Интернет жылдызына айланган Байзак ырчы: аябай толкунданып жатам...

4842
(жаңыланган 19:12 09.02.2021)
КР эл артисти Замирбек Үсөнбаевдин “Кечирип кой” аттуу ырын ырдап жылдызы жанган Байзак Кубанычбек уулун коомчулук жылуу кабыл алууда.

Sputnik Кыргызстан агенттигине Байзак Кубанычбек уулу менен бирге анын устаты катары жол көрсөтүүнү колго алган белгилүү ырчы Кенже Көбөкова мейманда болду. Байзак учурда вокалдан сабак алууда.

— Байзак, үнүңө баракелде! Бишкекке келгенден бери кандай сезимде болуп жатасың? Борборго Жумгалдан кандайча келип калдың? 

Байзак Кубанычбек уулу: — Абдан толкунданып жатам. Алгач “Замана” телестудиясынын чакыруусу менен келгем. Андан кийин студиядан Сыймык Бейшекеевге жолуктурушту. Келгенден бери күндө ар кыл телеберүүлөргө маек берип жатабыз. Таланттуу ырчы эже-байкелер да жардам берип жатышат.

Кыргызская певица Кенже Кобокова и юный певец Байзак Кубанычбек уулу на радио Sputnik Кыргызстан
© Sputnik / Табылды Кадырбеков
Байзак учурда вокалдан сабак алууда

— Буга чейинки маектериңде беш жашыңдан бери ырдап келериңди айттың эле. Ырларды кантип жаттачу элең?

Б.К.: — Мен негизи телевизордон көрүп отуруп же телефондон угуп алып эле тез жаттап алам. Азыр деле ошентем. Мектептен келгенде атама мал жайлашып жардам берем. Анан тоого чыгып алып, жаратылыш койнунда ырдаганды жакшы көрөм.

— Үйдө дагы кимдир ырдайт? Канча бир туугансың?

Б.К. — Төрт агам жана эжем бар. Бирок алар көп деле ырдашпайт. Апамдын айтуусунда, таенем тарапта жакшы ырдагандар болгон экен. Ошондой эле атамдын туугандарынын арасында да той-топурда ырдап жүргөн туугандарыбыз бар. Бирок эч кимиси ырчылык кесипти тандап алып, чоң сахнага чыккан эмес.

— Сыймык Бейшекеев, Кенже Көбөкова баштаган таланттуу эже-агаларыңа жолуктуң. Өзүңө кандай акыл-кеңештерди ала алдың?

Б.К.: — Чынын айтсам, алгач аябай толкунданып, сүйүндүм. Сыймык Бейшекеев агабыз мага чакан белегин тапшырып, акыл-насаатын айтты. Келечекте колдоп жардам берерин убадалап, төрт ыр жаздырып бермей болду. Кенже эжем (Көбөкова — ред.) да комуз үйрөтүп жатат. Жакында Замирбек Үсөнбаевдин калемине таандык “Кечирип кой” аттуу ырды кайрадан дуэт кылып ырдап чыксакпы деп жатабыз. Ага-эжелерге ыраазымын, өздөрүнүн балдарындай камкордукка алып “муздак ичпе", "үнүңдү сакта” деп жакшы кеңештерин да беришүүдө. 

Юный певец Байзак Кубанычбек уулу
© Sputnik / Табылды Кадырбеков
Байзак Кубанычбек уулу 8-класстын окуучусу

— Кенже айым, Байзактын ырдаганын угуп, талантына, үнүнө кандай баа бердиңиз?

К.К. — Байзакта Кудай берген талант бар. Жаш болсо да белгилүү инсан Замирбек Үсөнбаевдин “Кечирип кой” деген ырын тандап алып ырдап, таанылып жатат. Ал киши биздин устат болчу. Агайлар бизге салттуу музыканы даңазалоону үйрөткөн. Аны кийинки муунга жайылтуу биздин көкүрөгүбүздө сакталуу. Батышты туураган ырлар басымдуу болуп бара жаткан мезгилде Байзактай жаш муун салттуу музыкага, салмактуу ырларга басым жасаганы кубантат. Калың элге жакшы кабыл алынып жатканынын да себеби ушул. Сыймык (Бейшекеев — ред.) байкебиз баш болуп ушундай балдарыбызды, таланттарды бапестеп алалы деп жатабыз. Байзак каңылжарга салып, көмөкөй менен ырдайт. Илгертен кыргызда вокал деген сабак өтүлгөн эмес да. Биздин Токтогул атабыз баштаган Мыскал апабызга чейинки залкарлар ушул көмөкөй менен ырдашкан.

— Алдыда кандай жардам көрсөтөлү деп жатасыздар?

К.К.: — Азыр комузду жакшылап үйрөтөйүн деп жатам. Буюрса, мындан ары байланышта болуп турабыз. Азыр ар кандай эл аралык фестивалдар да көп болот эмеспи. Интернеттен жеке баракчама кайрылып, Байзакты ошондой бир фестивалга катышууга чакырып жатышат. Фестиваль ушул жылдын 4-8-мартында өтөт экен. Ушул он бир мамлекетке чейин катыша турган фестивалга даярдык көрүп баштадык. Ушундай сынактарга колдон келишинче жакшы даярдап катыштырып алсак, андан аркы пландарыбыз да алдыда.

Кыргызская певица Кенже Кобокова на радио Sputnik Кыргызстан
© Sputnik / Табылды Кадырбеков
Кенже Көбөкова: Байзактын музыкалык аспапты үйрөнүүгө далалаты абдан күч экен. Үйрөткөнүңдү бат эле илип кетип жатат

— Борборго алып келип музыкалык мектептерде окутууну көздөгөн жоксуздарбы?

К.К.: — Учурда мектепте өзүнүн окуусу болгондуктан жакын арада айылга кеткени жатат. Азыр 8-класста окуйт. Эми ата-энеси менен сүйлөшүп, 9-классты аяктагандан кийин борбордогу музыкалык мектепке алып келсекпи деп жатабыз. Мүмкүн 11-классты бүткөндө келер. Аны азыр так айта албайм. Бирок жайында эс алууга чыкканда шаарга үйүмө алып келип, өзүм тарбиялайм. Азыр үнүн туура коюуга аракет жасап жатабыз. Апасы да мектепте мугалим болгондуктан абдан түшүнүктүү адам экен. Байзактын атасы менен апасы экөө тең баласынын келечегине, талантына кайдыгер эмес. Тескерисинче, бизге кайрылып, булактын көзүн ачуу үчүн кеп-кеңештерди да сурап жатышат.

— Байзак, келечегиңди кандай элестетип жатасың?

Б.К.: — 9унчу же 11-классты аяктап келип, борбордон музыка жаатында билим алам. Азыр консерваториягабы же Мураталы Күрөңкеев атындагы музыкалык окуу жайга барамбы, билбейм. Сүйлөшүп жатабыз. Негизи Жумгалдын борбору Чаекте Чынара Дүйшеева атындагы музыкалык мектеп бар. Ошол жерде үч жылдан бери вокалдан сабак алып келе жатам. 

Кыргызская певица Кенже Кобокова и юный певец Байзак Кубанычбек уулу на радио Sputnik Кыргызстан
© Sputnik / Табылды Кадырбеков
Кенже Көбөкова: Байзактын атасы менен апасы экөө тең баласынын келечегине, талантына кайдыгер эмес

— Кайсы аспаптарда ойной аласың?

Б.К.: — Комузду жаңыдан үйрөнүп жатам. Мындан тышкары, аккордеондо ойногонду үйрөнгүм келет. Кызыгам. Үйрөткөн адам болсо бат эле үйрөнүп кетмекмин.

К.К.: — Негизи Байзактын музыкалык аспапты үйрөнүүгө далалаты абдан күч экен. Үйрөткөнүңдү бат эле илип кетип жатат. Андан тышкары, вокалга баргандыктан аз-маз болсо да үндү койгонду билет. Башкача айтканда, күчкө салып кыйкырып ырдабайт. Ошентсе да кемчиликтер бар. Азыр  үнүнүн тембрин байкап, музыкалык аспапка салып жакшы ырдоону өздөштүрүшүбүз зарыл.

— Байзак, ким болсом дейсиң?

— Ырчы эле болгум келет. Мен жеңил-желпи эстрадалык ырларды ырдоону жактырбайм. Көбүнчө эски ырларды ырдаган жагат.

4842
Белгилер:
Кенже Көбөкова, Байзак Кубанычбек уулу, консерватория, Жумгал, мектеп, музыка, ыр
Тема боюнча
Галкинди таңданткан Барсбектин апасы: уулум Бишкекке бийик үйлөрдү курсам дейт
Эл өлкө эмес өз камын ойлойт экен. Кытайлык кыргыз акын Акмат Султандын маеги
Ош шаарынын борбордук аянтында Бажы кызматынын жетекчисинин мурдагы орун басары Райымбек Матраимовдун тарапташтары митинг уюштурушту

Ошто миңдей адам Матраимовду колдоп митингге чыкты. Сүрөт, видео

152
(жаңыланган 14:44 28.02.2021)
Мурдагы аткаминерди колдоп митингге чыккандардын арасында Жогорку Кеңештин депутаттары Таабалды Тиллаев, Мирлан Бакировдор бар экени маалым болду.

БИШКЕК, 28-фев. — Sputnik. Ош шаарынын борбордук аянтында Бажы кызматынын жетекчисинин мурдагы орун басары Райымбек Матраимовдун тарапташтары митинг уюштурушту.

  • Митинг в поддержку экс-заместителя ГТС Райыма Матраимова в Оше
    Ош шаарынын борбордук аянтында Бажы кызматынын жетекчисинин мурдагы орун басары Райымбек Матраимовдун тарапташтары митинг уюштурушту
    © Sputnik / Зульфия Тургунова
  • Митинг в поддержку экс-заместителя ГТС Райыма Матраимова в Оше
    Sputnik Кыргызстан агенттигинин кабарчысы билдиргендей, аянтка 1000дей киши чогулган
    © Sputnik / Зульфия Тургунова
  • Митинг в поддержку экс-заместителя ГТС Райыма Матраимова в Оше
    Алар колдоруна мурдагы аткаминерди колдогон ар кандай жазуулары бар плакаттарды көтөрүп алышкан
    © Sputnik / Зульфия Тургунова
  • Митинг в поддержку экс-заместителя ГТС Райыма Матраимова в Оше
    Митингге чыккандардын арасында Жогорку Кеңештин депутаттары Таабалды Тиллаев, Мирлан Бакировдор бар экени маалым болду.
    © Sputnik / Зульфия Тургунова
1 / 4
© Sputnik / Зульфия Тургунова
Ош шаарынын борбордук аянтында Бажы кызматынын жетекчисинин мурдагы орун басары Райымбек Матраимовдун тарапташтары митинг уюштурушту

Sputnik Кыргызстан агенттигинин кабарчысы билдиргендей, аянтка 1000дей киши чогулган. Алар колдоруна мурдагы аткаминерди колдогон ар кандай жазуулары бар плакаттарды көтөрүп алышкан.

Митингге чыккандардын арасында Жогорку Кеңештин депутаттары Таабалды Тиллаев, Мирлан Бакировдордун бар экени маалым болду.

Эске салсак, Бажы кызматынын жетекчисинин мурдагы орун басары Райымбек Матраимов кайра кармалган. Биринчи май райондук соту тарабынан анын баш коргоо чарасы каралып, эки айга чейин абакта кармоо чечими чыккан. Андан кийин абакта анын кан басымы көтөрүлүп жатканы айтылган.

Буга чейин Бишкекте дагы мурдагы аткаминерди колдогон митинг өткөн.

Матраимов өткөн жылдын 20-октябрында бажы тармагындагы коррупция боюнча айыпталып, УКМК тарабынан колго түшкөн. Биринчи май райондук соту баш коргоо чарасын тандап, сыртка чыкпоо тууралуу тил кат алган болчу.

Кийинчерээк ал мамлекетке келтирилген эки миллиард сомдук зыянды толтурууга макул болгону айтылган. Анын 1,4 миллиардын акчалай, калган 600 миллион сомуна бир соода борборун, тогуз батирин өткөрүп берген.

11-февралда Биринчи май райондук сотунун судьясы Гүлзат Дыйканбаева Матраимовду коррупцияга күнөөлүү деп таап, 260 миң сом айып салган. Анын жана жакын туугандарынын камакка алынган мал-мүлкүн ээлерине кайтарып берген. Бул окуядан кийин коомчулук арасында нааразычылык жаралып, митингге чыгышкан. Кийин президент Садыр Жапаров сот Матраимовго бир эпизод боюнча гана чечим чыгарганын жана иш уланарын айткан. УКМК дагы Райым Матраимов кытай жараны Айеркен Саймаитинин банктар аркылуу өлкөдөн 700 миллион доллар чыгарып кетишине тиешеси бар-жогун аныктоо үчүн тергөө иштери улантылып жатканы боюнча маалымат тараткан.

