Президенттик шайлоо: коомдук тартипти 11 миңден ашуун милиционер көзөмөлдөйт
(жаңыланган 12:36 04.01.2021)
8-январдан баштап ИИМ кызматкерлери күчөтүлгөн тартипте иштейт. Алар шайлоо маалында коомдук коопсуздукту камсыздоого толугу менен даяр.БИШКЕК, 4-янв. — Sputnik. Кыргызстанда президенттик шайлоонун маалында коомдук тартипти 11 миңден ашуун милиция кызматкери көзөмөлдөйт. Бул тууралуу ИИМдин маалымат кызматы кабарлады.
Ага ылайык, ички иштер министри Улан Ниязбеков онлайн-жыйын өткөрүп, ага анын орун басарлары, ИИМдин борбордук аппаратынын өкүлдөрү, облустук жана шаардык милициянын жетекчилери катышты.
Министр шайлоо өнөктүгү учурунда коомдук тартиптин сакталышы, мыйзамдуулукту сактоо жана ар кандай тартип бузууларга өз убагында мыйзам чегинде ыкчам чара көрүү керектиги боюнча тапшырмаларды берген. ИИМ кызматкерлери буларды аткарууга толугу менен даяр экени белгиленет.
8-январдан баштап ички иштер органдарынын кызматкерлери күчөтүлгөн тартипте иштейт.
"Атайын иш пландарга ылайык, 11 миңден ашуун кызматкер коомдук тартипти сактоого тартылат. Бүгүнкү күнү 5000ден ашуун кызматкер шайлоо тилкелерин толугу менен кайтарууга алышты. ИИМ БШК менен иш алып барууну улантууда", — деп айтылат маалыматта.
Эске салсак, өлкө башчыны тандоо 10-январда өтөт.
Сиздерге таазим! Мамытов Ленинградды курчоодон бошотуу күнүнө карата кайрылуу жасады
(жаңыланган 11:30 27.01.2021)
Мамытов 27-январда белгилене турчу маанилүү дата — Ленинградды фашисттердин курчоосунан толук бошоткон күнгө карата жасаган кайрылуусунда советтик аскерлердин эрдигин өзгөчө белгилеген.БИШКЕК, 27-янв. — Sputnik. Президенттин милдетин аткарып жаткан Жогорку Кеңештин төрагасы Талант Мамытов Ленинград шаарынын фашисттик курчоодон толук бошотулган күнүнө карата элге кайрылуу жолдоду. Бул тууралуу бүгүн, 27-январда, президенттин маалымат кызматынан билдиришти.
Кайрылууда советтик аскерлер тарабынан Ленинград шаарынын фашисттик курчоодон толук бошотулган күнү белгиленип жатканы айтылды.
"Ленинградды курчоого алуу — Улуу Ата Мекендик согуштун эң кайгылуу окуяларынын бири. Ленинград — дүйнөлүк тарыхта 900 күндүк курчоого туруштук берген жападан жалгыз шаар, ошол күндөрү миллиондогон балдар, аялдар, улгайган адамдар жана аскерлер каза болгон", — деп жазылат Мамытовдун кайрылуусунда.
Ленинградды курчоодон бошотуудагы салгылашууларда башка боордош элдер менен бирдикте 4,5 миңден ашуун мекендештерибиз баатырларча курман болушкан.
©
Фото / представительство Россотрудничества в КР
Улуу Ата Мекендик согуш учурунда курчоого алынган Ленинграддан Кыргызстанга 16 миңге жакын адам эвакуацияланган. Алардын 3,5 миңи балдар болгон.
Белгилер:
Баланы сексуалдык зомбулуктан кантип коргоо керек. ИИМдин эрежелери
(жаңыланган 11:06 27.01.2021)
ИИМ балдарга карата сексуалдык зомбулук болгон учурда кылмыштын издерин сактоо үчүн кийимдерди жууп же ыргытып салбоо зарыл экенин билдирди.БИШКЕК, 27-янв. — Sputnik. Кыргызстанда сексуалдык зомбулукка жашы жете электердин 80 пайызы тааныштары жана туугандары тарабынан кабылат. Бул тууралуу ИИМдин маалымат кызматы кабарлады.
