Жыт сезбей калуу Паркинсон оорусунун да белгиси болушу мүмкүндүгү айтылды
(жаңыланган 10:38 12.01.2021)
Паркинсон илдети айыккыс дарт. Дарыгерлер бейтаптын оорусунун күчөшүн жайлатканга гана жардам бере алат.БИШКЕК, 12-янв. — Sputnik. Окумуштуулар жыт билбей калуу Паркинсон оорусунун баштапкы белгиси болушу мүмкүндүгүн аныктаганын Express басылмасы жазды.
©
Sputnik / Владимир Трефилов
Изилдөө көрсөткөндөй, Паркинсон дартына кабылгандардын 90 пайызы жытты жакшы сезбейт.
Учурда аталган илдет айыккыс болуп эсептелет. Дарыгерлер бейтаптын оорусунун күчөшүн жайлатууга гана жардам берип келишет.
Буга чейин дарыгер адам жытты коронавируска кабылганда, мурун көңдөйүнө суук тийгизгенде, курч же өнөкөт ринитте жана башка дем алуу органдарынын ооруларында сезбей каларын айткан.
Министр: Орто-Токой суу сактагычындагы суу бир айга гана жетет
(жаңыланган 00:11 18.06.2021)
Министр Орто-Токой суу сактагычында 224 миң куб суу калганын айтып, сууну эл өзү билемдикке салып колдонбошу керектигин эскертти.БИШКЕК, 17-июн. — Sputnik. Эгер суунун чыгымы азыркыдай көп болсо, анда 15-20-июлда Орто-Токой суу сактагычында суу калбай калат. Бул тууралуу айыл, суу чарба жана аймактарды өнүктүрүү министри Аскарбек Жаныбеков Жогорку Кеңештин жыйынында билдирди.
"Орто-Токой суу сактагычында 224 миң куб суу калганын айтып коюшум керек. Эгер биз аны азыркыдай иштетсек, 15-20-июлда ал жакта суу жок калат. Суу сактагыч беш дарыядан барган суу менен толот. Быйыл нормадан 50 пайызы гана келип жатат. Кырдаалдан чыгуунун бир эле жолу бар. Ал график боюнча кезектешип сугаруу жана скважинаны иштетүү", — деди министр.
Аткаминер эл сууну өзү билемдикке салып бөлүштүрбөшү керектигин эскертип, суу чарбасы бөлүштүргөн графиктин негизинде гана иш алып барууну белгиледи.
©
Sputnik / Акылбек Батырбеков , Эмиль Садыров
Буга чейин Суу ресурстары боюнча мамлекеттик агенттиктин жетекчисинин орун басары Абдыбай Жайлообаев июлда сугат суусу азыркыдан да тартыш болушу мүмкүн экенин божомолдогон.
Бишкектин жарымы жарыксыз калды. Энергетика министринин түшүндүрмөсү
(жаңыланган 22:56 17.06.2021)
Жарык Москва, Сокулук, Панфилов, Жайыл райондорунда жана Бишкек шаары менен Токмоктун айрым бөлүктөрүндө өчкөн.БИШКЕК, 17-июн. — Sputnik. Кыргызстанда жарык Казакстандын энергосистемасында авариялык кырдаал жаралгандыктан өчтү. Бул тууралуу "Улуттук электр түйүнү" ишканасынын маалымат кызматынын жетекчиси Элзада Саргашкаева билдирди.
Буга чейин ордо калаанын тургундары соцтармакка жарык өчкөнүн жазышкан. Ал тургай электр жарыгы Жогорку Кеңештин имаратында да жок болгон. Анын себебин энергетика жана өнөр жай министри Доскул Баймурзаев өлкө боюнча жыштыкты жөнгө салуу жабдуусу иштеп кеткени менен түшүндүргөн.
"Коңшу мамлекетте авария болуп, Токтогул ГЭСи былтыркыдай кырдаалды жөнгө салды", — деди ал.
Ишкананын маалымат кызматы саат 19:28те "Л-514 Фрунзенская-Шу" линиясында авария болгонун билдирди.
"Борбор Азиянын бириктирилген энергосистемасы Казакстандын түндүгүндөгү бирдиктүү энергосистемадан өзүнчө бөлүнүп чыккан. Өлкө боюнча автоматтык түрдө жыштыкты жөнгө салуу жабдуусу иштеп кеткен. Саат 20:26лар чамасында "Фрунзенская-Шу" линиясы транзитке кошулуп, саат 20:55те жарык берилди", — деди Саргашкаева.
Электр кубаты Чүйдүн Москва, Сокулук, Панфилов, Жайыл райондорунда жана Бишкек шаары менен Токмоктун айрым бөлүктөрүндө өчкөн.