Боомдогу автобус кырсыгы боюнча соттук экспертиза жүргүзүлөт

© Sputnik / Эмиль СадыровБоом капчыгайы. Архив
Боом капчыгайы. Архив - Sputnik Кыргызстан, 1920, 12.07.2021
Жазылуу
11-июлда Боом капчыгайында балдарды ташыган автобус кырсыктаган. Бул боюнча министрликтерге бир катар тапшырмалар берилген.
БИШКЕК, 12-июл. — Sputnik. Министрлер кабинетинде Боом капчыгайынын аймагында балдарды ташып келе жаткан автобустун кырсыктаганы боюнча жыйын өткөнүн өкмөттүн маалымат кызматы кабарлады.
Эске салсак, 11-июлда Бишкек — Торугарт жолунун 128-чакырымында үч автобус жана эки жеңил унаа кагышкан жол кырсыгы катталып, беш бала жана 28 жаштагы жүргүнчү жабыркаган.
Жыйынды министрлер кабинетинин төрагасынын орун басары Жылдыз Бакашова өткөрүп, мамлекеттик органдарга эскертүү берген.
"Боом капчыгайындагы балдардын өмүрүнө коркунуч жараткан жол кырсыгы мамлекеттик органдардын чоң кемчилиги. Мындай учур кайра кайталанбашы керек. Ата-энелер балдарын лагерге жиберер алдында коопсуздугуна толук ишенгидей болушу шарт", — деген Бакашова.
Ал мамлекеттик органдар балдардын лагерь жана ден соолукту чыңдоо борборлорундагы эс алуусун сапаттуу уюштурууга көңүл бурушу керектигин айтып, анын ичинде тамак-ашына, гигиеналык талаптардын сакталып жатканына да көзөмөл жүргүзүшү керектигине токтолгон.
Жыйындын жыйынтыгы менен министрлер кабинетинин төрагасынын орун басары төмөнкүдөй  тапшырмаларды берген:
  • ИИМ, ӨКМ, Билим берүү жана илим министрликтери балдарды эс алуу жайына жеткирүүдө коштоп баргандарды окутууну уюштурушу керек;
  • Юстиция министрлиги Боомдогу жол кырсыгы боюнча соттук экспертиза жүргүзүшү зарыл;
  • Транспорт министрлиги ИИМ менен биргеликте ташып-жеткирүүчү компанияларды текшерип чыгышы керек;
  • Саламаттык сактоо мнистрлиги жана министрлер кабинетинин облустардагы ыйгарым укуктуу өкүлдөрү жергиликтүү өзүн алдынча башкаруу органдары менен бирге балдардын лагердеги эс алуусун сапаттуу уюштурууга дайыма мониторинг кылып турушу шарт;
  • Саламаттык сактоо министрлиги кырсыктаган автобустун ичиндеги балдардын баарын медициналык кароодон өткөрүп, аларга жана жабыркагандарга психологиялык жардам көрсөтүшү зарыл.
Жаңылыктар түрмөгү
0