Ойлонгон киши. Иллюстративдик сүрөт

Атам менен аялымдын талашынын ортосунда калдым. Айласы кеткен жигиттин каты

13623
(жаңыланган 13:26 25.09.2021)
Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасына күч күйөө болуудан кутулуунун жолун издеген жигиттин каты чыкты.

Саламатсыңарбы! Менин психологго кат жазуумдун себеби үй-бүлөмө байланыштуу. Жашым 35те. Үч бир тууганбыз. Мен үйдө улуусумун. Кичинебизден эле атабыздын сөзүн эки кылбай тарбияланганбыз. Иним жана карындашым бар. Иним үйлөнүп, айылда ата-энемдин колунда калган. Карындашым шаарда студент. Үйлөнгөнүмө он жылдын жүзү болду. Өзүмдүн да үч балам бар. Жубайым жалгыз кыз. Кайнатам кеч балалуу болгон экен. Азыр 70тен өтүп калды. Келинчегимди жакшы көрүп калып, артынан жүгүрүп жүрүп алгам. Азыр деле жакшы көрөм. Ооба, анын деле айтканынан кайтпаган өжөрлүгү бар. Бирок аялзаты катары балдарыма камкор эне болду.

Бир жылдан бери эле кайнатам бизди бирге турууга чакырууда. Келинчегимдин кесиби врач, ал да "ата-энемдин кашына барышым керек. Жалгыз кызы болсом, көзү өтүп кетсе өкүнүп калам" деп көгөрүп болбой, мени көндүрүп жатат. Келинчегимдин ата-энесине каралашканына каршы эмесмин, каалаган убактысында барып турушун айткам. Бирок биротоло көчүп барууну туура көрбөйм. Анын үстүнө көнгөн үй-жайымды таштай албайм. Алар да өз үйүн калтыргысы келбей жаткандай.

Ал эми өзүмдүн атам кыргыздын салтын сактаган, намыскөй, бетке чабар киши. Ал кишиге кайнатамдын оюн айтсам "күч күйөө болосуңбу, уят эмеспи. Кайнатаң сеникине келсин. Элге балам кайнатасынын үйүнө кирип алган деп айтамбы?" деп урушуп, такыр болбой койду. Анын үстүнө атам мага тээ студент кезимде эле шаарга үй салып берип койгон. Ата-энем кышкысын айылда, жайында шаарда менин үйүмдө турууну көздөгөн.

Аялым азыр үйдө бир күн болсо, төркүнүндө эки күн жүрүп калды. Кайнатамдын да кан басымы бар. Ошентип эки ортодо жүрөм. Ушундан улам уруш да көбөйдү. Келинчегим үй-жайга да көңүл бура албай жатат. Кыскасы, ары эмес же бери эмес арабөк турмуш кечирүүдөбүз. Ошол себептен психологдун да оюн уккум келет.

Психолог Гүлнара Жасоолова:

— Туура чечим чыгаруунун жолун издеп психологго кайрылып жатыптырсыз. Сиздердин үй-бүлө үчүн оңтойлуу, эки тарапка тең орток жол табуу үчүн жубайыңыз менен бирге психологго жекече кайрылсаңыздар болмок. Ал кишинин да айтар кебин, сиздин оюңузду да угуп, маселени талкуулап, чечип алууга болор эле. Бул иш ушул бойдон кала берсе, бара-бара ортодогу түшүнбөстүк өсүп, ага эки тараптын ата-энелери да кийлигишип чатакка айланып кетиши ыктымал. "Сенин ата-энең болбогондо тынч эле жашай берет элек, сенин атаң куру намыстанбаганда баары эле жакшынакай бүтмөк" деген өңдүү сөздөр айтылып кетиши ыктымал.

Негизи эле кыргыздардын менталитетинде "күйөө бала кайын журтунда жашабайт" деген пикир калыптанып калган. Бирок жашоодо ар кандай болот да. Өзүңүздү кайнатаңыздын ордуна коюп көрүңүзчү, эртең эле балдарыңыз чоңоёт. Сиз да балким карыганда алардын жардамына муктаж болуп каларсыз. Бул жагын да эске алуу абзел.

Мындай маселени дароо негатив менен эмес, жөнөкөйлөтүп кабыл алууга аракет кылганыңыз оң. Атаңызга да кайын журтуңуздун абалын жакшылап түшүндүрсөңүз, ал киши деле туура кабыл алса керек.

