Sinopharm вакцинасы. Архив

Кыргызстанга кытай вакцинасы алып келинди. Sinopharm тууралуу эмне белгилүү?

(жаңыланган 10:33 20.03.2021)
Кытай өз өндүрүшүндөгү вакцинаны Кыргызстанга COVID-19га каршы күрөштүн алкагында берди. Sinopharm вакцинасы тууралуу Sputnik Кыргызстандын бул материалынан окуңуздар.

Республикага 150 миң ченемдеги Sinopharm кытай вакцинасы келди. Аны утурлай КР саламаттык сактоо министри Алымкадыр Бейшеналиев Sputnik Кыргызстандын маалымат борборунда өткөн брифингде өлкөгө келген доза 75 миң кишиге жетерин айткан эле.

Алгач вакцина көп сандагы адамдар менен иштегендерге, атап айтканда, медик, мугалим, чек арачыларга салынат. Андан соң өнөкөт илдети бар жана 65 жаштан өйдөңкү кыргызстандыктар эмделет.

Sputnik Кыргызстандын редакциясы бийлик өлкөдө жапырт эмдөөнү баштоого белсенип турган кытай вакцинасынан кеп козгоону чечти.

Sinopharm ("Синофарм") — коронавирус инфекциясына каршы Кытайда алгачкылардан болуп жактырылган вакцина. Ушул тапта аталган препаратты өз өлкөсү активдүү пайдаланууда. Аны бир катар чет элдик мамлекеттерде да жактырган.

Препарат активсиздештирилген (өлтүрүлгөн) коронавирустун негизинде жасалган. Бул – вакцина жаратууда эң ынанымдуу ыкмалардын бири. Буга дейре ушул эле технология боюнча, маселен, дифтерияга, В түрүндөгү гепатитке, полиомиелитке, көк жөтөл (коклюш) жана столбнякка каршы вакциналар чыгарылган.

Кытай COVID-19га каршы 150 миң доза SinoPfarm вакцинасын Кыргызстанга акысыз берди
© Пресс-служба правительства / Алишер Алиев
Курс эки баскычтан турат. Бул каражат булчуңга 21 күндүк аралык менен сайылышы керек. Аны Sinopharm компаниясынын бөлүгү – China National Biotec Group Company (CNBG) Ухандагы Вирусология жана Биологиялык өндүрүмдөр институттары менен кызматташтыкта иштеп чыккан.

Бул вакцинаны сыноолордун үчүнчү фазасы он өлкөдө, анын ичинде Бириккен Араб Эмирлиги, Бахрейн, Перу, Сербия, Марокко, Аргентина, Иордания жана Пакистанда жүргүзүлгөн.

Бирок компания үчүнчү баскычтын сыноолору жөнүндө пресс-релиздерден жана майнаптуулугунун көрсөткүчтөрүнөн тышкары рецензияланган медициналык журналдарда жарыялаган жок, вакцина тууралуу маалымат чыкпады. Ушундан улам дүйнөлүк эксперттер жана эпидемиологдор анын натыйжалуулугунан шек санайт.

"Бул вакцина канчалык жакшы таасир этерин айтыш кыйын", — деп билдирет Оксфорд университетинин эпидемиологу Чжэнмин Чен.

Европа биримдигинен биринчилерден болуп Венгрия Sinopharm вакцинасын пайдаланууну чечкен. 16-февралда бул мамлекет 550 миң доза вакцина алган, алдыдагы төрт ай аралыгында дагы 5 миллионду алууга үмүттөнүп турат. Бирок Венгрия медициналык палатасы мүнөздөмөлөрү расмий жарыяланбагандыктан Sinopharm вакцинасын пайдаланууга кеңеш бере албай турганын маалымдаган.

Дүйнөлүк маалымат каражаттары Перуда анын сыноолору былтыр декабрда токтотулганына да көңүл бурбай коюшкан жок. Анткени ыктыярчылардын бири эмделгенден кийин неврологиялык Гийен-Барре синдромунун белгилери пайда болгон.

Бул дарт тооруганда адамдын колдорун кыймылдатуусу кыйындап калат.

"Бир нече күн мурда жөнгө салуучу органдар изилдөөнүн 64 жаштагы катышуучусунда неврологиялык белгилер байкалган. Булар Гийен-Барре синдромуна байланыштуу болушу мүмкүн. Мындай нерсенин болушу күмөнсүтөт, анткен менен коопсуздук биринчи даражадагы мүнөздө. Ошол себептен дал эмне болгонун аныктоо үчүн изилдөөнү утурумдук токтотуу чечими кабыл алынды", — деп билдирген изилдөөчүлөр тобунун жетекчиси Херман Малага.

