай өзүмө келе албай, ал тургай баламды жерип жүрдүм.

Бала менен үйдө отуруп калганда эмнегедир күйөөмөн көп нерсени талап кылып, аны менен көп уруша баштагам. Балким, буга ошол нерсе да себеп болду го деп өзүмдү күнөөлөдүм. Өзүмдү таптакыр таштап салдым. Кечирим сурайбы десем күнөөсүн мойнуна алып да койгон жок. Таптакыр башкача болуп өзгөрүп кетти. Акыры уулумду алып апамдардын үйүнө басып кеттим. Төркүнүмдө жашап жатканыма беш ай болду. Эмне кылышты билбей, өзүмө келе албай жатам. Мен ага байланып, ансыз эч нерсе кылбай көнүп алыптырмын. Иштейин десем балам бар. Ата-энемдин мойнунда да отургум келген жок. Мен кеткенде жолдошум артыман кечирим сурап келген жок. Болгону "балам экөөңөргө жардам берип турам, баары менен камсыз кылам" деп айтты. "Ыраазымын, эч нерсенин кереги жок" деп намысымдан айттым. Мени ызалантканы ал менден кечирим сураган жок, мага болгон сезимдери өчкөнүн көзүнөн сездим. Жашоом токтоп калгандай, өзүмдү ушунчалык жалгыз сезип жатам. Жаңы жашоону эмнеден башташты да билбей калдым. Эч качан "күйөөм жок болуп калса, жалгыз кантип жашап, кантип жан багам" деп ойлобоптурмун. Эң биринчи өзүмдү тапканга психологдон кеңеш сурайт элем. Күйөөм менен тиги келиндин чогуу жашап, бирге жүргөнүн элестеткенде жашагым келбей кетип жатат. Ызадан, кызганычтан муунуп, өзүмдү өзүм жеп, үйдө отуруп жинди болгону калдым. Кеңешке абдан муктажмын...

Жизель Малиева, психолог:

--Түгөйлөр үй-бүлө курардан мурда же үй-бүлө кургандан кийин деле акча жаатында, социалдык жактан да, инсандык, моралдык жактан да тең өсүшү керек. Башкача айтканда, тең болгону жакшы. Анткени бирөө экинчисинен кайсы бир жагынан өсүп-өнүгүп кетсе, жоопкерчиликтин баары ошонун мойнуна артылат. Кат жазган келиндин үй-бүлөсүндө дагы жоопкерчилик бир эле кишинин мойнуна жүктөлүп калгандай.

Аял киши күйөөсүнө ачыла элек китептей кызыктуу болушу керек. Кандай болгон күндө да бир нерсеге кызыгып, хоббиси болуп, аны менен алектениши шарт.  Үй, бала, тиричилик деп жүргөн аялдар айрым учурда эркекке кызыксыз болуп калат. Анткени көпчүлүгү өзүн карабай таштап коёт. "Сен ушундай эле сулуусуң" деген менен баары бир эркекке өзүн караган аял жагат.

Аял киши күйөөсүнө таянып жүрө бербей өзү да бир нерсеге кызыгып, аракет кылганда жыйынтык башкача болот. Биринчи кезекте өзүнүн артыкчылыктарын көрө билип,  аны колдонгон жакшы. Ар бир адамдын артыкчылыгы болот. Аны айрымдары билбейт.

Кат жазган келин жолдошун атасындай көрүп алган. Анын канатына калкаланып, дайыма андан бир нерсе күтүп, үмүт этет. Мисал катары алсак, "сууну мага күйөөм куят, баары күйөөмө байланыштуу" деп жоопкерчиликтин баарын ага оодарып салган. Мындай болбойт. Аял сууну өзүнө-өзү куйганды, өзүн өзү өстүргөндү үйрөнгөнү жакшы. "Үйдө отурбай эркек менен кошо жарышып иштесин" деп үндөбөйм, бирок өзүнүн эмнеге кызыгарын түшүнүп, жок дегенде ошо менен алек болгону дурус.

Кат жазган келин алгач күйөөсү менен мамилени ачык отуруп чечишип алсын деп кеңеш берет элем. Аны күтүп, үмүттөнүп же болбосо ар кайсыны ойлоп жата бербей ачык сүйлөшүүсү керек. Эгер экөөнүн мамилесине чекит коюла турган болсо, экөө тең акыркы чечимин кабыл алса, анда бул келин белин бекем бууп, жаңы жашоону коркпой баштаганы оң.

Элге аралашсын, көпчүлүккө чыгып, курбулары болсо аларга арыз-муңун айтып, ичиндеги букту чыгарып алсын. Аял коомго аралашып, эл менен иштеше баштаганда көп нерсеге көзү жетип, жашоого болгон көз карашы да өзгөрөт. Аял киши бирөөнөн эле сүйүү, мээрим күтө бербей өзү да аны башкаларга бергенди үйрөнүшү керек. Качан гана өзүн жакшы көрүп, өзүнүн артыкчылыктарын көрө билип, аны колдоно баштаганда бактылуу болот.

Келинге кеңешим сөзсүз психологго кайрылыңыз, бетме бет отуруп ичтеги сезим, ойду айтып аны менен бөлүшүңүз. Эркектин башка менен жүрүп кетишин кабыл алуу, кечирүү абдан оор. Ага абдан көнүп алсаңыз эки эсе оор болуп жатышы ыктымал. Ошондуктан тез арада адиске барып, кеп-кеңеш алса, ашыкча болбойт.

