Бишкек шаарындагы Ленин райондук сотунун судьясы Таалайгүл Кадыркулова

Өспүрүмдү соттогондо энелик сезим селт эттирет. Судья Кадыркулованын маеги

1003
Ювеналдык юстиция деген эмне экенин билесизби? Бул балдардын укугун коргоодогу маанилүү инструменттердин бири. Башкача айканда, жашы жете электе кылмышка шектелип, сот таразасына түшүп калган балдардын укугун коргоо.

Статистикага таянсак, Кыргызстанда жылына 200дөй бала соттолот. Мисалы, 2017-жылы — 215, 2018-жылы — 161, ал эми былтыр — 189 өспүрүм эркинен ажыратылган.

Өлкөдө эрезеге жете элек балдардын кылмыштары, аларга карата соттордун чечими жана баланын кылмышка барышына ата-эненин таасири тууралуу Бишкек шаарындагы Ленин райондук сотунун судьясы Таалайгүл Кадыркулова менен маектештик.

Судья Ленинского районного суда в городе Бишкек Таалайгул Кадыркулова
© Фото / Пресс-служба Верховного суда КР
Бишкек шаарындагы Ленин райондук сотунун судьясы Таалайгүл Кадыркулова

— Таалайгүл айым, соттолуп жаткан баланын укугун кантип коргойсуздар? Кыргызстанда бул үчүн атайын даярдыктагы юристтер барбы?

— 2012-жылга чейин Кыргызстанда сот чоң кишилер үчүн кандай болсо, балдар үчүн деле дал ошондой иш алып барчу. Ошол жылы "Кыргыз Республикасынын балдар жөнүндө" кодексине ювеналдык юстиция деген бөлүм киргизилген. Жөнөкөй сөз менен айтканда, мында негизги максат — баланы соттоп жиберүү эмес, аны кылмыш кыла электеги абалына кайтарып келип, кайрадан коомго аралаштыруу. Кылмыш кылуу себептерин таап чыгып, баланын жашоосун оңдоо.

Биздин ЖОЖдор балдар менен иштеген судья, прокурор же адвокаттарды даярдашпайт. 2014-2018-жылдары мамлекеттик программа бар эле, бирок баары келип эле каражат маселесине такалат. Азыр мамлекет тарабынан балдардын кызыкчылыгын коргоо максатында мурдагы программанын аткарылбай калган талаптарын эске алуу менен жаңы программа иштелип чыгууда. Негизи кылмыш ишти адистешкен тергөөчүлөр алып барышы керек, бирок кадрлардын бат-баттан алмашкандыгына байланыштуу бул талап аткарылбай жатат. Ал эми жактоочулар мамлекет тарабынан кепилденген юридикалык жардамды акысыз берет. Ошондой эле Юстиция министрлиги тарабынан даярдалган адистештирилген жактоочулар жазык иштерине катыша алат.

— Тергөө жана сот учурунда балдар менен юристтерден башка адистер дагы иштешет да?

— Өспүрүм кылмыш кылып же ага шектелген учурда бир топ кызматтар ишке тартылат. Анткени биз баланын кылмыш кылуу мотивациясын, психологиялык, руханий абалын, ден соолугун, мектептеги жүрүм-турумун, үй-бүлөдөгү кырдаалды билишибиз керек. Бул үчүн жергиликтүү социалдык мекемелер, психологдор, педагогдор, Пробациялык көзөмөл кызматы ишти анализдеп чыгат.

Судья Ленинского районного суда в городе Бишкек Таалайгул Кадыркулова
© Фото / Пресс-служба Верховного суда КР
Кадыркулова: психикасы бузулган, жан дүйнөсү бош, мээримге зар болгон балдар кылмышка көп барат

— Бир нече жыл мурда кылмыш жазасына тартылган улан-кыздар чоңдор менен чогуу бир жерде жатышат деген маселе козголду эле. Азыр абал кандай?

— Андай көйгөй болгон, азыр 18 жашка чейинкилер балдар колониясында жаза өтөшөт. Бул чоң кылмышкерлер жаш, өз көз карашы толук калыптана элек балдарга таасир этпесин деген максатта көрүлгөн аракет. Негизи эле азыр мыйзам менен чатагы бар балдарга башкача мамиле жасала баштады. Мисалы, сотко алып келгенде жабалактаган элден, башка соттолуучулардан чочубасын деп балдар бөлмөсүн ачканбыз. Шектүү сот процесси башталганга чейин ошол жакта отуруп турат. Андан тышкары, сүрдөп өзүн жоготуп койбосун деп мантияны чечип коюп, карапайым кишидей алдына отуруп аңгемелешкенге аракет кылабыз. Мындайда балада ишеним пайда болуп, толугу менен ачылып, иштин чоо-жайын, өзүнүн сезимдерин жашырбай айтып берет.

