Түркияда медициналык туризм боюнча компания негиздеген Лира Жолчиева

Түркияда дарыланууга муктаж кыргызстандыктарга жардамдашабыз. Ишкер Лиранын маеги

868
(жаңыланган 12:10 23.11.2020)
Акыркы кезде чет мамлекеттен оор операция жасатууга муктаж болгон кыргызстандыктар арбып баратат. Дарылоо акысы кымбат болгондуктан андай бейтаптардын көбү акчалай жардам суроого муктаж болууда.

Лира Жолчиева Түркияда медициналык туризм боюнча компания негиздеп, жардамга муктаж кыргызстандыктарга көмөктөшүп, бөтөн жерде дарыланууда жол көрсөтүп келген кыргызстандыктардын бири.

Sputnik Кыргызстан агенттиги 32 жаштагы Лира Жолчиева менен байланышып, ал түзгөн компаниянын мекендештерге көмөгү жана медицина жаатында баарлашты.

— Алгач өзүңүз тууралуу айтсаңыз?

— Жалал-Абаддагы кыргыз-түрк лицейин аяктап, кийин мугалимдеримдин кеңеши менен "Манас" университетинин түркология факультетине тапшырдым. Менин жашоомдо жогорку окуу жай абдан чоң роль ойноду. Университеттен мыкты окумуштуу, профессорлордон билим алып, ар кыл өлкөдөн келген ар башка улуттагы жаштар менен бир тайпада окудук. Таш бетиндеги түрк элдерине тийиштүү байыркы руникалык жазууларды окуп, казак, уйгур, өзбек, башкыр, татар жана улуу Осмон империясынын убагындагы түрк тилдерин изилдедик. Менин өнүгүү, сырткы дүйнөдөгү жашоомо жол ачкан кыргыз-түрк лицейи болду.

Бизнесвумен, основательница компании по медицинскому турзиму в Турции Лира ЖолчиеваЛира Жолчиева
© Фото / из личного архива Лиры Жолчиевой
Бизнесвумен Лира Жолчиева

– Түркияга кандайча барып калдыңыз?

– Башынан эле өзүм башкарганды жактыргандыктан бизнес жасоого кызыгуум күч болчу. Сочиге жеке иштерим менен бара жатып Стамбул аркылуу учканбыз. Арадан сегиз саат тыныгуу бар эле. Ошондо убакытты текке кетирбей, аэропорттон жалгыз чыгып, метрого алгач ирет отуруп кыргыз-түрк "Достук" коомуна келгем. Ал жактагылар жылуу тосуп алышып, бир аз болсо да шаар менен таанышкам. Ошондо "Стамбул, мен сага бир күнү сөзсүз кайтып келем", – деп өзүмө сөз берген элем.

2013-жылы бизнес ачуу максатында "Жаш ишкерлер ассоциациясы" менен биргеликте Түркияга он күндүк бизнес саякатка келип кеткем. Ошондо келем деп кеткен Стамбул менен жакындан таанышып, Европа жана Азияны бириктирип турган Босфор көпүрөсүн көрүп, кемеге түшүп Босфор кысыгын айланганбыз. Ишкерлер менен жемиштүү бизнес-саякат жасадык. Ишкерлик тууралуу абдан керектүү маалыматтарды алып кеткем. Биздин делегациянын ичинде белгилүү "Супара" комплексинин азыркы жетекчиси Жаңылсынзат Турганбаева эже да бар болчу. Эң кызыгы, делегациянын уюштуруу иштеринде катачылыктар болуп, эже экөөбүз мейманканада бир номерде түнөгөнбүз. Бат эле тил табышып, кызыктуу маектешип отурдук. Ал мага басып өткөн жолун, Табылды Эгембердиевдей улуу инсан менен кандайча таанышканын, бизнеске болгон кызыгуусун, жаңы идеяларын айтып берген. Ошондо ошол түн бүтпөсө экен деп отургам, себеби ал адам мага абдан күчтүү мотивация берген.