152
Белгилер:
аткаминер, колдоо, митинг, Ош, Райымбек Матраимов
Тема:
Райым Матраимовдун кармалышы
Тема боюнча
Райым Матраимов эки айга камакка алынды
Абактагы Райым Матраимов кан басымы көтөрүлүп жатканын айтты
Өпкөнүн рентген сүрөтү. Архив

Штаб: өлкөдө коронавируска караганда пневмониядан көп адам көз жумган

33
(жаңыланган 13:49 28.02.2021)
Коронавирус жуктургандардын санын аймактар боюнча алганда Бишкек шаары биринчи орунда турат. Чүй менен Жалал-Абад облусунда да бир топ адамдан оору аныкталган.

БИШКЕК, 28-фев. — Sputnik. Кыргызстанда коронавирустан жалпы 1 464 бейтап көз жумса, анын 1 004ү коронавирус чакырган пневмониядан (U07.2) каза тапкан. Бул тууралуу Республикалык штаб маалымдады.

Эске салсак, Дүйнөлүк саламаттык сактоо уюму ооруларды классификациялоодо эки кодду киргизген. Тагыраагы, U07.1 коду — лаборатория тарабынан тастыкталган оору, башкача айтканда, коронавирус. Ал эми U07.2 клиникалык жана эпидемиологиялык жактан аныкталган пневмония деп эсептелет.

Ошондо Кыргызстанда көз жумган жалпы 1 464 бейтаптын ичинен 460ы коронавирустан (U07.1), ал эми 1 004ү пневмониядан ажал тапкан.

Өлкөдө коронавирус жуктургандардын саны 86 229га жетти. Республикалык штаб оору аныкталгандардын көбү кайсы аймактан экенин да көрсөткөн.

  • Бишкек шаары — 28 939;
  • Чүй облусу — 13 079;
  • Жалал-Абад облусу — 9 987;
  • Ош облусу — 8 507;
  • Ысык-Көл облусу — 7 824;
  • Баткен облусу — 7 211;
  • Ош шаары — 5 628;
  • Талас облусу — 2 616;
  • Нарын облусу — 2 444.

Кыргызстанда коронавирус жуктургандардын ичинен 83 179у ооруну жеңгени айтылды.

33
Белгилер:
өлүм, оору, пневмония, коронавирус, аймак, Кыргызстан
Тема:
Коронавируска байланыштуу Кыргызстандагы кырдаал
Тема боюнча
Бишкекте бир суткада пневмонияга кабылган 32 бала ооруканага түштү
Ош мэриясы "шаарда балдар өлүмү көп катталууда" деген билдирүүгө үн катты
Спорт аренасы. Архив

"Ура!" дейсиң деп... Дагестандагы мелдеште массалык мушташ чыкты. Видео

0
Эгер чатакташкандардын арасында спортчулар менен машыктыруучулар бар экени далилденип калса, катуу чара көрүлөрү айтылды.

БИШКЕК, 28-фев. — Sputnik. Дагестандын Каспийск шаарында дзюдо боюнча уландар арасындагы Түндүк-Кавказ федералдык округунун чемпионатында массалык мушташ чыгып кетти. Бул тууралуу РЕН ТВ билдирди.

Окуянын видеосу "Пул №3" Telegram каналына жарыяланды.

"Мушташ спортчулар 10 мүнөттөн ашык кармашкандан кийин башталды. Дагенстандык күйөрмандардын бири колун булгалап, "Ура!" деп кыйкырып жибергени осетиялык көрүүчүлөргө жакпай калганын айтышты. Мушташкандардын арасында спортчулар да бар экенин угуп жатам", — деди РФтин эмгек сиңирген машыктыруучусу Хабиб Магомедов.

Анын айтымында, эгер чатакташкандардын арасында спортчулар менен машыктыруучулар бар экени далилденип калса, катуу чаралар көрүлөт. Магомедов деги эле мындай окуянын болушун сынга алган.

"Минтип отурсак эч ким медаль албайт. Ушундай көрүнүштөрдүн айынан атлеттер менен машыктыруучулар убактылуу спорттон четтетилиши ыктымал", — деген ал.

Массалык мушташтан жабыркагандар катталган эмес.

0
Белгилер:
дзюдо, видео, мушташ, Дагестан, Россия
Тема боюнча
Мушкер атаандашына кол салып, мушташ чыгарып жиберди. Видео