Судья Ленинского районного суда в городе Бишкек Таалайгул Кадыркулова
© Фото / Пресс-служба Верховного суда КР
Судья балдарды чочутпаш үчүн кээде мантиясын чечип коерун айтат

— Бизде балдар көбүнчө кандай кылмыштарга барат?

— Кээде ушунчалык арзыбаган нерсе үчүн жаш өмүрлөрдүн талкаланып жатканына жаның кейийт. Ишенесиңерби, эң көп кылмыштар бизде кадимки уюлдук телефонго байланыштуу. Күчтүүрөөгү алсызынын смартфонун тартып же уурдап алат. Балким көтөрүп турайын деп сурап алып, кийин бергиси келбей жүрө берет. Бала да баары бир, кесепетин ойлонбойт. Ал эми жабырлануучу тарап арыз жазып коет. Мунун баарында баланын күнөөсү жок чынында. Баарына биз, чоңдор, ата-эне жана мамлекет жооптуубуз.

Кылмышка кандай балдар барат? Психикасы бузулган, жан дүйнөсү бош, мээримге зар болгон балдар барат. Учурда ата-энеси бар туруп жетимдей бозоруп чоңойгондор көп. Мисалы, ата-энеси башка жакка иштегени кеткен же бир үйдө жашап туруп деле көр оокатка малынып, баласынын "үнүн укпагандар". Ата-энени сагынуу, кусалык, анын мээримине зар болуу — бул бала үчүн кадимкидей илдет. Мындайда психика бузулуп, жаман чөйрөгө аралашып кетүү оңой эле. Же болбосо бактылуу, каалаган нерсесинин баары бар теңтушуна көрө албастык пайда болот, ичи күйөт. Ошого наалат иш кылгысы келип, бир күнү сабап же бир нерсесин тартып алышы мүмкүн. Кылмыштар ушинтип эле жасалат. Андыктан мен ата-энелерге балалуу болуудан мурда аны татыктуу тарбиялай аламбы, билим берип, мээрим төгөмбү, ушуга убактым жетеби деген суроолорго жооп бергиле деп суранат элем. Катуу айтсам кечирим сурайм, бирок курсагын тойгузуп, кийимин алып берип коюу жетишсиз. Антип малды деле бакса болот. Ал эми баладан татыктуу инсан чоңоюш үчүн аны тарбиялап, жүрөгүнө сүйүү толтуруш керек.

— Ажырашып кеткен үй-бүлөлөрдө дагы балдар кылмышка барган учурлар болсо керек?

— Сотко ажырашууга келгенде балалуу үй-бүлөлөргө силер ортодогу баланын тагдырына жоопкер экениңерди унутпагыла деп көп айтам. Албетте, турмушта ар кандай нерсе болот, бирок ажырашпаганга аракет кылгыла деп кеңеш берем. Анткени ата-эне ажырашуусу менен дароо баласынын турмушун абдан чоң жана орду толгус жоготууга учуратат. Канчалык аракет болбосун жалгыз бой ата же эне менен гана чоңойгон баланын жан дүйнөсүндө боштук, өксүк боло берет. Муну мага 10 жылдык иш тажрыйбам көрсөттү.

Судья Ленинского районного суда в городе Бишкек Таалайгул Кадыркулова
© Фото / Пресс-служба Верховного суда КР
Кадыркулова: өкүм чыгарарга аз калганда ушул чечим менен бирөөнүн жашоосун талкалап албасам экен деп санаа тартам

— Жаш бала кылмыш кылган учурда жабырлануучу тарап чоң кишиникиндей эле аеосуз жазаларды өтүнөбү же аяшабы?

— Ар кандай учурлар болот. 10 жылдан бери ушул тармакта келе жатып психолог болуп калат экенсиң. Келечекте жакшы адам чыкчу баланы көзүнөн эле көрөсүң. Кылмышы анча оор эмес учурда жабырлануучу тарапка баланы оңдоп, киши кылуу милдетибиз деп түшүндүрүүгө аракет кылам.

— Негизи эрезеге жете электерге эң чоң жаза канча жыл?

