Техникалык тейлөө станциясын кызматкери жумуш учурунда. Архив

6 жерин майлаңыз. Автоунаага кыштын алдында кантип кам көрүш керек

313
(жаңыланган 12:32 23.11.2021)
Суук биринчи ирет каарын көрсөткөндө эле кээ бир айдоочулардын шаштысы кетип калат. Албетте, андан соң автоунааны майлап, кайрадан карап чыкканга туура келет.

БИШКЕК, 23-ноя. — Sputnik. Кыштын алдында автоунаанын алты жерин атайын май менен майлап, бир ирет көздөн өткөрүп текшерип коюу маанилүү.

"Автовзгляд" порталы айдоочуларга бир нече кеңештерди берген.

Биринчи суук урганда эле бир топ айдоочулардын темир тулпары аксап баштайт. Эгерде башында техниканы кышка даярдап алса, мындай маселе жаралбайт эле. Адистер өтө кымбат эмес, жөнөкөй эле ыкмаларды — автоунаанын бир катар бөлүктөрүн майлап коюу керектигин айтышат.

Автокөлүктүн кыймылдаткычын эле эмес, бир топ түйүндөрүн, агрегаттарын да майлаш керек. Ар кыл тетиктердеги тыгыздап, бекемдөөчү нерселерди, эшиктин бүктөмөсүн, кулпусун кышка жакын атайын чыгарылган майлар (материалдар) менен сүртүп чыгуу зарыл. Ал үчүн кургак тефлон, силикон, баткакты жуктурбоочу, литол же башка майлоочу каражаттарды колдонууга болот. Буга көп каражат, башка материалдар деле жумшалбайт. Албетте, чүпүрөк, айнек жуугуч жана 20 мүнөт керек болот.

Капталдагы айнектер

Адатта автоунаанын капталындагы айнектерине аз көңүл бурушат. Кышында ага муз тоңуп, жолдон чачыраган баткактар жабышат да, эригенде майда кум же ылай ылдый агып, аны өйдө көтөрүп же түшүргөндө (жайлап да калат) кычыраган үн чыга баштайт. Анын кесепетинен айнек көтөргүч механизмге күч келет. Көйгөй жаралбаш үчүн алдын ала кам көрүп, силикон спрейди чачып же кургак тефлон сүртүү зарыл. Андан соң тегиз жайылыш үчүн бир нече ирет көтөрүп, кайра түшүрүп, кайталаш керек. Баарын жасап бүткөн соң ашыкча майларды, агып калгандарын чүпүрөк жана айнек тазалагыч менен алып саласыз. Бир караганда көп деле убакыт кеткен жок, бирок кыш бою кыйналбай, ыңгайсыздыкка туш болбой жүрөсүз. Биз сөз кылган көтөрүүчү механизмди жазында кайрадан алмаштырып, акча коротпойсуз.

Эшикти тыгыздагычтар жана багажниктин капкагы

Сырттан чаң, шамалды киргизбей тыгыз кармап турган эшиктин тыгыздагычтарына да кам көрүү керек. Ал сизди шамалдан, сууктан, жамгырдан, кардан, көчөдөгү ашыкча дабыштардан коргойт. Кыш алдында аларга да кам көрүү зарыл экенин эстен чыгарбаңыз. Автоунаанын каалгаларына, ички темирлеринин учтарына чапталган тыгыздагычтарга силикон сыйпап чыгыңыз. Мындай камкордук ага муз тоңуп калгандан коргойт. Себеби катып калганда жабылышы да кыйындайт, кээде катуу күч колдонгондо кырчылып да кетиши мүмкүн.

