Ишкер Матлюба Хакимова

Көзүм көрбөй каларын билгем. Ишкерликке кадам таштаган Матлюба менен маек

765
(жаңыланган 14:40 28.06.2020)
Пандемия маалында жарандарга ишкердик баштоо эмес, жумуш табуу да кыйын болуп калды. Антсе да эл арасында аракети жана жөндөмү менен ийгилик жаратып жаткандар арбын.

Көзү дартка чалдыгып көрбөй калса да, бирөөдөн жардам күтүп отурууну жактырбаган каарманыбыз Матлюба учурда пельмень чыгаруучу чакан цех иштетүүдө.

Көзүнүн көрбөй калганына моюн сунуп, чүнчүп кетпестен жаңы жашоону өздөштүрүүгө бет алган Матлюба Хакимова менен Sputnik Кыргызстан агенттигинин кабарчысы маек даярдаган.

— Азыр пельмень чыгарган чакан цех иштетип жатыпсыз. Буга кандайча жетиштиңиз?

— Ооба, быйылтан баштап өз алдымча чакан ишкердик менен алектене баштадым. Буга чет элдик кайрымдуулук фонддон жардам беришти. Негизги кесибим мугалим. Бирөөгө көз каранды болбош үчүн жасаган аракетимдин аркасынан өз алдынча болууга жетиштим деп ойлойм. Мурда жакындарыман акча суроого туура келчү. Ишкердикти жакшы эле баштагам, ортодо карантин да бир аз тосколдук жаратып койду. Азыр кардарлардын санын арбытуу менен алекпиз. Буюрса, туруктуу сатып алуучуларды таап алсам, бул ишимди жолго коёрума ишенем. Азырынча сиңдим экөөбүз иштеп жатабыз, мүмкүн кийинчерээк жардамчыларды да алармын.

Предпринимательница, владелица маленького цеха по изготовлению пельменей Матлюба Хакимова
© Фото / Нурайым Кудаяр кызы
Матлюба Хакимова: пельмень жана вареники менен камырдын түрлөрүн чыгарабыз

— Ошондо кандай азыктарды чыгарып жатасыздар?

— Биз пельмень жана вареники менен камырдын түрлөрүн чыгарып жатабыз. Кыскасы, бизден адал жарым фабрикат азыктар чыгат. Кээ бир ишканалар таразадан бир аз кемитип коюшат. Биз андайга жол бербейбиз.

— Азыр алты саны аман адамдар деле жумуш жок экенин айтып даттанышат. Эми өзүңүз тууралуу айтып берсеңиз?

— Өзүм Лейлектен болом. Ошол жакта чоңойдум. Мектепти аяктаган соң Бишкектеги Жусуп Баласагын атындагы Кыргыз улуттук университетинин "Математика, информатика жана кибернетика" факультетине тапшырып, математика боюнча мугалимдик кесипти алып чыккам. Андан кийин айылдагы өзүм окуган мектепте мугалим болуп иштедим.

21 жаштагы ишкер кыз: апамдын бейитине гүл алып барсам деп жүрүп бизнес ачтым

— Кечирип коюңуз, көзүңүз көрбөсө университетте билим алуу, мектепте иштөө оорчулук жараткандыр?

— Мурда көзүм жакшы эле көрчү. Бирок караңгыда эч нерсе көрбөй калаарымды 12 жашымда байкадым. Күндүз кадимкидей эле көрчүмүн. Ошентип 16-17 жашка келгенде бир туугандарым Улуттук госпиталдын поликлиникасына көрсөтүшкөн. Дарыгерлер "куринная слепота" деген диагноз коюп, бирок ал өтө деле кооптуу эместигин айтышкан. Бирок булардын аныктоосу туура эмес болуп чыкты. Кийин мектепти аяктап Бишкекке келгенде Академик Алмазбек Исманкуловдун көз оорулары боюнча клиникасынан көзүмө "Центральная дистрофия сетчатки" деген дартты коюшкан. Ошондон кийин убак-убагы менен дарылоо курсунан өтүп турчумун. Бирок дарыгерлер ошондо эле көзүмдү операция жасоого болбой турганын, барган сайын көрүүсү начарлай берерин айтышкан.