2931
Белгилер:
мамиле, эркек, келин, кеңеш, үй-бүлө, психолог
Тема:
Психолог менен баарлашуу (123)
Тема боюнча
Өзүмдөн улуу келин менен жашаарымды ата-энем билбейт. Жигиттин каты
Жеңем апамды киши ордуна көрбөйт. Чырдан тажаган кыздын каты
Саргарган дарактар. Архив

Бейшембиге карата аба ырайы

53
Бейшембиге караган түнү жаан-чачын күтүлбөйт. Батыштан соккон шамалдын ылдамдыгы секундасына 4-9 метрден айрым райондордо 15-20 метрге жетет.

БИШКЕК, 21-окт. — Sputnik. Бейшемби күнү, 22-октябрда, күндүз Чүй, Талас, Жалал-Абад облустарынын кээ бир райондорунда жаан, тоо этектеринде жамгыр, тоолуу жерлеринде кар жаайт. Өрөөндөрдө жаан-чачын күтүлбөйт. Бул тууралуу Кыргызгидромет билдирди.

Абанын температурасы Чүй менен Таласта +12...+17, Ош, Жалал-Абад облустарында +18...+23, Баткенде +17...+22, ал эми Ысык-Көл, Нарын жергесинде +11...+16 градус болот.

Бишкекте күндүн экинчи жарымында бир аз жаан жааса, ал эми Ошто күн ачык болот. Абанын температурасы борборубузда +15...+17, Ошто +21...+23 градуска көтөрүлөт.

53
Белгилер:
Кыргызстан, аба ырайы
Тема боюнча
Шашылыш билдирүү! Жакынкы күндөрү аба ырайы кескин өзгөрөт
Премьер-министр Садыр Жапаров. Архивдик сүрөт

Садыр Жапаров: абакта жатканда коронавирус менен ооруп айыктым

314
(жаңыланган 23:47 21.10.2020)
Өкмөт башчы өлкөдөгү эпидемиологиялык абал боюнча күн сайын кабар алып турарын, ооруканалар дары-дармек, медициналык каражаттар менен камсыз болорун билдирди.

БИШКЕК, 21-окт. — Sputnik. Абакта жатканда коронавирус менен оорудум. Бул тууралуу президенттин милдетин аткаруучу жана премьер-министр Садыр Жапаров BBC радиосуна маек берип жатып билдирди.

Жапаров дартты дары чөптүн жардамы менен жеңгенин белгилеген. Анын айтымында, дары чөп бир гана коронавируска эмес башка ооруларга дагы, мисалы, ашказандын рагына дагы миңдин бири. Аны кыргыздар илгертеден колдонуп келген.

"Ачык айтканда, Кара-Балтанын Финполициясынын кызматкерлеринин көбү коронавирустан атайын дары чөптүн жардамы менен айыгышты. Андан үй-бүлөсү менен сакайгандар болду. Ал дарыны Саламаттык сактоо министрлиги менен бирге сыноодон өткөрүп көрүш керек", — деди Жапаров.

Коронавирус: Бишкектеги ооруканаларда 400дөн ашуун бош орун бар

Мындан сырткары, ал өлкөдөгү эпидемиологиялык абал боюнча күн сайын кабар алып турарын, ооруканалар дары-дармек, медициналык каражаттар менен камсыз болорун кошумчалады.

314
Белгилер:
дары, абак, коронавирус, Садыр Жапаров
Тема:
Кыргызстандагы коронавирус жуктуруп алгандар
Тема боюнча
Министрлик: коронавирустан сакайган 7 кишиден кайра оорунун белгиси байкалды
Абсолюттук мушкерлер чемпионаты (UFC) россиялык чемпион Хабиб Нурмагомедов менен америкалык Жастин Гэтжинин көз караштар таймашы

Гэтжи менен Нурмагомедов көз караштар таймашын өткөрдү. Видео

0
(жаңыланган 23:08 21.10.2020)
Нурмагомедов менен Гэтжинин чемпиондук наам үчүн кармашы саналуу күндөрдөн кийин Абу-Дабидеги "Мушкерлер аралы" аренасында болот.

БИШКЕК, 21-окт. — Sputnik. Абсолюттук мушкерлер чемпионаты (UFC) россиялык чемпион Хабиб Нурмагомедов менен америкалык Жастин Гэтжинин көз караштар таймашынын видеосун жарыялады.

Бүгүн, 21-октябрда, мушкерлер маалымат жыйын өткөрүп, андан кийин салтка айлангандай бетме-бет жолугушту. Атлеттер бири-бирине сес көрсөтпөй, сый менен тике карашкан.

Посмотреть эту публикацию в Instagram

Публикация от ufc (@ufc)

Промоутерлик компания жүктөгөн экинчи видеодон Гэтжи утурумдук чемпион болгондогу бел курун тагынбай койгонун көрүүгө болот. Аны башында көтөрө келген. Ал эми чыныгы чемпион атыккан Нурмагомедов курун кармап кадрга түшкөн.

Посмотреть эту публикацию в Instagram

Публикация от ufc (@ufc)

Нурмагомедов менен Гэтжинин чемпиондук наам үчүн кармашы 24-октябрда UFC 254 турниринин алкагында Абу-Дабидеги "Мушкерлер аралы" аренасында болмокчу. Россиялык мушкер бел курун сактап калганга жан үрөйт.

0
Белгилер:
таймаш, видео, Жастин Гэтжи, Хабиб Нурмагомедов, UFC
Тема боюнча
Уайт: Нурмагомедов — Гэтжи беттеши UFC тарыхындагы эң ири таймаш болот