Ар бир адамдын күчтүү жана алсыз жагы болот. Адам жакшы сапаттары менен үйдөгү ар кандай маселелерди чечип, жол таап кетет. Ал эми ажырашып, кайра баштан жашоо курууну пландоо — бул алсыздык. Ошол себептен кандай болгон күндө да үй-бүлөнүн бүтүндүгүн сактап калуу керек. Бул маселени кандай чечсеңиздер ал чүрпөлөрүңүзгө да тарбия болуп калат. Себеби бала көргөнүн жасап, ата-энеге карап түздөлөт.

13623
Белгилер:
психолог, күйөө, кайната, күч, күйөө бала, ата, аял, үй
Тема:
Психолог менен баарлашуу (170)
Тема боюнча
Ата-энем жигитимден жүз миңдеген акча сурап кууратты. Кыздын каты
Тапкан акчасын туугандарына чачып чарчатты. Жолдошуна көз каранды келиндин каты
Whatsapp логотиби. Архивдик сүрөт

Программист мессенжердеги жазышууну толугу менен кантип өчүрүү керектигин айтты

0
Адистин айтымында, мессенжерлер колдонуучулар тууралуу көп жеке маалыматтарга ээ жана анын баары серверде сакталат.

БИШКЕК, 24-окт. — Sputnik. Мессенжердеги маалыматты өчүрүү өтө кыйын, жазышууларды тазалагандан кийин дагы иштеп чыгуучунун серверинде калып калат. Бул тууралуу "Прайм" агенттигине "ИТ-Резерв" компаниясынын директору Павел Мясоедов айтып берди.

Анын айтымында, мессенжерлер колдонуучулар тууралуу көп жеке маалыматтарга ээ жана анын баары серверде сакталат. Ал түшүндүргөндөй, жазышууда система билдирүүнү алгач иштеп чыгуучунун инфраструктурасына жиберет, андан кийин гана маектешип жаткан кишиге жөнөтүлөт.

"Жазышууну уюлдук телефондон же башка жактан өчүрүүнүн пайдасы жок. Муну менен аны түп-тамырынан бери өчүрө албайбыз", — деди программист.

Адистин айтымында, маалыматтарды ортомчусуз алмашууга мүмкүн, ал үчүн атайын программаларды көчүрүү керек. Маселен, peer-to-peer протоколдору боюнча иштеген программалар бар.

0
Белгилер:
программист, жазышуу, өчүрүү
Тема боюнча
Facebook өзүнө таандык WhatsApp мессенджериндеги жазышууларды окуйт. Максаты
WhatsApp сүрөт менен видеону сапаттуу жөнөткөнгө мүмкүнчүлүк түзөт
Москва шаары. Архивдик сүрөт

Эртең "Көл" тасмасы Москвада көрсөтүлөт

12
"Көл" — драмалык жанрда Ысык-Көлдө тартылган тасма. Сюжетинде ыйык көлдө балык түрүндө жашаган байыркы ата-бабалардын жан дүйнөсү тууралуу уламыш баяндалат.

БИШКЕК, 24-окт. — Sputnik. Эртең, 25-октябрда, Москва шаарында кыргызстандык режиссёрдун "Көл" аттуу кинофильми алгачкы ирет көрсөтүлөт. Бул тууралуу Кинематографты колдоо фондунан кабарлады.

Картина РФтин Кинематографисттер союзунун Кино үйүндө Россиядагы кыргыз кино күндөрүнүн алкагында коюлмакчы.

Кирүү акысыз, каалоочулар бул тиркеме аркылуу каттоодон өтүп коюшу керек.

"Көл" — драмалык жанрда Ысык-Көлдөн тартылган кинокартина. Сюжетинде ыйык көлдө балык түрүндө жашаган байыркы ата-бабалардын жан дүйнөсү тууралуу уламыш баяндалат.

Кинонун сценарийин Эрке Жумакматова менен КРдин эмгек сиңирген артисти Эмил Атагелдиев жазган. Башкы ролдорду Артыкпай Сүйүндүков, Болот Тентимишов, Малика Айдабосунова, Айнура Качкынбек кызы, Санжар Өмүрбаев аткарган. Фильм бир катар эл аралык сыйлыктарга көрсөтүлүп, жеңүүчү да болгон.

12
Белгилер:
Москва, 'Көл' тасмасы, бет ачар, маданият, Кыргызстан
Тема боюнча
Россиялык тасмага тартылган кыргызстандык курьерди режиссер издеп жатат. Видео
Кыргызстандан барган тасма Алматыда "Мыкты фильм" аталды. Видео