Предпринимательница, владелица маленького цеха по изготовлению пельменей Матлюба Хакимова
© Фото / Нурайым Кудаяр кызы
Көзү дартка чалдыгып көрбөй калса да, бирөөдөн жардам күтүп отурууну жактырбаган Матлюба Хакимова учурда пельмень чыгаруучу чакан цех иштетүүдө

— Көрбөй калышыңыз толук мүмкүн экендигин билген экенсиз да?

— Ооба, дарыгерлер көздүн көрүшүн ошол калыбында сактап калууга аракет жасашты. Бирок барган сайын начарлап жатканын угуу мага оңой болгон эмес. Дарыгерге барар учурда бутум тартпай, келгенден кийин ыйлап, жакындарым, ата-энем менен да сүйлөшпөй жаман болчумун. Бирок кийин көзүм биротоло көрбөй калганда андай деле катуу стресс болгон жокмун. Ага чейин эле санаа тартып, ыйлап жатып өзүмдү ушул күн келерине даярдап койсом керек. Маңдайга жазган тагдырымды кадимкидей эле кабыл алдым. Азыр "эмнеге минтип калдым" деп кайгырбайм. Тескерисинче, жаңы жашоону өздөштүрүүгө бет алдым.

— Канча убактан кийин толук көрө албай калдыңыз?

— Жогорку окуу жайын аяктагандан кийин айылда эки жылдан ашык жакшы эле иштедим. Андан кийин эле улам начарлап отуруп, анан көрбөй калдым. Кесиптештерим кагаздарды толтуруума жардамчы катары атайын бир мугалимди дайындап берди. Анын жардамы менен мектепте баш-аягы сегиз жылдай математик болдум. Бирок мүмкүнчүлүгүмө жараша аз саат менен иштедим. Акыры шаарга кетүүгө туура келди.

Абдан кирешелүү! Ич кийим сатуудан ишкерликке жеткен Гулинанын баяны

— Себеби?

— Анткенимдин бирден-бир себеби эле өз алдынча жашоого көнүү болчу. Негизи бирөөгө көз каранды болгонду жана ар кимден жардам катары акча алып, арызданып жашаганды жактырбайм. Бишкекке 2018-жылы жазында келип "Кыргыз азиздер федерациясында" алты ай реабилитациялык тренингде окуп, брайл тамгасын, өз алдымча басып-турганды өздөштүрдүм. Ага чейин дайыма жакындарымдын жетегинде басып, жалгыз жүрө алчу эмесмин. Аталган фонддо көзү көрбөгөндөрдү бекер окутушат экен. Андан кийин Бишкектеги пельмень жасоочу цехтердин бирине жумушка орноштурушту. Цехтен жарым фабрикат тамактарды даядоону үйрөндүм. Эмгек жамаат мени абдан жакшы кабыл алышты. Айрыкча, кадимки жумушчулардай эле мамиле жасагандары мени өз алдымча оокат кылууга түрттү.

Предпринимательница, владелица маленького цеха по изготовлению пельменей Матлюба Хакимова
© Фото / Нурайым Кудаяр кызы
Матлюба Хакимова: дарыгерге барар учурда бутум тартпай, келгенден кийин ыйлап, жакындарым, ата-энем менен да сүйлөшпөй жаман болчумун. Эми болсо маңдайга жазган тагдырымды кадимкидей эле кабыл алдым

— Мугалимдик кесибиңизди уланткан жоксузбу?

— Башында репетитор катары тааныштарымдын балдарын окутуп жүрдүм. Мектептердин көбүндө мүмкүнчүлүгү чектелген мугалимдерге шарттар каралган эмес. Математика боюнча мектепке сабак берүүдө өзүмө ылайык жабдуулар, аудио китептерди алып даярданайын дедим, бирок кыйын эле болуп калчудай. Кесибимди да жакшы көрөм. Бирок шартка байланыштуу азыркы жолумду тандап алууну чечтим. Ишкерлик жааты да чыгармачылыкты талап кылат жана жакшы адамдардын жардамы менен өздөштүрүп кеттим.

— Эмне кыялыңыз бар?

— Алгач эле үйлүү болууну кыялданам. Мага жардам берген фонддун өкүлдөрү "Сен да бир кездерде башкаларга жардам бересиң", — деп шыктандырышты эле. Ошондон кийин муктаждарга жардам берген деңгээлге жетүүнү кыялданам жана максат кылам.

765
Белгилер:
азиз, көз, мугалим, ишкердик, цех
Тема боюнча
Мусулман аялдар жөнүндөгү стереотипти бузгум келет. Жаш ишкер Абдыкалыковдун маеги
Мектептеги окуучулар. Архив

Кыргызстанда окуучулар кайсы айда мектепке барары айтылды

5029
(жаңыланган 22:40 30.09.2020)
Мектептерде ар кандай иш-чаларды өткөрүүгө жана ата-энелер менен башка уюмдардын өкүлдөрүнүн имаратка кирүүсүнө уруксат жок.

БИШКЕК, 30-cен. — Sputnik. 2020-жылдын 6-октябрынан тарта 1-класстан 6-класска чейинки окуучулар жалпы билим берүү мекемелеринде салттуу түрдө окуй баштайт. Мындай чечим Республикалык ыкчам штабдын отурумунда кабыл алынды.

Маалыматка караганда, 2020-2021-окуу жылында 1-6-класстын окуучулары үчүн билим берүү процессин реалдуу режимде жандандырууда санитардык-гигиеналык нормаларды сактоо боюнча иш-аракеттердин алгоритми иштелип чыкты. 

Ага ылайык, окуучулардын жана мугалимдердин ден соолугу медицина кызматкерлери тарабынан көзөмөлдөнүп, мугалимдердин дене табы өлчөнүп турууга жана бет кап режимин сактоого тийиш. Окуучулар окуу процессинде аралыкты сактоо менен отургузулат. Алар колдорун бат-бат жууп турушу үчүн тиешелүү каражаттар менен камсыз кылынат.

3D китебинин автору: оюн түрүндөгү "Ойнобук" баланын акылын өстүрөт

Ошондой эле кызматкерлердин, үй-бүлө мүчөлөрүнүн ден соолугу, аларда илдеттин белгилеринин бар-жогу боюнча анкета толтурулуп турат.

“Эгерде мектепте окуучулардын саны 200гө чейин болсо, план боюнча бекитилген расписаниеге ылайык кадимки режимде окуу процесси уюштурулат. Ал эми балдардын саны 350гө чейин болсо, ийкемдүү расписание боюнча окутулат. Тагыраагы, сабактардын башталышы жана тыныгуулар ар кандай убакытта уюштурулат. Мисалы, 1-2-класстарда сабак 8.00дө башталса, 3-4-класстар саат 8.30га келишет. Балдардын саны 500гѳ чейин болсо, кезектешүү негизде болот. Мисалы, 1-2-3-класстар 1-кезметте, 4-5-6-класстар 2-кезметте окушат. Ашканада тамактануу процесси да смена боюнча уюштурулат”, — дешти штабдан.

Муну менен катар мектептерде ар кандай иш-чаларды өткөрүүгө жана ата-энелер менен башка уюмдардын өкүлдөрүнүн имаратка кирүүсүнө уруксат жок.

Ал эми мектеп балдар келгенге чейин дезинфекцияланууга тийиш. Бирок бул иш-чарада пайдаланыла турган каражаттардын концентрациясы белгиленген өлчөмдө гана колдонулат.

5029
Тема:
Коронавируска байланыштуу Кыргызстандагы кырдаал
Тема боюнча
5-октябрдан тарта башталгыч класстар мектепке барып окуйбу? Расмий жооп
Кол чатыр көтөргөн кыз. Архив

Бейшембиге карата аба ырайы

114
(жаңыланган 21:03 30.09.2020)
Бейшембиге караган түнү айрым райондордо жамгыр жаап, тоолуу өрөөндөрдө кар жаашы күтүлөт.

