БИШКЕК, 26-июн. — Sputnik. Мекендешибиз Дастан Али Шаршеев эртең, 27-июнда россиялык атаандашы Антон Калинин менен реванш-беттешүүгө чыгат. Бул тууралуу Sputnik Кыргызстан агенттигине спортчу өзү билдирди.
Машыгууларын Таиландда өткөргөн Шаршеев наам үчүн эмес, намыс үчүн беттешерин билдирип, согушка барчудай даярданып жатканын Sputnik Кыргызстан агенттигинин кабарчысына билдирди.
"Толкунданып жатканымды жашыргым келбейт. Мен үчүн жоопкерчиликтүү, тарыхта кала турчу күн. Элимди, ата-энемди жер караткым келбейт. Наам үчүн эмес, намыс үчүн беттешем. Кыргыздар намыскөй, өжөр эл экендигин көрсөткүм келет. Күнүнө үч маал, үч сааттан терим калбай, бөйрөгүм түшкүчө машыгып жаттым. Оюмдун баары бир гана беттеште болду. Атайын телефон номеримди дагы алмаштыргам. Жашоомдогу маанилүү күн үчүн согушка даярдангандай эле болуп жатам. Беттешке жүз пайыз даярмын. Буюрса, жеңгенимди тастыктайм"— деди Шаршеев.
Дастан Али Шаршеев эртең, 27-июнда Бишкек убактысы боюнча 22:00дө беттешке чыгат. Россиянын "Боец" телеканалы түз алып көрсөтөт.