Нью-Йорктогу медайым Нуркыз: моргдо орун жок, эки контейнер да өлүккө толуп калды

— Кийин бизнес жасоо үчүн бардыңызбы?

— 2014-жылы дипломумду колго алып, Түркияда иштөөнү туура көрдүм. Алгач балдарга англис тилин үйрөтүп иштедим. Бул аралыкта түрктөрдүн маданиятын, тилин-дилин жакындан таанып, эл-жер кыдырып, саякаттап жүрдүм. Эгей деңизинин жээгин бойлой көп шаарларда болдум. Измир шаары өтө жакты. 2017-жылы ири холдингдердин биринин эл аралык мамилелер департаментинде бир жылдай иштеп көрдүм. Ишкерлик баары бир оюмдан кетпей койду. Ошентип, 2018-жылы "Фейшн Лили Стамбул" деген бренд менен Кыргызстанда кийимдерди сата баштадым. Бир топ белгилүү инсандар менен иштешип, аларга стилистик-байер кызматын көрсөттүм. Стамбулдун көптөгөн белгилүү дизайнерлери менен таанышып, алардын мода көргөзмөлөрүнө катышып жүрдүм. Андан кийин көп кыргызстандыктарды Түркиянын медицинасы кызыктырарын жана ага муктаждык чоң экенин байкадым.

Бизнесвумен, основательница компании по медицинскому турзиму в Турции Лира Жолчиева
© Фото / из личного архива Лиры Жолчиевой
Бизнесвумен Лира Жолчиева

— Ошондон кийин медицина жаатында иштөө чечимин кабыл алдыңызбы?

— Ооба. Негизинен кичинемден эле дарыгер болууну каалачумун.

— Сиз түзгөн "Компас" компаниясы Кыргызстандан ооруп барган бейтаптарга кандай кызмат көрсөтөт?

— Компаниянын ачылганына эки жылдын жүзү болду. Аны түптөөгө бир жагынан Кыргызстандын медицинасынын чабалдыгы жана ар кандай ооруга чалдыккан бейтаптардын көптүгү, алардын чет элдик клиникалардын жардамына муктаж болуп жатканы себеп болду. Учурда компаниябыздын расмий кызматташкан 45ке жакын клиникалары бар. Ушуга чейин ооруган көп эле мекендешибизге жардам бердик. Кыргызстандан абдан оор акыбалдагы адамдар жардам сурап кайрылышат. Биз аларга сапаттуу жана арзан баада дарылай турган ооруканаларды таап, сүйлөшүп беребиз. Котормочулук жагынан да жардамдашабыз. Бул үчүн биз бейтаптан акы албайбыз. Бардыгы бекер. Биздин компания Түркиянын Саламаттык сактоо министрлигинин астындагы чет элдик бейтаптар менен иштөө департаментинин жалгыз расмий өкүлү болуп эсептелинет. Башка компаниялар өз мамлекетинде туруп эле келишим түзүп, бейтапты жөнөтүп коюшат. Биз кыргызстандык бейтапты Түркияга келгенде тосуп алып, бөлөк эл, бөтөн жерде жалгыз калтырбай жардам берип коштоп жүрөбүз. Анын укугун коргоп, көйгөйлөрүн чечип, дарылануу баасын арзандатып сүйлөшүп бергенге аракеттенебиз.

Өзүн атып алган кызга донордун жүзүн салып... Кыргызстандык хирургдун баяны

Бизнесвумен, основательница компании по медицинскому турзиму в Турции Лира Жолчиева
© Фото / из личного архива Лиры Жолчиевой
Бизнесвумен Лира Жолчиева

— Мында компаниянын кандай финансылык кызыкчылыгы бар?

— Кызыкчылыгыбыз клиникалар менен байланыштуу. Алар ар бир бейтап үчүн бизге бонус төлөп берет. Пандемия учурунда да Түркиянын алдыңкы дарыгерлери менен түз эфирлерди уюштуруп, пульмонологдордун жана инфекционисттердин жаңы делген дарылоо ыкмаларын айтып берип жаттык. Пандемия ар бир мамлекеттин медицинасынын акыбалын көрсөтүп койду. Анын ичинде Кыргызстандагы ооруканалар менен бирге дарыгерлердин жетишсиздигинин, саламаттыкты сактоо тармагынын чабалдыгы сезилип калды. Түркияда башка мамлекеттерге караганда пандемия учурунда адам өлүмү аз болду.