Ошондой эле балдарга карата сексуалдык ыдыктар үйүндө же конокто жасалары айтылат.
- Министрлик ата-энелерди балдарга сак жана жоопкерчиликтүү болууга чакырып, аларды зомбулуктан коргоонун жолдорун айтып берди.
- Балдар тийишкен адамдар тууралуу жакындарына же ишенимдүү адамга айтуудан тартынбашы керек;
- Өзүңдүн коопсуздугуңду сактоого укугуң бар. Зомбулук аракет кылгандарга жооп кайтара бил;
- Жолдогу бейтааныш адамдардын автоунаасына отурба. Зарылчылык жаралганда такси кызматын чакыр;
- Подъездге, лифтиге түшүүдөн мурда тегерегиңди кара, тааныш эмес адам менен кирбе;
- Бейтааныш адамдар сунуштаган суусундуктарды ичпе;
- Каякка барарыңды жана качан келериңди жакындарыңа билдирип тур;
- Туугандарың болсо дагы эркектер менен жалгыз калбаганга аракет кыл. Үйдө ата-энелер жокто эркектерди киргизүү да кооптуу;
- Түнгө калба жана конокто көпкө отуруп калба.
Мындан сырткары, ата-энелерге балдардын уюлдук телефонуна "Мен милициянын аймактык инспекторумун" жана "112 Кыргызстан" тиркемелерин көчүрүп берүүнү сунуштады.
"Зомбулук болгон учурда эмне кылуу керек? Кылмыштын издерин сактоо үчүн кийимдерди жууп же ыргытып салбоо зарыл. Милицияга жана медициналык мекемеге кайрылуу керек. Биринчи 72 саатта дарыгер ВИЧтин, жыныстык жугуштуу оорулардын жугушунун алдын алууга, күтүлбөгөн жерден бойго бүтүрбөөгө жардам берет. Ошондой эле зомбулукка кабылган жашы жете электерге психологиялык жардам берүү маанилүү", — деп айтылат билдирмеде.
Балдарга карата сексуалдык же башка мүнөздөгү зордук-зомбулуктар жасалса 102, 112 кызматтарына жана 111 ишеним телефондоруна байланышууга болот.
Генералдык штаб кайрадан Коргоо министрлигине айланышы ыктымал
(жаңыланган 12:08 27.01.2021)
Учурда КМШ мамлекеттеринин ичинен Кыргызстанда эле аскердик тармактын башкы командалык органы Генералдык штаб экени белгиленди. Куралдуу күчтөр бул мекемеге 2014-жылы бириккен.БИШКЕК, 27-янв. — Sputnik. Кыргызстандын Куралдуу күчтөрүнүн Генералдык штабын кайрадан Коргоо министрлиги деп өзгөртүү маселеси каралып жатат. Бул тууралуу маалыматты Генштабдын маалымат кызматы тастыктады.
Мекеменин Facebook баракчасында "Жарандар министрликти түзүүгө кандай карайт?" деген сурамжылоо жүргүзүлгөн. Анда элдин көбү бул идеяны колдогон.
"Өлкөгө жаңы жетекчинин келиши менен эски системага кайтуу планы бар. Тагыраагы, мыйзамга өзгөртүүлөр киргизилиши мүмкүн", — деп белгилеген Генералдык штаб.
©
YouTube / Генеральный штаб КР
Эске салсак, Куралдуу күчтөр Генералдык штабга 2014-жылы бириккен.
2018-жылы Жогорку Кеңеште Коргоо министрлигин кайтаруу маселеси көтөрүлгөн. Анда депутат Алмамбет Шыкмаматов Генштабдын генералдары чет мамлекеттерде таанылбай жатканын, анткени мындай орган сыртта анча маанилүү мекеме эместигин белгилеген.
Белгилер: