Бала ити менен сейилдөөгө бара жатат. Архив

Кинологдор ооруларды иттер жыт аркылуу аныктай аларын айтышты

41
Ит менен иштегендер белгилегендей, ар бир оорунун өзүнчө жыты бар, ал аркылуу ит дене табындагы анча-мынча өзгөрүүлөрүн жана организмдеги сезгенүү процесстерин аныктай алат.

БИШКЕК, 14-фев. — Sputnik. Атайын үйрөтүлгөн иттер кандагы канттын деңгээлин, рак, эпилепсия жана коронавирус инфекциясын жыт аркылуу аныктай алышат. Бул тууралуу Россиянын Кинологиялык федерациясы (РКФ) 12-февралда өзүнүн Instagram баракчасына жазганын "Известия" билдирди.

Күнүмдүк машыгуудан кийин 3-5 жуманын ичинде итке ар кандай ооруларды аныктоону үйрөтүү мүмкүн экендиги белгиленет. Керектүү жытты табуу мүмкүнчүлүгүнө ээ болгон, ага кызыгуу көрсөткөн жаныбарлар машыгууга алынат.

Ит менен иштегендер белгилегендей, ар бир оорунун өзүнчө жыты бар, ал аркылуу ит дене табындагы анча-мынча өзгөрүүлөрүн жана организмдеги сезгенүү процесстерин аныктай алат.

Иттин ооруну аныктоосу үчүн ага ошол илдетке чалдыккан адамды жыттатат же ит анын жытынын үлгүсүн алат. Эгер ооруну сезип калса анда ит үнү же кандайдыр бир кыймылы менен белги берет.

Учурда Россияда шалайка тукумундагы иттерди коронавирус инфекциясынын жытына көндүрүү үчүн үйрөтүлүп жатат.

2020-жылдын май айынын башында Франциянын Корсика аралындагы кинологдор жана ветеринарлар үйрөтүлгөн ит коронавирус менен ооруган адамдарды жыттан аныктоо жөндөмүн изилдеп жатканы белгилүү болгон. Көп өтпөй алардын финляндиялык кесиптештери бул гипотезаны жылдын аягында тастыкташкан.

Ал эми Австриянын Куралдуу күчтөрү июль айында эле коронавирус жуктурган адамды жытынан аныктоочу иттерди тесттик режимде үйрөтө башташкан.

41
Белгилер:
аныктоо, оору, жыт, ит, коронавирус
Тема боюнча
Кинолог: көп жыл иштеген кызматтык иттер "пенсияга" чыгарылат
Иранда иттерди COVID-19ду аныктоого үйрөтүшүүдө. Кызыктуу видео
Первый вице-премьер-министр Артем Новиков

Калпак кийген Новиков кыргызстандыктарды майрамы менен куттуктады. Видео

0
(жаңыланган 16:34 05.03.2021)
Биринчи вице-премьер жарандарды кыргыз тилинде майрамы менен куттуктап, ак калпак эр жүрөк, курч мүнөз жигиттин белгиси экенин белгиледи.

БИШКЕК, 5-мар. — Sputnik. Биринчи вице-премьер Артём Новиков кыргызстандыктарды улуттук баш кийим — Ак калпак күнү менен куттуктады.

Куттуктоо видеосу Новиковдун Facebook баракчасына жарыяланды.

"Кадырлуу кыргыз элим, урматтуу достор. Бүгүн мамлекетте өзгөчө майрам — Ак калпак күнү. Ак калпак кыргыз элинин башкы белгиси жана ыйык буюму. Ак калпак — бул эр жүрөк, курч мүнөз жигиттин белгиси. Ак калпак — бул Ала-Тоо. Ошон үчүн бийик бололу, Кыргызстан бийиктикте болсун. Майрамыңыздар менен куттуктайм!" — деди Новиков.

Белгилей кетсек, Ак калпак майрамы Кыргызстанда 2011-жылдан бери майрамдалып келет. 2016-жылы Жогорку Кеңеш 5-мартты Ак калпак жана улуттук кийимдер күнү деп расмий бекиткен. Бул майрам жер-жерлерде белгиленип, мырзалардын күн бою ак калпак кийип жүрүшү салтка айланган.

0
Белгилер:
ак калпак, Ак калпак күнү, Кыргызстан, Артем Новиков

Ишим оор деп жүрөсүзбү? Көндүм ойду жокко чыгарган ширетүүчү айымдын видеосу

2
(жаңыланган 16:35 05.03.2021)
Бишкек ЖЭБдеги ширетүүчүлөр арасында аял киши бар экенин билчү белеңиз? Бул Минихоят Семенюта. Ал жарым кылымдык өмүрүн ушул кесипке арнаган. Кыргызстандык айымдын жумуш күнү кандай өтөрүн Sputnik Кыргызстан агенттиги тартып келди.

Минихоят Закиуллаевна мактанганды жактырбайт. Бирок анын эмгек жолу эле баарын айтып турат. Ажарлуу айымдын 45 жылдык иш тажрыйбасы бар. Көп жылдык эмгек анын кесибине болгон сүйүүсүн мокото алган эмес. Ал түтүктөрдү, металлдан жасалган конструкцияларды жогорку чеберчилик менен ширетет.

Адистин айтымында, 1970-жылдары советтик жаштар ушундай сыяктуу кесиптерге кызыгышчу. Себеби өлкөдө ГЭС, ТЭЦ жана башка ири объектилер курулуп жаткан. Тиги же бу кесиптин артыкчылыктарын айтып берген үгүтчүлөрдүн дагы салымы чоң эле.

"Ширетүүчүлүк менен алектене турган кыздарды топтоо демилгеси көтөрүлүп, жыйынтыгында каалоочулардын саны арбып, бир группа түзүлгөн. Училищени аяктагандан кийин 1976-жылы биз Сыр-Дарыя ГЭСинде иштедик. Жөнөкөй нерседен баштап акырындык менен жоопкерчиликтүү иштерге өтө баштадык", — деди маектеш.

Кыргызстандык айым практика учурунда эле тандоосунан адашпаганын түшүнгөн.

"Колуң ишке көнүп калгандан кийин кызыгуу ого бетер күч алат. Сага маанилүү иштерди табыштай башташат. Мындай учурларда сенден керектүү адис чыкканын сезе баштайсың", — деди Семенюта.

Учурда Минихоят Закиуллаевна алтынчы разряддагы тажрыйбалуу кызматкер. Бул эң жогорку жана жоопкерчиликтүү категория. Ошентсе да ал өзүнүн ишин оор деп эсептебейт.

"Бул силер элестеткендей оор иш эмес... Тескерисинче, абдан кызыктуу. Мында жонуңа бир нерсе көтөрүп жүрүү зарылдыгы жок. Эң башкысы, сенин ишиңден кийин бирөө жарым кулап же сынып калбашы керек. Бул, албетте, чоң жоопкерчилик. Бирок ошентсе дагы кооптуулук жок", — деп ишендирди ал.

Семенютанын жумушундагылар ага сый-урмат менен мамиле жасашат. Бул айымдын кесибин уккан адамдар адатта таң калышат. Ширетүүчү айымдар аз эмеспи.

"Учурда ширетүүчү аялдар аз... Мен эле калдым го дейм. Бирок Россияда, тескерисинче, бул кесипке кызыккан кыздар көбөйүүдө", — деди ал.

Минихоят Закиуллаевна 45 жылдык эмгек жолунда бир дагы жолу кесибин алмаштыруу жөнүндө ойлонуп көрбөгөнүн кошумчалады.

Редакция КамАЗ айдап Кара-Кечеден көмүр ташып суктанткан айым тууралуу да материал даярдаган.

2
Белгилер:
Көмүр, ЖЭБ, Бишкек