Белгилүү мамлекеттик жана коомдук ишмер Жумабек Ибраимов. Архивдик сүрөт

Слесардын жардамчысынан премьерге чейин. Жумабек Ибраимов жөнүндө 6 факты

786
(жаңыланган 00:08 02.01.2021)
Бүгүн белгилүү мамлекеттик жана коомдук ишмер Жумабек Ибраимовдун туулган күнү. Эгемендикке ээ болгон республиканын алгачкы өкмөт башчыларынын бири болгон саясатчынын көзү тирүү болгондо быйыл 77 жашка толмок.

Sputnik Кыргызстан агенттиги анын эмгек жолундагы кызыктуу фактыларды сунуштайт.

Билимге умтулган слесарь

Жумабек Ибраимов Улуу Ата Мекендик согуш каарын чачып турган мезгилдери, 1944-жылы 1-январда Чүй облусунун Кемин районундагы Жаңы-Алыш айылында туулган. Айылдагы мектепти аяктагандан соң эмгек жолун айыл чарба техникасынын кыймылдаткычын оңдоо боюнча слесардын жардамчысы болуп, андан кийин нан комбинатында иштейт. Билим алууну, бир кесиптин ээси болууну эңсеген жаш жигит Фрунзедеги политехникалык жогорку окуу жайына тапшырып, аны ийгиликтүү аяктап, ошол жакта мугалимдикти аркалап калган. 

Инженер, конструктор...

Болочоктогу көрүнүктүү мамлекеттик ишмер 1976-жылы кесипкөйлүгүн жогорулатып Москвадагы курулуш институтуна стажировкага кетет. Кыргызстанга кайтып келгенде Фрунзе атындагы айыл чарба техникасын куруу заводунун жетекчиси инженер кызматына чакырткан. Кийинки жылы эле Балыкчыдагы ири ишканага инженер болуп барып, ал жакта бир жумада эле конструктордук жөндөмүн пайдаланып конвейердин жаңы эскизин иштеп чыгып, өндүрүштү жакшыртып, 37 жашында заводдун директору болгонго жетишкен. 

Экс-премьер-министр Кыргызстана и мэр города Бишкек Жумабек Ибраимов.
Александр Федоров
Жумабек Ибраимов Улуу Ата Мекендик согуш каарын чачып турган мезгилдери, 1944-жылы 1-январда Чүй облусунун Кемин районундагы Жаңы-Алыш айылында туулган

Кызматтык тепкичтери

Эл менен бат тил табыша билген, кесипкөй жаш Ибраимов кайсы кызматка дайындалбасын, иштин майын чыгара билген жетекчи болгонун анын замандаштары эскерет. Ал 1985-жылы Балыкчы шаардык элдик көзөмөл комитетинин төрагасы, андан соң ошол эле калаанын коммунисттик партиясынын биринчи катчысы болуп бекитилет. Үч жылдан кийин өлкөнүн компартиясынын уюштуруу иштери бөлүмүнүн башчысынын биринчи орун басары, Чүй облустук компартиянын экинчи катчысы болуп дайындалып, 1990-жылы СССРдин Жогорку Советтин бир, КРдин Жогорку Кеңешинин эки жолку депутаты болуп шайланган.

Алдыга талпынган…

Иш билги инсан союз кулап, мамлекет каатчылыкка кептелгенде эл керегине жараган. Дайым изденүүнүн үстүндө жүргөн Жумабек Ибраимов 1992-93-жылдары "Жанар" акционердик коомун башкарып, кийин Фрунзе ЭВМ заводун жетектөө милдети жүктөлөт. Тажрыйбалуу адис карызга белчесинен батып, чыгашага учураган ишканалардын өндүрүшүн жанданткан. Мисалы, союз маалында учактын борттук техникаларын даярдаган заводду калкка керектүү жабдууларды чыгартууга өткөргөн. Кыргыз Республикасынын эмгек сиңирген рационализатору өлкөнүн тез бутуна туруп, мамлекеттин элдин алдындагы милдеттерин аткаруу үчүн сырттан инвестиция тартууга, өз убагында туура саясий чечимдерди кабыл алууга бел байлаган. 

