Той ээсинин көзүн карап сүйлө. Тост айтуу маданияты
(жаңыланган 11:35 16.01.2021)
Sputnik Кыргызстан "Этикет" рубрикасынын алкагында коомдук жайларда жана ар кыл жагдайда өзүн татыктуу алып жүрүү эрежелери менен тааныштырат.Кайсы бир майрам, туулган күн, үлпөт той, юбилей, корпоративдик кече, айтор, ушул сыяктуу иш-чаралардын бардыгы каалоо-тилек, башкача айтканда, тост менен коштолот.
Салтанат ээсине жана конокторго жагымдуу маанай тартуулайм десеңиз, тост айтуу маданиятын сактаңыз. Каалоо-тилек айтып жаткандагы эрежелер тууралуу этикет мугалими Нуржан Исмаилова айтып берет.
Кезек
Тостту каалаган учурда, каалаган киши айта бергени туура эмес. Адатта алгач кеченин ээси, андан соң окуяга түздөн-түз тиешеси бар адамдар сүйлөйт. Эгер баарына тең орток иш-чара болсо жаш курагына жараша улуулашып же жетекчиликтен баштап, катары менен улана берет. Жыйынтыктоочу тост кайрадан кеченин кожоюнуна берилет.
Стакан кармоо
Адатта стаканды же бокалды тост ээси көтөрүп, башкалардын көңүлүн бурат. Ошондон кийин гана калгандар стаканды колго алат. Эгер сүйлөп жаткан киши бокалды кармабай эле сөз баштаса, башкалар дагы дал ошондой кылганы туура. Тост ээси ордунан турганы же турбаганы кеченин макамына жараша болот. Эгер расмий иш-чара болсо, сүйлөп жаткан киши ордунан турганы жакшы. Ал эми туугандар, достор арасында отуруп сүйлөй берсе болот.
Алып иели!
Тост ээси каалоо-тилек арналып жаткан кишинин көзүнө карап сүйлөшү керек. Тост аяктаган соң алгач башкалар ичип, тост ээси менен каалоо-тилек айтылган адам аларды күтүп турат.
Тосттун мазмуну
Айрым адамдар узак сүйлөгөндү жакшы көрөт. Бирок көп киши менен отурган жерде башкалардын каалоосун жана убактысын сыйлоо керек. Тост кыска-нуска, иш-чарага жана салтанат ээсине түздөн-түз тиешелүү сөздөрдөн, каалоолордон куралганы жакшы. Анын ата-теги, 10 жыл мурда болгон окуялар тууралуу жеке өзүнө, башкалар жокто айтканыңыз туура. Дегеним, ал сөздөр той ээсине канча баалуу болгону менен башкаларга түшүнүксүз, кызыксыз болушу мүмкүн. Дагы бир маанилүү нерсе, тостко таарыныч, качандыр бир учурда болгон жагымсыз окуялар тууралуу кошпой эле койгон жакшы.
Аралык
Чакан жамаатта ар бир тосттун ортосунда 15 мүнөттөн убакыт өткөрсө болот. Ал эми көп киши катышкан салтанат, тойлордо каалоо-тилектердин ортосунда андан бир аз көбүрөөк убакыт өтүшү зарыл. Ошондой эле жогорку пунктуда айтылгандай, элди тажатып ийбей кыска болушу керек.
Той ээси
Башкалардан айырмаланып, той ээсине көбүрөөк убакыт берилет. Анткени ал бир тосттун ичине конокторго ыраазычылыгын, иш-чаранын маанилүүлүгүн, ошондой эле кимдир бирөөлөргө өзгөчө рахматын батырышы керек. Шарт боюнча кожоюндун тостунан кийин чөйчөктөр бош калышы керек.
23-январдан тарта Кыргызстанга чет өлкөдөн киргендердин ПЦР-анализи болушу керек
БИШКЕК, 20 янв — Sputnik. Үстүбүздөгү жылдын 23-январынан тарта өлкөгө авиатранспорт аркылуу келген кыргызстандыктар үчүн акыркы 72 саат ичиндеги ПЦР-анализи терс чыккан маалымдамалары сөзсүз болушу керек. Бул тууралуу өкмөттүн сайтына жарыяланды.
Ага ылайык, өлкөгө коронавирус инфекциясынын жаңы штаммынын кирүүсүн алдын алуу максатында текшерүү алгоритмине өзгөртүүлөр киргизилди.
"Эл аралык каттамдарды ишке ашырууда аба кемесинин бортундагы жүргүнчүлөргө сурамжылоо өткөрүлөт. Келген учурда анкеталар санитардык-карантиндик посттордун кызматкерлерине берилет. Аэропортто дене табын өлчөө, санитардык ченемдердин жана социалдык обочолонуу талаптарынын сакталышы, ПЦР-иликтөөсүнүн бар-жогу текшерүүгө алынат. Клиникалык көрсөткүчтөр байкалган учурда ооруканага жаткырылат", — деп айтылат маалыматта.
ПЦР-тесттин мөөнөтү учуу узактыгына, же авиакаттамдын кармалуусу сыяктуу объективдүү себептерден улам өтүп кетсе (72 саат), жарандар аэровокзалдан ПЦР-иликтөөдөн өтүүгө тийиш болот.
©
Фото / пресс-служба правительства/ Алишер Алиев
Бишкекте Роза Айтматованын "Атам жөнүндө" аттуу китебинин бет ачары өтөт
(жаңыланган 19:18 20.01.2021)
Китепте Төрөкул Айтматовдун Кыргызстандын эл чарбасынын, өнөр жайынын пайдубалын түптөөгө кошкон салымы баяндалат.БИШКЕК, 20-янв. — Sputnik. Бишкекте Роза Айтматова "Атам жөнүндө" аттуу эскерүү китебинин бет ачары өтөт. Бул туурасында Кыргызпатенттин маалымат кызматы билдирди.
Иш-чара эртең, 21-январда, саат 11.00дө Алыкул Осмонов атындагы улуттук китепкананын конференц-залында өтөт.
Бул китеп Кыргызпатент тарабынан 2020-жылы Тарых жана ата-бабаларды эскерүү күнүнө карата мамлекеттик жана расмий тилде 500 нускада чыгарылган.
Анда Төрөкул Айтматовдун көп кырдуу ишмердигинин ичинен Кыргызстандын эл чарбасынын, өнөр жайынын пайдубалын түптөөгө кошкон салымы архивдик материалдардын негизинде чагылдырылган.
Бет ачарга Кыргызстандын илимий жана чыгармачыл интеллигенциясынын өкүлдөрү, Айтматовдун үй-бүлө мүчөлөрүнүн катышуусу күтүлүүдө.
Китеп окурмандардын кеңири катмарына сунушталат.
Белгилер: