Наристени карап жаткан дарыгерлер. Архив

КРде балдар пневмониясын дарылоого протокол даярдалып, 2000 керебет коюлду

421
(жаңыланган 09:14 02.09.2020)
Кыргызстандык дарыгерлердин айтымында, балдардагы коронавирус пайда кылган пневмония илдетин дарылоонун эрежелери даяр.

БИШКЕК, 1-сен. — Sputnik. Кыргызстанда балдар арасында пневмония илдети көбөйгөн жок. Бирок коронавирустун божомолдонуп жаткан экинчи толкунуна карата бөбөктөр үчүн 2 миңден ашык керебет дайындалган. Бул тууралуу Саламаттык сактоо министрлигинин Медициналык жардамды уюштуруу жана дары саясаты башкармалыгынын башкы адиси Бермет Самаганова Sputnik Кыргызстан агенттигинин кабарчысына билдирди.

Буга чейин коңшу Казакстандын Алматы шаарында балдар арасында пневмония болгондор көбөйүп, 800дөй бала ооруканага жаткырылганын жергиликтүү ЖМКлар жазып чыккан. Шаардын санитардык башкы дарыгери Жандарбек Бекшин курч мүнөздөгү респиратордук вирустук инфекция дагы кеңири жайылып, былтыркы жылдын ушул убагына салыштырмалуу 26 пайызга көп экенин айткан. Дарыгердин пикиринде, бул нерсе балдардын саламаттыгына бир топ коркунуч жаратышы мүмкүн.

Мындан улам редакция Саламаттык сактоо министрлигине кайрылып, пневмония илдетинин жайылышы тууралуу кабар алды. Ошондой эле өпкөнү жабыркаткан бул илдет балдар арасында жайыла турган болсо, кайсы протокол менен дарыланарына кызыккан.

Балдарга жабышкан Кавасаки синдрому. Дарыгер оорунун белгилерин айтты

Пневмония боюнча абал кандай

Бермет Самаганованын айтымында, ушул тапта абал туруктуу, атургай балдар арасында пневмония илдети былтыркы жылга салыштырмалуу азайды.

Главный специалист лечебного Управления Министерства Здравоохранения КР Бермет Самаганова
© Sputnik / Асель Сыдыкова
Медициналык жардамды уюштуруу жана дары саясаты башкармалыгынын башкы адиси Бермет Самаганова
"Алты ай ичинде бөбөктөр жана өспүрүмдөр арасында элдин жүрөк үшүн алган илдет 31 пайызга азайды. Бирок биз күздө божомолдонуп жаткан вирустун экинчи толкунуна карата республиканын ар кайсы аймактарындагы ооруканалардын балдар бөлүмүнө жалпысынан 2 миңден ашуу керебет даярдап, дары-дармек менен камсыздадык", — деди Самаганова.

Коронавирустун көбөйүшүн токтото алчу витамин аныкталды

Балдар кайсы протокол менен дарыланат?

Дарыгер балдарды дарылоонун бекитилген эрежелери даяр экенин белгиледи.

"Төртүнчү клиникалык протоколдо коронавирус жана пневмонияга кабылган балдарды дарылоо боюнча атайын бөлүк бар. Анда илдетти аныктоо, дарылоо, балдар менен иштөө эрежелери толук камтылган. Бул боюнча медиктер окуудан өтүп жатат", — деди башкы педиатр.

Өлкөдө канча бала COVID-19га кабылды

Расмий маалыматтарга караганда, өлкөдө коронавируска кабылган 17 жашка чейинки балдардын саны 600дү түздү. Бирок, Самаганованын айтымында, жашы жете электер арасында оору өтүшүп, бейтаптын абалы өтө оорлоп кеткен учурлар катталган жок.

Кыргызстанда 5,5 миңдей киши COVID-19дан дарыланууда. Абал чыңалып турат

Кавасаки синдрому

Акыркы кезде коронавирустун күчөп кеткен абалы катары пневмония менен чогуу Кавасаки синдрому айтыла баштады. Эне жана баланы коргоо боюнча улуттук борбордун директору Камчыбек Узакбаев Sputnik Кыргызстан агенттигине берген маегинде оорунун белгилери, кооптуулугу тууралуу кенен айтып берген. Бактыга жараша, учурда бул илдет Кыргызстанда бир дагы балада аныктала элек.

Баса, ошол эле Казакстан Кавасаки синдромун кошуп, COVID жуктурган балдарга дарылоо боюнча өзүнчө протокол даярдады. Ошондой эле протокол Кыргызстанда дагы түзүлүп жатканын дарыгер Узакбаев билдирди. Документ жакында Саламаттык сактоо министрлигинин буйругу менен бекитилип, үй-бүлөлүк дарыгерлерге таратылат.

Эске салсак, окумуштуулар коронавирустун экинчи толкунун божомолдоп, ушу тапта дүйнөнүн бир топ мамлекети ага даярдык көрүп жаткан кез.

421
Белгилер:
протокол, пневмония, коронавирус, наристелер, бала, Кыргызстан
Тема боюнча
Министрлик: коронавирус басаңдай элек, күрөштү токтотуу али эрте!
Абдрахманов жана Мичурин көчөлөрүнүн кесилишиндеги Кычан Жакыпов атындагы сейил бак

Мэрия: Маданият министрлигине кайра айып салынды

24
(жаңыланган 18:39 29.09.2020)
Жарандардан Абдрахманов жана Мичурин көчөлөрүнүн кесилишиндеги Кычан Жакыпов атындагы сейил бак кароосуз калып, таштанды көбөйгөнү боюнча арыздар келип түшкөн.

БИШКЕК, 29-сен. — Sputnik. Маданият, маалымат жана туризм министрлигине Эреже бузуулар жөнүндөгү кодекстин 293-беренеси ("Ыйгарым укуктуу органдын чечимдерин, аныктамаларын, тескемелерин же талаптарын аткаруу тартибин бузуу") боюнча протокол түзүлдү. Бул тууралуу Бишкек мэриясынан билдиришти.

Дайверлер Ысык-Көлдүн түбүнөн бир тоннадан ашык таштанды алып чыгышты. Сүрөт

Мусор в парке имени Кычана Джакыпова на пересечении улиц Ю. Абдрахманова и Мичурина в Бишкеке
© пресс-служба мэрии города Бишкек
Жарандардан Абдрахманов жана Мичурин көчөлөрүнүн кесилишиндеги Кычан Жакыпов атындагы сейил бак кароосуз калып, таштанды көбөйгөнү боюнча арыздар келип түшкөн.

Айып Санитардык-экологиялык инспекциясы тарабынан салынган. Маалыматка караганда, көпчүлүк жарандардан Абдрахманов жана Мичурин көчөлөрүнүн кесилишиндеги Кычан Жакыпов атындагы сейил бак кароосуз калып, таштанды көбөйгөнү боюнча арыздар келип түшкөн. 

Мусор в парке имени Кычана Джакыпова на пересечении улиц Ю. Абдрахманова и Мичурина в Бишкеке
© пресс-служба мэрии города Бишкек
Айып Санитардык-экологиялык инспекциясы тарабынан салынган.
"Санитардык инспекциянын өкүлдөрү жерине барып парктын аймагы чын эле каралбай калганына күбө болушкан. Буга байланыштуу министрликке карата эскертүү берилген. Бирок коомдук жай дагы деле иретке келтирилген жок. Ошондуктан 293-берене боюнча протокол түзүлдү", — деп айтылат маалыматта.

Мэрия элди таштанды ыргытпоого чакырып, ишканасынын, үйүнүн айланасын таза кармоону суранды.

24
Белгилер:
Маданият министрлиги, тазалык, Бишкек мэриясы
Тема боюнча
Бишкекте жаңы конуштун тургундары мектептин жанына таштанды үйүп салышкан
Суу өчүрүү убагында. Архив

Бишкектеги эки конушта 1-октябрь күнү суу болбойт

36
(жаңыланган 17:09 29.09.2020)
Калаа тургундары суу боюнча суроолор жаралса бирдиктүү 1533 номерине чала алышат. Мындан сырткары, мэриянын 1840 жана 1850 линиясы иштеп жатат.

БИШКЕК, 29-сен. – Sputnik. Кышка даярдык көрүү үчүн суу түтүктөрү оңдолуп жаткандыктан 1-октябрда Бишкектеги Ынтымак менен Арча-Бешик конуштарында суу өчүрүлөт. Бул тууралуу мэриядан билдиришти.

Маалыматка караганда, ичүүчү суу эртең мененки саат 9.00дөн кечки саат 18.00гө чейин болбойт. Белгилей кетчү жагдай, Арча-Бешик конушунун биринчи көчөсүнөн жетинчи көчөсүнө чейинки гана бөлүгүндө суу жок болуп, башка жактарында үзгүлтүккө учурабайт.

Кезекке турсаңыз болот! Бишкектин чок ортосуна жаңы бала бакча ачылды. Сүрөт

Калаа тургундары суу боюнча суроолор жаралса бирдиктүү 1533 номерине чала алышат. Мындан сырткары, мэриянын 1840 жана 1850 линиясы иштеп жатат. Көйгөйлөр боюнча сүрөт, видеолорду 0554 182-185 WhatsApp номерине жөнөтүүгө болот.

36
Белгилер:
жаңы конуштар, таза суу, Бишкек мэриясы
Тема боюнча
Мамкаттоо айдоочуларга ыңгайлуу шарт түзгөн жаңы сервис иштеп чыкты
Жол кырсыгынан жабыркаган унаа. Архив

Бишкекте төрт машина кагышты. Видео

0
(жаңыланган 19:39 29.09.2020)
Төрт машина кагышкан жол кырсыктан жабыркагандар жок. Окуя шаардын түндүк тарабында, Элебесов көчөсүндө болгон.

БИШКЕК, 29-сен. – Sputnik. Бишкекте бүгүн төрт жеңил унаа кагышканын Кайгуул милициясынан билдиришти.

Жол кырсыгынын видеосу Telegram-каналынын “Короче” тайпасына жарыяланды.

Окуя Фере жана Элебесов көчөлөрүнүн кесилишинде болгон. Күбөлөрдүн айтымында, кырсыктын айынан Баялинов көчөсүнө чейин тыгын жаралган.

Милициядан билдиришкендей, жабыркагандар жок.

0
Белгилер:
жол кырсык, Бишкек
Тема боюнча
Анжиянда кыргызстандык айдоочу эки кызды коюп, өзү кошо көз жумду