Изилдөөлөр негизинен препарат коопсуз экенин көрсөткөн, ал эми эмдөөдөн соң антителонун жогорку деңгээли иштелип чыгат. Вакцинанын майнаптуулугу 86 пайыз, ал эми коронавирустун оор кесепеттеринен коргоо даражасы 100 пайыз деп бааланууда. Ошол эле убакта Түркиядагы, Индонезия жана Бразилиядагы өнөктөштөрү препараттын натыйжалуулук деңгээлин 50дөн 91 пайызга чейин деген бүтүмгө келишкен.

Sinopharm вакцинасын сактоодо минустук температуранын зарылдыгы жок. Андыктан аны ташуу, тийиштүү муздаткыч камералары жок өлкөлөргө таратууну кыйла жеңилдетет.

Кытайдын Тышкы иштер министрлигинин билдирүүсүнө ылайык, бийлик эмдөө иштеринде өнүгүп келе жаткан 53 жана экспорттук келишимге ээлик кылган дагы 22 мамлекетке көмөк көрсөтүүдө.

КЭР жана бир катар өлкөлөрдө кытайлык Sinopharm фармацевтикалык компаниясы тарабынан иштелип чыккан вакцинанын 43 миллион дозасы пайдаланылды. Алардын 34 миллиону Кытайда, калганы чет өлкөлөрдө, көбүнесе Азияда колдонулду.

Белгилер:
коопсуздук, жыйынтык, эмдөө, вакцина, коронавирус, Кытай, Кыргызстан
Тема:
Коронавируска каршы эмдөө (52)
Тема боюнча
Жакында Кыргызстанга Россиянын "Спутник V" вакцинасы алып келинет
Европа AstraZeneca компаниясынан өч алууда
АКШда коронавируска каршы вакцина алган аялдан антителосу бар ымыркай төрөлдү
Ысык-Көл тамыры чөп кайнатмасы

Бишкекте киши уу коргошунга ууландыбы? Дарыгерлердин жообу

(жаңыланган 22:40 16.04.2021)
"Ысык-Көл тамыры" уусу күчтүү дары чөп болуп эсептелет. Тажрыйбалуу медицина кызматкерлери коронавирустан бекитилген протоколдун негизинде дарыланууну сунуштайт.

БИШКЕК, 16-апр. — Sputnik. Социалдык тармактарда Бишкекте киши "Ысык-Көл тамыры" деген чөптүн кайнатмасын ичип алып ууланып калганы тууралуу маалымат тарап жатат.

Бул тууралуу өзүнүн Facebook баракчасына Кыргыз-Россия Славян университетинин клиникалык фармакология кафедрасынын жетекчиси, медицина илимдеринин кандитаты Аида Зурдинова дагы жазган.

"Мессенджер аркылуу мага маалымат түштү. Тез жардамда иштеген таанышыма саат 14:00дө бир киши чалып "жардам бергиле" деп кыйкырыптыр. Бейтап 10-кичи райондо жашайт экен. Дарыгерлер жерине барганда батирдин ичинен бүгүн жарнамаланган уу коргошундун бөтөлкөсүн көрүшкөн. Бейтаптын жүрөгүнүн согушу бузулуп, дем алуусу кескин начарлаган. Бактыга жараша, Тез жардамды убагында чакырышкан. Бейтап өзү дагы ошол кайнатманы ичкенин билдирген. Жаран токсикологияга жеткирилген, жакшы болуп кетет деп үмүт артуудабыз", - деп жазды ал.

Анткен менен Бишкектеги Травмотология жана ортопедия илим изидөө борборунун токсикология бөлүмүнөн мындай бейтаптар түшпөгөнүн билдиришти.

Ал эми Зурдинов өзүнүн жазган постунун алдына бейтап жеке клиникага жаткырылганын жазып, окуянын чоо-жайы тууралуу маалымат эртең болорун билдирди.

Уу коргошун чуусу

Буга чейин президент Садыр Жапаров Кыргызстандын дарыгерлери коронавирустан 2-3 күндө айыктырган ыкма тапканын айткан. Көп өтпөй социалдык тармактагы баракчасына он чакты киши атайын аппараттын жардамы менен бөтөлкөлөргө саргыч түстөгү суюктукту куюп жаткан видео жарыялаган. Анда бөтөлкөлөрдүн сыртында "Уу коргошун" жана "Иссык-Кульский корень" деген жазуулар бар экенин көрүүгө болот.

