Неаполь шаары. Архивдик сүрөт

Италияда киши баккандар келин сыяктуу эле кызмат кылат. Ишкер Автандилова менен маек

1606
(жаңыланган 18:45 27.06.2020)
Мекендешибиз Жылдыз Автандилова он жылдан ашык убакыттан бери Италияда жашап, ал жактан 20га чукул жумуш ордун түзгөн. Ал азыр Неаполь шаарында өзүнүн дүкөн, ресторанын иштетип келет.

Бөтөн жерде ийгилик жараткан ишкер айым менен Sputnik Кыргызстан агенттигинин кабарчысы маек курду. 

Предприниматель Жылдыз Автандилова, которая живет и работает  в Неаполе
© Фото / предоставлено Жылдыз Автандиловой
Ишкер Жылдыз Автандилова

— Италияга кеткенге чейин Кыргызстанда эмне иш кылчу элеңиз?

— Мурун "Кыргызтелекомдо" иштегем. Эки жогорку билимим бар, үч кыздын энесимин. Италияга 2009-жылы бөлөм аркылуу келгем. Башында мен дагы башкалар сыяктуу эле эки жылдай улгайган адамдарды карап, үй жыйнап иштеп жүрдүм. Анткени бул жакта кыргыз кыз-келиндеринин көпчүлүгү ошол жумуштарды жасайт.

— Ал жакта пенсия курагындагы бейтаптарды карап тыйын тапкандар негизинен кандай кызмат аткарышат?

— Мындай жумушта иштеген адам моралдык жактан кыйналат. Башында италиялыктар бизди замандан артта калган, аябай караңгы калк элестетчү. Мен барганда дагы жумушка алган аял үйдөгү кир жуучу машинаны көргөзүп, "бул кир жуучу машина, аны минтип колдонот, мындай техника силерде жок болуш керек" дегени эсимде. Бул жакта Кыргызстандан пенсияга чыгып алып келип иштеген эжелер бар. Биздин кыз-келиндер Альцгеймер менен ооруган кемпир-чалдарды өзүнүн ата-энесиндей карайт. Аларга убагында тамак-ашын жасап, дары-дармегин берип, кийим-кечесин жууп беришет. Кадимкидей бир үй-бүлөгө келин болуп барып кайындарына кызмат кылгандай эле жумуштарды жасайт.

— Убакыт өткөндөн кийин ишкерлик менен алектенүүңүзгө эмне түрткү болду?

— Союз тарап, Кыргызстан эгемендүүлүк алган жылдары мен дагы өзүм курактуулар сыяктуу базарга чыгып калгам. Мектеп окуучусу болгонума карабай Ысык-Көлдөн Бишкекке алма алып келип сатып жүрдүм. Жазында Түп районунан борбор калаага картошка алып келип тыйын тапчумун. Ошол жылдары чоң эжелер менен орун талашып урушуп, базардын жашоосун көрүп калгам. Соода-сатыкка шыгым бар болчу. Убакыт өтүп жогорку окуу жайды аяктап, үй-бүлө курдум. Чынын айтканда, бул жакка келгенде аябай кыйналдым. Тил билбейм, көп кыйынчылыктарды башыман өткөрдүм, бир ресторанда идиш жууп иштедим. Ошондо жеке ишкерлик менен алектенүүгө аракет башталды. Чындыгында бөтөн жерде аябай эле тобокелчиликке салдым. Анан адам башына кыйынчылык келгенде бир нерсени баштоого далалат кылат экен. 

Ал күндөрдү эстегим келбейт, алардын баарын ойлоно берсең оорулуу болуп калгыдайсың. Адам аябай кыйналса бир чечимге келет окшойт. Биринчи жылы айла жогунан социалдык үйдө түнөп калган күндөр болгон. 2009-жылы кыргызстандыктар аябай аз болчу, кийин 2012-жылдары агылып келди. Биз, кыргыздар, ынтымактуубуз, бири-бирибизди колдоп, жакшылык-жаманчылыктарга катышып турабыз. Келечекте биздин өкмөт кийинки муунду да мигрант кылбай, аларга шарт түзүп берсе экен деп тилейм.

— Италияга коңшу мамлекеттердин жарандары да эмгек мигранты болуп барышабы?

— Кыргызстандан 17-18 жаштагы кичинекей кыздар иштегени келүүдө. Балдар кызмат көрсөтүү жаатында, базарда эмгектенишет. Кээде аларды көрүп жүрөгүң ооруйт. Анан Украина, Филиппин, Индия, Бангладеш, Шри-Ланка, Пакистан жана Африка мамлекеттеринин жарандары басымдуулук кылат. Коңшу өлкөлөрдөн казакстандыктар көбүнчө эс алуучу катары жана өз товарларын алдыга жылдыруу үчүн келет.

— Дүкөнүңүз менен рестораныңыздан жакшы эле киреше табасызбы?

