Көчмөндөр оюну: Казакстан көк бөрү боюнча өз тайпасында алдыда келе жатат

БИШКЕК, 5-сен. — Sputnik. Көчмөндөр оюнунун алкагында көк бөрү боюнча өтүп жаткан мелдеште Казакстандын курама командасы өз тайпасында алдыда келе жатканын Жаштар иши, дене тарбия жана спорт боюнча мамлекеттик агенттиги билдирди.

Алгачкы беттешүүлөр кечээ өткөн. АКШ командасы Краснояркиден келген топко 7:17 эсебинде утулса, казактар Кытай командасын 15:4 эсебинде ат чабым артка калтырды. Ал эми Башкыртстан 1:0 эсеби менен Афганистандын улакчыларды жеңип алды.

Дүйшөмбү күнү Чолпон-Атадагы ипподромдо Кытай менен Америка командалары беттешип, оюн кытайлык спортчулардын пайдасына чечилди (20:4). Бул америкалыктардын экинчи утулуусу. Эртең кытай командасы Красноярскиден келген спортчулар менен күч сынашса, америкалыктар Казакстандын командасы менен ат салышат.

Көк бөрү боюнча кийинки мелдеш Казакстан менен Красноярскинин ортосунда жүрүп, казактар 15:2 эсебинде жеңишке жетишкен.

Бүгүн ипподромдо Түркия менен Афганистандын (саат 14.00) жана Кыргызстан менен Башкырстандын (15.30) командалары ойнойт.

"А" тайпасына АКШ, Кытай, Красноярск жана Казакстандын командалары кирсе, "В" тайпасында Кыргызстан, Түркия, Башкырстан жана Афганистандын командалары ойномой болгон. 

Экинчи дүйнөлүк көчмөндөр оюндары 8-сентябрга чейин уланат. 

Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.