— 10 жылга чейин эркинен ажыратуу, бул чоңдордукуна караганда, албетте, азыраак. Мисалы, уурулук боюнча чоң киши эркинен ажыратыла турган болсо, ага 2,5-5 жыл берилет. Ал эми балага 1,6-2,6 жыл.

— Канча жаштан баштап кылмыш жоопкерчилигине тартылат?

— 14 жаштан баштап.

— Кесилип кеткен балдар жаза аткаруу жайларында эмне менен алек болушат?

— Окушат. Аларды кайрадан тарбиялап чыгуу аракеттери көрүлөт.

Судья Ленинского районного суда в городе Бишкек Таалайгул Кадыркулова
© Фото / Пресс-служба Верховного суда КР
Жашы жете электер үчүн атайын бөлмөдө

— Кимдир бирөөнүн үстүнөн өкүм чыгарарда судья эмес, адамдык сезимдер ойгонуп кеткен учурлар болобу?

— Тирүү адам болгондон кийин сезимсиз жашай албайбыз да. Бооруң ооруп, атүгүл кээде энелик сезим ойгонот. Көпчүлүк сот десе жүрөгү муздак, эмоциясыз адамды элестетет. Жеке өзүм тууралуу айтсам, өкүм чыгарарга аз калганда кадимкидей санаа тартып, ушул чечим менен бирөөнүн жашоосун талкалап албасам экен деп күнү-түнү ойлонгон учурлар болот. Бирок судья бардыгын мыйзам чегинде чечип берүүгө милдеттүү.

— Буга чейин ырайымдуулук, балага жаңы жашоого мүмкүнчүлүк берүү жолдорун издээриңерди айтып жаттыңыз. Шектүү кесилип кетпей, ата-энесине өткөрүп берилгенде абдан кубансаңыз керек?

— Ооба, бирок ишенесизби, айрым ата-энелер сот залынан баласын алып кетүүгө анча кубанбаган учурлар болот. "Бизди тажатты, үйгө түнөбөй калды. Андан көрө колонияга барып, тарбия көрүп келсе болмок" деп нааразы болушат. Сөзүмдүн аягында мен бардык ата-энелерден жаш муун келечегибиз экенин унутпай, тарбия иштерине жоопкерчиликтүү мамиле кылуусун өтүнөм.

1003
Белгилер:
маек, өспүрүм, судья, сот, Кыргызстан
Тема боюнча
Романов: аткаруучу пробация шарттуу түрдө эркинен ажыратуунун бир түрү
Мамытов: учурда түрмөдө күнөөсүз адамдар отурган фактылар бар
Успешный садовод Аскар Сулайманов из Иссык-Куля

Тогуз гектардан 180 тоннага чейин карагат алабыз. Түптүк дыйкан менен маек

43
(жаңыланган 19:23 15.08.2020)
Ысык-Көл облусунун 58 жаштагы тургуну Аскар Сулайманов быйыл 10 гектарга жакын жерге карагат тигип, көпчүлүккө үлгү болууда. Анткени облус аймагында аталган мөмө багын чоң аянтка тиккендер жокко эсе.

Чет өлкөлөрдөн билип, алардын тажрыйбасын айылда колдонгон дыйкан, ишин сүйгөн элеттик менен Sputnik Кыргызстан агенттигинин кабарчысы маек курду.

— Тогуз гектар жерге карагат тигүү үчүн канча каражат жумшадыңыз?

— Карагат өстүрүү үчүн балдарымдын беш жылкысын, үч уюн саттым. Акчанын басымдуу бөлүгү көчөт алганга жана тегерегин тор менен тосуп чыгууга кетти. Анан өзүбүз колдонгонго жаңы экскаватор алып койдук. Ортосундагы жыгач казыктарды айылдаштардан ар бирин 20 сомдон сатып алдык. Алар кубануу менен эле даярдап беришти. Кудайга шүгүр, бир нече жылдан кийин карагаттарыбыз да, айланасындагы дарактар да жашылданып калат. Жерди болсо айылдаштардан узак мөөнөткө ижарага алдым. Өзүм суу курулушу боюнча инженермин, бул аянтты толугу менен тамчылатып сугарууга өткөрөбүз. Башына суу соргуч коюп, сууну үнөмдөп сугарабыз. Ошол эле маалда түтүктөр аркылуу жер семирткичтерди да кетиребиз. Азыр керектүү жабдыктарды алып даярдап койдук. Жерди башында алганда таш аябай көп болчу, тогуз гектардын баарын тазалап чыктык.