— Италияда бир нерсе ачуу, иштетүү аябай оор жана көп каражатты талап кылат. 2014-жылы Кыргызстандагы банктан насыя алып, Бишкектеги өзүмдүн, эжемдин батирин күрөөгө койгом. Чогултуп жүргөм акчамды салдым, бизнес-өнөктөшүм бир топ акча кошкон. Бул жакта ишкерликтен анча деле көп каражат таппайбыз. Дегеним, миллионер деле болуп кеткен жокмун. Мамлекетке кирешебиздин 22-23 пайызын салык катары төлөйбүз. Андан сырткары, чыгашаларыбыз да бар. Азыр дүкөнүбүздө дүйнөнүн бардык товары сатылат, ресторанда Европа менен Азия элдеринин тамак-ашын жасайбыз. Ашпозчубуз кыргыз кыз менен уйгур бала. Азыр кол алдыбызда жалпы 16 адам иштейт.

— Коронавирус пандемиясы ишкерликке кандай таасир этти? Учурда абал кандай?

— Азыр көчөдө бет кап тагынган деле эч ким жок, карантинди алып коюшкан. Бирок дүкөндөргө барганда, коомдук унааларга түшкөндө сөзсүз бет кап тагынуу керек. Коронавирус убагында мен дүкөндө иштедим, талаптар боюнча чектөөлөр болду. Ал эми ресторанга аябай залакасы тийди, азыркыга чейин ача элекмин. Элдин баары кыйналды, бул жактан тапканыбыздын баарын эле үйгө салабыз да, жумуш токтоп калды, эмне кыларын билбей отуруп калгандар көп болду. Экономикалык жактан аябай эле кыйналдык.

— Италияда жашап-иштеп жатканыңызга он жылдан ашып калыптыр. Кыргызстандыктар ал жактагылардын эмнесин алсак болчудай экен?

— Биринчиден, италиялыктар эмгекчил калк болушат, ишин сапаттуу жасайт. Экинчиден, туризм тармагын жолго салып алышкан. Мисалы, эс алуучулар келген деңизди бат-баттан тазалап турушат. Италиялыктар айлана-чөйрөгө аябай жакшы мамиле кылып, эски архитектуралык имараттарын сактап калган жана кызмат көрсөтүүнүн деңгээли абдан жогору. Анан дүйнөгө таанымал Италия ашканасын айтпай коё албайсың. Биз деле алардай болуп өзүбүздүн жаратылышты, тоолорду пайдаланып укмуш киреше таба алмакпыз. Менимче, ошого аракет кылышыбыз зарыл.

1606
Белгилер:
маек, ишкер, Италия
Тема боюнча
21 жаштагы ишкер кыз: апамдын бейитине гүл алып барсам деп жүрүп бизнес ачтым
Колу-бутуман ажыраганыма өкүнбөйм. Павлония багын өстүргөн Монкоев менен маек
Россиянын коронавируска каршы вакцинасы

Коронавируска каршы вакцина: гениалдуу нерсенин баары жөнөкөй

99
(жаңыланган 22:59 12.08.2020)
Россия дүйнөдө биринчилерден болуп коронавируска каршы вакцинаны каттоодон өткөргөнүн жар салды. Колдоп ыраазычылык айткандар, сындап нааразы болгондор да кездешти дейт дарыгер Сергей Царенко.

Биз, дарыгерлер, коронавирус жуккан бейтаптарды дарылап айыктырууда моноклоналдык антителону, стероиддерди, вируска каршы дарыларды колдонуп, ийгиликке жеттик. Ооругандар азыраак көз жума баштады, ал эми оор абалда жаткандарды баары бир өпкөнү жасалма дем алдыруучу аппаратка туташтырууга аргасыз болдук.

Ар бир он кишинин алты-сегизи оорукана ичиндеги инфекциядан каза тапты. Андай ноокастарды жаңы антибиотиктер сактап калмак эле. Бирок аларды иштеп чыгуу үчүн көп жылдар керек. Дагы башка жолу бар. Ал – адамдарды оору жуктурбай аман алып калуу. Бардык жагынан алганда бул жакшы. Адам оорубайт, айланадагыларына илдетти жуктурбайт. Негизи адам кеселге канчалык туруштук берсе, коомчулуктун иммундук катмары калың болуп, эпидемия эртерээк кайтат.

Путин COVID-19га каршы россиялык алгачкы вакцина каттоодон өткөнүн кабарлады

Азырынча ооруга болгон туруктуулук эгерде ал ооруп айыкса гана калыптанат. Дагы бир коопсуз жолу бар, ал — иммунизация. Анан калса Гамалея институтунун адистери иштеп чыккан майнаптуу жана коопсуз вакцина бар. Бул институт автомобиль курууда "Мерседес" кандай кадыр-барктуу бренд болсо, микробиологияда дал ошондой дөө-шаа.

