БИШКЕК, 23-ноя. — Sputnik. Бишкекте теннис боюнча СССРдин спорт чебери Жеңишбек Таласбаевдин элесине арналган эл аралык турнир аягына чыкканын Мамлекеттик жаштар, дене тарбия жана спорт агенттиги билдирди.
Спорттук иш-чарага Кыргызстан, Казакстан жана Түркмөнстандан келген 50 спортчу катышты. Мелдеш 50 жашка чейинки жана андан жогорку курактагы эки категорияда өттү. Катышуучулар жалгыз жана жуп болуп ойношту.
50 жашка чейинки категорияда биринчи орунду казакстандык Диаз Сарсембаев, экинчи орунду кыргызстандык Алишер Якубаев, ал эми үчүнчү орунду түркмөнстандык Вячеслав Хмечев ээлешти.
50 жаштан жогорку курактагы спортчулардын ичинен биринчи орунду казакстандык Никонор Ким алса, экинчи, үчүнчү орундарга эки кыргызстандык спортчу ээ болду.
Жеңүүчүлөр диплом, медаль жана баалуу байгелер менен сыйланышты.
Кыргызстандын бирден бир мыкты теннисчилеринин бири Жеңишбек Таласбаев 1993-жылы каза болгон.