— Чет мамлекетте дарыланууга муктаж бейтаптардын арасында алданып калгандары кезигеби?

— Бейтаптардын арасында башка туура эмес адамдарга же жакшы эмес компанияга туш болуп алданып калгандар бар. Натыйжада доктурга көрүнө албай же акчасын ала албай калган учурлар көп болот.

— Кыргызстандыктар кайсы оорулар менен көп кайрылууда?

— Кыргызстандагы статистикага таянсак, акыркы он жылда боордун циррозу, бөйрөк оорулары кескин түрдө көбөйдү. Тилекке каршы, Бишкекте бөйрөктү же боорду алмаштыруу операциялары жасалбагандыктан ооруга чалдыккандар чет мамлекеттин медицинасына кайрылууга муктаж. Көбүнчө неврологиялык, нейрохирургиялык, гематология жана онкологиялык ооруларга чалдыккандар келүүдө.

Бизнесвумен, основательница компании по медицинскому турзиму в Турции Лира Жолчиева
© Фото / из личного архива Лиры Жолчиевой
Бизнесвумен Лира Жолчиева

— Эмне үчүн ооруга шыпаа издегендер Түркияга көп барышууда?

— Түркиянын өндүрүшү кандай алдыга кетсе, медицинасы да ошондой жакшы өнүккөн. Акыркы он жылда эле бул тармак дүйнөлүк деңгээлге чыгып, эң алдыңкы беш өлкөнүн катарына кошулду. Ошондой эле Түркиянын Саламаттыкты сактоо министрлиги акыркы убакта медицинаны өнүктүрүүгө 30 миллиард доллар жумшаганын айтты. Ал эми докторлорго Америка жана Европада тажрыйба алмашуу боюнча мамлекет тарабынан тынымсыз финансылык колдоо көрсөтүлүп келет. Израиль жана Германияга салыштырмалуу 30-40 пайыз арзан жана сапаттуу медициналык тейлөө жүргүзүлүүдө. Ар бир адамдын дарылануусу боюнча протокол даярдалат. Түркияга Европадан, Россиядан, Азиядан, Араб өлкөлөрүнөн шыпаа издеп келгендер көп. Түркиянын президенти Режеп Тайип Эрдоган "биз эмне үчүн медицинаны өнүктүрүүгө көп каражат жумшап жатабыз? Себеби келечекте Түркияны дүйнөлүк медицина борборуна айлантабыз" — деп айткан. Ушундай максаттары бар.

— Бирок дарыланууга кызмат көрсөтүүнүн баалары биздин мекендештер үчүн кымбат болуп калганы да көйгөй болууда. Анткени акчалай жардам сурагандар ого эле көп...

— Албетте, менчик клиникалар кымбат болсо, мамлекеттик ооруканалары арзаныраак келет. Биздин компания Түркиянын Саламаттык сактоо министрлигинин алдындагы расмий өкүл болгондуктан мекендештерге мамлекеттик клиникалардан арзаныраак дарылоо шарттарын караштырып беребиз. Операция да ар түрдүү болот. Мисалы, кулагы укпаган балдарга кохлеардык имплантты орнотуу операциясын алсак, аппарат Германиядан келет. Имплант аппараты 11 миң доллардан 25 миң долларга чейин болот. Андан кийин ага операциянын, дарыгердин, клиниканын акысы кошулат. Операциялардын эң оору — боорду трансформациялоо. Ал 11 саат, кээде 18 саатка чейин созулат. Ошондой эле өтө кымбат дарылар колдонулгандыктан бул операциянын баасы да кымбат турат.