Видный государственный и общественный деятель, премьер–министр Кыргызской Республики Жумабек Ибраимов
© Фото / семейный архив Ибраимовых
Болочоктогу көрүнүктүү мамлекеттик ишмер 1976-жылы кесипкөйлүгүн жогорулатып Москвадагы курулуш институтуна стажировкага кетет. 37 жашында заводдун директору болгонго жетишкен

Акаевдин кеңешчиси

Чарбачыл жетекчи эгемендиктин алгачкы жылдарында президент Аскар Акаевдин көзүнө илинген. Өлкө башчы аны алгач борбор калаанын мэри кылып дайындап, андан кийин өзүнө жакындатып мамлекеттик катчы, кеңешчиси жана Жогорку Кеңеште ыйгарым укуктуу өкүлү кылып бекитет. Ошондой эле Мамлекеттик мүлктү башкаруу фондунун жетекчиси кызматын аркалаган.

Өтө жөнөкөй өкмөт башчы

Физика-математика илимдеринин кандидаты барган жеринде иштин майын чыгара иштеген саясатчы 1998-жылдын декабрь айында өлкөнүн премьер-министрлигине киришип, бир топ шалаакы аткаминерлерди кызматтан айдоого кудурети жеткен. Замандаштары анын элдин акчасын кантип үнөмдөө керектигин иш жүзүндө көргөзгөнүн айтып келет. Ал өкмөт башчысы болуп турганда Германияга эконом класстагы учак менен жанына үч адамды ээрчитип иш сапарга барып, көпчүлүккө үлгү болгон. 

Видный государственный и общественный деятель, премьер–министр Кыргызской Республики Жумабек Ибраимов
© Фото / семейный архив Ибраимовых
Физика-математика илимдеринин кандидаты барган жеринде иштин майын чыгара иштеген саясатчы 1998-жылдын декабрь айында өлкөнүн премьер-министрлигине киришип, бир топ шалаакы аткаминерлерди кызматтан айдоого кудурети жеткен

Төрт баланын атасы

Белгилүү саясатчы, коомдук жана мамлекеттик ишмер Султан Ибраимовдун архивдик сүрөтү
© Фото / из семейного архива семьи Ибраимовых
Мамлекеттик ишмер жубайы менен үч уул, бир кызды тарбиялап өстүргөн. Үй-бүлө башчысы балдарынан дайыма актыкты, тактыкты талап кылган. Улуу баласы Ильяс "Манас" эл аралык аэропортунун коопсуздук кызматында иштесе, экинчиси Нурдин энергетика тармагында эмгектенет. Кичүү уулу Абакир — жеке ишкер. Ал эми кызы Назгүл эл аралык Кызыл жарым ай коомунда директордун орун басары. Жумабек Ибраимов Москвада операция болуп, Кыргызстанга кайтып келгенден кийин 55 жашында онкологиялык оорудан улам көз жумган. Азыр саясатчынын ысымын борбор калаадагы бир көчө жана Кемин районунун Жаңы-Алыш айылындагы орто мектеп алып жүрөт.

786
Белгилер:
факты, Жумабек Ибраимов, мамлекеттик ишмер, саясатчы, Кыргызстан
Тема:
Кыргыздын көркөм өнөрү, белгилүү инсандары жөнүндө фактылар (375)
Тема боюнча
Чыныбай Турсунбеков бүгүн 60 жашка толмок. Саясий ишмер тууралуу 10 факты
Өлүмү азыркыга чейин сыр. Депутат, диктор Сатыбалды Жээнбеков тууралуу 8 факты
Ээрге бекем отурат. Өкмөт башчылыкка аттанган Боронов тууралуу 7 факты
Режиссер Айбек Дайырбеков менен келинчеги Толкун Дайырбекова менен

Кызыктуу жашообуздун бир эле принциби бар. Издешпей табышкан Дайырбековдор

9
Иште да, үйдө да бири-бирин толуктап, эл көзүндө жүргөн жубайлардын катарында режиссер Айбек Дайырбеков менен келинчеги Толкун Дайырбекова да бар.

Жубайлар кыргыз киносуна салым кошуп, алар жараткан тасмалар эл аралык кинофестивалдарга катышып келет.

