БИШКЕК, 9-фев. — Sputnik. Кыргызстандын футбол боюнча курама командасы Эл аралык футбол федерациясынын тизмегинде өз ордун сактап калды.
Февралдык рейтинг уюмдун сайтына жарыяланды. Улуттук команда 200 өлкөнүн ичинен 124-сапты ээлеп, мурунку ордунда калды. Кыргызстандык футболчулар январда бир да беттешке чыккан эмес.
Рейтингде Борбор Азия ичинен биринчи орунду Өзбекстан (63-орун) ээлейт. Команда россиялык топтон болгону эки орун төмөн турат. Казакстан 96-орунда, Тажикстан 133, Түркмөнстан 144-сапта турат. Азия өлкөлөрүнүн ичинен мурдагыдай эле 32-катарды ээлеп Иран алдыда келе жатат.
Кыргызстандын жакын арада беттеше турганы Макао командасы. Азия кубогунун квалификациялык турунун алкагында Бишкекте өтчү таймаш 28-мартка белгиленген.
Ал эми FIFA рейтингинин алдыңкы үч сабын мурдагыдай эле Аргентина, Бразилия жана Германия ээлеп турат. Тизмек эми 9-мартта жаңыланат.
