Ташиев: Райым Матраимовдон алынган сегиз батир УКМК кызматкерлерине берилет
(жаңыланган 12:02 24.12.2020)
Турак жайлардын жалпы аянты 1309,8 чарчы метрди түзүп, ар биринин чарчы метри 41 973 сомдон 67 699 сомго чейин бааланган.БИШКЕК, 24-дек. — Sputnik. Бажы кызматынын төрагасынын мурдагы орун басары Райым Матраимовдон алынган батирлердин сегизи чекисттерге берилет. Бул тууралуу УКМКнын төрагасы Камчыбек Ташиев маалымат жыйында билдирди.
Анын айтымында, Матраимов 1,4 миллиард сомду накталай, калган 600 миллион сомуна кыймылсыз мүлктөрүн өткөрүп бергенин айтты. Анын ичинде бир соода борбору, тогуз батир бар.
"Соода борборун мамлекетке өткөрүп, андан түшкөн кирешени бюджетке которобуз. Ал эми сегиз батирди УКМКнын кызматкерлерине калтырабыз. Бир турак жайынын аянты чоң, менимче, 280 чарчы метр болсо керек. Анда биздин кызматкерлер жашай албайт, аны бала бакчага же социалдык мекемелерге беребиз. Эки-үч күндүн ичинде өкмөттүн токтому менен аталган мүлктөрдү бөлүштүрөбүз", — деди Ташиев.
УКМК төрагасы алынган турак жайлардын жалпы аянты 1309,8 чарчы метрди түзүп, ар биринин чарчы метри 41 973 сомдон 67 699 сомго чейин бааланганын кошумчалады. Ошондой эле ал Матраимов батирлердин баарын ижарага берип келгенин белгиледи.
Ал эми соода борборун бир чарчы метри башка жакта 1500 доллар экенине карабай, 945 долларга баалап алышканын айтты.
Соңку бир суткада 93 адам коронавирус жугузуп, экөө каза болду
(жаңыланган 11:07 23.01.2021)
Бүгүнкү күндө ооруканаларда 689 бейтап дарыланууда. Алардын 437си орто оордукта, 220сы оор абалда, 28и өтө оор абалда жатат.БИШКЕК, 23-янв. — Sputnik. Кыргызстанда соңку бир сутканын ичинде 93 адам коронавирус жугузуп алса, 108 бейтап ооруну жеңип чыкты. Бул тууралуу Республикалык штаб кабарлады.
Илдеттен эки адам каза болуп, алар Чүй жана Ысык-Көл облусунун тургундары болгону айтылды. Ушуну менен өпкөнү сезгенткен оорудан 1 398 кыргызстандык каза болду.
Бир сутка ичинде катталган жаңы учурлар:
- Бишкек – 27;
- Ош – 2;
- Чүй облусу – 29;
- Ош облусу – 4;
- Талас облусу – 2;
- Нарын облусу – 1;
- Ысык-Көл облусу – 21;
- Жалал-Абад облусу – 5;
- Баткен облусу – 2.
Бүгүнкү статистиканы кошкондо өлкөдө COVID-19 жугузуп алган адамдардын жалпы саны 83 796га жетти.
Айыгып чыккандар:
- Бишкек – 38;
- Ош шаары – 2;
- Чүй облусу – 35;
- Ош облусу – 3;
- Нарын облусу – 3;
- Ысык-Көл облусу – 23;
- Жалал-Абад облусу – 1;
- Баткен облусу – 3.
Ушуну менен коронавирустан сакайгандардын саны 79 772 кишини түздү.
Бүгүнкү күндө ооруканаларда 689 бейтап дарыланууда. Алардын төртөө канааттандырарлык абалда, 437си орто оордукта, 220сы оор абалда, 28и өтө оор абалда жатат.
Мындан сырткары, 1006 бейтап үй шартында дарыланууда.
Бишкекте электрондук айдоочулук күбөлүктүн пилоттук долбоору ишке кирет
БИШКЕК, 23-янв. — Sputnik. Быйыл санариптештирүүнүн алкагында айдоочулук күбөлүктөрдү жана автоунаалардын паспортторун электрондук түргө өткөрүү пландаштырылууда. Бул тууралуу Мамлекеттик каттоо кызматы билдирди.
Маалыматта айтылгандай, аталган долбоор пилоттук негизде адегенде Бишкек шаарында башталат.
"Пилоттук түрдө сыналуучу долбоордо унаа башкарган адамдар бет түзүлүшү аркылуу идентификацияланып, келечекте айдоочунун күбөлүгүн жана унаанын документин каттоо электрондук түргө өтүүгө мүмкүндүк берет. Электрондук документтер мобилдик тиркемелер аркылуу сунушталат", — деп айтылат маалыматта.
Өткөн жылы "Унаа" ишканасы тарабынан автонуааларга 413 миң 218 мамлекеттик номер белгилери, 250 миң 038 транспорт каражатын каттоо тууралуу күбөлүктөр берилген.
Ал эми эл аралык үлгүдөгү айдоочулук күбөлүк алгандардын саны 189 миң 526 адамга берилген.