Дайырбековдор Sputnik Кыргызстан агенттигинин "Издешпей табышкандар" рубрикасынын коногу болуп, аял-эркек ортосундагы мамиле, түшүнүшүү, жумуш, балдардын тарбиясы тууралуу ой бөлүштү.

— Чыгармачыл үй-бүлөнүн жашоосу да кызыктуу болсо керек. Айрыкча кино тарткан адамдардыкы элдикинен башкача деп айтышат.

Айбек Дайырбеков: — Андай жагы бар. Бир жолу съемкада жүрсөк, айылдагы байкем "киноң деле өзүнчө азап экен. Биздин жумуш саат алтыда бүтөт, бүтпөсө бешинчи күнү бүтөт, анда бүтпөсө күздө бүтөт. Силердин жумуштун деги бир аягы көрүнбөйт турбайбы" деп айткан эле. Анысы кандай, биз съемка, фестиваль деп жүрүп күн кантип өтүп жатканын билбей калабыз. Башка жумуштагылар үйүнө барып эс алса, биздики үйгө барганда деле улана берет. Мисалы, жаңы идея келип калса дароо Толкунга айтам. Күйөрманым да, угарманым да Толкун. Ага айтып жатып кандай тасма тартарымды алдын ала эле ойлоп, элестетип коем.

Толкун Дайырбекова: — Жашообуз башка үй-бүлөлөрдүкү сыяктуу эле, бирок сиз айткандай кызыктуу. Ар дайым жаңы нерселерди биринчи угасың. Жаңы идея, жаңы сценарий, жаңы тема, жаңы долбоор жаралганда аны биринчи талкуулайсың. Ошол нерселерди талкуулоонун өзү кызыктуу. 

Супруга режиссера Айбека Дайырбекова Толкун Дайырбекова во время беседы в офисе Sputnik Кыргызстан
© Sputnik / Табылды Кадырбеков
Супруга режиссера Айбека Дайырбекова Толкун Дайырбекова

— Балдарыңыздар да бул тармакты жакшы өздөштүрүп калса керек.

Т.Д.: — Ооба. Мисалы, Айбек кино тартарда сценарийин өзү жазып, өзү тартып, өзү монтаж жасайт. Тарткандан башка процессинин баары үйдө болгондуктан балдар билинбей аралаша берет. "Дарак ыры" тасмасын тартуу иштерине мен продюсерлик кылып, баштан-аяк катыштым. Экөөбүз эшикте деле, үйдө деле ошону эле сүйлөшүп калганбыз. Анан жайкысын балдар үчүн кино лагерь уюштурчубуз. Ал жакка өзүбүздүн чүрпөлөрдү да кошо ала барабыз. Ошентип жүрүп бала өзүнөн өзү бул дүйнөгө кирип кетет экен.

Улуу уулубуз эки тасмага тартылды, өзү да кыска метраждуу тасма жаратты. Эгер бала ушул багытты тандагыдай болсо, анда аны колдоп, кеп-кеңешибизди беребиз. "Жок, башка тармакка кетем" десе дагы ал анын тандоосу болот. Өзүбүз кино дүйнөсү менен аралашып жүргөнүбүз менен балдарыбызды ага үгүттөбөйбүз деле. Кандай багытты тандабасын, биз аларга колдоо гана көрсөтөбүз.

Азыр үйдөн мурдагыдай жалаң кино жөнүндө сүйлөшпөй калдык. Мурда болсо, айрыкча, "Дарак ыры" тасмасы менен иштегенде күнбү-түнбү, эки сөзүбүздүн бири эле ошол болуп калган. Анын үстүнө бул тасманы жаратууда жумуштун басымдуу бөлүгүн Айбек экөөбүз жасадык. Ал тартып, монтаждаса, мен продюсер болчумун. Жалаң ошол темада гана сүйлөшүп калганбыз.

А.Д.: — Акыр-аягы "үйгө барганда кино жөнүндө сүйлөшпөйбүз" деп өзүбүзгө чек койдук. 

Режиссер Айбек Дайырбеков во время беседы в офисе Sputnik Кыргызстан
© Sputnik / Табылды Кадырбеков
Режиссер Айбек Дайырбеков

— Айбек байкени режиссер катары билебиз. Толкун эже, сиз да ушул тармак боюнча билим алдыңыз беле?

