Жылкыбаев: Ош облусунда абал туруктуу, дүрбөлөң түшпөңүздөр

© Фото / Республиканский штаб КР по борьбе с COVID-19Полпред правительства КР в Ошской области Узарбек Жылкыбаев
Полпред правительства КР в Ошской области Узарбек Жылкыбаев - Sputnik Кыргызстан
Жазылуу
Ош облусу боюнча 639 адамдан коронавирус аныкталып, анын 348и айыгып чыккан. Оорунун кесепетинен облустун тогуз тургуну жана беш медик каза болгон.

БИШКЕК, 10-июл. — Sputnik. Бүгүнкү күндө Ош облусунда эпидемиологиялык абал туруктуу. Бул туурасында өкмөттүн облустагы өкүлү Узарбек Жылкыбаев маалымат жыйын учурунда билдирди.

Анын айтымында, учурда жасалма дем алдыруучу аппаратка, дары-дармекке чоң муктаждык жок. Ага карабай кошумча алуу аракети көрүлүп жатат.

"Күндүзгү стационарлар ФАПтын, үй-бүлөлүк дарыгерлер тобунун, бейтапканалардын базасында уюштурулгандыктан медиктер 90 пайыз жетиштүү. Бул бүгүнкү кырдаалга карап алгандагы абал. Ошондуктан кабатырланып же дүрбөлөңгө түшпөөгө чакырам. Бизде абал туруктуу. Бирок ага карабастан кандайдыр бир себептерден улам иштебей жүргөн медицина кызматкерлерин ишке чакырабыз. Ыктыярчы медиктерге эмгек акы төлөнөт жана бардык шарттар каралат", — деди Жылкыбаев.

Сыйлашчу маал эмес! Ноокатта COVID-19дан айыккан киши түлөө өткөргөнү айтылды

Ошондой эле ал облуста абал курчуп кетишин дагы эске алып даярдыктар көрүлүп жатканын белгиледи.

"Ооруканаларда 730 орун, обсервацияга 600 жана күндүзгү стационарга 1 406 орун даярдалган. Орундар жетиштүү, кычкылтек концентраторлору жана ИВЛ аппараттарыбыз дагы бар. Толук кандуу жетиштүү деп айта албайбыз, бирок бүгүнкү абалга жетиштүү. Бул боюнча демөөрчүлөр, эл аралык уюмдар менен иштеп жатабыз. Кечээ эле өкмөттөн 50 аппарат келди, аны райондорго бөлүп бердик. Дары-дармектердин эки айлык кору бар. Жеке коргонуучу каражаттары дагы толук камдалган", — деди облус башчысы.

Ош облусуна кирип-чыгууга тыюу салынды. Карантиндик чектөөлөрдүн тизмеси

Соңунда Жылкыбаев Оштун район, айылдарына жардам берип жаткан ишкерлерге жана чет жакта иштеген мекендештерге ыраазычылык билдирди.

Ош облусу боюнча 639 адамдан коронавирус аныкталып, анын 348и айыгып чыккан. Оорунун кесепетинен 14 бейтап каза болгон, мунун бешөө медицина кызматкери. Азыркы тапта COVID-19 жугузгандардын 119у ооруканада, 169у үй шартында дарыланууда.

Жаңылыктар түрмөгү
0