АСУ маалыматтарынын 98%ы эсептелди. Кайсы аймакта шайлоочу көп болду
(жаңыланган 11:04 11.01.2021)
Шайлоого катышуудагы эң жогорку көрсөткүч Ысык-Көл облусунда катталган. Аймакта 143 179 шайлоочу (46,52 пайыз) добуш берүүгө катышкан.БИШКЕК, 11-янв. — Sputnik. Кыргызстанда өткөн президенттик шайлоого катышкандардын көрсөткүчү 39,75 пайызды түздү, тактап айтканда, 1 миллион 416 миң 485 жаран добуш берген. Бул тууралуу Борбордук шайлоо комиссиясы билдирди.
Жалпысынан 3 миллион 563 миң 574 шайлоочу катталган. Катышуу боюнча эң жогорку көрсөткүч Ысык-Көл облусунда экени маалым болду.
Аймактар боюнча маалымат:
- Бишкек — каттоодо турган 416 123 жарандан 162 361 киши (39,01 пайыз) добуш берүүгө катышты;
- Ош —151 115 жарандын 66 990у (44,33 пайыз);
- Чүй облусу — 591 818 жарандын 210 585и (35,58 пайызы);
- Талас — 157 886 жарандын 61 064ү (38,68 пайызы);
- Ош — 722 933 жарандын 291 579у (40,33 пайызы);
- Жалал-Абад — 666 695 жарандын 267 406сы (40,11 пайызы);
- Баткен — 297 264 жарандын 116 318и (39,13 пайызы);
- Ысык-Көл — 307 786 жарандын 143 179у (46,52 пайызы);
- Нарын — 202 475 жарандын 84 948и (41,95 пайызы);
- Чет өлкөлөрдө — 49 479 жарандын 12 095и (24,44 пайызы).
АСУнун 98,02 пайызга эсептелген маалыматтарына ылайык, шайлоодо Садыр Жапаров ишенимдүү түрдө алдыга озуп чыккан.
Красноярск – Ош – Красноярск чартердик каттамы ачылды
(жаңыланган 15:59 25.01.2021)
Буга чейин Жарандык авиация агенттиги Россияга болгон авиабилеттердин баасын арзандатуу жана рейстерди көбөйтүү аракеттери көрүлүп жатканын билдирген.БИШКЕК, 25-янв. — Sputnik. Красноярск – Ош – Красноярск чартердик аба каттамы ишке кирди. Бул тууралуу "Манас" эл аралык аэропортунан билдиришти.
23-январь күнү Красноярск шаарынан учуп келген "Икар" авиакомпаниясы алгачкы учагы "Ош" эл аралык аэропортуна келип конгон.
"Алгачкы каттамда Ош калаасына 125 жүргүнчү учуп келип, Красноярск шаарына 189 жүргүнчү учуп кетти", — деп жазылат маалыматта.
Жаңы ачылган чартердик каттам жумасына бир жолу — ишемби күнү учары кошумчаланды.
Буга чейин Кыргызстан Жарандык авиация агенттигинин директору Сталбек Шаршеев Россияга болгон авиабилеттердин баасын арзандатуу жана рейстерди көбөйтүү аракеттери көрүлүп жатканын билдирген.
Дүйнөдө биринчи жолу бейтаптын колун ийини менен кошо салып беришти. Видео
(жаңыланган 15:35 25.01.2021)
Исландиялык киши 20 жыл мурда электр тогуна урунуп эки колунан тең ажырап калган. Бейтап 2013-жылы эле операция жасатмак, бирок донорду издөөгө убакыт кеткен.Франциянын Лион шаарында дүйнөдө биринчи жолу бейтаптын колун ийини менен кошо салып беришти. Бул тууралу The Guardian басылмасы жазды.
Трансплантация 13-январда Эдуард Эррио атындагы клиникада жүргүзүлдү. Операцияга даярдык көрүүгө 50 ак халатчан тартылса, аны жасоого медиктердин төрт бригадасы катышып, колдорду "жамоо" 15 саатка созулган.
48 жаштагы исландиялык Феликс Гретарсон 20 жылы мурда электр тогуна урунуп, эки колунан тең ажырап калган. Андан бери ондогон операция жасаткан. Бейтап Лионго 2013-жылы операция жасатууга уруксат алгандан кийин көчүп келген. Бирок донорду издөөгө бир нече жыл кеткен.
Операциядан кийин оң колу сол колуна караганда батыраак калыбына келерин айтышкан. Себеби сол жак ийиндин бардыгын калыбына келтирүүгө туура келген.
Азырынча Феликс Гретарсон колдору менен өз алдынча кыймылдай албайт.
Тогуз күндөн кийин исландиялык киши клиникадан биринчи видео кайрылуусун жасап, дарыгерлердин бул керемет ишине эбегейсиз ыраазылыгын айткан.
Ролик оорукананын YouTube-канале каналына жүктөлгөн.
Белгилер:
700 миң сомдун дайны жок. Оштогу "Достук" бажы бекетинин тескөөчүсү кармалды
(жаңыланган 16:04 25.01.2021)
Бул факты боюнча тергөө учурунда 706 260 сом суммасында келтирилген зыяндын орду толтурулганы айтылат.БИШКЕК, 25-янв. — Sputnik. Финансы полициясынын Ош шаары боюнча башкармалыгы тарабынан Түштүк-Батыш бажысынын тескөөчүсү кармалды. Бул тууралуу Экономикалык кылмыштарга каршы күрөшүү кызматы билдирди.
Маалыматта Ош шаарындагы "Достук" бажы бекетинде иштеген тескөөчү кызмат адамдарынын катышуусунда товарларды контрабандалык жол менен ташып кирүү фактысы боюнча колго түшкөнү кабарланды.
"2020-жылдын декабрь айында Финансы полициясынын кызматкерлери элдик керектөөдөгү товарлар жүктөлгөн DAF үлгүсүндөгү жүк ташуучу автоунааны кармашкан. Аны "Достук" бажы бекетинин кызматкерлери КР аймагына документтерин бажылык тариздөөдөн өткөрбөстөн жана бажы төлөмдөрүн төлөтпөстөн киргизип жиберишкен. Натыйжада, жүргүзүлгөн эсептөөлөргө ылайык мамлекеттин бюджетине 700 миң сомдон ашык түшпөй калган", — деп айтылат маалыматта.
Кармалган тескөөчү А. Р. 21-январь күнү Ош шаардык милициянын убактылуу кармоочу жайына киргизилген. Бул факты боюнча тергөө учурунда 706 260 сом суммасында келтирилген зыяндын орду толтурулганы айтылат.
Азыркы убакта тергөө иштери уланууда.