868
Белгилер:
операция, медицина, Түркия
Тема боюнча
Баланын алаканы менен таманы шишийт. Кавасаки синдрому тууралуу эмне билүү керек
Чүй облусундагы Оруу-Сай лыжа базасы. Архив

Бейшембиге карата аба ырайы

10
3-декабрга караган түнү республиканын тоолуу райондорунда кар жаайт. Дыйканчылык аймактарында жаан-чачын болбойт. Батыштан соккон шамалдын ылдамдыгы секундасына 4-9 метрге жетет.

БИШКЕК, 2-дек. — Sputnik. 3-декабрь күндүз өлкөнүн көпчүлүк аймактарында күн ачык болот. Бул тууралуу Кыргызгидромет билдирди.

Абанын температурасы Чүй, Ош, Жалал-Абад, Баткен аймактарында +3…+8, Талас жергесинде -2…+3, Ысык-Көлдө 0…+5, Нарын облусунда -2…+3 градусту көрсөтөт.

Ош шаарында кар жааса, Бишкекте күн ачык болот. Күндүн табы борборубузда жана Ошто +6…+8 градус жылыйт.

10
Белгилер:
декабрь, Кыргызстан, аба ырайы
Тема боюнча
Жыл аяктаарда ызгаар суук болобу? Декабрга карата аба ырайы
Россиянын президенти Владимир Путин

Путин келерки жумада коронавируска каршы эмдөө жүргүзүүнү тапшырды

29
(жаңыланган 20:31 02.12.2020)
2020-жылдын август айында Россиянын Саламаттык сактоо министрлиги дүйнөдөгү алгачкы вакцина катары Гамалея атындагы илимий борбордо жасалган "Спутник V" препаратын каттоого алган.

БИШКЕК, 3-дек. — Sputnik. Россиянын президенти Владимир Путин вице-премьер Татьяна Голиковага келерки жумадан тарта коронавируска каршы масштабдуу эмдөөнү баштоону тапшырды. Бул тууралуу РИА Новости жазды

​Эске салсак, буга чейин БУУдагы Россиянын атайын өкүлчүлүгү жана Саламаттык сактоо министрлиги "Спутник V" вакцинасынын бет ачарын өткөрөрү айтылган.

Вице-премьер Эльвира Сурабалдиева брифинг учурунда
© Фото / Республиканский штаб КР по борьбе с COVID-19
"Спутник V": COVID-19га каршы вакцина" деп аталган виртуалдык иш-чара БУУнун Башкы ассамблеясынын атайын комиссиясынын аймагында өтөрү маалымдалган. Отурумда россиялык бул препарат боюнча кенен маалымат берилмекчи.

2020-жылдын август айында Россиянын Саламаттык сактоо министрлиги дүйнөдөгү алгачкы вакцина катары Гамалея атындагы илимий борбордо жасалган "Спутник V" препаратын каттоого алган. Октябрда дагы бир "ЭпиВакКорона" аттуу вакцина тууралуу жарыяланган. Анын Новосибирскидеги "Вектор" борборунда иштелип чыкканы маалым.

29
Белгилер:
вакцина, коронавирус, Россия
Тема боюнча
Коронавирус G20 саммитин бузду. Батыш башканын вакцинасын батырбайт
Путин Кыргызстан, Беларусь жана Карабахтагы окуялар боюнча оюн айтты
КР президентинин милдетин аткаруучу Талант Мамытов

ЖККУ саммитинде маанилүү документтерге кол коюлду. Тизме

0
Бүгүн, 2-декабрда, өткөн саммитке КР президентинин милдетин аткаруучу Талант Мамытов катышты. Жыйынга Россия Федерациясы төрагалык кылды.

БИШКЕК, 2-дек. — Sputnik. Жамааттык коопсуздук келишим жөнүндө уюмуна (ЖККУ) мүчө мамлекеттердин башчылары бүгүнкү жыйында 15 документке кол коюшту.

Бүгүн, 2-декабрда, өткөн саммитке КР президентинин милдетин аткаруучу Талант Мамытов катышты.

Сессиянын жыйынтыгында ЖККУнун Жамааттык коопсуздук кеңешинин мүчөлөрү тарабынан аларга кол коюуга жеке тартипте киргизиле турган бир катар документтердин долбоорлору жактырылды.

