Күндүзгү стационардын кире беришинде колун жууп жаткан дарыгер. Архив

Пол жууп болсо да кол кабыш кылып кетчүмүн. Ысык-Көлдөгү ыктыярчылардын мээнети

935
(жаңыланган 15:48 27.07.2020)
Республикада  эпидемиологиялык оор акыбал Бишкектен кийин эле Ысык-Көл өрөөнүндө. Sputnik Кыргызстан агенттиги дубандагы абалга сереп салып, ыктыярчылардын иши туурасында айтып берүүнү туура көрдү.

Бүгүнкү оңой эмес кырдаалда ыктыярчылардын эмгеги ат көтөргүс болуп жатат. Муну өлкө жетекчилиги да моюндап, жакында эл президент Сооронбай Жээнбеков алар менен жолугуп, сунуштарын укту.

Негизги көңүл Бишкектеги ыктыярчыларга бурулуп турганы менен аймактарда да элге кызмат кылып жүргөндөр арбын. Бул ирет редакция Ысык-Көл облусундагы ыктыярчылар менен баарлашты.

Тоңдун ар бир айылында ыктыярчылар иштөөдө

Тоң районунун тургундары учурда коронавирус менен күрөшүүдө жалпылап, жапа тырмак иш алып барышууда. Райондун борборуна эки стационар ачылган. Учурда анын бирөө иштеп жатат. Тоңдун Бишкектеги жана чет жактагы улан-кыздары кичи мекенин медициналык жабдыктар менен камсыздап, жардам беришүүдө.

Ыктыярчы Эрмек Кыдыев Тоң районунун Бөкөнбаев айылынын тургуну. Элге кызмат кылалы деген ыктыярчы 32 жашта, үч баланын атасы. Беш-алты кишиден турган Райондук штаб түзүп, алар ыктыярчы катары бир катар иштерди жасашууда.

Волонтер из Иссык-Куля Эрмек Кыдыев
© Фото / из личного архива Эрмека Кыдыева
Ыктыярчы Эрмек Кыдыев
"Негизи Көлдө абал оорураак болуп турат. Биздин район боюнча Бөкөнбаев айылында жана Ак-Терек айыл өкмөтүндө ооругандар көп катталды. Бирок биз дагы жугуштуу вирус менен күрөшүүгө даярдык көрүп, учурда оору менен кармашып жатабыз. Бир жума мурда уккан маалыматым боюнча, райондук ооруканада 40тан ашык кычкылтек концентратору бар болчу. Бул аппараттарды Бишкекте жана чет мамлекетте иштеп жүргөн жердештерибиз алып берди. Ошондой эле башка айылдарга да демөөрчүлөр алып келип берип жатышканын угуп жатам. Мындан тышкары, керектүү дары-дармек, медициналык каражаттар менен да камсыздалып жатабыз", — деди ал.

Анын айтымында, бүгүн стационарга кайрылгандардын саны бир аз көбөйгөнү байкалган. Аймакта коронавирустан каза болгондор күнүнө катталууда. Ал эми райондун борборуна 20 жана 40 орундуу эки стационар ачылып, азыр 20 орундуусу иштеп жатат.

"Сактап кал" деп жалдыраган көздөр жүрөгүмдү тилип кетти. Ыктыярчылардын маеги

Учурда Тоң районунун ар бир айылында ыктыярчылар иштеп жатат. Бардыгы коргоочу кийим менен камсыздалып, санитардык гигиена толук сакталган.

"Ошондой эле айылга COVID менен күрөшүүгө арналган кутуча ачканбыз. Ага карыялардан баштап кичинекей балдарга чейин акча салышууда. Бүгүнкү күндө 700 миң сомдой акча чогулуптур. Буга райондук ооруканага медициналык жабуу алалы деп жатабыз", — деди ыктыярчы.

Тоң районунда да дарыгерлердин тең жарымы ооруп калышкан.

Жердештеримдин колдоосун көрүп жүрөк жылыды...

"Каракол ынтымагы" тобунун негиздөөчүлөрүнүн бири Бакыт Асаналиев учурда Караколдон чыккан улан-кыздар WhatsApp тармагында атайын топ түзүп,  демөөрчүлүк кылып жатышканын айтты.

Волонтеры объединения Каракол ынтымагы
© Фото / из личного архива Бакыта Асаналиева
"Каракол ынтымагы" тобу

Топтун 250дөн ашык катталуучусу бар. Булар кичи мекенине колдон келген жардамын аябай, вирус менен күрөшүүдө материалдык колдоо көрсөтүүдө.

