Ноутбук менен колдонуп жаткан адам. Архив

Жолдошумдун жатып ичерлиги көкөйгө тийди. Келиндин каты

(жаңыланган 14:04 22.12.2020)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасына күйөөсүнүн бекер жаткандыгынан тажап, анын айынан үйдө уруш көбөйгөнүн айткан келин кат жазган.

Саламатсыздарбы! Ушул рубрикадан үй-бүлөлүк суроолор менен психологго кайрылгандарды окуп, мен да сиздерге өзүмдүн арыз-муңумду айтып кайрылууну чечтим. Биздин үйдөгү маселебиз жолдошума жана акча-тыйынга тийиштүү. Ортодо эки кызыбыз бар. Үйлөнгөнүбүзгө он жылдан ашып калды. Өзүм Таластын кызымын, бирок бишкектик жигитке турмушка чыккам. Жалгыз бала, кайындарымдын шаардын ортосунда үч бөлмөлүү үйү бар. Ата-энеси менен чогуу турабыз. Жолдошумдун кесиби программист. Аябай сабаттуу, билимдүү жигит, бирок эч жерде иштебейт. Башында ашып кетсе жарым жыл иштеп эле "менин деңгээлимдеги жумуш эмес экен" деп чыгып кетчү же айлыгы жакпайт. Ата-энеси жумуш таап беришет, ал жакта деле жарытып иштебейт.

Мурда кайнатам банкта иштеп, кайненемдердин акчасы менен жашагандыктан "эми, иштээр, азырынча көңүлүндөгүдөй жумуш табалбай жатат го" деп ойлочумун. Бирок ишенүүнүн да чеги болот экен. Азыркыга чейин туруктуу жумушу жок. Кайындарымдан акча сурай берүү жаныма батканда университетке жумушка чыгып кеткем. Менин маянам деле аз. Кыздарымдын бакчасына, кийимдерибизге эле жетет. Кыскасы, өзүбүздөн артпайт. Калган азык-түлүктөн баштап чыгымдын баары атам-апамдардын мойнунда. Бул кишилер да карып бара жатат. Канчага чейин булардын мойнунда отурабыз билбейм. Кайнатам баласын тилдегени менен менин алдымда өзүн күнөөлүү сезип калат. Акчанын айынан жолдошум экөөбүз өзүнчө үй-бүлө катары эч ким менен да катышпайбыз. Кыздарды бакчага жеткирип, кайра алып келгени болбосо күйөөмдүн кечке тиктегени компьютер менен телевизор болуп калды. Уятынан үйдөгү таштандыны төгүшүп, апам менен азык-түлүк алганы барат.

"Үйү бар, кайнатаңдар иштейт, сага эмне жетишпейт?" — деген туугандар да болот. Бирок күйөөңдүн айынан көз каранды болуп жашаган эң жаман экен. Жедеп ата-энеси уулун аяп, оозу-мурдуна тыга берип ак кол болуп калган деп ойлойм. Бирок кайненем күйөөсүнө көрсөтпөй баласына акча катып берип, болбой эле бапестеп турат. Жолдошум достору менен кээде мончого же бильярдга барып эс алат. Андайда мен да акча бербейм, кайнатамдан сурай албайт. Бирок энесинин акчасы менен барат.

Жолдошум экөөбүз да акыркы убакта көп урушчу болдук. Өмүр бою түйшүк тартамбы? Муну кантип жумушка көндүрөм. Кээде батирге чыгып кетсек, кыйналганда иштеп баштайбы деп ойлоп коём. Бирок өзүм да ага батына албай турам. Ушинтип ар кайсыны ойлоно берчү болдум. Кантип тарбиялоого болот? Деги эле мүмкүнбү?