Капоттун бекиткен кулпусу

Автоунаанын дагы бир көңүл буруп карай турган жери — капоттун бекиткичи, мындайча айтканда, илмеги. Алды жакта жайгашып, темирди бекем, ныктап кармап тургандыктан маңдайдан да, автоунаанын алдынан да көп нерсе чачырайт. Нымдуулук, кышында жолго чачылган реагенттер, баткактын баарына "туруштук берет". Андыктан литол же атайын чыгарылган башка майды илмектин механизмдерине чачып же сыйпап чыгасыз. Муну менен сиз ал тетиктерди "сырткы душмандардан" коргоп каласыз. Бул — айдоочунун алдын ала кам көрүп, андан ары баш оорутпай айдап кетишин шарттаган ыкмалардын бири. Болбосо айнек жуугучка сууну да куя албай, кор болуп, машинанын алдына жатып алып, тырмалап жатканыңызды элестетсеңиз. Андан көрө алдын алып, бир нече мүнөт бөлүп койгон алда канча оңой эмеспи.

Эшиктердин кулпусу

Баарынан да, кичинекей болгону менен автоунааны каалгасынын кулпусу маанилүү бөлүк. Темир тулпарыңыздын эшигин тырмалабай пульт менен ачып-жаап жүрсөңүз да аны майлап койгонду эстен чыгарбаңыз. Байкалбайт, бирок дөңгөлөктүн эпкини менен чаң, кум, кир заттар кулпунун кичинекей тешикчесине кире берет. Кургак тефлон, силикон же баткакты жугузбай турган майлар, ал тургай WD-40 деле жакшы коргоочу боло алат.

Эшиктердин бүктөмөсү

Автоунаанын эшиктеринин бүктөмөсүн литол, атайын баткактарды жабыштырбай турган атайын май же дат басканга каршы каражаттар менен майлаган жакшы. Аны сыйпагандан кийин май андан ары сиңип, жайылыш үчүн эшиктерди бир нече ирет ачып-жаап туруш керек.

Бензин бактын оозу же май куйган жер

Кээ бир автоунаалардын ээлери үчүн бензобактын люгу баш оору. Алар датка анча туруштук бере албайт, жолго себилген реагенттер, ар кыл химиялар люк үчүн кооптуу нерселердин катарына кирет. Андыктан бензин куйганда эле ачып, жаап койбостон, капкактын бүктөмөсүн да майлап турууну унутпаңыз. Ага WD-40ты пайдалансаңыз болот. Канча көп кам көрсөңүз, баш ооруткан учуруңуз ошончолук аз болот.

313
Белгилер:
автоунаа, кышка даярдык, машина, капот, айнек, бензин, адис, кеңеш, кыш, баткак, майлоо
Тема боюнча
Кырсыктан оолак болосуз! Кышында автоунааны туура айдоо боюнча кеңештер
Терезе бууланбаш үчүн автоунаа мешин кантип туура иштетүү керек
Улуу акын Алыкул Осмоновдун улуттук китепкананын алдындагы эстелиги. Архивдик сүрөт

Жекшембиге карата аба ырайы

129
5-декабрга караган түнү республика боюнча жаан-чачын күтүлбөйт. Батыштан соккон шамалдын ылдамдыгы секундасына 4-9 метрге жетет.

БИШКЕК, 4-дек. — Sputnik. Жекшембиде күндүз Чүйдүн айрым райондорунда жаан, тоо этектеринде жана тоолуу аймактарда кар жаашы күтүлөт. Жолдор тайгак болот. Бул тууралуу Кыргызгидромет маалымдады.

Абанын температурасы Чүй өрөөнүндө +7...+12, Ош, Жалал-Абад, Баткен облустарында +9...+14, Талас жергесинде +6...+11, Ысык-Көл чөлкөмүндө +4...+9, ал эми Нарын аймагында -3...+2 градус болору айтылды.

Термометрдин көрсөткүчү Бишкек шаарында +10...+12 жана Ош калаасында +11...+13 градуска жетет.

129
Белгилер:
декабрь, Кыргызстан, аба ырайы
Тема боюнча
Жерге кооптуу астероид жакындап келе жатканы айтылды
КР маданиятына эмгек сиңирген ишмер, жомокчу Бегайым Жайчиева

Жомокчу Бегайым Жайчиева: аял турмушта башкача жашап өтүшү керек экен...