85 гектар жерди эки киши сугарып жетишет. Тоңдогу жаңычыл багбан менен маек

— Карагат өстүрүүгө ыктап кетүүңүзгө эмне себеп болду?

— 2000-жылдары эл капысынан айыл өкмөт башчысы кылып шайлап, ал кызматты алты ай аркалагам. Кийин Швейцариянын, Япониянын уюмдары менен иштеп, дыйкан, малчылар менен биргеликте бир катар долбоорлорду ишке ашыргам. 2006-жылы Япониядан айыл чарба продукцияларынын маркетинги боюнча билим алып, окуумда жер-жемиштерге басым жасалган. Карагат Ак-Суу, Түп жана Жети-Өгүз менен Ысык-Көл райондорунун айрым жерлеринде сонун өсөт. Ошондуктан аталган райондогу дыйкандар бул өсүмдүккө ыкташы керек. Япондор кантип башкалардан арзан жана сапаттуу продукцияны чыгарам деп катуу ойлонушат. Алар менен сүйлөшүп калсам, буудай өстүрүү боюнча Казакстан менен жарышсаңар алардын тебелендисине каласыңар, картошка боюнча Беларусь менен Россиядан ашып өтө албайсыңар деп айткан эле. Ошондуктан Ысык-Көл облусундагылар сапаттуу үрөн чыгаруу, мөмөлүү бак, жер-жемиш өстүрүү менен алектенгиле деп кеп-кеңешин беришкен. Менимче, ошолор түрткү болду. 

Успешный садовод Аскар Сулайманов из Иссык-Куля
© Sputnik / Мирбек Сакенов
Аскар Сулайманов: карагат өстүрүү үчүн балдарымдын беш жылкысын, үч уюн саттым. Акчанын басымдуу бөлүгү көчөт алганга жана тегерегин тор менен тосуп чыгууга кетти

— Келечекте түшүмдү сатуу жагы кандай болуп калат?

— Түшүм жыйнаган маалда сатып алуучу издеп убара болбойсуң, карагат ушундай өсүмдүк. Япондор өздөрү экологиялык таза карагат өстүрө алсаңар, биз бардыгын сатып алууга даярбыз деп айткан. Европа жана Азиянын өнүккөн өлкөлөрүндө карагатка азыраак шекер кошуп джем, балдардын тамагын жасашат. Ага дүйнө жүзүндө суроо-талап күч. Кыргызстандын бардык аймагына карагат тигип салса дагы жалгыз Кореяны толук камсыздай албайбыз. Азыр элдин баары С витамини адамга зарыл экендигин түшүндү. Андыктан чийки зат сатуу жагынан көйгөй болбойт. Түп районундагы Чоң-Таш айылынын жайгашкан жери дагы Алматы шаарынан 300 чакырым эле алыстыкта. Казакстанга өзүбүздүн карагатты ортомчусуз алып бара алабыз.

Талаада ыйлаган күндөр болду. Чөлдү кирешелүү бакка айланткан Маджиковдун маеги

— Эсебиңиз боюнча үч жылдан соң канча түшүм алып каласыз?

— Төрт жылдан кийин ар бир гектар жерден 10 тоннадан 20 тоннага чейин түшүм алышыбыз керек. Кудай буюрса тогуз гектардан жыл сайын 180 тоннанын айланасында алып калабыз. 

Успешный садовод Аскар Сулайманов из Иссык-Куля
© Sputnik / Мирбек Сакенов
Аскар Сулайманов: япондор буудай өстүрүү боюнча Казакстан менен жарышсаңар алардын тебелендисине каласыңар, картошка боюнча Беларусь менен Россиядан ашып өтө албайсыңар. Ошондуктан Ысык-Көл облусундагылар сапаттуу үрөн чыгаруу, мөмөлүү бак, жер-жемиш өстүрүү менен алектенгиле деп кеп-кеңешин беришкен

— Көчөт өстүрүп, аны өлкөнүн бардык аймактарына да сатат экенсиз. Муну дыйкандар эриш-аркак алып кетиши керекпи?

— Негизи бир иштин эле майын чыгара жасаш керек. Бирок кошумча каражат табуу максатында көчөт өстүрүү зарыл болууда. Биз Польшадан алып көчөттөрдү Ысык-Көлдө көбөйтүп жатабыз. Аны Нарын, Ош, Жалал-Абад облусундагы дыйкандар алдын ала акчасын төлөп сатып алууда.