Муратбек Султанбеков, "Психоанализ.кг" психотерапия борборунун жетекчиси:

—Бул келиндин катын окусак өтө деле чоң көйгөй жок. Мында убактылуу кризис камтылган. Илгертен эле бизде эркек кишинин милдети үй-бүлөсүн камсыздоо. Айрым өлкөлөрдө аял менен эркектин акча табуусун бирдей карашып, экөө тең укукта экени белгиленсе, кээ бир мамлекеттерде акча табуучу катары эркекти гана карайт. Ошондой эле ар бир үй-бүлөнүн өз ара мамилеси, түшүнүгү, келишими болот. Бул жубайлар деле он жыл мурда бири-биринин кайсы бир тарабын, мүнөзүн жактырып үйлөнүшкөн да. Баш кошордо жаштар бири-бирине көп учурда убада беришет. Бирок кээде алар турмуш-шартка, менталитетке жараша аткарылбай калат. Бул үй-бүлөнү алып карасак, келиндин күйөөсүндө акча табууга мотивация жок өңдүү. Муктаждык болуп калса апасы акча берип коёт экен. Иштебей калсам, эртең ачка калбайбызбы деген коркунуч жок. Каттын ээси да жолдошун акча табуу жөндөмү жокпу деп түйшөлүүдө.

Жолдошуңуз ата-энесине, сизге таянып алган. Андыктан акча табууга муктаждыгы жок. Негизи үй-бүлөдө ар кими өз милдетин аткарганы жакшы. Эч качан аял киши эркектин түйшүгүн, милдетин талашпашы керек. Көбүнчө күйөөлөр үйдө өзүн эркектей сезбей калганда — болгон күчүн ичкиликтен, аялына кол көтөрүүдөн же башка аялдарга баруудан чыгара баштайт. Аял киши да жолдошуна түрткү берип, анын ишке жөндөмүн ойготуп, мотивация берүүсү кажет. Ошондой эле ага үй-бүлө башчысы үйдөгү маселелер боюнча ата-энеси, жубайы да чечим чыгаруу мүмкүнчүлүгүн берсеңер дурус болмок. Ушундай жол менен акырындап анын ишенимин арттырууга мүмкүнчүлүк бар. Ал деле ойлонот.

Негизинен эркекти үй-бүлө башчысы катары ага ишеним көрсөтүп, колдогон оң. Антпесе, ал өзүн таштап, баалабай калат. Мунун аркасы менен ал эч нерсе менен иши жок, жанын багып эле жүрө бергенге өтөт. Каттын ээси да жолдошу менен сүйлөшүп, өзүнүн күнөөсүн да анализдеп көргөнү туура. Ошондой эле ата-энелер да балдарынын жүгүн ашыкча мойнуна илип албаганга аракет кылганы дурус.

Белгилер:
күйөө, акча, келин, психолог
Тема боюнча
Апам менен аялымдын урушунан тажадым. Мигрант болуп кетүүнү көздөгөн жигиттин каты
Ата-энем балалуу аял алышыма каршы чыгып, айлам кетти. Жесил эркектин каты
Ооруканада палатадагы капельница. Архив

Бишкекте уу коргошунга ууланып төртүнчү бейтап ооруканага түштү

(жаңыланган 22:48 20.04.2021)
Учурда бейтап Бишкектеги Травматология жана ортопедия илим-изилдөө борборунда жатат. Абалы туруктуу экени айтылды.

БИШКЕК, 20-апр. — Sputnik. Бишкек шаарында уу коргошунга ууланган төртүнчү адам ооруканага түштү. Бул тууралуу кабарды Саламаттык сактоо жана социалдык өнүктүрүү министрлигинин маалымат кызматы тастыктады.

Билдирүүгө ылайык, бейтап тундурманы беш күндөн бери үйүндө ичип жатканын айткан. Учурда ал Бишкектеги Травматология жана ортопедия илим-изилдөө борборунда жатат. Абалы туруктуу.

Кыргызстандын президенти Садыр Жапаров
© Пресс-служба президента КР / Султан Досалиев
Ушуну менен борбор калаада уу коргошунга ууланган төртүнчү бейтап катталганы маалым болду. Бүгүн аталган ооруканага 71 жана 67 жаштагы жубайлар түшүп, алдын ала диагнозу "аконитке уулануу, аритмогендик шок" деп коюлган.

Андан мурдараак Тез жардам кызматы уу коргошунга ууланган киши ооруканага жеткирилгенин билдирген. Министрлик ал белгисиз затка ууланганын айтып, каны менен заарасы экспертизага жиберилгенин маалымдады. 

