БИШКЕК, 14-янв. — Sputnik. Тюмень шаарында (Россия) бажычылар Кыргызстандан аткезчилик менен келе жаткан товарды кармашты. Бул тууралуу Урал бажы башкармалыгынын сайтында айтылат.

Маалыматка караганда, ал жерде "дүйнөлүк бренддердин товарлары" болгон.

"Интеллектуалдык менчик укуктары бузулган товар менен эки жүк ташуучу унаа Кыргызстандан Москва шаарына бара жаткан. Ыкчам кызматкерлер товарларды карап жатып Chanel, Gucci, Louis Vuitton, Adidas, Puma жана Paul & Shark бренддеринин белгилери коюлган көйнөк, шым, футболка, шейшептерди таап алды", — деп айтылат билдирүүдө.

Товарды алып бара жаткан тарап анын оригинал экенин тастыктоочу документтерин көрсөткөн эмес.

Тюмень бажысынын Бажы көзөмөлү кызматынын жетекчиси Александр Решетниковдун билдирүүсүндө, мындай мыйзам бузуунун кесепетинен 22 миллион рублдик чыгым келтирилген.

Аталган факты боюнча РФтин Кылмыш жана жазык кодексинин 180-беренесине ("Товардык белгини мыйзамсыз пайдаланып, ири өлчөмдө чыгым алып келүү") ылайык кылмыш иши козголду. Күнөөлүүлөр эки жылга эркинен ажырап, 80 миң рубль өлчөмүндө айып төлөшү мүмкүн.

Бардык чогулган материалдар полицияга өткөрүп берилгени белгилүү болду.

БИШКЕК, 26-янв. — Sputnik. Россия коронавируска каршы "Спутник V" вакцинасын Кыргызстандын аймагында чыгарууга даяр. Бул тууралуу Өнөр жай, энергетика жана жер казынасын пайдалануу боюнча мамлекеттик комитеттин төрагасы Жыргалбек Сагынбаев билдирди.

Анын айтымында, кыргыз делегациясы Жогорку евразиялык экономикалык кеңештин отурумуна катышуу үчүн Москва шаарына барып, Россиянын өкмөт мүчөлөрү жана инвесторлор менен жолуккан. Жыйын учурунда Владимир Путин Россия ЕАЭБдин бардык өлкөлөрүндө вакцина өндүрүшүн ачууга даяр экендигин айткан. Андан кийин муну Россиянын өнөр жай жана соода министри Денис Мантуров дагы ырастаган.

"Эгерде Кыргызстан техникалык мүмкүнчүлүктөрү, тиешелүү шаймандары бар компанияны аныктаса, анда Россия комиссия жиберип, чечим кабыл алууга даяр экенин билдирди", – деди Сагынбаев.

Вакцина өндүрүүчү компанияны Россиянын Өнөр жай жана соода министрлиги тандайт. Талапкерлерди Кыргызстандын Мамлекеттик өнөр жай комитети сунуштайт. Айрым талапкер болгон компаниялар буга чейин министрлик менен сүйлөшүүлөрдү өткөргөн. Каржы маселесин Россиянын Өнөр жай жана соода министрлиги жана компания чечет, ал эми кыргыз өкмөтү шарт түзүп бериши керек.

Сагынбаев вакцинаны өндүрүү препараттын жеткиликтүүлүгүн гана камсыз кылбастан, жумуш орундарын да түзөрүн, ошондой эле вакцина өндүрүү жаатындагы өлкөдө алгачкы тажрыйба болорун белгилеген.