Төрөт үйү. Архив

Быйыл 11 ай ичинде канча ымыркай төрөлүп, канча киши көз жумду. Статистика

103
(жаңыланган 12:17 24.12.2020)
Белгилүү себептерден улам июнь айынан баштап өлүм каттоолорунун саны көбөйгөн. Сентябрь айынан тарта гана сандар төмөндөй баштаган.

БИШКЕК, 24-дек. — Sputnik. Мамлекеттик каттоо кызматы жарандардын 2020-жылдын 11 ай ичинде туулгандыгы жана каза болгондугу жөнүндө статистикалык маалымат берди.

Ага ылайык, орто эсеп менен ай сайын төрөлүү өлүмгө караганда төрт эсе көп катталган.

Быйыл январь айында МККнын алдындагы Калкты каттоо жана жарандык абалдын актыларын каттоо департаменти жаңы төрөлгөн 13 миң ымыркай менен үч миң өлүмдү документтештирген. Ал эми апрелге чейин ушул эки көрсөткүчтө төмөндөө байкалган.

Февраль айында 12 миң, март айында 10 миң төрөт кабыл алынган. Ал эми каза болгондор февралда 2,9 миң, мартта 2,4 миң болгон.

Ушул жылдын 24-мартынан 11-майына чейин Кыргызстанда коронавируска байланыштуу өзгөчө абал режими күчүндө болгон. Буга байланыштуу апрель айында Бишкек жана Ош шаарларындагы Жарандык абалдын актыларын каттоо кызматы иштебегендиктен документтештирүүлөр болгон эмес.

Өлкөнүн башка аймактарында 5 миң туулгандыгы жана 1,2 миң каза болгондугу жөнүндө күбөлүктөр берилген. Бул 11 айда төрөт жана каза болгондорду каттоо органында каттоонун төмөндөшүнүн эң төмөнкү чекити экени белгиленди.

Өзгөчө абал режими аяктагандан кийин иш калыбына келтирилип, карантин мезгилинде катталбаган иштер бүткөрүлгөн. Натыйжада май айында туулгандыгы жана каза болгондугу тууралуу күбөлүктөр өлкө боюнча апрель айына караганда 2,5 эсе көп берилген.

Туулгандарды каттоонун туу чокусу июнь айына туура келип, 18 миң ымыркайга алгачкы документтер берилген. Кийинки айда ЖААКтын төрөттү каттоо боюнча статистикасы 6 миңге азайып, 12 миңди түзгөн. Август айында 15 миң балага туулгандыгы тууралуу күбөлүк берилген, сентябрда бул көрсөткүч 16 миң, октябрда 14 миңге жакын, ноябрда 13 миң болгон.

Тилекке каршы, белгилүү себептерден улам июнь айынан баштап өлүм каттоолорунун саны көбөйгөн. Июнда 3,5 миң, июлда 4 миң, августта 4,5 миң болгон. Андан соң күзүндө көрсөткүчтөр төмөндөдү: сентябрь 3,6 миңди, октябрда болжол менен 3,4 миңди, ноябрда 4,1 миңди түзгөн.

Региондор боюнча туулгандыгы тууралуу күбөлүктөр июнь айында Ош облусунда баарынан көбүрөөк берилген, тагыраагы, 4 миң бала алган. Өлгөндүгү жөнүндө күбөлүктөрдүн эң азы май айында Ош шаарында катталган, 83 кишиники документтештирилген. Каза болгондон кийин актылардын эң көп катталышы август айында болуп, 881и Ош облусуна туура келген.

Жалпысынан 2020-жылдын 11 айында МККнын алдындагы ведомстволук орган 144 миң туулгандыгы жана 35,9 миң өлүмү жөнүндө күбөлүктөрүн берген.

103
Белгилер:
документ, каттоо, төрөт, өлүм, Мамлекеттик каттоо кызматы, Кыргызстан
Колл-центрдин ишкери. Архив

Бишкекте мугалимдер онлайн-сабак өтпөй жатса арызданууга болот. Номерлер

6
Ушул жумадан тарта борбор калаада 1, 5, 9 жана 11-класстын окуучулары мектепке барып окуй баштады. Калган класстар аралыктан билим алууну улантууда.

БИШКЕК, 23-янв. — Sputnik. Бишкек шаарынын вице-мэри Айжан Чыныбаева мугалимдер онлайн-сабакты өтпөй жатса кабарлап коюуну өзүнүн Facebook баракчасы аркылуу өтүндү.

Эске салсак, 18-январдан тарта борбор калаада 1, 5, 9 жана 11-класстын окуучулары мектепке барып окуй баштады. Ошол эле учурда бул класстын айрым окуучулары шартына жараша үйдөн да билим алса болору белгиленген. Аларга мугалим өзүнчө сабак өтөт, мындан сырткары, телеканалдарда телесабактар көрсөтүлөт.

"Социалдык тармактарда айрым мугалимдер онлайн-окутууну үзгүлтүккө учуратып, сабак өтпөй жатат деген маалыматтар пайда болду. Бул маалымат чындыкка дал келбейт. Биз жакынкы убакытта балдардын бардыгы окууну кадимкидей тартипте улантарына ишенебиз", — деп жазган Чыныбаева.

Вице-мэр окуу процессине байланыштуу педагогдор тарабынан мыйзам бузуулар болсо 0709 24 02 84 WhatsApp номерине кабарлап коюуну өтүндү.

6
Белгилер:
кайрылуу, мугалим, окуу, Бишкек мэриясы
Тема боюнча
Бишкектеги мектептерге 53,5 миңден ашуун окуучу бара баштады
Кыз апасы менен кинотеатрда. Архив

Балдар үчүн кинофильмдин сценарийине сынак жарыяланды

18
Сценарий жазууга катышууну каалагандардын арызы "Кыргызфильм" киностудиясынын электрондук почтасы аркылуу кабыл алынат.

БИШКЕК, 23-янв. — Sputnik. Төлөмүш Океев атындагы "Кыргызфильм" улуттук киностудиясы балдар үчүн кинофильмдин сценарийине сынак жарыялады. Бул тууралуу Маданият, маалымат жана туризм министрлигинен кабарлады.

Ага ылайык, арыздар "Кыргызфильм" киностудиясынын электрондук почтасы аркылуу кабыл алынат.

Сценарийдин тиркемесине төмөнкүлөр кирет:

  • болжолдуу аталышы;
  • жанр;
  • убакыт;
  • логлайн (кыскача баяндоо);
  • синопсис (кыскача мааниси).
"Сценарийлер америкалык форматта гана кабыл алынат. Ал эми тиркемелери менен өзү кыргыз тилинде жазылышы шарт. Жеңүүчүлөрдүн эмгеги киностудиянын расмий сайтына жарыяланат", — деп айтылат маалыматта.

Мыкты эмгектин ээсине 100 000 сом гонорар төлөнүп бериле турганы кошумчаланды.

18
Белгилер:
балдар, кино, сынак, сценарий
Тема боюнча
"Акыркы көч" тасмасы Дакка эл аралык кинофестивалына катышууда