Уу коргошун чуусу

Президент Садыр Жапаров Кыргызстандын дарыгерлери коронавирустан 2-3 күндө айыктырган ыкма тапканын айткан. Көп өтпөй мамлекет башчы өзү аконит (уу коргошун) кайнатып жасап жатканы белгилүү болду

Ал эми саламаттык сактоо министри Алымкадыр Бейшеналиев түз эфирде уу коргошун ичип, мындан ары коронавирустан дарылоого колдонуларын жар салган. Ошол эле учурда бул тундурманы адам муздак ичип алса беш мүнөткө жетпей өлөрүн эскерткен.

Белгилер:
Бишкек, уулануу, бейтап, оорукана, Ысык-Көл тамыры, уу коргошун
Тема:
Уу коргошун чуусу
Тема боюнча
Уу коргошун ичкендерден кагаз жүзүндө уруксат алган эмеспиз. Министрдин маеги
Милиция кызматкерлерин фуражкалары. Архив

Айзада киши колдуу болгон жердин сүрөтүн жарыялаган 3 милиционер жазаланды

(жаңыланган 22:52 20.04.2021)
Анын ичинде кылмыш катталган жерге медициналык кол капты таштап салуу фактысы боюнча да иликтөө жүргүзүлгөн.

БИШКЕК, 20-апр. — Sputnik. Айзада Канатбекова киши колдуу болгон жердин сүрөтүн жарыялаган үч милиция кызматкери жазаланды. Бул тууралуу Чүй облустук милициянын маалымат кызматы билдирди.

Социалдык тармактарга тарап кеткен сүрөт, анын ичинде кылмыш катталган жерге ташталган медициналык кол каптар боюнча фактынын негизинде кызматтык иликтөө жүргүзүлгөн. Иликтөөнүн башкы максаты милдетин так аткарбай, көңүл кош мамиле жасаган кызматкерлерди жоопко тартуу болгон.

Ким кандай жаза алды:

  • Аламүдүн РИИБдин жоруктар бөлүмүнүн кызматкери, милициянын лейтенанты А. Экеевге катуу сөгүш;
  • Аламүдүн РИИБдин криминалдык милиция кызматынын жетекчиси, милициянын майору К. Самаевге катуу сөгүш;
  • Аламүдүн РИИБдин Криминалдык топту коштоп жүрүүчү инспектор-криминалист, милициянын капитаны М. Янванчиновго кызматына дал келбестиги боюнча эскертүү.

Айзаданын өлүмү

5-апрель күнү эртең менен саат 7:00дөр чамасында Медеров жана Тыныстанов көчөлөрүнүн кесилишинен үч жаран 27 жаштагы кызды кызыл түстөгү автоунаага салып кеткен. Кыздын туугандары ошол эле күнү издеп баштап, Биринчи май райондук милицияга саат 7:30да кабарлашкан. Бирок издөө иштери кечеңдеп жатканына нааразы болуп, эртеси ЖМКларга кайрылышкан.

7-апрелде изделип жаткан автоунаа Бишкектин чет жагындагы Арашан менен Чокморов айылдарынын ортосунан табылган. Ал тууралуу милицияга жергиликтүү чабан кабар берген.

Автоунаанын ичинен киши колдуу болгон Айзада Канатбекованын жана 36 жаштагы кишинин бычакталган сөөгү табылган. Кызды ала качууга катыштыгы бар делип төрт шектүү кармалган.

Айзада Канатбекованын өлүмү боюнча кызматтык иликтөөнүн натыйжасында Бишкек ШИИБдин жана Биринчи май райондук милициясынын начальниктери баш болгон бир катар жетекчилер кызматтан алынган.

Белгилер:
Айзада Канатбекова, жаза, сүрөт, өлүм, кызматкер, милиция, кылмыш
Тема:
Бишкекте 27 жаштагы кыздын уурдалып, өлтүрүлүшү
Тема боюнча
Кабар алып туралычы! Эже-карындашына кайдыгер ага-инилерге кайрылуу
ИИМ: митингчилерди милиция кызматкерлери кууган эмес