Мен академиктер Гинцбург менен Логуновду көп жылдан бери жакшы билем. Алардын кызматкерлери менен туруктуу бактерияларга каршы күрөшүү боюнча жаңы ыкмаларды иштеп чыгып келе жатабыз. Мындан сырткары, Эбола жана MERS вирусуна каршы вакцина чыгарышты. Жөн гана ойлоп чыгарып коюшпай, аны майнаптуу жана коопсуз кылышты.

Адам үчүн коопсуз болгон аденовирус ташып жүрүүчү ракета сымал орбиталдык станцияга коронавирустун кичинекей бөлүгүн жармаштырып койду. Аны адамдын ичине, организмине кое берди. Мындан улам экөөндө тең иммунитет пайда болду. Ийгиликти бекемдеш үчүн ошондой эле "орбиталдык станцияны" башка аденовируска "ташып жүрүүчү ракетага" кое беришти. Кайрадан иммунитет пайда болду. Жыйынтыгында эки аденовируста алсызыраак (себеби ал организмге кереги жок да), ал эми коронавирустан — туруктуу жана ишенимдүү иммундук коргоо жаралды. Сонун, гениалдуу.

Каттоодон өткөн россиялык вакцина жапырт колдонууга качан чыгары айтылды

Вакцинаны ыктыярчы адамдарга сынап көрүштү. Алардын бардыгы Гамалея институтунун кызматкерлери эле. Алар аркылуу биринчи поезд өттү! Мындан кийин вакцинаны аскер кызматкерлерине сынашты. Биринин да ден соолугунда көйгөй жаралган жок, бардыгында кубаттуу бир иммунитет пайда болду.

Албетте, бүткөн ишке сынчы көп. Басылмаларда сындар жаады. Көп сөздөр айтылды. Акыркысына эле токтолсок, чочуй тургандай нерсе. Инфекцияны толук жок кылбайт же антитело вирустун клеткага киришинин натыйжалуулугун күчтөндүрөт (ADE) дешти. Бул адис эместер үчүн коркунучтуу. Ал эми вирусологдор ADE натыйжасы Денге лихорадкасы үчүн эле эмес, вакцинация менен да байланышпагандыгын билишет. Калган учурларды майнапты пробиркадан гана көрүшөт.

Ушул жерден суроо жаралат. Басылмалардагы бул кампанияны ким каржылап жатат? "Көз карандысыз" эксперттер кимден көз каранды? Полишинель сыры: россиялык окумуштуулардан артта калып калган башка вакциналардын өндүрүүчүлөрүнөн көз каранды. Дагы вируска каршы дарыларды чыгаргандар бар. Кээде ал препараттар оору менен күрөшүүдө майнабын берет. Бирок ал оорунун жеңил түрүнө кабылганда жардамчы, бирок башка кыйыр таасирлери толтура.

Россияда COVID-19га каршы вакцина алгандар ооруканадан чыкты. Видео

Иштеп жүргөн бизге окшогон дарыгерлер, мисалы, ушундай майда нерселерди көргөндө уяласың. Бизге качан коронавирус жуктурган бейтаптар келбей калат, эпидемиядан улам кол жетпей жаткан башка ооруларды качан дарылайбыз деп күтөбүз.

99
Тема:
Дүйнөгө жайылган коронавирус
Тема боюнча
Россия: коронавируска каршы чыгарылган бир вакцина баарына жарай бербейт
Жамгырдуу аба ырайы. Архивдик сүрөт

Бейшембиге карата аба ырайы

45
(жаңыланган 21:01 12.08.2020)
13-августта түнкүсүн республиканын тоолуу райондорунда өткүн өтүп, күн күркүрөшү күтүлөт.

БИШКЕК, 12-авг. — Sputnik. Бейшемби күнү күндүз өлкөнүн көпчүлүк аймактарында өткүн өтүп, күн күркүрөйт. Бул тууралуу Кыргызгидромет билдирди.

Батыштан соккон шамалдын ылдамдыгы секундасына 4-9 метрден кээ бир райондордо 15-20 метрге жетет.

Күндүн көзү ачылбайт... Бир жумага карата аба ырайы

Абанын температурасы Чүйдө +25...+30, Талас аймагында +22...+27, Ош, Жалал-Абад, Баткен облустарында +29...+34, Ысык-Көлдө +20...+25 жана Нарын жергесинде +19...+24 градус болору айтылды.

Борбор калаада өткүн өтүп, күн күркүрөйт, Ошто күн ачык болот. Күндүн табы Бишкекте +27...+29, Ош калаасында +32...+34 градуска чейин жетсе, Чолпон-Атада термометрдин көрсөткүчү +21...+23 градуска көтөрүлөт.

45
Белгилер:
Кыргызстан, аба ырайы
Тема боюнча
Күндүн көзү ачылбайт... Бир жумага карата аба ырайы