Трамп грин-карта, виза берүүгө тыюу салган чечимин узартты. Мөөнөтү да айтылды
(жаңыланган 12:46 02.01.2021)
Америка президенти бул кадамын пандемия кесепетинен кийинки экономикалык кыйынчылыкта америкалыктардын жумуш орундарын сактап калуу аракети деп түшүндүргөн.БИШКЕК, 2-янв. — Sputnik. АКШ президенти Дональд Трамп бир катар категориядагы визалар менен грин-картанын көбүн берүүгө мурда салынган тыюунун мөөнөтүн дагы узартты. Бул туурасында Fox News кабарлады.
Виза боюнча чектөөлөр апрелде коюлган. Жаңы чечим боюнча, эми ал 2021-жылдын 31-мартына чейин узартылды. Тагыраагы, кеп иммиграциялык жана жумуш визаларын токтотуу туурасында жүрүп жатат. Алар H-1B, H-2B, H-4, L жана J тибиндеги визалар.
Трамп мындай кадамын пандемия кесепетинен кийинки экономикалык кыйынчылыкта америкалыктардын жумуш орундарын сактап калуу аракети катары айткан.
Трамптын буйругу виза лотореясын өткөрүүгө тыюу салган. Документте грин-картанын көпчүлүк бөлүгүн берүүгө убактылуу чектөө коюлганы жазылган.
Өткөн жылдын 31-январында АКШ жетекчилиги Кыргызстан, Эритрея, Мьянма, Нигерия, Судан жана Танзания жарандарына иммиграциялык виза менен грин-карт (Diversity Visa) берүүгө тыюу салган. Аны "өлкөнүн коопсуздугун жана бакубат жашоосун коргоо максатында" деп түшүндүргөн.
Сиздерге таазим! Мамытов Ленинградды курчоодон бошотуу күнүнө карата кайрылуу жасады
(жаңыланган 11:30 27.01.2021)
Мамытов 27-январда белгилене турчу маанилүү дата — Ленинградды фашисттердин курчоосунан толук бошоткон күнгө карата жасаган кайрылуусунда советтик аскерлердин эрдигин өзгөчө белгилеген.БИШКЕК, 27-янв. — Sputnik. Президенттин милдетин аткарып жаткан Жогорку Кеңештин төрагасы Талант Мамытов Ленинград шаарынын фашисттик курчоодон толук бошотулган күнүнө карата элге кайрылуу жолдоду. Бул тууралуу бүгүн, 27-январда, президенттин маалымат кызматынан билдиришти.
Кайрылууда советтик аскерлер тарабынан Ленинград шаарынын фашисттик курчоодон толук бошотулган күнү белгиленип жатканы айтылды.
"Ленинградды курчоого алуу — Улуу Ата Мекендик согуштун эң кайгылуу окуяларынын бири. Ленинград — дүйнөлүк тарыхта 900 күндүк курчоого туруштук берген жападан жалгыз шаар, ошол күндөрү миллиондогон балдар, аялдар, улгайган адамдар жана аскерлер каза болгон", — деп жазылат Мамытовдун кайрылуусунда.
Ленинградды курчоодон бошотуудагы салгылашууларда башка боордош элдер менен бирдикте 4,5 миңден ашуун мекендештерибиз баатырларча курман болушкан.
©
Фото / представительство Россотрудничества в КР
Улуу Ата Мекендик согуш учурунда курчоого алынган Ленинграддан Кыргызстанга 16 миңге жакын адам эвакуацияланган. Алардын 3,5 миңи балдар болгон.
Белгилер:
Баланы сексуалдык зомбулуктан кантип коргоо керек. ИИМдин эрежелери
(жаңыланган 11:06 27.01.2021)
ИИМ балдарга карата сексуалдык зомбулук болгон учурда кылмыштын издерин сактоо үчүн кийимдерди жууп же ыргытып салбоо зарыл экенин билдирди.БИШКЕК, 27-янв. — Sputnik. Кыргызстанда сексуалдык зомбулукка жашы жете электердин 80 пайызы тааныштары жана туугандары тарабынан кабылат. Бул тууралуу ИИМдин маалымат кызматы кабарлады.
Ошондой эле балдарга карата сексуалдык ыдыктар үйүндө же конокто жасалары айтылат.
- Министрлик ата-энелерди балдарга сак жана жоопкерчиликтүү болууга чакырып, аларды зомбулуктан коргоонун жолдорун айтып берди.
- Балдар тийишкен адамдар тууралуу жакындарына же ишенимдүү адамга айтуудан тартынбашы керек;
- Өзүңдүн коопсуздугуңду сактоого укугуң бар. Зомбулук аракет кылгандарга жооп кайтара бил;
- Жолдогу бейтааныш адамдардын автоунаасына отурба. Зарылчылык жаралганда такси кызматын чакыр;
- Подъездге, лифтиге түшүүдөн мурда тегерегиңди кара, тааныш эмес адам менен кирбе;
- Бейтааныш адамдар сунуштаган суусундуктарды ичпе;
- Каякка барарыңды жана качан келериңди жакындарыңа билдирип тур;
- Туугандарың болсо дагы эркектер менен жалгыз калбаганга аракет кыл. Үйдө ата-энелер жокто эркектерди киргизүү да кооптуу;
- Түнгө калба жана конокто көпкө отуруп калба.
Мындан сырткары, ата-энелерге балдардын уюлдук телефонуна "Мен милициянын аймактык инспекторумун" жана "112 Кыргызстан" тиркемелерин көчүрүп берүүнү сунуштады.
"Зомбулук болгон учурда эмне кылуу керек? Кылмыштын издерин сактоо үчүн кийимдерди жууп же ыргытып салбоо зарыл. Милицияга жана медициналык мекемеге кайрылуу керек. Биринчи 72 саатта дарыгер ВИЧтин, жыныстык жугуштуу оорулардын жугушунун алдын алууга, күтүлбөгөн жерден бойго бүтүрбөөгө жардам берет. Ошондой эле зомбулукка кабылган жашы жете электерге психологиялык жардам берүү маанилүү", — деп айтылат билдирмеде.
Балдарга карата сексуалдык же башка мүнөздөгү зордук-зомбулуктар жасалса 102, 112 кызматтарына жана 111 ишеним телефондоруна байланышууга болот.
Жогорку Кеңеште жаңы вице-спикер шайланууда. Көрсөтүлгөн талапкерлер
(жаңыланган 12:24 27.01.2021)
Төраганын орун басары кызматына парламенттин оппозициялык фракцияларынын квотасы менен көрсөтүлүп, шайланат.БИШКЕК, 27-янв. — Sputnik. Жогорку Кеңештин депутаттары вице-спикерди шайлап жатат.
Төраганын орун басары кызматына оппозициялык фракциялардын квотасы менен көрсөтүлөт. "Ата Мекен" фракциясы Нурбек Сыдыгалиевди, "Өнүгүү – Прогресс" фракциясы Уланбек Исмаиловдун талапкерлигин сунуштады.
Мурдагы вице-спикер Мирлан Бакиров белгисиз себептерден улам өткөн жылдын 23-декабрында кызматын тапшырып кеткен.