Ишкер Жылтырова: КРден тонналап чыгарылган чөптөн Европада кымбат дары жасалат

— Сизде билим, тажрыйба дагы бар экен. Чийки түшүмдү эле сата бербей, аны кайра иштетип жакшы киреше көрүү планыңызда барбы?

— Быйыл карагаттын бир килограммы 200 сомго чыгып, көпчүлүгү карагат өстүргүсү келип калды. Бирок бул учур жыл сайын бир айга чейин эле созулат, чийки затты алуучулар да аз. Биз ал учурду узартышыбыз керек. Мисалы, жарым фабрикат кылып чыгарууну жолго салып алсак, өзүбүз каалагандай 1,5 жылга чейин сактап сатып, кошумча баада кардарларга сунуштай алабыз. Азыр айыл өкмөт менен сүйлөшүп, эски кырманды сурап жатабыз. Буюрса быйыл алып, карагатты кайра иштетүүчү база курабыз. Анткени үч жылдан кийин биз ал жайга муктаж болобуз. 

Успешный садовод Аскар Сулайманов из Иссык-Куля
© Фото / Мирбек Сакенов
Аскар Сулайманов: биз башкалардын ишин, ыкмасын көрүп үйрөнүшүбүз керек. Буга чейин Германия, Франция, Польша, Японияга барып, алардын айыл чарбасын көрүп келгем. Ар бир адамдын өзүнүн кесиби болот, дыйкан жер иштетиши керек

— Айыл чарбанын казанында көп жылдан бери кайнап келе жаткан экенсиз. Биздеги адистердин жетишсиздиги боюнча эмне дейсиз?

— Кээде тегерек стол, түрдүү талкууларга чакырып калышат. Ошондо жергиликтүү өзүн-өзү башкаруу органдарында, мамлекеттик түзүмдө иштеген айыл чарба боюнча кесипкөй эмес адистер өтө эле көп экенин байкайм. Айрымдары бул тармактагы жаңычылдыктар жөнүндө такыр маалыматы жок болсо, дагы бири такыр түшүнбөйт. Бул деген асманда учуп бараткан учакты адистигин жөндөй албагандар башкарып жатат дегендей эле кеп. Бизде азыр кадр жетишсиздиги эң чоң маселе.

Трактор курап, чакан ГЭС салган замандаштар. Элеттик жаратмандардын эмгеги

— Көпчүлүк кыргызстандыктар элет жеринде мал чарбасы же дыйканчылык менен алектенет. Адискөй дыйкан катары сизди түйшөлткөн маселелерди айта кетиңизчи...

— Биз башкалардын ишин, ыкмасын көрүп үйрөнүшүбүз керек. Буга чейин Германия, Франция, Польша, Японияга барып, алардын айыл чарбасын көрүп келгем. Ар бир адамдын өзүнүн кесиби болот, дыйкан жер иштетиши керек. Колунан келбегендер айыл чарбага жолобогону эле жакшы. Айылда эле көрүп жүрөбүз, бирөөнүн жылкысы сыланган, экинчисиники ырбыйган. Кыргызстанда 90-жылдары жер бөлүштүрүлгөндө бардыгына үлүш тийди. Жер иштете алганы дагы, албаганы дагы жерлүү болгон. Айыл өкмөт болуп иштеп жүргөндө айылга тиешелүү жерлерди анализ кылдым. Элдин жалпы айдоо жери 700 гектар болсо, анын 34 гектары бири-биринин ортосундагы чек экен. Душман кол салып тартып албай эле жөн эле жатат. Мисалы, кичинекей эле жерде алты чек бар. Ар биринин узундугу 600 метр, туурасы бир метр болот, алты сотых жер калып жатат. Аны алтыга көбөйтсөң 36 сотых, ал аянт бир үй-бүлөнүн жараган эле бир айдоо жери болуп атпайбы. Жыйынтыгында үч жолу зыян тартып жатабыз. Биринчиден, эрозия, экинчиден, отоо чөптөрдүн уругу арыктар менен тарап жатат, үчүнчүдөн, бош турган жер колдонулбайт. Мен келечекте ошонун баарын эске алган, дыйкандарга жакшы мүмкүнчүлүктөрдү ачкан кооператив түзүү планымда бар. Буюрса, анын ишмердүүлүгүн бүт Кыргызстанга үлгү кылабыз.