"Бахридин Шабазов болуп WhatsApp тайпасын түзүп, жердештерди четте карап турбай жардам берүүгө чакырганбыз. Баары туура кабыл алып, колдошту. Ар ким мүмкүнчүлүгүнө жараша жардам берүүдө. Акчадан тышкары унаасы менен медициналык жабдыктарды бекер жеткирип берүүнү сунуштагандардан баштап мейманканасын обсервацияга бергендер болду. Баары жардамга кол сунду. Муну көрүп кадимкидей жүрөгүм жылыды. Азыр Караколдо Бишкекке караганда абал жакшыраак. Биз Караколдогу ыктыярчы балдар менен да иштешип жатабыз. Учурда Америка, Россия өңдүү чет мамлекетте жүргөн жердештер ыктыярчыларга акча которуп, алар дары-дармек, кычкылтек концентратору өңдүү медициналык жабдыктарды алып, атайын мекеме ачып муктаждарга бекер берип жатышат. Үйүндө дарыланып жаткандарга атайын түзүлгөн мобилдик топтор кычкылтек концентраторун туташтырып берип жатышат. Ал эми дарылар врачтын көрсөтмөсү менен гана берилүүдө. Караколдогу ыктыярчы Азамат Асангулов барган дары-дармекти координациялап көзөмөлгө алууда",— деди ал.

Асаналиевдин айтымында, "Кумтөрдүн" тоо-кен өндүрүшү бөлүмүнүн А сменинде иштеген жигиттер да эки миң доллардан ашык акча чогултуп, шаарга төрт концентратор жана 35 миң сом акчалай жардам беришкен. Караколдогу ыктыярчы жигит Азамат Асангулов барган дары-дармектин баарын координациялап, көзөмөлгө алууда.

Волонтер из города Каракол Азамат Асангулов
© Фото / Азамат Асангулов
Ыктыярчы Азамат Асангулов

"Демөөрчү болгондордун арасында миң сомдон баштап 50 миң сомго чейин которгондор болууда. Учурда чогулган акча 500 миң сомго жакындап калды. Эми буга керектүү дары-дармек, медициналык каражат сатып алып, элге бекер таратабыз. Андан соң бардык каражат кайда жумшалгандыгы тууралуу тактап жазып, топко отчёт беребиз", — деди демөөрчү.

Коркпой-үркпөй сындадык. Ыктыярчылар Жээнбековго эмне сунуштаганын айтышты

Бир адамдын жашап кетүүсүнө көмөкчү болсом кубанам

Каракол шаарындагы ыктыярчы Эсте Идирисова 41 жашта, үч баланын энеси ишкерлик менен алектенет.

Волонтер в городе Каракол Эсте Идирисова
© Фото / из личного архива Эсте Идирисовой
Каракол шаарындагы ыктыярчы Эсте Идирисова

"Караколдо күндүзгү стационарлар ачылганы эпидемиологиялык кырдаал бир аз жеңилдеген. Ошентсе да абал жакшы эмес. Мен пандемия башталганда эле элге жардам берип баштагам. Алгач стационарларда пол жууп болсо да кол кабыш кылып кетчүмүн. Ошентип жүрүп медиктерден кычкылтек концентраторун туташтырганды, кан басымын ченеп, сатурацияны көтөргөндү үйрөнүп алдым. Азыр мобилдик топ түзүп, ошо менен элге жардам берүүдөбүз. Бизге ишенген демөөрчүлөр аппарат алып беришкен. Үйүндө дарыланып жаткан бейтаптардын сатурациясы төмөндөп кычкылтек жетишпей калганда барып, аппаратка туташтырып, абалы турукташуусуна көмөкчү болобуз. Кээде концентраторду түнгө калтырып кетүүгө туура келет. Андайда башка жактан жардам сурап чалгандар да болот. Ошол себептен дагы кычкылтек концентраторлору болсо жакшы болот эле", — деди Идирисова.

Ал пандемия маалында үч–төрт бейтаптын оорудан улам көз жумганына күбө болгон.

"Мен бирөөнүн жашап кетишине көмөкчү болсом кубанам. Мындан кадимкидей ырахат алам. Азыр Караколдо деле эл бири-бирине жардам берип абалдан чыгууга аракет жасашууда. Медиктерди тамак-аш менен камсыздаган ыктыярчылар тобу да бар. Аларга карапайым эл эле демөөрчү болот", — деди ыктыярчы.

Караколдо беш күндүзгү жана бир түнкү стационар ачылган.

Чолпон-Атада да абал оор...

Салтанат Нарынбаева Чолпон-Ата шаарында гуманитардык жардамдарды ооруканаларга жана стационарларга бөлүштүрүүгө жардам берет.