Дүйнөлүк саламаттык сактоо уюмунун Кыргызстандагы өкүлчүлүгүнүн башчысы Назира Артыкованын ЖМКларга билдиргенине караганда, "Ысык-Көл тамырынын" кайнатмасы менен коронавирусту дарыласа болот деп ойлоо туура эмес.

Журналисттин "Сөз болуп жаткан кайнатма менен коронавирустан арылса болобу?" деген суроосуна ал: "Мүмкүн эмес. Бардык жерде илимий далил керек", - деп жооп берди.

Ал арада Дүйнөлүк саламаттык сактоо уюмунун (ДССУ) Кыргызстандагы өкүлчүлүгү билдирүү таратып, сыноодон өтпөгөн дарыны каттоо жана калкка кеңири колдонууга сунуштоого болбой турганын эскертти. Клиникалык сыноолордо препараттын натыйжасы жана коопсуздугу аныкталарын эске салган.

Ал эми далилдүү медицина боюнча адис Бермет Барыктабасова "Ысык-Көл тамыры" Кыргызстандагы эң уулуу чөп экенин айтып, анын кайнатмасын пайдалануу элдин саламаттыгына коркунуч жаратарын билдирген.

Белгилер:
бейтап, дары, Ысык-Көл тамыры, уу коргошун, Садыр Жапаров, Кыргызстан
Тема:
Уу коргошун чуусу
Тема боюнча
Садыр Жапаров уу коргошун кайнатканды кимден үйрөнгөн?
Министр: уу коргошунду туура эмес ичкен адам беш мүнөткө жетпей өлөт
Барыктабасова: "Ысык-Көл тамыры" элдин саламаттыгын коркунучка кептейт
Бишкек шаарынын дрондон көрүнүшү. Архив

Бишкектин жаңы башкы планы тез арада иштелип чыкмай болду

(жаңыланган 22:03 16.04.2021)
"Бишкек башкы архитектура" ишканасында өткөн жыйында шаар куруу боюнча документациялык көйгөйлөрдү тезинен чечүү зарылдыгы айтылды.

БИШКЕК, 16-апр. — Sputnik. Бишкек мэриясы менен Транспорт, архитектура, курулуш жана коммуникация министрлигине борбор калаанын жаңы башкы планын иштеп чыгуу өтүнүчүн камтыган кат жиберилет. Бул тууралуу "Бишкек башкы архитектура" мекемесинин маалымат кызматы билдирди.

Учурда иштеп жаткан генералдык пландын мөөнөтү бүтө элек болсо да аракеттер көрүлөт.

Бүгүн аталган мекемеде шаар куруудагы документацияны иштеп чыгуу жана бекитүү маселесине арналган отурум болду. Ага профилдик министрликтин өкүлдөрү, "Бишкек башкы архитектура" ишканасынын башчысы Марат Жороев, Кыргызстандын архитекторлор союзунун жетекчилери жана мүчөлөрү, прокуратура жана курулуш компанияларынын өкүлдөрү катышты.

Талкуудан соң Транспорт, архитектура, курулуш жана коммуникация министрлигине айрым процедураларды жөнөкөйлөштүрүү максатында тийиштүү ченемдик-техникалык документацияларды тез арада өркүндөтүү зарылдыгы боюнча кайрылуу чечими кабыл алынды.

"Бишкек мэриясына, Транспорт, архитектура, курулуш жана коммуникация министрлигине Бишкектин учурдагы башкы планынын мөөнөтү бүткөнгө чейин эле жаңысын иштеп чыгуу өтүнүчү менен кат жиберилет", — деп айтылат маалыматта.

Мэрдин милдетин аткаруучу Бактыбек Кудайбергенов буга чейин Бишкек шаарынын башкы планынын ачыктыгын камсыздоо негизги милдеттеринин бири экенин билдирген.

Учурда ордо калаада 2025-жылга чейинки генералдык план иштеп жатат. Ал 2006-жылы кабыл алынып, бекитилген.

Белгилер:
Бишкекбашкыархитектура, башкы план, Бишкек, Кыргызстан
Тема боюнча
Бишкекте түркүн түстүү жоогазындар гүл ачты. Ажайып сүрөттөр
Бишкекте дагы эки көчөнүн кесилишинде оңдоо иштери жүрүп, жолдор жабылат
Бишкекте эмен бактарын курттан коргоо үчүн ийне сайылып баштады. Сүрөт