Эркек менен аял уруш учурунда. Иллюстративдик сүрөт

Мен жашагым келип оолугам, карган күйөөм үйдөн чыкпайт. Келиндин каты

30233
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасына бул ирет өзүнөн бир топ жаш улуу жолдошу менен жашоого нааразы болгон келиндин катын жарыялайбыз.

Саламатсыздарбы? Менин көйгөйүм үй-бүлөмө байланыштуу. Кыйналып жүргөнүмдү эч кимге айта албайм. Эч нерсе болбогондой сыртыман жылмайып, ичимен бушайманмын.

3-курста окуп жатканымда банктардын биринде практикага барып калдым. Бул система көңүлүмө жакын болгондуктан, анын үстүнө сабакты жакшы окугандыктан иштен кыйналган жокмун. Мага баары кызык эле. Коллектив менен да тез эле тил табышып, айтор, кийин окууну бүткөндө жумуш издеп кыйналган жокмун. Дароо эле алышты.

Бир күнү жумушка келсем кабинетте өзгөрүү болуп, жаңы адамдар келип калыптыр. Ротация болуп которулуп келгендер экен. Арасындагы жашы 45терге барып калган байке менен бат эле ынак болуп кеттик. Мен анда 23 жашта элем. Жумушка тактыгы, бой-келбети, чыкыйып кийингени, орундуу сөзү, жасаган мамилеси, айтор, баары мен кыялдангандай болуп чыкты. Эң башкысы, үй-бүлөсү жок болчу, жубайынын өтүп кеткенине үч жыл болуптур. Ушунча жакшы көрүп калгандыктан, үйлөнүү тууралуу сунушун ойлонбостон кабыл алдым. Көп каршылыктар болду. Жаш айырмачылыгыбызды укканда ата-энем чалкасынан кетти. Иши кылса тоскоолдуктарга карабай баш коштук. Оо, ал убакта менден өткөн бактылуу киши жок эле...

Андан бери 15 жыл өттү. Ортобузда эки уул, бир кызыбыз бар. Бир карасаң баары жакшы, кем-карчыбыз жок. Бирок акыркы убакта кыйнала баштадым. Сиркем суу көтөрбөй, үйдөгүлөргө жаман көрүнүп жатат окшойм. Эмне каалап жатканымды деле так билбейм, жолдошумдан да алыстап бараткандаймын. Өткөндө көптөн бери көрө элек классташ кызым менен жолугуп калып кийин үйүнө чакырды. Күйөөмдү көрүп алып аябай таң калып, эмнеге мынча улуу кишиге турмушка чыгып алганымды сурады. Жакшы көрөм дедим, баш ийкеп койгону менен ишенген жок. Эми жакында дагы бир топ классташ балдар-кыздар менен жолугабыз, мен эмнегедир жолдошумду алып баргым келбей жатат. Ага деле эч кызыгы болбосо керек андай жолугушуулардын.

Дагы бир көйгөй — төшөк маселеси. Акыркы убакта өтө эле солгундап калды. Албетте, мунун баары жаратылыш экенин түшүнөм, бирок менин азыр болуп-толуп турган убагым. Кумарым канбагандыктан кадимкидей кыжалат болом, жиним келет, бирок айла жок.

Эки жакка чыгып эс алгым келет, анткен менен көп учурда күйөөмдүн ден соолугуна карап үйдөбүз. Мындай нерселерди сөз деле кылбайм, кылганда деле пайда жок. Болгону ушинтип топтолуп отуруп бир күнү жарылып кетемби деп корком.

Психолог Перизат Калмаматова:

— Урматтуу автор, абалыңыз оор экенине карабай, адис катары чындыкты айтып коюшум керек. Өзүңүздүн деле жазганыңызга караганда, көп нерсени түшүнүп жатасыз. Тилекке каршы, жаратылыш ушундай, жаш өткөн сайын адам алсырап, тынч, ызы-чуусуз жашоого качып калат.

Ушул жерден эркектин психологиясы тууралуу айта кетейин. Ар бир он жыл сайын эркек киши өзү билип-билбей кризиске кабылып турат. 20 жашында тандоо кризиси, 30 жашта мотивация издейт. 40 жаштан өтүп калганда эркек жетишкендиктеринин жемишин көрүүгө аракет кылат. 50 жашта мурда максат кылган жана учурда жеткен нерселерин салыштырып, күткөнү ишке ашпай калса катуу депрессияга түшөт. 60 жашында жашоонун бардык нерсесин кабыл алып, шүгүр деп жашап калат. Сиздин жолдошуңуз дал ошол куракта экен.

Жашыңар тууралуу айта турган болсок, жубайлардын ортосунда 10 жаштан жогору айырма болсо, ар дайым ушул сыяктуу көйгөйлөр келип чыгат, бул кадыресе көрүнүш. Анткени 20 жаштагы кезде аял жаш айырмасына анчалык маани бербейт. 30 жашка барып калганда алоолонгон сүйүү бир аз басаңдап, күнүмдүк турмуш үстөмдүк кыла баштайт. Адатта бул учурда аял балдарды төрөп бүткөн, карьерасы жолго коюлган, эми өзү үчүн, сексуалдык каалоолорун канааттандыруу үчүн жашай баштаган учур болот. Ал эми 50 жашка барып же ашып калган жолдошу "ооздукту" тартып, шаан-шөкөткө караганда диванды көбүрөөк жакшы көрүп калган кези.

Адатта мындай куракта жаш келинчеги бар эркектердин аз гана пайызы активдүү болуп, аялы менен тең тайлаша жашайт. Булар табиятынан мүнөзү шайыр, спорт менен машыгып, бир жерде тура албаган адамдар.