— Жок, мен кесибим боюнча финансы адисимин. 9-классты бүткөндөн кийин Финансы техникумуна тапшырып, экономика жана финансы адистигин аяктадым. Андан кийин Президенттин алдындагы башкаруу академиясында банк иштери адистигин бүтүргөм.

— Экөөңөр таптакыр эки башка кесиптин ээлери турбайсыңарбы. Тагдыр жолуңар кайдан, эмне болуп кошулду эле?

А.Д.: — Экөөбүз 2004-жылы Ысык-Көлдөн таанышканбыз. Анда жаш лидерлердин лагерин уюштуруп, мен ал жакка уюштуруучу, ал эми Толкун катышуучу катары барган. Ошол жактан таанышып, кийин сүйлөшүп калдык.

Т.Д.: — Сүйлөшүп жүргөндө Айбек "Боз салкын" тасмасына иштеп кетти. Кино тартылып бүткөндөн кийин үйлөндүк. Үйдө кино тууралуу сөз болуп жатып эле мен Айбектин ишине ооп кеттим окшойм.

Бирок бул чөйрөдө деле чыгармачыл адам катары эмес, өзүмдүн кесибим менен иштедим. Тагыраагы, бухгалтер болдум. Кийин Айбек "Кыргыз киносу" кинотеатрын ачканда дагы каржы жаатын карап, ошол жактан кол кабыш кылып жүрдүм.

— Айбек байке, өмүрлүк жар тандоодо анын кесиби же иштеген ишине кароо маанилүү деп ойлойсузбу?

А.Д: — Мектепте окуп жүргөндө классташтарың анкета берип "Идеал туткан адамың ким, идеалдуу аялың кандай болот?" деген суроолорду бере берчү эмес беле? Ошондой анкетаны деле түшүнчү эмесмин. Кантип ала элек аялыңды же күйөөңдү тизме түзүп алып тандамак элең? Идеалдуу адам жок. Сен портретин түзүп алып издесең, андай адам табылбай калса эмне кыласың? Акылдуу болсо, башка бир жери жакпай калышы ыктымал. Ошондуктан мен болочок өмүрлүк жарымдын портретин түзгөн эмесмин. Аялым бул кесиптин ээси болсун, тигил жакта иштесин деп да элестетчү эмесмин.

Кесипти да ошондой жол менен тандагам. Негизи эле турмушта чечимдерди башкача жол менен кабыл алам. Маселен, кесибимди тандап жатканда көп ойлондум. Кино тартпай башка кесип менен кетсем карыганда бактылуу боломбу деп элестетчүмүн. Башка кесипти окуп, андан ийгиликке жетип, үй алып, автоунаалуу болуп, бирок кино тартпасам бактысыз болорума көзүм жетип, ушул багытты тандап алгам. Анан кино дүйнөсүнө баш-отум менен кириштим. Толкунду көргөндө ага үйлөнөм деп ойлогон эмесмин. Бирок жакындан таанышкандан кийин ал менин адамым экенин түшүнүп, 80-90 жашка чыкканда Толкун жанымда болсо, бактылуу болот экенмин деп туруп үйлөнгөм. 

Режиссер Айбек Дайырбеков с детьми на отдыхе
© Фото / Айбек Дайырбеков
Режиссер Айбек Дайырбеков

— Толкун эже, кино жаатына билинбей аралашып кеттим деп жатпайсызбы. Эми бул өзүнчө бир дүйнө болгон чөйрөдөн чыга албай калган чыгарсыз.

— Ушул чөйрөгө аралашып калам деген деле ой жок болчу. Ата-энем экөө тең каржы жаатында иштеген адамдар. Апам "кийин өзүңдүн ишиңди алып кетиш үчүн финансы жаатында билимиң болушу керек" деп жүрүп, 9-классты бүтөрүм менен ушул багытты тандадым. Анда кийин банкта иштейм, өз ишимди ачам деген кыялдар бар эле.

