БИШКЕК, 25-мар. — Sputnik. "Манас" эл аралык аэропорту" ААКсы Кыргызстандан бир нече багыттар боюнча авиабилеттердин баасы эмнеге өсүп кеткенин айтып берди.

Бүгүнкү күндө жарандар аэропортко авиабилеттер кескин кымбаттаганын айтып нааразычылыктарын билдиришүүдө.

"Аэропорт авиабилет сатуу менен алектенбейт жана бааны жөнгө сала албайт. Баа саясатын авиакомпаниялар жүргүзөт. Алар ички эрежелерине таянып сатышат", — дешти маалымат кызматынан.

Аэропорттон билдиришкендей, Россия менен Казакстандын шаарларына кеткен гана рейстердин билеттери кымбат болуп жатат.

"Билеттердин баасын "Аэрофлот", "Урал авиалиниялары", "Сибирь", "Эйр Астана" жана дагы бир нече компания кымбаттатты. Россияга кеткен билеттердин баасынын өсүшү COVID-19га байланыштуу болду. Пандемиядан улам авиарейстер кыскарып, чартердик каттамдардын жаңы эрежелери жаралды", — деп айтылат маалыматта.

Мисалы, буга чейин күн сайын Бишкек — Москва каттамы менен 4-6 рейс аткарылып турган.

"Бирок пандемияга байланыштуу рейстердин саны кескин кыскарып кетти. Ошол эле учурда күн сайын аткарылчу чартердик каттамдар ачылды. Ошентсе да Россияга кетүүнү каалагандарга билет жетпей, ажиотаж жаралып, мындай жагдай баалардын өсүшүнө алып келди", — дешти аэропорттон.

Авиабилеттердин кымбатташынын экинчи себеби — учуу эрежелеринин өзгөрүүсү (чартердик жана кадимки каттамдардыкы ар кандай).

"Чартердик рейстин жүргүнчүлөрү ПЦР-тесттен сырткары Россияга кирүүгө абдан муктаж болуп жаткандыгы боюнча документин дагы көрсөтүшү керек. Ал эми кадимки каттам менен кеткендерге ПЦР-тесттин анализи гана керек. Мындан улам ушундай каттам менен жүрүүнү каалагандардын саны өсүп, авиабилеттердин кымбатташына алып келди", — дешти аэропорттон.

Чартердик рейстер буга чейин деле кадимки каттамдарга караганда кымбат болгону белгиленди.

"Өзү каалаган бааны коюп жаткан авиакомпаниялар локдаун учурундагы финансылык жоготууларынын ордун толтурууга аракет кылып жатышы дагы мүмкүн. Кыскасы, жаралды делген дефицит, авиабилеттердин алып-сатылышы жана компаниялардын кызыкчылыктары бааны өстүрдү", — деди маалымат кызмат.

Кыргызстан "COVID-19 жок саякатта" тиркемесине кошулушу күтүлүп жатат. Болжол боюнча эгер Россия КРдин тиркемеге кошулушун жактырса, өлкөдөн учуу процедуралары кыйла жеңилдейт. Ошондой эле рейстердин саны өсүп, билетке болгон ажиотаж басаңдашы мүмкүн.

БИШКЕК, 20-апр. — Sputnik. Айзада Канатбекова киши колдуу болгон жердин сүрөтүн жарыялаган үч милиция кызматкери жазаланды. Бул тууралуу Чүй облустук милициянын маалымат кызматы билдирди.

Социалдык тармактарга тарап кеткен сүрөт, анын ичинде кылмыш катталган жерге ташталган медициналык кол каптар боюнча фактынын негизинде кызматтык иликтөө жүргүзүлгөн. Иликтөөнүн башкы максаты милдетин так аткарбай, көңүл кош мамиле жасаган кызматкерлерди жоопко тартуу болгон.

Ким кандай жаза алды:

• Аламүдүн РИИБдин жоруктар бөлүмүнүн кызматкери, милициянын лейтенанты А. Экеевге катуу сөгүш;
• Аламүдүн РИИБдин криминалдык милиция кызматынын жетекчиси, милициянын майору К. Самаевге катуу сөгүш;
• Аламүдүн РИИБдин Криминалдык топту коштоп жүрүүчү инспектор-криминалист, милициянын капитаны М. Янванчиновго кызматына дал келбестиги боюнча эскертүү.

Айзаданын өлүмү

5-апрель күнү эртең менен саат 7:00дөр чамасында Медеров жана Тыныстанов көчөлөрүнүн кесилишинен үч жаран 27 жаштагы кызды кызыл түстөгү автоунаага салып кеткен. Кыздын туугандары ошол эле күнү издеп баштап, Биринчи май райондук милицияга саат 7:30да кабарлашкан. Бирок издөө иштери кечеңдеп жатканына нааразы болуп, эртеси ЖМКларга кайрылышкан.

7-апрелде изделип жаткан автоунаа Бишкектин чет жагындагы Арашан менен Чокморов айылдарынын ортосунан табылган. Ал тууралуу милицияга жергиликтүү чабан кабар берген.

Автоунаанын ичинен киши колдуу болгон Айзада Канатбекованын жана 36 жаштагы кишинин бычакталган сөөгү табылган. Кызды ала качууга катыштыгы бар делип төрт шектүү кармалган.

Айзада Канатбекованын өлүмү боюнча кызматтык иликтөөнүн натыйжасында Бишкек ШИИБдин жана Биринчи май райондук милициясынын начальниктери баш болгон бир катар жетекчилер кызматтан алынган.