43
Белгилер:
маек, багбан, Кыргызстан
Тема боюнча
Талаада ыйлаган күндөр болду. Чөлдү кирешелүү бакка айланткан Маджиковдун маеги
Ишкер Жылтырова: КРден тонналап чыгарылган чөптөн Европада кымбат дары жасалат
Трактор курап, чакан ГЭС салган замандаштар. Элеттик жаратмандардын эмгеги
85 гектар жерди эки киши сугарып жетишет. Тоңдогу жаңычыл багбан менен маек
Испаниялык Барселонанын чабуулчусу, аргентиналык Лионель Месси. Архивдик сүрөт

ЖМК: "Бавариядан" ири эсепте утулган Месси "Барселонадан" кетерин жар салды

175
(жаңыланган 18:06 15.08.2020)
33 жаштагы Лионель Месси клубдун жетекчилигине жана башкаруу системасына канааттанбай келгени айтылат.

БИШКЕК, 15-авг. — Sputnik. Испаниялык "Барселонанын" чабуулчусу, аргентиналык Лионель Месси каталондук клуб УЕФАнын Чемпиондор лигасынын чейрек финалында мелдештен четтегенден кийин командадан кетүү чечимин кабыл алды. Бул тууралуу РИА Новости жазды.

Мюнхендик "Бавария" кечээ "Барселона" клубун 8:2 эсебинде утуп, Чемпиондор лигасынын жарым финалына чыккан. Немецтик клубдан мындай эсеп менен жеңилүү Мессинин карьерасында эң ири утулуш болду.

Криштиану Роналду эзелки атаандашы Лионель Мессинин клубуна өтөбү?

Маалыматта 33 жаштагы футболчу клубдун жетекчилигине жана башкаруу системасына канааттанбай келгени айтылат. Мындан сырткары, Месси "Барселона" менен түзүлгөн келишими 2021-жылы аяктаганда кете ала турганы белгиленет. Футболчуну командада алып калууга клубдун жетекчилигиндеги кескин өзгөрүүлөр себеп болору айтылып келет.

Аргентиналык футболчу "Барселона" командасында ойнойт. Клуб менен ал 10 ирет чемпиондук наамды, алты жолу Испания кубогун, төрт жолу Чемпиондор лигасы мелдешин уткан. Чабуулчу каталондук клубдун катарында расмий беттештерде 634 гол киргизген.

175
Белгилер:
келишим, Барселона, футбол, Лионель Месси
Тема боюнча
КРдеги футболдук үч клубга айып салынды. Машыктыруучу 50 миң сом төлөйт
"Барселонанын" дарбазасына кирген 8 топ! 74 жылдан берки ири жеңилүү
Чемпионка мира по смешанным единоборствам по версии UFC Валентина Шевченко с сестрой бойцом UFC Антониной Шевченко во время тренировок

Алгачкы жолу! UFC эже-сиңди Шевченколорду бир турнирде октагонго чыгарат

0
(жаңыланган 19:27 15.08.2020)
Валентина мелдеште чемпиондук наамын коргосо, эжеси Антонина рейтинг үчүн кармаш өткөрөт. Анын атаандашы ушул сааттарда белгилүү болду.

БИШКЕК, 15-авг. — Sputnik. UFC уюмунун жетекчилиги эже-сиңди Антонина жана Валентина Шевченколордун катышуусунда өзгөчө беттеш даярдап жатканын MMA Uno спорттук порталы жазды. 

Маалымат боюнча, алгачкы жолу бир тууган кыздар чогуу турнирде беттешет. Кармаштар ушул жылдын 21-ноябрында UFC 255 турниринин алкагында өтмөкчү.

Шевченко Tapology версиясы боюнча эң мыкты 100 мушкердин катарына кирди

Спорттук иш-чаранын башка беттештеринин биринде Валентина бразилиялык Женнифер Майя менен кармашып, чемпиондук наамын төртүнчү ирет коргоп калганга жан үрөйт.

Посмотреть эту публикацию в Instagram

Публикация от World of MMA (@worldofmma.cz)

Ошол эле убакта Антонина бразилиялык дагы бир мушкер Ариана Липски менен күч сынашат.

Соңку беттешинде 35 жаштагы Антонина калыстардын чечими менен америкалык Кэтлин Чукагянга утулган.  Анда дагы промоутерлик компания өзгөчө беттеш тартуулаган. Тагыраагы, Валентинага утулган Чукагян анын эжеси менен жолуккан болчу.

0
Белгилер:
турнир, беттешүү, Антонина Шевченко, Валентина Шевченко, UFC
Тема боюнча
Мындан да күчтүү болуп кайтам! Бети-башы көгала Антонина үн катты