Анан режиссерго турмушка чыктым, бала-чакалуу болдук. Ошентип кино деген дүйнөгө турмуштун нугу менен эле өтүп кеттим. Бул чөйрөгө Айбекти моралдык жактан колдоо максатында аралаштым десем жаңылышпайм. "Дарак ыры" тасмасын тартууга аттанып алгандан кийин балдарым, алардын келечеги үчүн ушул кино тартылышы керек деп жатып Айбекке колуман келген жардамды бердим. Азыр кино чөйрөсүндө эмесмин, башка жакта иштеп жатам. Бирок андагы жаңылыктарга кызыгып, эмне болуп жатканын сурап турам. 

Супруга режиссера Айбека Дайырбекова Толкун Дайырбековой со своими детьми
© Фото / Айбек Дайырбеков
Супруга режиссера Айбека Дайырбекова Толкун Дайырбекова

— Ар бир үй-бүлөгө турмуштук сыноо, кыйынчылык келсе керек. Сиздер мындай кырдаалдан кантип чыгасыздар, аны кантип жеңип келе жатасыздар?

Т.Д.: — Кудайдын алдында чоң сыноолор келди деп айтканга болбойт, баары кудайга шүгүр. Мен үчүн жаңы үйлөнүп Айбек Казакстанга кетип иштеп жүргөн жылдар бир аз кыйын болгон. Ал учурда балдар менен же кош бойлуу болуп жалгыз калчумун. Бирок анын баарын алдын ала сүйлөшүп, макулдашып алгандыктан мен нааразы болгонго акым жок эле. Анткени Айбекти ал жакка өзүм макул болуп кетиргем. Ошол учурдун эле кыйынчылыгы болбосо, калганы жакшы. Кыйынчылык бизде көбүнчө ич ара эмес, ар кандай долбоорлорду ишке ашырууда жаралчу.

Анан Айбек экөөбүз бири-бирибизге жумуштан сапат жагынан, убакыт жагынан бир топ талаптарды коюп, ошол нерседен келишпестик жаралчу. Биз көп нерсени алдын ала сүйлөшүп алчубуз. Ошол себептен ич ара мамиле боюнча уруш-талаш болгон жок.

А. Д.: — Үйдө баарын башынан эле сүйлөшүп алганбыз. Маселен, менин кийимим жыртык болсо же идиш сынып кетсе, ошол чырды пайда кылган теманы гана сүйлөшөбүз. Ал темадан алыс кетип, бири-бирибизге, анан туугандарга өтпөйбүз.

Көпчүлүк үй-бүлөдө глобалдуу уруш-талаш майда нерседен башталат. Ал чоңоюп отуруп ажырашууга чейин жетет. Мисалы, бир үйдө күйөөсү таксист болуп иштейт дейли. Аялы аны кечинде 500 сом таап келет деп күткөн. Бирок жолдошу 200 сом эле алып барып, уруш ошондон башталат. Акчадан башталган талаш акыры экөөнө, анан ата-энелерине чейин жетет. Анан кыял-жоруктары кошулуп, талашып жатып калышат. Баягы 200 сомдон башталган чыр чоң урушка айланып кетет.

Мындай нерселерди алдын алуу максатында биз баарын башында эле сүйлөшүп, макулдашып алабыз. Жумушта да, үйдө да ушундай принцип бар. 

Режиссер Айбек Дайырбеков с супругой Толкун Дайырбековой во время беседы в офисе Sputnik Кыргызстан
© Sputnik / Табылды Кадырбеков
Режиссер Айбек Дайырбеков с супругой Толкун Дайырбековой

— Казан-аяк кагышкан учурда эркектердин көбү унчукпай сыртка чыгып кетип, жини тарагандан кийин келип сүйлөшөбүз деп айтып калышат.

А.Д.: — Аял менен эркектин табияты эки башка. Аял баарын ачык айтып сүйлөшкөндү жакшы көрсө, эркек унчукпай коюп кутулат. Бирөө айтып, бирөө үндөбөй үй-бүлөнү сактап калгылары келет.

Аял сүйлөнүп баарын айтып баштаганда эркек таптакыр эле маани бербей койбой, "ии" деп угуп койгону жакшы. Анткени аял ошол үй-бүлөнү сактап калыш үчүн баарын ачык сүйлөшкүсү келет. Бирок кечке эле мээсин чагып туруп албай, жолдошу "ии" дегенде түшүнүп, убагында өзүн кармап басып кеткени жакшы. Анткени эркек да уруш чыгып, тилим тийип кетпесин деп үн катпай отурат да.

