БИШКЕК, 8-окт. — Sputnik. Дүйнөлүк чемпионаттын тандоо раунддарынын алкагында болгон беттеште Кыргызстан менен Тажикстандын курамалары 2:2 эсебинде тең чыкты.
Оюн Бишкек шаарындагы Дөлөн Өмүрзаков атындагы стадиондо өттү.
Оюндун биринчи бөлүгүндө эсепти КР курама командасынын жарым коргоочусу Бахтияр Дүйшөбеков 8-мүнөттө ачты. Оюндун жүрүшүндө кыргызстандыктар үстөмдүк кылды.
Бирок экинчи тайм башталганда 67-мүнөттө тажикстандык 21-номерлүү оюнчу Жалилов эсепти теңеди. Топ КР курама командасынын оюнчусу Тэго жерге кулап калгандан кийин киргизилгендиктен, күйөрмандар нааразычылык билдирди.
Экинчи голду Тажикстан курама командасынын коргоочусу Фарход Васиев голду пенальтиден тээп киргизип, командасын алдыга алып чыкты.
Оюндун акырына дээрлик бир мүнөттөй калганда КР курама командасынын оюнчусу Землянухин пенальти тээп, оюн эсебин 2:2 кылып теңеди.
Дүйнөлүк чемпионаттын финалдык бөлүгү 2018-жылы Россияда өтөт.