Алар:

  • Жамааттык коопсуздук жөнүндө келишим уюмунун Жамааттык коопсуздук кеңешинин декларациясы;
  • ЖККУнун Жамааттык коопсуздук кеңешинин адилеттүү жана туруктуу тынчтык түзүмүн куруу жөнүндө билдирүүсү;
  • ЖККУнун “2021-2025-жылдарга карата Жамааттык коопсуздук келишим жөнүндө уюмуна мүчө-мамлекеттердин аскердик кызматташтыкты өнүктүрүү планы тууралуу” чечими;
  • ЖККУнун “2021-2025-жылдарга карата Жамааттык коопсуздук келишим жөнүндө уюмуна мүчө-мамлекеттердин баңги заттарга каршы стратегиясы тууралуу” чечими;
  • ЖККУнун “Жамааттык коопсуздук жөнүндө уюмдун алкагында биргелешип иштелип жана өндүрүлүп жаткан аскердик максаттагы продукциялар менен бардык этаптарда камсыз кылуу жана алардын сапатын көзөмөлдөө боюнча комплекстүү жана системдүү мамилелердин концепциясы жөнүндө” чечими;
  • ЖККУнун “Жамааттык коопсуздук жөнүндө келишим уюмуна мүчө-мамлекеттердин мамлекеттик бийлик органдары үчүн кадрларды даярдоо тутумун өркүндөтүү боюнча кошумча чаралар жөнүндө” чечими;
  • ЖККУнун “Жамааттык коопсуздук жөнүндө келишим уюмунун Тынчтык куруу күчтөрүнүн кызматкерлерин даярдоо боюнча базалык окуу-методикалык уюму жөнүндө” чечими;
  • ЖККУнун “Жамааттык коопсуздук жөнүндө келишим уюмуна мүчө-мамлекеттердин тынчтык куруу контингенттеринин курамы жана жайгаштырылышы тууралуу протокол жөнүндө” чечими;
  • ЖККУнун “Жамааттык коопсуздук жөнүндө келишим уюмунун катчылыгындагы квоталык кызмат орундарын бөлүштүрүү жөнүндө” чечими;
  • ЖККУнун “Жамааттык коопсуздук жөнүндө келишим уюмунун 2019-жылдагы бюджетинин аткарылышы тууралуу отчёту жөнүндө” чечими;
  • ЖККУнун “Жамааттык коопсуздук жөнүндө келишим уюмунун 2021-жылга карата бюджети жөнүндө” чечими;
  • ЖККУнун “Жамааттык коопсуздук жөнүндө келишим уюмунун сыйлыктары менен сыйлоо жөнүндө” чечими;
  • ЖККУнун “Уюмга төрагалык кылуу, Жамааттык коопсуздук кеңешинин кезектеги сессиясын өткөрүү убактысы жана орду жөнүндө” протоколдук чечими;
  • ЖККУнун аскерлерин (Жамааттык күчтөрүн) материалдык-техникалык жана медициналык жактан биргелешип камсыздоо жөнүндө макулдашуусу (документ эл аралык келишимдерге кол коюу үчүн зарыл болгон мамлекет ичиндеги жол-жоболор бүткөндөн кийин ЖККУнун ЖКК мүчөлөрүнө кол коюуга киргизилет);
  • 2007-жылдын 6-октябрындагы ЖККУнун Тынчтыкты куруу ишмердиги жөнүндө макулдашуусуна өзгөртүүлөрдү киргизүү жөнүндө протоколу (документ эл аралык келишимдерге кол коюу үчүн зарыл болгон мамлекет ичиндеги жол-жоболор бүткөндөн кийин ЖККУнун ЖКК мүчөлөрүнө кол коюуга киргизилет).
0
Белгилер:
документ, Талант Мамытов, ЖККУ, Кыргызстан
Тема боюнча
ЖККУнун коргоо министрлеринин отуруму өттү. Талкууланган маселелер
Талант Мамытов ЖККУ лидерлерине президенттик шайлоо таза өтөрүн убадалады