Жолукчан аял. Архивдик сүрөт

Келинимдин чыр салганы жанга батты, чыдабай баратам... Кайнененин даты

2542
(жаңыланган 12:10 03.07.2021)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасына кыялы жаман келинден көңүлү калса да баласын кыя албай кыйналган эне кат жазган.

Саламатсыздарбы, менин катыма да психологдон кеңеш сурап берсеңиздер жакшы болот эле. Өзүм 57 жаштамын. Абышкам да алтымышка чыгып калды. Экөөбүз беш баланын ата-энеси болдук. Улуу балам менен келиним өз алдынча бөлүнүп кетишкен. Балдарынын алды мектепти аяктоо алдында турат. Үч кызым бар. Кыздардын экөөсүн турмушка берип, бирөө шаарда иштейт. Каражаттын жоктугунан балдардын эч кимисин окута албадык. Азыр колубузда кичүү уулум менен келиним бар. Чүйдө турабыз. Келинимдин келгенине 10 жылдан ашты. Төрт баласы бар. Келин-уулум иштешет. Абышка экөөбүз баланы, үй-жайды карап үйдөбүз.

Менин маселем эле баламдын ден соолугуна байланыштуу. Тубаса жүрөк оорусу бар. Капаланса эле жүрөгү кармап, эс-учун билбей жатып калат. Өзү аябай жоош. Коркуп, кичинесинен көзүн карап өстүрдүк. Келиним болсо дакылдаган, улуу-кичүү, кайната-кайнене, кайнага дегенди билбей эле адыраңдап сүйлөгөн жайы бар. Жедеп ушу баламды аяп, "экөө урушуп кетпесе экен" деп көзүн карап жүрүп ушуга келдик. Келиндин айтканынын баарына көнөбүз. Кыздарым келсе бир күндөн кийин эле "кетишпейби" деп үтүрөңдөп чыгат. Анда да кыздарымды акырын жолуна салам. 

Кылдан кыйкым таап ызы-чуу салмайы бар. Аялынын жини кармаганда, ызы-чууну көтөрө албаган балам жүрөгү кармап жатып калат. Бир нече жолу тез жардам чакырып, ооруканага да алып барган күндөр болду. Баламдын оорусунан коркорубузду билип алып, келин бизди каалагандай калчай турган болду. Эмне кылышты билбей калдык. Бир айда жок дегенде эки жолу уруш чыгарат. Бир-эки ирет энесин, эжелерин чакырсак алар кызын тилдеп, тынчтандырып кетишкен. Кудагыйым менен кудачалар деле созулган жакшы кишилер. Менин келиним эле кайдан чыкканын билбейм.

Мындан ары келиндин кылыгына чыдабай калдык. Айла жок. Кандай кылсак болот?

Психолог Гүлнара Жасоолова:

— Үй-бүлөдө негизи келишпестиктер боло берет. Бирок аны туура жол менен чечип алууну, бири-бирин угуп, түшүнүүнү үйрөнсөк конфликт өзүнөн-өзү чечилет эле.

Келиндин жаман кыялынын бир айда эки жолу кармарын эсеп менен жазыпсыз. Ал эмне себептен антип жатканынын себебин аныктап көрсөңүз. Мүмкүн талаптары орундалбай жаткандыр же күйөөсүнө нааразычылыгы бардыр. Балаңыздын ден соолугуна байланыштуу көзүн карап өстүргөн экенсиз. Азыр да үй-бүлөсү бар, ата болуп калган балаңызга өзгөчө көңүл буруп, бөпөлөп жатканыңыз, балким, келиниңизге жакпай жаткандыр. Ошол себептен кылдан кыйкым издеп жаткан жокпу? Анткени аялзатында "жолдошум мага көңүл бурса, эс алып бир жакка барсак, чечкиндүү болсо" деген өңдүү ойлор болот. Ушул жагынан оюн айта албай жинин чыр-чатак менен чыгарып жаткандыр. Бул жерде келиндин чыр салган себебин билүү абзел. Кандай маселе болбосун акырын отуруп, ачык сүйлөшүп алуу керек. Анын бир туугандарын чакырып аралаштырганда уруш кайра ырбашы мүмкүн.

Үйдөгү мындай курч мамиле, ызы-чуунун бат-бат болуп туруусу баарыңыздардын ден соолугуңуздарга терс таасир тийгизет. Андан өсүп келе жаткан балдар да туура эмес тарбия алып калышы ыктымал.

Эгер келиниңиз кааласа, психологго барып жекече кеңеш алсын.

2542
Белгилер:
аял, психолог, келин, кайнене, кайната, күйөө, уруш, турмуш
Тема:
Психолог менен баарлашуу (158)
Тема боюнча
Күйөөмдүн көңүлүн төшөктө таба албай кыйналдым... Арданган аялдын каты
Кайнатам эжемди экинчи аялым бол деп жанын койбой... Ызаланган келиндин каты
Саясатчы Равшан Жээнбеков. Архив

Равшан Жээнбековду үй камагынан Бишкектеги тергөө абагына киргизишти. Себеби

36
(жаңыланган 19:46 05.08.2021)
Жээнбеков былтыркы жылдын октябрь айынан бери үй камагында отурган. Ал эми ага чейин Кой-Таш окуясы боюнча фигурант болгондуктан бир жылга чукул абакта калтырылган.