"Чолпон-Атада рентгенге түшүү маселе жаратууда. Себеби эки эле жерде рентген болуп, кезек күткөндөрдүн саны абдан көп болуп жатты. Эки күн мурда эле дагы бир рентген аппараты алып келинип, ишке берилди. Бирок дагы эле кезек күткөндөрдүн аягы үзүлө элек. Биздин шаарга көп эле гуманитардык жардам көрсөтүлүүдө. Аларды даректерине бөлүштүрүп берип жатабыз. Медиктер коргоочу формалар жетиштүү дешет. Ошентсе да дагы бир көйгөй — дарыгерлердин 60 пайызынын вирус жугузуп алып, ооруп калгандыгында болууда. Учурда шаар боюнча мобилдик топ түзгөн ыктыярчылар да иштеп, медиктерге кол кабыш кылып жатышат", — деди ал.

Чолпон-Атада күнү-түнү иштей турган эки стационар жана бир күндүзгү стационар пайдаланууга берилген.

935
Белгилер:
пандемия, Каракол, коронавирус, ыктыярчылар, Тоң, Ысык-Көл облусу
Тема:
Коронавируска байланыштуу Кыргызстандагы кырдаал (2259)
Тема боюнча
Пакистандык студент: мурдумду сындыра сабашты, ошентсе да ыктыярчылыкты таштабайм
Ыктыярчылар менен эми Аида Исмаилова жолукту. Кандай сунуштар болду
ИИМ: ыктыярчы кыз сактай албай калдык деп ыйлаган киши өлгөн эмес. Видео
Блок-посттогу ИИМ кызматкерлери. Архив

Баткенде бүгүн киргизилген катуу чектөөлөр кайрадан алынды

567
(жаңыланган 21:45 28.09.2020)
Акыркы күндөрү Кыргызстанда COVID-19 жуктуруп алгандардын саны кайра арбып кетти. Алардын көбү Баткен облусунан чыгууда.

БИШКЕК, 28-сен. — Sputnik. Баткен облусунда курчуган эпидемиологиялык кырдаалдан улам бүгүн киргизилген бир нече чектөөлөр бир сутка өтпөй жоюлуп, республикалык штаб бир нече тармактын иштөөсүнө кайра уруксат берди. Бул тууралуу аталган штаб кабарлады.

28-сентябрда эпидемиологиялык кырдаалга байланыштуу кабыл алынган чечимдер, республикалык штабдын тапшырмасы менен кайрадан каралып чыккан.

Эске салсак, бүгүн Баткенде облустар жана райондор аралык, ошондой эле райондук, шаардык ички коомдук транспорттун каттамы убактылуу токтотулган. Мал базарлардын иштебей, мечиттерде жамаат менен жума намаздарын окулбай турганы айтылган эле.

Соңку суткада коронавирустан Ош облусунда бир адам көз жумду

"Анда жер-жерлерде, райондук администрация жана шаардык мэрияларга кайрылган коомдук транспорттун айдоочуларынын жана жергиликтүү тургундардын кабыл алынган чектөөлөр, алардын турмуш шартына түздөн-түз таасир этери айтылган. Коомдук транспорттун, мал базарларын жана мечиттердин кадимки нукта иштөөсүнө уруксат сурап, бардык санитардык талаптарды сактай тургандыктарын айтып кайрылган сунуштары эске алынды", — деп жазылган маалыматта.

Мындан улам облустук штаб маселени кайра карап чыгып, санитардык талаптарды сактоо менен иштөөгө уруксат берген.

"Бирок облуста катуу көзөмөлдөгү бет кап режими жана той-аштарга болгон чектөөлөр күчүндө калды. Ал эми базарларда, соода борборлорунда, дүкөндөрдө, тамактануучу жайларда, коомдук жайларда санитардык талаптардын аткарылышы боюнча күн сайын рейд жана дезинфекциялоо иштери жүрөт, баш ийбегендерге мыйзам чегинде чара көрүлөт", — деп билдиришти штабдан.

Вирус күчөп бараткан Баткендин экинчи толкунга даярдыгы кандай

Акыркы күндөрү Кыргызстанда COVID-19 жуктуруп алгандардын саны кайра арбып кетти. Бүгүн, 28-сентябрга карата, 104 кишиден вирус табылды.

567
Белгилер:
чектөө, коронавирус, Баткен облусу, Кыргызстан
Тема:
Коронавируска байланыштуу Кыргызстандагы кырдаал (2259)
Тема боюнча
КРде бир нече аптадан бери алгачкы өлүм катталды. COVID боюнча статистика
Баткенде санитардык талаптарды аткарбагандарга айып салынды. Арасында 9 мамкызматкер бар
COVID-19га каршы россиялык Спутник V вакцинасы. Архив

Россиялык вакцинанын алгачкылары Беларуска келе баштады

46
(жаңыланган 21:15 28.09.2020)
Клиникалык изилдөөлөр Беларустун сегиз медициналык мекемесинде жасала тургандыгы айтылды. Эмдөө 1-октябрда башталмакчы.