446
(жаңыланган 21:04 04.12.2021)
КР маданиятына эмгек сиңирген ишмер, жомокчу Бегайым Жайчиева жомок балдарды гана эмес, чоңдорду да тарбиялай тургандыгын белгилейт. Ал 30 жылга чукул убакыттан бери Кыргыз радиосунан жомок окуп, бир муунду тарбиялаган чоң энеге айланды.

Радиодо бир кишинин театрын негиздегенге тете эмгек жасаган жомокчу Бегайым Жайчиеваны Sputnik Кыргызстан редакциясынын кабарчысы мейманга чакырып, ал кишинин радио менен эриш-аркак өткөн өмүрү, иши тууралуу маектешкен.

— Биз бала кезден эле сиздин жомокторуңузду окуп чоңойдук. Негизи бул дүйнөгө кантип аралашып калдыңыз?

— Өзүм Сокулуктун Асылбаш айылынан болом. Мектепке алты жашымдан баргам. 4-класска чейинки эски мектепке барып окучубуз. Ал эми 5-класстан баштап 1929-жылы салынган жаңы мектепте окудук. 1-класска кирген кезимде кичирээк бөлмөгө баш баксам, жерде көп китептер жатыптыр. Көрсө китепкана экен. Бат эле бир айга жетпей тамга таанып, шар окуп кеткем. Анан окуй аларыма мактангым келген го, карасам жыйылган китептердин үстүндө "Үч аюу" деген жомок китеп жатат. Дароо алдым да үйгө келип, эки-үч күндө эле бүтүп койдум. Ошентип китеп окумайынча тура албай калдым. Быйыл мына 75 жашка чыктым. Жетимиш жылдан бери китеп окубаган бир да күнүм болбойт. Кыргыз китептерин гана эмес дүйнөлүк адабиятты, түшүнүүгө оор болгон китептерди да жакшы көрүп окудум. Апам айылда эстүү-баштуу, китепти көп окуган аял болчу. Кийин экөөбүз бири-бирибизден китеп талашып окуп калдык. Айылдагылардын бири "китеп берем" деп койсо, сыртта бороон-чапкын болуп жатса да ээрчип кетчүмүн. Аны түн ичинде чырак өчкөнчө окучумун. Ошентип жүрүп эле жомокту жанымдай көрүп калдым. Менин сүйүктүү китебим "Том Сойердин жоруктары" деген китеп болчу. Ушул кезге чейин эч унутпайм.

Анан үйдө кичинекей радио илинип турчу. Анда театрлаштырылган спектаклдерди берчү. Анан "бул үндөр каяктан чыгып жатат" деп эле таң калып артын карай берер элем.

Ошону менен мектепте эсепке такыр көңүл бурган жокмун. Математиканы балдардан көчүрүп алчумун. Бирок башка сабактардан жакшы окуп, чоң класстардын дилбаянын да жазып берчүмүн. Ошентип жүрүп эле адабиятка кирип кеттим. Кичинемде журналист же жазуучу болом деп ойлогом. 

Заслуженный работник культуры КР, сказочница Бегайым Жайчиева на спектале
© Фото / из семейного архива Бегайым Жайчиевой
Радиодо бир кишинин театрын негиздегенге тете эмгек жасаган жомокчу Бегайым Жайчиева

— Радиого кантип келип калдыңыз?

— Радиого 1968-жылы келдим. Мен эмгек жолумду негизи телевидениеден баштагам. Ал убакта жаш кыздар диктор, акын, жазуучу же актриса болууну кыялданчу элек. Курч кезибиз экен. Тимеле колубуздан баары келчүдөй дымагыбыз күч, бийиктикти гана көксөп турчубуз. Ошол аралыкта эле радиодогу балдар үчүн уктурууларга катыша коюп жүрдүк. Эфирге кыпчылып, эптеп бир сөз айтып койсок эле жыргап калчубуз.

1997-жылы Кыргыз радиосуна Байма Сутенова директор болуп калды. Күнүнө саат беш-алтыларда 20 мүнөттүк жомок берип, аны 10-15 киши окучубуз. Ар бир каарманды бирден киши окуп, алардын баарына убакыт да кетип, каражат да төлөнчү. 1997-жылдын ноябрь айында бир күнү эле мени Байма Сутенова чакырып жатат дегенден барсам, "эже, жомокту жалгыз эле өзүңүз окуп көрбөйсүзбү?" деди. Мен алгач "андай болбойт го" деп тартынчыктаганым менен макул болдум. Анан "Кыргыз эл жомогу" китебин алып келип радиодо режиссёр менен отуруп, окуп көрсөм такыр окшошпой койду. Анан бир жума үйдөн бассам-турсам да кандай кылууга болот, кантип иштесем деп абдан ойлондум. Ошентип идея жаралды. Анан режиссёрго келип "Ай, мурунку жарабайт, кайра окуйм, башкача ыкма таптым" деп кайрадан ар бир жаныбардын үнүн туурап окуп туруп, кетирип жибердик. Күнүнө саат 19:50дөн 20:50гө чейин жомок окулуп баштады. Анан жуманын аягы коллективдин чоң залында жыйын өтүп, ар бир берүү талкууланчу. "Мен-мен" деген баяндамачы журналисттер, жетекчилер отурчу. Ар бир берүүнү жиликтеп талкуулап, жаман чыгып калса талкалап салышчу. Жыйынга акырын барып коркуп отурсам, Айылчиев деген агай "бул бир кишинин театры болду" деп аябай мактаганда сүйүнгөнүмдү айтпа. Ошондон кийин жомок менен бирге жашап калдым. Жомокту балдарымдан кийин, балким, балдарымдай эле жакшы көрсөм керек. Эл да жакшы кабыл алды, 23 жыл радионун эфиринен түшпөй келе жаткан жалгыз программа болду. Эч ким тийишип, каршы да болгон жок. Ушу аралыкта жомокту эфирден алдырып салган бир гана кишиге таң калдым. 

Заслуженный работник культуры КР, сказочница Бегайым Жайчиева во время передачи радио
© Фото / из семейного архива Бегайым Жайчиевой
Бегайым Жайчиева: 1997-жылы Кыргыз радиосуна Байма Сутенова директор болуп калды. Күнүнө саат беш-алтыларда 20 мүнөттүк жомок берип, аны 10-15 киши окучубуз

— Ким алдырып салды эле?

— Бир жылдары бизге Асел Мамбетова деген жетекчи кыз келди. Ал чакырып жатат дегенинен барсам, өзү орус тилдүү кыз экен. Мурда "Ала-Тоо" программасында кабарчы болуп жүргөнүн экрандан көрүп калчумун. Анан ал мага орусча: "Азыр жомокту ким угат? Силер артта калган турбайсыңарбы", — деди. "Эл угат, азыр беш миллион кишинин эки миллиону угат" десем болбой, "жок, эч ким укпайт" деп программадан алдыртып салды. Баарыбыз эле бир кызык болуп калдык. Ал кыз болсо өз бийлигин жүргүзүп баштады. Көпкө барбай эле бийлик алмашып, анан ал да кызматтан ыргып кетти го.

Мен ушул күнгө чейин Байма Жапаровнанын эмгегине ыраазымын. Жомок аркылуу элге таанылдым. Жолугуп калганда көп адамдар: "Ии, радиодо күндө кечинде жомок окуган сизсизби?" — деп сурап калышат. Той-топурда да "жомокчу апа" деп эл алдына чакырып, жакшы сөздөрүн арнап калышат. 

Заслуженный работник культуры КР, сказочница Бегайым Жайчиева с коллективом
© Фото / из семейного архива Бегайым Жайчиевой
Бегайым Жайчиева: жомокту балдарымдан кийин, балким, балдарымдай эле жакшы көрсөм керек. Эл да жакшы кабыл алды, 23 жыл радионун эфиринен түшпөй келе жаткан жалгыз программа болду

— Ушунча жыл окуган жомокторуңузду кайдан тапчу элеңиз?

— Дүйнө жүзүндөгү жомоктордун баарын калтырбай окудум окшойт. Кыргызстандын шаарларында мен кыдырбаган китепкана калган жок. Анда да китеп азыраак болчу. Жомоктун тарбиялык мааниси зор, балдар ишенет. Кичине баланын дили аппак да, жомокту угуп андагы каармандарга арбалып "баатыр бала, сулуу кыз болом" дешет. Китептин эң жакшысы — бул сөз байлыкты арттырат. Дүйнө жүзүндөгү жомоктордун баары — баатыр жеңип, душман жеңилген жакшылык менен бүтөт. Убагында мага Оштон, Нарындан, Көлдөн, Таластан бир топ апалар өзү жазып, балдары чыгартып берген жомок китептерин берип жиберген учурлары болгон. Айрымдар билген илгерки жомогун жазып жиберсе, кээ бирлер жомок чогултуп кат менен жөнөтчү. Ошол себептен Мамбетовага "эл жомок угат" деп айткам да. Ошентип жомоктор кийин өзүнөн-өзү жыйылды. Кол жазмаларды "Жайчиевага" деп КТРКнын кароолуна таштап кетишчү. Мен буга абдан таң калгам.

Негизи балдарга жатарда сөзсүз жомок окуп берүү керек. Телефонду карматып койгон болбойт. Жомок сенин тирүү үнүң. Ал тарбия. Жомок менен балдарды гана эмес, чоңдорду да тарбияласа болот. Чоңдорго арналып жазылган жомоктор абдан көп. Кайнене менен келинге, ата менен балага арналган, жаратылышты сактоого, жалкоолукка арналган жомоктор бар. Балдар жазуучусу Сулайман Рысбаев көптөгөн жомокторду жазат. 

Заслуженный работник культуры КР, рассказчица сказок Бегайым Жайчиева в офисе Sputnik Кыргызстан
© Sputnik / Асель Сыдыкова
Бегайым Жайчиева: оңдорго арналып жазылган жомоктор абдан көп. Кайнене менен келинге, ата менен балага арналган, жаратылышты сактоого, жалкоолукка арналган жомоктор бар. Балдар жазуучусу Сулайман Рысбаев көптөгөн жомокторду жазат

— Бала чагыңыз, ата-энеңиз тууралуу да сурагым келип турат...

— Атам 19 жашында курстан окуп, Асылбаштан Жалал-Абадга барып мугалим болуп иштептир. Ошол жерден согушка кетет. Төрт жылдан кийин кан майдандан бутунан жарадар болуп келип, айылда кырк жылга жакын башкарма болгон. Эң биринчилерден болуп мага чатыраш пальто, портфель сатып берген. Анда колго тигилген китеп кап көтөрчүбүз да. Айылдагылардын баары келип, менин буюмдарымды көргөн эле. Ушинтип эркелеп чоңойгом. Апам билими жок болгону менен китепти көп окуган. Атамды биздин өрөөндөгүлөр Жайчы деп дагы деле таанышат. Кыйын киши болчу. 

Заслуженный работник культуры КР, сказочница Бегайым Жайчиева с отцом
© Фото / из семейного архива Бегайым Жайчиевой
Бегайым Жайчиева: атам эң биринчилерден болуп мага чатыраш пальто, портфель сатып берген. Анда колго тигилген китеп кап көтөрчүбүз да. Айылдагылардын баары келип, менин буюмдарымды көргөн эле. Ушинтип эркелеп чоңойгом

— Турсун Уралиев агай менен кандайча таанышып калгансыз?

— Амбициябыз асманды чапчып турган кез. Баарыбыз артист, алып баруучу болууну самап турганда атайын студия ачылганын угуп бардык. Анда Абдырашит Көбөгөнов тандоо жүргүзүп жатыптыр. Дүйшөн Байдөбөтов, Турганбү Бообекова, Абас Чикеев өңдүү азыркы белгилүүлөрдүн баары шагырап барышкан. Мен базарга барып жашылча сатканды этюд кылып көрсөтүп, өтүп кеттим. Эртеси күнү Кыргыз радиосунан Турсун Уралиев, Касымжан Төлөбаев деген агайлар келди. Төлөбаев улгайган адам экен. Ал эми Турсун Уралиевдин жаш, өзү да жакшынакай кези экен. Шайыр жигит менен таанышып сүйлөшүп отургандан кийин бизге комуз менен укмуш ырдап берди. Отурган кыздардын баары ага ашык болуп калган. Алардын катарында мен да бармын (күлүп). Ошентип университеттен кийин радиодо иштеп жүрдүм. Ал киши да мени жактырган көрүнөт, экөөбүз кыз-жигит катары сүйлөшүп жүрдүк. Менин ата-энем ага турмушка чыгуума караманча каршы болушту. Жашы да менден улуу болчу. Бирок эч кимди укпай, акыры барып баш коштук. Бирок бир гана жакшы көрүү менен иш бүтүп калбайт экен. Ал киши жакшы ырдап, сүйлөп, шайыр болгону менен турмушка такыр даяр эмес болуп чыкты. Үйдүн керек-жарагы менен иши жок, мамлекеттин ишине берилген адамга баш коштум. Ал киши убактысын, күчүн бүт радиого арнады. Ошентип үйдүн да, балдардын да түйшүгүн жалгыз тартып калдым. Алгач "аял ушундай болот экен" деп баарына чыдаптырмын. Көрсө турмушта аял башкача жашап өтүшү керек экен, аял киши да өзүн бир аз аяп, баалашы керек экен. Үйүбүз жок, орустардыкында батирлеп көп кыйынчылык тарттык. Көмүр, тамак-аш жагынан ата-энем абдан каралашты. Абышкам өзү жетим өсүп, менде кайын журт деле болгон жок.

Ал убакта берүүлөр тасмага тартылчу. Улам тасмага даярдап, аны эфирге кетирип, кайра экинчисин даярдап, күндөп-түндөп эле иште жүрүп калчу. Жаш кезимде чыдабай апама ыйлаган да күндөрүм болду. Анан апам "бизде кыз бала кайра кайтып келбейт. Сени "барба" дегенбиз, өзүң болбой кеткенсиң. Эми чыда. Эки баланы кимге жалдыратасың, биз жардам беребиз. Аял киши кыйынчылыкты чыдап жүрүп жеңет" деди. Айткандай эле баарына чыдадым, анан кийин-кийин кайтарымы болду. Балдар чоңойду. 

Заслуженный работник культуры КР, сказочница Бегайым Жайчиева с мужем Турсун Уралиев
© Фото / из семейного архива Бегайым Жайчиевой
Бегайым Жайчиева: жолдошум киши жакшы ырдап, сүйлөп, шайыр болгону менен турмушка такыр даяр эмес болуп чыкты. Үйдүн керек-жарагы менен иши жок, мамлекеттин ишине берилген адамга баш коштум. Ал киши убактысын, күчүн бүт радиого арнады

— Негизи азыр коомдо ача пикир айтылып жатпайбы. Бири турмушка чыдоо керек десе, айрымдары аял киши алгач өзүн ойлошу керек дейт. Сиз үй-бүлөңүздүн түйшүгүн толук, аягына чейин көтөрүп кеткениңизге өкүнгөн жоксузбу? Аялдардын "ден соолугумду аябапмын, көрсө "намыс" деп жүрө бериптирмин" деп өкүнгөндөрүн көп угуп калабыз...

— Жок, мен "турмушка чыдоо керек" дегенге кошулам. Негизи жашоодо, кайсы улут, кайсы жер, кандай шарт болбосун аялдар көбүрөөк түйшүк тартат, тартып келген. Үй-бүлөнү сактап калуунун кайтарымы болот. Аны сен көрбөсөң да балдарыңа тиет. Балдар жетим калбайт, өз атасынын мээримин көрүп өсөт. Баары бир эркек акыры билип, баалайт экен.

— Канча балаңыз бар?