БИШКЕК, 5-авг. — Sputnik. Саясатчы Равшан Жээнбеков Бишкектеги №1 тергөө абагына киргизилди. Бул туурасында Биринчи май райондук сотунан кабарлашты.

Эми ал 5-октябрга чейин аталган жайда кармалат.

"Айыптоочу тарап ал үй камагынын тартибин бузду деп кине такты. Бирок ал саат 22:00дөн кийин эшикке чыкса да тартип коргоо органдарынан жашырынбай жана сотторго басым кылган эмес. Эреже сакталган", — деди жактоочу.

Жээнбеков анын баш коргоо чарасы өзгөртүлөрүн кечээ социалдык тармактагы баракчасына жазып, абакта чачтарач жок болгондуктан чачын тегиздетип алып барарын айткан.

Саясатчы соттун жогорудагы чечиминен кийин журналисттерге саясий куугунтуктоого кабылганын билдирген.

Белгилей кетсек, Жээнбеков 2019-жылы декабрда кармалып, Кылмыш-жаза кодексинин 244 ("Барымтага алуу") жана 264-беренелери ("Массалык башаламандык уюштуруу") боюнча айып тагылган. Сот иштери уланып, 2020-жылы октябрда үй камагына чыгарылган.

36
Белгилер:
Равшан Жээнбеков, тергөө абагы, сот, үй камагы
Тема боюнча
УКМК "Кыргыз көмүр" ишканасынын директорун кармады
Экс-депутат Узакбаев Кумтөр иши боюнча күнөөлүү деп табылды. Камакта калабы?
Спортчу Айсулуу Тыныбекова

Кыргызстандык балбан кыздар Олимпиададан эки медаль менен кайтты. Сүрөт

145
(жаңыланган 18:33 05.08.2021)
Тыныбекова кыргызстандыктарга ыраазычылыгын билдирип, машыктыруучулары жана спортчу кыздар менен Токиодо түшкөн сүрөттөрүн жарыялаган.

БИШКЕК, 5-авг. — Sputnik. Күрөш боюнча Кыргызстандын кыз-келиндер курама командасынын Олимпиада-2020 мелдешиндеги сапары карыды. Бул тууралуу спортчу Айсулуу Тыныбекова Facebook баракчасы аркылуу билдирди.

"Күрөш боюнча Кыргызстандын кыз-келиндер курама командасынын Олимпиада оюндарындагы мелдештери аягына чыкты. Бардыгыңыздарга колдооңуздар жана сүйүүңүздөр үчүн ыраазычылык билдиребиз", — деп жазган спортчу.

Кыргызстандык балбан машыктыруучулары жана спортчу кыздар менен Токиодо түшкөн сүрөттөрүн да жарыялаган.

Эске салсак, Олимпиада оюндарында грек-рим күрөшүнүн балбаны Акжол Махмудов менен балбан кыз Айсулуу Тыныбекова күмүш медаль тагынса, Мээрим Жуманазарова коло байге жеңген.

145
Белгилер:
Айсулуу Тыныбекова, күрөш, балбан, олимпиада, сүрөт
Тема:
2021-жылы Токиодо өтө турган Олимпиада оюндары
Тема боюнча
Олимпиададан утмайын турмушка чыкпайм деген. Айсулуу тууралуу 10 факт
Кылкылдап, аянтка батпай. Айсулуунун мелдешин көрүүгө чогулган элдин сүрөтү
Алтайдагы Катунь дарыясы. Архив

Алтайда 25 жаштагы кыргызстандык жигит дарыяга чөгүп каза болду

15
(жаңыланган 19:49 05.08.2021)
Кыргыз диаспорасы полиция жана куткаруучулар менен биргеликте жаранды издеп таба албай коюшкан. 10 күндөн кийин сөөгүн туристтер көрүп калган.

БИШКЕК, 5-авг. — Sputnik. Алтайда инструктор болуп иштеп жүргөн 25 жаштагы кыргызстандык жигит Катунь дарыясында сүзүп жүрүп чөгүп кетти. Бул туурасында Кыргызстандын Новосибирскидеги башкы консулдугу билдирди.

Окуя 20-июлда Тельдекпень-2 аймагында болгон. Кыргыз диаспорасы полиция жана куткаруучулар менен биргеликте издеп таба албай коюшкан.

"30-июлда туристтердин бири Катунь дарыясынын Еланда аймагынан кыргызстандык М.С. аттуу жарандын сөөгүн көрүп полицияга кабарлаган. Кыргыз диаспорасынын көмөгү менен маркумдун сөөгү Кыргызстанга 4-августта жиберилди. Жол чыгымдары үчүн Башкы консулдук тарабынан 70 миң рубль өлчөмүндө мамлекеттик компенсация төлөндү", — деп жазылат маалыматта.

Башкы консулдук окуянын иликтенишин көзөмөлүнө алганы белгиленди. Аны менен катар Россиянын ТИМинин Барнаулдагы өкүлчүлүгүнө, тергөө жана көзөмөл органдарынын жетекчилигине тергөө ишин көзөмөлгө алууну сурап кайрылуу жиберген.

15
Белгилер:
Алтай крайы, Кыргызстан, өлүм, дарыя, сөөк, жеткирүү
Тема боюнча
Экинчи ирет киргенде тапкан. Караколдо милиционер чөккөн өспүрүмдү куткарып калды
Ысык-Көлдө 15 күн мурда жоголгон турист кыздын сөөгү табылды. Сүрөттөр