БИШКЕК, 28-сен. — Sputnik. COVID-19га каршы россиялык "Спутник V" вакцинасынын биринчи партиясы Беларуска алып келинди. Бул тууралуу Түз инвестициялар боюнча россиялык фонд билдирди.

Фонд бул азырынча дүйнө боюнча катталган бирден бир вакцина экендигин айтты. Аны клиникалык изилдөө жасоо үчүн Россиянын жер-жерлерине жеткиришкен, эми бул процедураларга Беларусь кошулду. Ал препаратты алган биринчи чет мамлекет болуп калды.

Клиникалык изилдөөлөрдүн Беларустун сегиз медициналык мекемесинде жасала тургандыгы айтылды. Ыктыярчыларды эмдөө 1-октябрда башталмакчы. Фонд 100 киши катышкан Беларустагы клиникалык изилдөөнү каржылап бермекчи.

Путин менен жолуккан Жээнбеков: россиялык вакцина КРге жетет деп үмүттөнөм

Фонддон мындай иш-чараны Бразилия, Индия, Сауд Аравиясы, Египет жана Бириккен Араб Эмирлигинде жүргүзүү пландалып жаткандыгын айтышты.

Вакцина суроо-талап жаралып, КМШнын, Европаны, Азияны, Жакынкы Чыгышты жана Латын Америкасын кошкондо 50 мамлекеттен арыз түшкөн.

Буга чейин аталган фонд макулдашуунун негизинде өнөктөштөр менен сүйлөшүү жүргүзүлүп, Мексикага 32 миң, Бразилияга 50 миллион, Индияга 100 миллион, Өзбекстанга 35 миллион доза берилерин айткан эле.

46
Белгилер:
Россия, вакцина, Беларусь
Тема:
Дүйнөгө жайылган коронавирус
Тема боюнча
COVID-19га каршы россиялык вакцина КМШга берилет
Кыргызстандын президенти Сооронбай Жээнбеков. Архив

Жээнбеков Венгрияга расмий сапар менен барды. Кимдер коштоп жүрөт

0
(жаңыланган 23:52 28.09.2020)
Сапардын алкагында Кыргыз-венгер өнүктүрүү фондусун түзүү жөнүндө меморандумга жана эки тараптуу кызматташуу жөнүндө башка документтерге кол коюлат.

БИШКЕК, 28-сен. — Sputnik. Венгрияга расмий визит менен барган президент Сооронбай Жээнбековду Венгриянын вице-премьер-министри Михай Варга тосуп алды. Бул тууралуу мамлекет башчынын маалымат кызматынан кабарлашты.

Расмий визиттин алкагында Жээнбеков Венгриянын премьер-министри Виктор Орбан менен эки тараптуу сүйлөшүүлөрдү жүргүзөт. Алар Кыргызстан менен Венгриянын ортосундагы стратегиялык өнөктөштүк жөнүндө биргелешкен декларацияга кол коюшат.

Жээнбеков Венгрияга барат. Эки өлкөнүн соода-сатык алакасы кандай

“Жээнбеков жана Орбан Будапешт шаарындагы Түрк кеңешинин европалык өкүлчүлүгүнө барышат. Сапардын алкагында Кыргыз-венгер өнүктүрүү фондусун түзүү жөнүндө меморандумга жана эки тараптуу кызматташуу жөнүндө башка документтерге кол коюлат”, - деп айтылган маалыматта.

Кыргызстан делегациясынын катышуусунда Будапешт шаарындагы гүлбакка жазуучу Чыңгыз Айтматовдун ысымын ыйгаруу аземи болот.

Расмий визиттин алкагында Жээнбеков президент Янош Адер жана Улуттук жыйындын төрагасы Ласло Кёвер менен дагы жолугат.

Будапешт шаарындагы скверге Айтматовдун ысымы ыйгарылат

Кыргызстандын делегациясынын курамында тышкы иштер министри Чыңгыз Айдарбеков, Президенттин аппаратынын тышкы саясат бөлүмүнүн башчысы Данияр Сыдыков, Венгриядагы атайын жана толук ыйгарым укуктуу элчи Бакыт Жусупов, вице-премьер-министр Эркин Асрандиев, билим берүү жана илим министри Каныбек Исаков, айыл чарба, тамак-аш өнөр жайы жана мелиорация министри Эркинбек Чодуев, транспорт жана жолдор министри Жанат Бейшенов, каржы министри Бактыгүл Жээнбаева жана экономика министри Санжар Муканбетов бар.

0
Белгилер:
расмий сапар, Сооронбай Жээнбеков, Венгрия, Кыргызстан
Тема боюнча
Жээнбеков быйыл Венгрияга барат. ТИМ Будапештте жолугушууларды өткөрүп келди