Кыргызстандын желегин көтөргөн митингчилер. Архив

Бийлик укпай койгон. Садыр Жапаров октябрда эл эмнеге толкуганын айтты

171
(жаңыланган 10:57 05.10.2021)
Мамлекет башчы мурда парламент өкмөткө, өкмөт кайра парламентке түртө салып, президент эч нерсе болбогондой мамиле кылып жоопкерчиликти эч бир бийлик бутагы алгысы келбегенин белгилеген.

БИШКЕК, 5-окт. — Sputnik. Президент Садыр Жапаров октябрь окуяларынын бир жылдыгына карата кайрылуу жасап, элдик толкундоонун келип чыгышына эмне себеп болгонун билдирди.

Анын айтымында, Жогорку Кеңешке депутаттарды шайлоо одоно мыйзам бузуулар менен өтүп, адилетсиздикке байланыштуу шайлоочулардын нааразычылыгы күчөп, шайлоонун жыйынтыгын жокко чыгаруу талабы катуу коюлган. Бул талапка өз учурунда жооп берилбегендиктен элдин калың катмары бийликти кулатууга мажбур болгон.

"Мындай жагдайга 2010-жылкы Конституциянын редакциясында парламенттик-президенттик башкаруу формасына өтүү деген тариздеги мамлекеттин кызыкчылыгына туура келбеген өзгөртүүлөрү себеп болду десем жаңылышпайм. Себеби пропорционалдык шайлоо системасын киргизип, жабык тизме менен өткөн. Бул система саясий коррупцияга жагымдуу шарттарды жараткан. Натыйжада саясий партиялардын лидерлери тизмени кызылдай эле соодалап, добуштарды сатып алуу күчөгөн. Бул саясий коррупция андан ары уланып, өкмөттү түзүү укугуна ээ болгон парламент министрлик портфелдерди бөлүшүп, дегеле аткаруу бийлик бутагын өз алдынча иштөө мүмкүнчүлүгүнөн ажыратып, талкалаган", — деди Жапаров.

Ошондой эле ал парламент өкмөткө, өкмөт кайра парламентке түртө салып, президент эч нерсе болбогондой мамиле кылып, жоопкерчиликти эч бир бийлик бутагы алгысы келбегенин белгилеген.

"Бардык бийлик бутактарынын легитимдүүлүгү күмөн жараткан абалга кептелген. Конституциянын биринчи эле беренесиндеги "бийликтин ээси эл" деген негизги принцип одоно бузулган. Саясий партиялар коомдун тигил же бул катмарынын кызыкчылыгын ишке ашыруу үчүн эмес, анын башында турган саналуу адамдардын гана мүдөөсүн көздөп калган. Мындай адилетсиз түзүлүш эртеби-кечпи кулайт эле. Акыры элдин башкы мүдөөсү Конституция менен негизделип калган жоопкерчиликсиз бийликти кетирүүгө чейин жеткен. Андан тышкары, коррупциянын пандемия шартында гүлдөшү да элдин кыжырдануусун күчөтүп, бийликке болгон ишенимин биротоло жоготкон", — деп баа берди президент.

Жапаров ошол күндөрү жарандык араздашуунун оту тутанып, мамлекеттин кыйрашын шарттайт деген кооптонуулар менен душмандар сүйүнүп, достор күйүнүп турганын айтты. Бирок акылман эл, даанышман журт андай саясий чайкоочулуктан, чагымчылдыктан өзүн бийик кармай турганын көрсөткөнүн кошумчалады.

Эске салсак, 2020-жылдын 5-октябрында нааразы болгон саясий күчтөр, эл “Ала-Тоо” аянтына чогулган. Алар 4-октябрда өткөн парламенттик шайлоонун жыйынтыгын жокко чыгарууну талап кылган. Кечинде эл толкуп Ак үй тарапка агылган, күч түзүмдөрү көздөн жаш агызуучу газ, кулак тундуруучу гранаталарды колдонуп, аларды таратууга аракет кылган. Натыйжада 6-октябрга караган эл Ак үйдү басып алган. Муну арты менен президент Сооронбай Жээнбековдун бийлиги кулатылган.

Ошол кезде легитимдүү бийлик аталган Жогорку Кеңеш Садыр Жапаровду премьер-министр кылып дайындады. Андан соң ал президенттин да милдетин аткарып жатты. Ал эми 2021-жылдын 10-январында президенттик шайлоо өтүп, Жапаров өлкө башчылыгына келди.

171
Белгилер:
Садыр Жапаров, парламенттик шайлоо, нааразычылык
Тема боюнча
Жапаров 4 өлкөдөн электр энергиясы алынып жатканын айтып, абалды түшүндүрдү
Жапаров Кумтөр тууралуу: алтын жерде калбайт, кардарлар кезекте турушат
Кол чатыр көтөрүп баратан жуп. Архив

Ишембиге карата аба ырайы

683
23-октябрда өлкөнүн дыйканчылык аймактарында жаан карга айланып, тоолуу райондордо кар жаайт. Айрым жерлерде батыштан соккон шамалдын ылдамдыгы секундасына 15-20 метрге жетет.

БИШКЕК, 22-окт. — Sputnik. Ишембиде республиканын тоолуу райондорунда жолдорго муз тоңуп, тайгак болот. Бул тууралуу Кыргызгидромет билдирди.

Абанын температурасы Чүй облусунда +6…+11, Талас өрөөнүндө +5…+10, Ош, Жалал-Абад, Баткен аймактарында +9…+14, Ысык-Көлдө +2…+7, Нарында 0…+5 градус болот.

Бишкек жана Ош шаарларында күндүз жаан-чачын күтүлбөйт. Күндүн табы борбордо +9…+11, Ош шаарында +11…+13 градусту көрсөтөт.

683
Белгилер:
аба ырайы, Кыргызстан
Тема боюнча
Күнгө чагылышкан алтын күз. Бишкектин көз талдырган видеосу
Аэропорттогу жүргүнчүлөр. Архив

Россиялыктар арасында бир апталык эс алууда Кыргызстанга келгиси келгендер бар

128
(жаңыланган 23:15 22.10.2021)
Россиядагы коронавируска байланыштуу эпидемиологиялык абал оорлошуп кеткенине байланыштуу өлкө президенти Владимир Путин 30-октябрдан 7-ноябрга чейин дем алыш жарыялаган.

БИШКЕК, 22-окт. — Sputnik. Россиянын саякаттоо сервиси боюнча анализ жүргүзгөн Туту.ру сайты алдыдагы бир апталык деп алышта жарандар кайсы мамлекеттерге көбүрөөк бара турганын жарыялады.

Россиянын жашоочулары 30-октябрдан тарта 7-ноябрга чейин барып келүүнү пландаган алдыңкы 10 мамлекеттин ичинде Кыргызстан дагы бар.

Россиялыктар барууну пландаган өлкөлөрдүн ондугу (эл аралык авиакаттамдарга билет алгандардын жалпы санынан пайыз менен бөлүп көрсөтүлөт):

  • Өзбекстан — 16,6 пайыз;
  • Армения — 14,1;
  • Түркия — 13,5;
  • Кыргызстан — 9,6;
  • Азербайжан — 6,6;
  • Молдова — 6,1;
  • Беларусь — 4,4;
  • Кипр — 3;
  • Казакстан — 2,8;
  • Египет — 1.

Эске салсак, Россиядагы коронавируска байланыштуу эпидемиологиялык абал оорлошуп кеткенине байланыштуу өлкө президенти Владимир Путин 30-октябрдан 7-ноябрга чейин эс алуу жарыялаган. Ошондой эле ал абал жакшырбаса, дем алыштын мөөнөтү узартыларын кошумчалады.

128
Белгилер:
Россия, пандемия, эс алуу, билет, Кыргызстан
Тема боюнча
Россиялыктар коронавирустан улам 30-октябрдан 7-ноябрга чейин эс алмай болду
Москвада коронавирустан улам бир катар чектөөлөр кирди. Тизме
Голос долбоорунун сахнасы. Архив

Кыргызстандык "Голос" шоусуна катышып, Билан менен Агутинди таң калтырды

0
(жаңыланган 00:18 23.10.2021)
Бишкектик ырчы Адилет Жумабековду дароо үч насаатчы командасына алгысы келди. Ал долбоордогу чыгармасын апасына арнаган.

БИШКЕК, 23-окт. — Sputnik. Кыргызстандык Адилет Жумабеков Россиянын "Голос" шоусунун кийинки этабына өттү.

Бул шоуда насаатчылар аткаруучуларды артты карап алып угуп, жакса бурулушат. Адилет кесипкөй ырчы эмес экенин, бирок бир нече аспапта ойной турганын айткан.

"Апам төрт баланы жазгыз өстүрдү. Мен музыкалык окуу жайда окучумун, бирок финансылык кыйынчылыктан улам музыкант, ырчы болуп иштеп кеткем. "Голос" долбоору — менин көптөн берки кыялым", — деген Жумабеков.

30 жаштагы бишкектик ырчы долбоордо Boyz II Men — End of the road ырын аткарды. Ал ырдап жатканда Александр Градский, Леонид Агутин менен Дима Билан бурулуп караган. Залда отургандар да ага кол чаап, "Баракелде!" деген. 

Пелагея кыргызстандык ырчынын аткаруусуна таң берген, Агутин стилин жана тембрин баалаган, Билан дагы аны өз командасынан көргүсү келип жатканын билдирген. Натыйжада Жумабеков Биланды тандаган.

0
Белгилер:
Россия, 'Голос' долбоору, ырчы
Тема боюнча
Бишкекте "Орто Азия романсиадасы" конкурсунун жеңүүчүлөрү аныкталды. Сүрөт