Ооруканада эмдөө учурунда

Гриппке каршы эмдөө жүрөт: вакцина кайдан келип, кимге сайылат. 11 суроого жооп

5345
(жаңыланган 10:47 23.08.2020)
Сентябрь айынын аягынан тарта калктын тобокелдик тобуна кирген жарандарга курч мүнөздөгү респиратордук вирустук инфекцияларга каршы вакцина сайыла башайт.

Пандемия шартында быйыл гриппке каршы вакцинага эл арасында кызыгуу көп. Качан башталып, кайсы жакка кайрылса болот, баасы канча экенин билгиси келгендер четтен чыгат.

Мындан улам Sputnik редакциясы Ооруларды алдын алуу жана санитардык-эпидемиологиялык көзөмөл боюнча мамлекеттик департаменттин жугуштуу ооруларды алдын алуу жана көзөмөлдөө бөлүмүнүн башчысы Динара Оторбаевага бир катар суроолорду берип, жооп алды.

Вакцинанын максаты

Жыл сайын күз, кыш айларында күч алган курч мүнөздөгү респиратордук вирустук инфекциялар (КРВИ) менен сасык тумоону алдын алуу. Оорунун жеңил формада өтүшүнө шарт түзүү.

Быйыл КРге канча вакцина келет?

Өкмөт менен Саламаттык сактоо министрлиги азырынча 135 миң доза вакцинага заказ берген. Бирок тобокелдик тобуна кирген жарандардын саны бери дегенде 700 миңди түзгөндүктөн, кошумча препарат сатып алуу маселеси өкмөттүн кароосуна жиберилген.

Өкмөт сатып алган вакциналар кимге арналган

Бул вакциналар толугу менен акысыз түрдө тобокелдик тобуна кирген жарандарга сайылат. Мисалы, өнөкөт оорусу барлар, бат-баттан ооруй бергендер, кош бойлуу аялдар, балдар үйүндөгү бөбөктөр, кары-картаңдар жана медиктер. Эгер кошумча вакцина келип, тобокелдик тобунан ашып калса, калкты тейлөө тармагындагы милиция, мугалим, айдоочу, почта кызматкерлери сыяктуу адистерге сайылат.

COVID-19га каршы вакцинаны алууга кантип даярдануу керектиги айтылды

Башка жарандар вакцинаны кантип алса болот?

Өз каалоосу менен алгысы келген жарандар үчүн Бишкекте атайын уруксаты бар жеке клиникалар вакциналарды алып келип сайышат. Жыл сайын мындай кызматтарды "Малыш", "Кроха", "Гиппократ", "Поликлиника 312", "Доктор.kg" клиникалары жана №6, №8 үй-бүлөлүк дарыгерлер борборлорунда көрсөтүшөт.

Баасы кандай?

Жыл сайын 500-650 сомдун тегерегинде жасалып келет. Быйылкы наркы аныктала элек.

Кайсы мамлекеттин вакцинасын колдонобуз?

Акыркы жылдары тендерди россиялык компания утуп алууда.

Вакцина алууга кантип даярдануу керек?

КРВИ же сасык тумоо менен ооруп, дене табы көтөрүлүп тургандарга препарат сайылбайт. Мындан тышкары, дарыгер бейтап акыркы 3-4 күндө ооруган киши менен байланышта болгон-болбогонун билүүсү зарыл. Ошондой эле аллергиясы бар адамдар дарыгер менен кеңешип, чечим кабыл алат.

Сентябрдын аягында Кыргызстанда гриппке каршы эмдөө башталат

Канча жаштан баштап вакцина алууга болот?

Алты айдан жогору.

Вакцина адамды канча убакыт вирустан коргой алат?

Алты ай препарат күчүн сактап, андан кийин алсырай баштайт.

Вакцина алган айрым адамдар баары бир ооруганын айтышат. Себеби эмнеде?

Дүйнөлүк саламаттык сактоо уюму (ДССУ) жыл сайын быйыл кайсы вирус көп болорун аныктап, вакцинага дал ошолордун штаммын киргизүү боюнча жолдомо берет. Ошентип вакцинанын курамына штаммы кирген вирус адамга жукпайт. Ошол эле учурда адам башка вирустук оорулар менен ооруп калышы мүмкүн. Бирок оору жеңил формада өтөт.

Грипптин вакцинасы коронавирус жуккан учурда ооруну жеңилдете алабы?

Россиялык окумуштуулар грипп менен COVID-19 адамга бир учурда жугуп калышы мүмкүн экенин айтууда. Албетте, мындай учурда вакцина грипптин жүрүшүн жеңилдетет, бул нерсе организмге бир топ жардам болот. Бирок коронавирус боюнча жеңилдик болор-болбосу азырынча изилдене элек.

5345
Белгилер:
дарыгер, грипп, вакцина, Кыргызстан
Тема:
Коронавируска байланыштуу Кыргызстандагы кырдаал (2415)
Тема боюнча
Россияда коронавируска каршы вакцина чыгарыла баштады
Медициналык кызматкер ВИЧке кан анализин жүргүзүп жатат

Жалал-Абадда ВИЧ илдетин жуктургандарды аныктоо боюнча акция башталды

45
(жаңыланган 18:19 27.11.2020)
Өнөктүк маалында жашоочулар анонимдүү түрдө акысыз текшерүүдөн өтө алат. Иш-чара 27-ноябрдан баштап 1-декабрга чейин уланмакчы.

БИШКЕК, 27-ноя. — Sputnik. Жалал-Абад облусунда "ВИЧ-СПИД илдети боюнча өз макамыңды бил" аттуу акция башталды. Бул тууралуу аталган аймактагы СПИДге каршы күрөшүү жана алдын алуу борборунан билдиришти.