Т. Д.: — Биз бирибиздин жинибиз келип жатканда экинчибиз унчукпай калганга аракет кылабыз. Адам эмнеге жини келип жатканын так билиши керек экен. Мен башында башкага эле жиним келсе, үйдөн чыгарып алчумун. Азыр антпейм, анализдеп калдым. Андан сырткары, Айбек менден улуу, акылдуу, көптү билет. Ошондуктан андан көп нерсени талаша бербейм.

А.Д.: — Адам урушкусу келгенде эң күчтүү эмоциялар 12 мүнөт эле жашайт экен. Андан кийин жин тараш керек. Бирөө жиниңе тийген учурда аны ошол жерден айтып чыгарып алыш керек. Айрымдар жумуштан жетекчисине жини келсе айтпай сактап жүрө берет да, үйүнөн, аялы, балдарынан чыгарат. Анткен болбойт. Бир сөз менен болсо дагы ошол жерде калтырганы жакшы. 

— Пайдубалы күчтүү үй-бүлө түзүш үчүн жубайлардын ортосунда эмне маанилүү деп ойлойсуздар?

Т.Д.: — Биздин үй-бүлөнүн пайдубалынын бекем болушуна ата-энебиздин тарбиясынын салымы көбүрөөк. Ата-энелерибиз жашообузга эч качан кийлигишкен эмес. Кудалар бири-бирин сыйлап, бири-бири жөнүндө жаман нерсе айткан эмес. Ошого ыраазымын. Алар бири-бирин концерт, киного чакырып, кудалар партиясын түзүп алышкан. Ошол нерсе жеке биздин үй-бүлө үчүн күч-кубат, түрткү берет. Алар бири-бирин колдоо менен биздин үй-бүлөнүн өзөгүн да кармап турушат. Ата-энелерибиз ушундай ынтымактуу болуп жаткандан кийин андан аркысын улап кетүү өзүбүздөн деп ойлойм. Алар Айбек экөөбүзгө ишенишет. Кандай учур болбосун, колдоосун аяшпайт. Мисалы, кинотеатрды иштетерде ири суммада насыя алганбыз. Башында кооптонушкан, бирок биз ал ишти андан ары алып кеттик. "Дарак ыры" тасмасын тартарда дагы өтө көп каражат салганбыз. Анда да кооптонушту, бирок жолтоо болбой колдоп-коштоп беришти.

Айбектин ийгиликке жетиши биринчи кезекте мага керек. Ошол себептен мен анын кылган ишин, максаттарын колдоого даярмын. "Иши кылса акча тап" деген позиция жок. Тескерисинче, "биз атабыз менен сыймыктанышыбыз керек, балдарым кийин сыймыктанышы керек, ал үчүн биз колдоо көрсөтүшүбүз зарыл" деген позициядамын. Ошол эле учурда өзүмдү да унутпайм. Анткени жеке жашоомдо менин дагы максат, миссияларым бар. Балдарым мени менен да сыймыктангандай болушун каалайм. Айтор, баарын бирге алып кетүүгө аракет кылып жатам. 

Режиссер Айбек Дайырбеков и его жена Толкун Дайырбекова во время беседы в офисе Sputnik Кыргызстан
© Sputnik / Табылды Кадырбеков
Режиссер Айбек Дайырбеков с супругой Толкун Дайырбековой

— Бала тарбиялоодо эмнеге өзгөчө көңүл бурасыздар?

А.Д.: — "Балаңды канчалык жакшы тарбиялаба, ал өзүңө окшошуп калат" деген жакшы сөз бар экен. Бул чын эле туура. Баарыбыз баланы жакшы тарбиялаганга аракет кылабыз, бирок жеке өзүбүздү унутуп коебуз. Бала ата-эненин жүрүм-турумун кайталайт.