— Үчөө. Ушул эле КТРдин айлыгы менен балдарымды бир эмес эки окуудан окуттук. Чоң киши болушту. Байлык күтүүгө деле кызыккан жокпуз. Ал убакта байлыкты эч ким деле ойлобоптур. Замандын тартыштыгына жараша азыр жаштар да материалдык дүйнөгө басым жасап калышты өңдөнөт. Биздин убакта мамлекетке ишенчүбүз. Анткени туруктуу иш, пенсия, кызматтан көтөрүлүү, камсыздоо бар эле. Азыркы жаштарды аяп кетем. Баарына адам өзү жетиши керек болгон турмушта жашап калдыңар.

446
Белгилер:
Бегайым Жайчиева, жомок, Кыргыз радиосу, балдар, Турсун Уралиев
Тема боюнча
Мар Байжиев: атамды алып кеткен КГБ аскерин кийин тааныдым, чогуу иштедик
Нурак Абдрахмановдун кызы Ширин: байбичелеринин акылмандыгы бизди бириктирди
Ашыраалы Айталиевдин небереси: чоң атам футбол, бильярд ойночу, романтик эле
Сот балкасы. Архивдик сүрөт

Жапаров Бишкек менен беш облуска сотторду дайындады. Тизме

78
(жаңыланган 22:50 04.12.2021)
Жер-жерлердеги кызмат орундарына Судьяларды тандоо боюнча кеңеш 16 талапкерди сунуштаган. Мамлекет жетекчиси 15ине макул болду.

БИШКЕК, 4-дек. — Sputnik. Президент Садыр Жапаров Бишкек шаарында жана облустарда 15 сотту дайындаганын өлкө башчынын маалымат кызматы кабарлады.

Кыргызстандын президенти Садыр Жапаров. Архив
© Пресс-служба президента КР / Султан Досалиев
Билдирүүдө Судьяларды тандоо боюнча кеңеш тарабынан президенттин атына Баткен, Ош, Талас облустарынын жана Бишкек шаарынын айрым жергиликтүү сотторунун судьялык кызмат орундарына тогуз талапкер, ошондой эле Чүй, Жалал-Абад, Баткен облустарынын жана Бишкек шаарынын айрым жергиликтүү сотторунун судьялык бош кызмат орундарына жети талапкер, жалпы 16 талапкерге сунуш келип түшкөнү айтылат.

Өлкө башчы 15 талапкер боюнча сунушка макул болгон.

Баткен облусу

Баткен облустук соту:

  • Абышова Кундуз Сабырбековна.

Кадамжай райондук соту:

  • Ажиматов Улан Абдыкаарович;
  • Тажибаев Илязбек Курванбекович;

Лейлек райондук соту:

  • Абдимиталипов Эльярбек Бахадирович.

Сүлүктү шаардык соту:

  • Эрматова Гүлзат Муктаровна.

Кызыл-Кыя шаардык соту:

  • Адимов Акылбек Акматович.

Ош облусу

Кара-Суу райондук соту:

  • Гуламидин уулу Элчибек.

Ош шаардык соту:

  • Турдалиев Ниязбек Назарович.

Жалал-Абад облусу

Ноокен райондук соту

  • Чоноев Чынгыз Мелисович.

Жалал-Абад шаардык соту:

  • Ганиев Жоомарт Махамадисакович.

Чүй облусу

Чүй облустук соту:

  • Кыдыралиева Нурзат Амантуровна.

Талас облусу

Талас шаардык соту:

  • Сүйналиев Дамир Сүйүнтаевич.

Бишкек шаары

Бишкек шаардык соту:

  • Бекбаева Нурия Хусаиновна;
  • Накешова Минура Асылбековна;
  • Токтосунов Шарабидин Бекташевич.

Бул жарлыктар кол коюлган күндөн тартып күчүнө кирери айтылды.

78
Белгилер:
Садыр Жапаров, судья, дайындоо, жарлык
Тема боюнча
Садыр Жапаров аймактарга 14 судья дайындады. Тизме
Жапаров жергиликтүү сотторго бир катар судьяларды дайындады. Тизме