Борбордун башкы дарыгери Элмира Сатарованын айтымында, облус аймагында илдетти жыныстык жол менен жуктуруп алган эркектердин саны өскөн. Мындан улам өзүнүн ВИЧ-инфекциясын жуктуруп алганын билбей жүргөндөрдү эртерээк аныктап, дарылоо максатында атайын иш-чара уюштурулган.

"Акция учурунда жашоочулар анонимдүү түрдө акысыз текшерүүдөн өтө алат. Иш-чара 27-ноябрдан баштап 1-декабрга чейин уланат", — деди Сатарова.

Маалым болгондой, облуста илдетти жугузгандардын 62 пайызы ооруну жыныстык жол менен илештирсе, 27 пайызы кан аркылуу, беш пайызы энеден балага жуккан.

Учурда Жалал-Абад облусунда 1 087 адамдын ВИЧ-инфекциясына чалдыккандыгы аныкталган. Жыл башынан бери 36 адам аталган дартты жуктуруп, алардын 56 пайызы эркектер экени кошумчаланды.

45
Белгилер:
акция, аныктоо, оору, ВИЧ, СПИД, Жалал-Абад
Тема боюнча
Кыргызстанда ооруканада ВИЧ/СПИД жуктургандарга компенсация төлөнөт
Мурдагы вице-премьер-министр Тайырбек Сарпашев. Архив

Мыйзамсыз байыган. Экс-вице-премьер Тайырбек Сарпашевге иш козголду

1371
(жаңыланган 18:03 27.11.2020)
Финансы полициясынын кызматкерлери 2020-жылдын ноябрь айында мурдагы аткаминердин үйүн тинтүүгө алган.

БИШКЕК, 27-ноя. — Sputnik. Мурдагы вице-премьер-министр Тайырбек Сарпашевге кылмыш иши козголду. Бул тууралуу Экономикалык кылмыштарга каршы күрөшүү кызматы билдирди.

Маалыматта Финансы полициясы Сарпашевге карата мыйзамсыз баюу фактысы боюнча сотко чейинки өндүрүш баштаганы айтылат.

"Мурдагы вице-премьер С.Т. мамлекеттик мекемеде жетекчилик кызмат ордун ээлеп турганда көп сандаган кыймылдуу жана кыймылсыз мүлктү сатып алган. Кийин аны декларацияларда көрсөтпөстөн жакын туугандарына каттаган", — деп айтылат маалыматта.

Финпол бул сотко чейинки өндүрүштүн алкагында Сарпашев суракка чакырыларын белгиледи.

Белгилей кетсек, Тайырбек Сарпашев 2012-2014-жылдары Кыргызстандын экономика жана инвестиция боюнча вице-премьер-министри болуп эмгектенген. 2020-жылдын ноябрь айында Финпол анын үйүн тинтүүгө алган.

Тергөөгө ылайык, 2016-жылы президенттин аппаратынын кызматкерлери, Мамлекеттик каттоо кызматынын жетекчилиги, судьялар жана сот тутумунун өкүлдөрү соттун чечимдерин жасалмалап, Максим Бакиевге жакын кишилердин мүлкүн камакка алуу чечимин жокко чыгартышкан. Алар муну менен "Г.Э" ишканасынын кызыкчылыгын көздөшкөн. Сарпашев 2015-2017-жылдары Мамлекеттик каттоо кызматынын төрагасы болуп турган.

1371
Белгилер:
мүлк, кылмыш иши, финансы полициясы, Тайырбек Сарпашев
Тема боюнча
Бакиевдин жакындарына жардам берген. Бишкекте мурдагы судья кармалды
Октябрь районунун мурдагы акими Куценко үй камагына чыгарылды
Беларусь президенти Александр Лукашенко

Лукашенко жаңы Конституция кабыл алынганда президент болбой турганын жар салды

61
(жаңыланган 19:50 27.11.2020)
Лукашенко азыркы Баш мыйзамда президенттин ыйгарым укуктарына басым жасалганын айтып, өлкөнүн пайдасы үчүн жаңысын кабыл алуу керектигин белгилеген.

БИШКЕК, 27-ноя. — Sputnik. Беларусь президенти Александр Лукашенко жаңы Конституция кабыл алынгандан кийин өлкө башчысы болбой турганын жар салды. Бул тууралуу БелТА агенттиги жазды.

"Конституцияны өзүмө ылайыктаган жокмун. Жаңы Баш мыйзам кабыл алынса, мен силердин президентиңер болуп иштебейм. Ошондуктан муну жеңил кабыл алып, тынч болгула", — деген президент.

Ал шайлоонун жыйынтыгын кимдир бирөөнүн жасалмалоосуна жол бербей турганын айтып, ошол себептен жаңы Баш мыйзамды өзгөртүүнү колдоп жатканын айткан.

"Мен жаңы Баш мыйзамдын тарапташымын. Себеби азыркы иштеп жаткан Конституцияны "белгисиз президенттин" колуна карматканга болбойт", — деген ал.

Лукашенко азыркы Баш мыйзамда президенттин ыйгарым укуктарына басым жасалганын айтып, өлкөнүн пайдасы үчүн жаңысын кабыл алуу керектигин белгилеген.

61
Белгилер:
өзгөртүүлөр, конституция, Александр Лукашенко, Беларусь
Тема:
Беларустагы нааразылык акциялары
Тема боюнча
Жапаров референдумга Конституция эмес, башка маселени алып чыгууну сунуштады
Лавров: Беларустагы конституциялык реформаны колдойбуз