БИШКЕК, 22-сен. — Sputnik. 21-сентябрдын жыйынтыгы менен Ашхабадда өтүп жаткан жабык имараттагы V Азия оюндарында кыргызстандык спортчулар эки күмүш, эки коло медалга ээ болушту.

Ат спортунун конкур түрү боюнча жеке таймашта кыргызстандык чабандес Камил Сабитов үчүнчү орунга чыкты. Ал эми казак күрөшү боюнча Тилек Куралов күмүш, Мирлан Эралиев коло медаль алса, иран күрөшүндө күч сынашкан Айдарбек Айтиев коло байгелүү болду.

Мындан тышкары, баскетболдун 3х3 стритбол түрүнөн кыргызстандык жигиттер Өзбекстандын командасын 21:18 эсебинде утуп алышты. Буга чейинки беттешүүлөрдө Монголияга утулса, Непалдын командасын жеңип алышкан.

Ал эми Амиржан Муканов жетектеген Кыргызстандын футзал командасы Ирандын командасына каршы туралбай 10:0 эсебинде утулуп, оюндан четтеп калды. Мурдагы беттешүүлөрдө Иорданиядан 7:1 эсебинде утулуп, Таити командасын 4:2 эсебинде жеңип алган.

Ошентип учурда Кыргызстандын улуттук командасынын куржунунда 30 байге — 2 алтын, 10 күмүш жана 18 коло медаль бар. Кыргызстан мурдагүнү 12-орунда турса, 21-сентябрдын жыйынтыгы менен 15-орунга жылып калды.

22-сентябрда спортчулар баскетбол, алыш-бел боо күрөшүнүн эркин ыкмасы, боулинг, бильярд, шахмат, ат спорту, футзал, сууда сүзүү, теннис, күрөш, тайбокс, таэквондо, велотрек жана оор атлетика боюнча күч сынашат.

БИШКЕК, 19-янв. — Sputnik. Бишкектеги Кайгуул милиция кызматы бүгүн маршрутка көйгөйүнөн улам аялдамаларда калган бишкектиктерди үйлөрүнө жеткирүүдө. Бул туурасында шаардык милициянын маалымат кызматынан кабарлашты.

Кечкурун милиционерлер балдарга, аялдарга жана улгайган адамдарга өз жардамын сунуштап жатканы айтылды. Бул багытта аталган кызматтын атайын автоунаалары иштеген.

Милициядан аялдамаларда топтолгон кишилер аз, шаар ичи тынч деп билдиришти.

Бүгүн, 18-январда, айрым маршрутка айдоочулары жумушка чыкпай коюшкан. Алар жол кире акысын жогорулатууну талап кылышууда. Себеби жол кире 2012-жылдан бери көтөрүлө элек. Учурда маршрутканын баасы күндүз 10, ал эми кечинде 12 сом.

Эртең менен Бишкек шаарынын мэринин милдетин аткарып жаткан Балбак Түлөбаев каттамга чыкпай койгон маршруткалардын лицензиясы алынып, башкага берилерин эскерткен.

Мэриядан бүгүн калаадагы 1350 микроавтобустардын 400-450сү ишке чыкты деген маалымат берген. Шаардык транспорт башкармалыгынан маршруттук каттамдардын 90 пайызы кадимки калыбында иштеп жатат дешкен. Ал эми кечкурун аялдамаларда эл топтоло баштап, коомдук транспортту күткөндөр көбөйгөндө Мэриянын шаардык транспорт башкармалыгынын жетекчисинин милдетин аткарып жаткан Улан Бейшенбаев маршрутка боюнча кырдаал турукташкандыгын, ал эми жогорудагы көрүнүш автотыгын менен байланыштуу болушу мүмкүн деген жообун айткан.