Т.Д.: — Турмушка 18 жашымда чыгып, көп нерсени кийин түшүндүм. Башында балдарга талапты катуу койчумун. Азыр көбүрөөк көңүл буруп, мээрим төккөнгө аракет кылам. Кыз баланы жашоо-турмушка тың кылып тарбиялаган жакшы. Анткени ал турмушка чыгат, тың болсо өзүнө эле пайда. Эркек баланы тарбиялоодо өз алдынча болууга басым жасаган оң деп ойлойм. Анткени ата-энеси бөпөлөп чоңойткон бала кийин чоркок болуп, анын айынан турмуштун сыноосуна чыдай албай, ал ажырашууга чейин жеткириши ыктымал.

Балдарымды өз алдынча болууга көбүрөөк тарбиялайм. Мага да үйдөгүлөр ошондой тарбия берип, турмушка эрте бышырган. 18 жашымда күйөөгө тийсем да кыйналган жокмун. Кыздарым андай эрте турмушка чыксын дебейм, бирок чет өлкөгө окууга барып калышы мүмкүн. Анын баарына баланы даяр кылып көндүрө берген жакшы экен.

Балдардын билиминен да акча аябайбыз. Кымбат кийинбесек дагы алардын жакшы окуп, чөйрөсү жакшы болушун каалайбыз. Үч балабыз бар, үчөө тең жеке менчик кыргыз тилдүү мектепте билим алышат.

9
Белгилер:
тарбия, үй-бүлө, режиссер, Айбек Дайырбеков
Тема боюнча
Издешпей табышкандар. Алтынбек Максутов менен Таалайкан Абазова
Урушсак кат жазышып жарашабыз. Издешпей табышкан Мирхамид менен Шаакан Токтогул
Эл аралык аэропортто COVID-19га текшерүүдөн өткөндөн кийин жүргүнчү. Архив

23-январдан тарта Кыргызстанга чет өлкөдөн киргендердин ПЦР-анализи болушу керек

20
(жаңыланган 19:48 20.01.2021)
Өлкөгө коронавирус инфекциясынын жаңы штаммынын кирүүсүн алдын алуу максатында текшерүү алгоритмине өзгөртүүлөр киргизилди.

БИШКЕК, 20 янв — Sputnik. Үстүбүздөгү жылдын 23-январынан тарта өлкөгө авиатранспорт аркылуу келген кыргызстандыктар үчүн акыркы 72 саат ичиндеги ПЦР-анализи терс чыккан маалымдамалары сөзсүз болушу керек. Бул тууралуу өкмөттүн сайтына жарыяланды.

Ага ылайык, өлкөгө коронавирус инфекциясынын жаңы штаммынын кирүүсүн алдын алуу максатында текшерүү алгоритмине өзгөртүүлөр киргизилди.

"Эл аралык каттамдарды ишке ашырууда аба кемесинин бортундагы жүргүнчүлөргө сурамжылоо өткөрүлөт. Келген учурда анкеталар санитардык-карантиндик посттордун кызматкерлерине берилет. Аэропортто дене табын өлчөө, санитардык ченемдердин жана социалдык обочолонуу талаптарынын сакталышы, ПЦР-иликтөөсүнүн бар-жогу текшерүүгө алынат. Клиникалык көрсөткүчтөр байкалган учурда ооруканага жаткырылат", — деп айтылат маалыматта.

ПЦР-тесттин мөөнөтү учуу узактыгына же авиакаттамдын кармалуусу сыяктуу объективдүү себептерден улам өтүп кетсе (72 саат), жарандар аэровокзалдан ПЦР-иликтөөдөн өтүүгө тийиш болот.

Кыргызстандын чек арасын автомобилдик пунктулар аркылуу кесип өтүүдө акыркы 72 саат ичинде жасалган ПЦР-анализи терс чыккан маалымдама суралат. Ошондой эле дене табы өлчөнүп, санитардык ченемдердин жана социалдык обочолонуу талаптардын сакталышы текшерилет. Клиникалык көрсөткүчтөр байкалган учурда ооруканага жаткырылат. Байланышта болгон жактар анкета толтуруп, обочолонууга жөнөтүлөт.

20
Белгилер:
штамм, коронавирус, Кыргызстан
Тема:
Коронавируска байланыштуу Кыргызстандагы кырдаал
Тема боюнча
ДССУ: апта ичинде COVID илдетинен өлгөндөр боюнча рекорд жаңыланды
Бишкекте эки киши каза таап, жалпы 162 адам СOVID жуктурду. Акыркы маалымат