Тажикстан — Кыргызстан беттешүүсүн өзбекстандык калыс тескейт

БИШКЕК, 29-мар. — Sputnik. Тажикстан — Кыргызстан беттешүүсүн өзбекстандык калыстар тобу тейлей турганын Футбол федерациясы билдирди.

Оюн бүгүн Бишкек убактысы боюнча саат 19.00дө 2018-жылы өтө турган Дүйнө чемпионатынын тандоо турунун алкагында өтөт.

Башкы калыс болуп 35 жаштагы Азиз Асимов дайындалды. 33 жаштагы Руслан Серазитдинов мгөенен 29 жаштагы Андрей Цапенко капталдан көз салышат. Ал эми төртүнчү арбитрдин милдети түркмөнстандык рефери Алибек Сапаевге жүктөлдү. Калыстарга Бахрейнден келген Джассим Мохамед Абдулкарим көзөмөлдүк кылса, оюндун комиссары болуп ливандык Бачир Чафик Абдул Халек дайындалды.

Кыргызстан "В" тайпасында үчүнчү орунда ишенимдүү келе жатат. Аталган беттешүүнүн жыйынтыгы кыргызстандык футболчулардын позициясына эч кандай таасир тийгизбейт. Бирок команда Дүйнө чемпионатынын кийинки этабына чыга албай калганы менен 2019-жылы өтө турган Азия чемпионатынын квалификациялык туруна түз чыгууга зор мүмкүнчүлүк алды.

Кыргызстандык команданын эсебинде учурда 11 упай бар. "В" тайпасында биринчи орунда 18 упай менен Австралия келе жатат, Иордания 16 упай менен экинчи орунда. Улуттук команда үчүнчү катарда. Ал эми Тажикстан беш упай менен төртүнчү, Бангладеш бир упай менен бешинчи орунда келе жатат.