Бирок азыр медицина жетишкен. Жашы өтүп калган эркектин дагы, аялдын дагы төшөктөгү мүмкүнчүлүктөрүн арттыруу үчүн адистерден кеп-кеңеш алса болот. Андан тышкары, автор өзү же жолдошу менен бирге психологиялык терапиядан өтсө дагы пайдасы тиет.

30233
Белгилер:
аял, күйөө, карылык, көйгөй, психология
Тема:
Психолог менен баарлашуу (165)
Тема боюнча
Тапкан акчасын туугандарына чачып чарчатты. Жолдошуна көз каранды келиндин каты
Бала көтөргөн аял. Архив

Индиядагы кыргызстандык келиндин өлүмү боюнча ТИМ маалымат берди

97
(жаңыланган 23:29 22.09.2021)
Маалыматка караганда, келиндин Индиядагы туугандары уулу экөөнүн тең сөөгүн Кыргызстанга коюуга макулдугун берген.

БИШКЕК, 22-сен. — Sputnik. Кыргызстандын Тышкы иштер министрлиги Индиянын Нью-Дели шаарында баласы менен чогуу киши колдуу болгон келиндин өлүмү тууралуу комментарий берди.

Буга чейин 28 жаштагы кыргызстандык кош бойлуу келин Нью-Дели шаарында бир жашар уулу менен чогуу өлтүрүлгөндүгү тууралуу маалымат тараган.

“Тергөөнүн маалыматы боюнча, келин курбусунун үйүндө 21-сентябрга караган түнү киши колдуу болгон. Тиешелүү экспертизалар жүргүзүлүп, полиция кылмыш ишин козгоду. Шектүүлөр суракка алынып, тергөө иштери жүрүп жатат”, — деп айтылат билдирүүдө.

Маалыматка караганда, келиндин Индиядагы туугандары уулу экөөнүн тең сөөгүн Кыргызстанга коюуга макулдугун берген.

Элчилик бул ишти өз көзөмөлүнө алып, учурда сөөктөрдү Кыргызстанга алып келүү маселесинин үстүндө иштеп жатат.

97
Белгилер:
Индия, Кыргызстан, келин, бала, өлүм, ТИМ
Тема боюнча
Аялдын өлүмүнө себепчи болгон мотоциклдин айдоочусу үй камагына чыкты
Алтын. Архив

Бажы кызматы Кытайга 17 фура алтын концентратынын чыгып кетиши боюнча үн катты

411
(жаңыланган 21:41 22.09.2021)
Депутат бул жерде чоң акча жүрүп жатканын белгилеп, чыгарылып кеткен алтын концентратынын болжолдуу суммасы 253 миллион долларды түзөрүн айткан.

БИШКЕК, 22-сен. — Sputnik. Мамлекеттик бажы кызматы депутат Аккулу Бердиевдин Чоң-Алай районундагы Алтын-Казык кенинен казылган алтын концентратын 17 фура менен Кытайга чыгарып кетишти деген билдирүүсү боюнча комментарий берди.

Анын айтымында, өткөн жылы "Эркеч-Там" бажысынан 17 фура алтын концентратын мыйзамсыз чыгарып кетип баратканда Финпол тарабынан токтотулуп, кылмыш иши козголгон.

"Кечээ, 21-сентябрда, кытайлар жаңылады деп "Эркеч-Там" менен "Достук" бажысы аркылуу чыгарып кетиптир. Министр, бажычылардын деңгээлиндеги коррупция токтобой жатат. Ал иш сотто экенине карабай "Кайди" компаниясы коррупциялык жолдор менен эскирген лицензиясын жаңылап алыптыр. Бажы кызматынын башчысы Самат Сатаровичке чалсам "мен билбей калыптырмын, балдар чыгарып жибериптир. "Эркеч-Тамдан" эмес, "Достуктан" өткөрүп поездге жүктөп кетиптир" дейт. Мындай боло берсе мамлекет оңолушу кыйын болот", — деген Бердиев.

Бажы кызматынан билдиришкендей, “тарифсиз жөнгө салуу чаралары колдонулган бажы операцияларын ишке ашырууда товарды алып кирүү жана чыгуу боюнча уруксат берилген эрежелерди жана Евразия экономикалык комиссиясынын 2015-жылкы чечимине ылайык иш алып барат”.

“Товарды киргизүү жана чыгаруу Кыргызстандын тиешелүү органдары уруксат берген документтин негизинде гана ишке ашырылат. Кыргыз өкмөтүнүн 2016-жылдын 24-мартындагы токтомуна ылайык, тиешелүү органдар "Гик Кайди" ЖЧКсына 2021-жылдын август айынан тарта Кыргызстандын сыртына флотациялык концентрат алып чыгууга уруксат берген. Бажы кызматкерлери жогорудагы уруксат документтерин көрүп туруп концентраттарды чыгаруу боюнча операцияны аткарышкан”, — деп айтылат билдирүүдө.

Депутат бул жерде чоң акча жүрүп жатканын белгилеп, чыгарылып кеткен алтын концентратынын болжолдуу суммасы 253 миллион долларды түзөрүн айтты.

Буга байланыштуу эл өкүлү башкы прокурор Курманкул Зулушевге кайрылып, ишти тыкыр текшерүүнү өтүндү.

411
Белгилер:
Кыргызстан, депутат, Мамлекеттик бажы кызматы, алтын, чек ара
Тема боюнча
Тонналап экспорттолчу. Кыргызстан июлда бир дагы грамм алтын саткан жок