БИШКЕК, 30-сен. — Sputnik. 1-октябрь, бейшембиде, күндүз Талас облусунун кээ бир райондорунда, Ысык-Көл, Нарын жергесинин көпчүлүк аймактарында, Чүй, Ош, Жалал-Абад, Баткен облустарынын тоо этектеринде жамгыр жаап, тоолуу жерлерге кар түшөт. Бул тууралуу Кыргызгидромет билдирди.

Батыштан соккон шамалдын ылдамдыгы секундасына 4-9 метрге жетет.

Жер көчкөн Кара-Кече көмүр кенине электр жарыгы берилди. Сүрөттөр

Абанын температурасы Чүйдө +14...+19, Талас, Нарын жана Ысык-Көл аймактарында +12...+17, Ош, Жалал-Абад, Баткен облустарында +16...+21 градус болот.

Термометрдин көрсөткүчү борбор калаабыз Бишкекте +17...+19, Ош шаарында +18...+20 градусту көрсөтүп турат.

114
Белгилер:
Кыргызстан, аба ырайы
Тема боюнча
Кыштын илеби жакындап... Октябрь айына карата аба ырайы
АКШнын Киевдеги элчилигин имараты. Архив

Киевде АКШ элчилигинде иштеген аялдын өлүмүнүн себеби иликтенип жатат

0
(жаңыланган 22:52 30.09.2020)
Алгач полиция аялды өлтүрө сабап кетишкенин билдирсе, кийинчерээк жергиликтүү басылмага укук коргоо органдарындагы ишенимдүү адам аны поезд коюп кетиши мүмкүндүгүн маалымдаган.

БИШКЕК, 30-сен. — Sputnik. Украинанын борбору Киевде АКШ элчилигинин кызматкеринин өлүмү иликтенип жатат. Бул тууралуу РИА Новости жазды.

Киев Улуттук полициясынын маалымат кызматы дипөкүлчүлүктүн кызматкери ооруканага токмок жеп түшкөндөн кийин каза тапканын билдирген. Укук коргоо органдары окуянын жагдайын тактап жатат.

Трамп: полиция кызматкерлерин жөн жерден атып кеткен киши өлүм жазасына тартылат

Полициядан билдиришкендей, шаршемби күнү Киев шаарынын Шевченко районундагы темир жол каттамына жакын жердеги токойлуу аймакта башынан жаракат алган аял жатканы тууралуу маалымат түшкөн. Ал жакка полиция кызматкерлери жана башка кызматтардын өкүлдөрү жөнөп кеткен.

"Аял эс-учун жоготкон абалда ооруканага жаткырылып, кийин ал ошол жерден көз жумган. Жабырлануучунун буюмдарын текшерүү учурунда анын АКШ элчилигинде иштей турганын тастыктаган күбөлүк табылган. Ыкчам иликтөө иш-чараларынын натыйжасында кызматкерге кол салышы ыктымал делген адамдын болжолдуу портрети түзүлүп, изделип жатат", — деп айтылат маалыматта.

Украина полициясынын өкүлдөрү РИА Новостиге маркумдун жарандыгы тактала электигин билдиришкен. Жергиликтүү маалымат каражаттарынын жазышынча, аялдын аты Санвер Никаело болгон.

Андан кийин "Цензор.НЕТ" басылмасы укук коргоо органдарындагы ишенимдүү адамга таянуу менен элчиликтин кызматкерин поезд коюп кетиши ыктымалдыгын жазган. Аял кулакчын тагынып алып темир жол жакта чуркаганы божомолдонгон.

Ошондой эле маалымат берген киши элчиликтин кызматкери желке тушунан оор жаракат алганын кошумчалаган.

0
Белгилер:
иликтөө, өлүм, кызматкер, элчилик, АКШ, Киев, Украина
Тема боюнча
Киев: бомба жардырам деген өзбекстандыкты аскерлердин кармаган учуру. Видео