Кыргызстандагы белгилүү футболчулардын бири Азамат Байматов

Азамат Байматов: алдыдагы маанилүү оюндардан кийин үйлөнөм

964
(жаңыланган 23:57 28.06.2018)
Кыргызстандагы белгилүү футболчулардын бири Азамат Байматов учурда Индонезиянын "Борнео" клубунунун жогорку лигасында ойнойт. Кызматы — коргоочу.

Футболчу жакында эле мекенине келип эс алып кайтты. Ал ортодо Sputnik Кыргызстан маалымат агенттигине баш багып, спорттогу жолу, алдыдагы пландары, үй-бүлөсү жана жеке жашоосу тууралуу кенен айтып берди.

Байматов — Кыргызстандын мыкты футболчусу (2010, 2012), Өлкөнүн көз карандысыздык кубогунун ээси, КРдин чемпиону (2008, 2011, 2012), КР кубогунун жеңүүчүсү (2008, 2012). Ошондой эле "Дордой" (Кыргызстан), "Транзит", "Вентспилс" (Латвия), "Сибирь" (Россия), "Ситра", "Риффа" (Бахрейн) клубдарында ойногон.

— Кыргызстандагы эс алуу кандай өттү?

— Келген күндөн тарта туулуп өскөн жерим Ош шаарында болдум. Ата-эне, тууган-туушкандар менен отуруп чер жазыша эс алдык. Жаш балдар менен сүрөткө түшүп, сүйлөшүп жакшы күндөргө күбө болдум. Борборго келгенде журналисттерге маек берип, спорттук дарыгерлердин текшерүүсүнөн өттүм. Чуңкурчак жайлоосунда кымыз ичип, тоого чыктым. Жаратылыш жан дүйнөмө жакын. Алдыда Индонезиянын чемпионаты күтүп турат. Клубдун түзүп берген шартына жооп катары мыкты жыйынтык көрсөтүшүм керек. 

Капитан сборной КР по футболу Азамат Байматов
© Фото / Эржигит Акаев
Кыргызстандагы белгилүү футболчулардын бири Азамат Байматов: эс алууга Чуңкурчак жайлоосунда кымыз ичип, тоого чыктым. Жаратылыш жан дүйнөмө жакын

— "Борнео" менен канча жылга келишим түзүлгөн?

— Бир жылга. Кийинки жылдын январында бүтөт.

— Мурда ойногон клубдарыңыз менен келишимди бир жылга түзүптүрсүз. Эмнеге көпкө узабайт?

— Спорттун өмүрү кыска, футболчу жыл сайын өсүп турушу керек. Анүстүнө келишим түзгөн клуб менен акырына чейин иштешем деген кепилдик жок. Мен "Борнеого" чейин арабдардын эки клубунда ойнодум. "Ситрада" ойноп жүрүп "Риффага" өтүп, жер которгондо борбордон айылга эле келип калгандай болдум. Араб өлкөлөрүндөгү клубдардын бир жаман жери — айлыктарын кечиктирип берет. Алар акчалуу болгону менен ичи тар келишет. Үч жыл жашап көп нерсени түшүндүм. Араб элин идеалдуу элестетебиз, жаман иштерди жасаган учуру деле арбын. Ал жакта ири суммадагы акчамды кайтара албай калтырып кеткем. Болбосо ден соолугумду арнап бир канча оюн өткөргөм. Өзүм соттошуп, ызы-чуу чыгарганды жактырбайм, жөн эле баса бергем. Курама команда менен Индонезияда мыкты оюн көрсөткөнүбүздө азыркы иштешип жаткан клубдан сунуш келген.

 

 

— Сыр болбосо клубдар канча каражат төлөйт?

— Келишим боюнча айтылбайт. Латвияда жүргөндө бир айлыгыма унаа алчумун. Ал жакта машиналар арзан да, 1000-2000 еврого эле алсаң болот. Мен бир Mazda сатып алгам. Агезде 18 жашта болчумун. Клуб келишимдин негизинде Кыргызстанга жибере албай калды. Ошондо апамды жаныма чакыртып, аш басып суунун жээгине алып баргам. Ошол күндөр керемет эле.

— Спорттун аркасы менен кандай материалдык байлык топтой алдыңыз?

— Бишкекте батирим, унаам бар. Ата-энеме үй куруп бергем. Москвада окуган карындашыма жардам берем. Кудайга шүгүр.

— Былтыр улуттук курама команданын капитанын тандоодо кыйынчылыктар болду окшойт. Кээ бир оюндарда сизди көрө алган жокпуз, кийинки жылы боло турчу Азия кубогунда команданын тизгини кимде болот?

— Ар бир машыктыруучунун системасы бар. Мурда капитанды машыктыруучу же команда тандачу. Ал эми Александр Крестининдин талабы боюнча, оюн сайын капитан алмашып турушу керек. Капаланбайм, бул дүйнөлүк практикадагы тажрыйба. Азия чемпионатында ким кураманы жетектей турганы белгисиз. 

Футболист сборной Кыргызстана Азамат Байматов после матча Кыргызстан — Бангладеш
© Sputnik / Табылды Кадырбеков
Азамат Байматов: Азия чемпионатында ким кураманы жетектей турганы белгисиз

— Спортто канча убакыт болоюн деп пландап жатасыз?

— Быйыл 29га чыгам. Дагы беш жыл ойнойм деген ниетим бар. Негизи спортто дооруң бүтүп жатканы билинет. Карьерамдын соңунда өзүбүздүн командада бир жылдай ойнойм. Мен Кыргызстанга келип бир клубду тандаганда карьерасын жыйынтыктайт экен деп ойлой бериңиздер (күлүп).

— Карьера бүткөндөн кийин эмне менен алектенем деп өзүңүзгө суроо берип көрдүңүзбү?

— Мен профессионалдык карьера тууралуу кеп кылып жатам, а негизи спортто өмүр бою эле болсом керек. Жашоодо ар тараптуу болгон жакшы. Маселен, ашканада өзүмдү мыктымын дебейм, бирок курсак тойгузганды билем. Келишим түзгөн клубдан батирден тарта унаага чейин камсыздап беришет. Бир гана тамагы өзүңөн. Сырттан тамак сатып жебейм. Спагеттини абдан жакшы жасайм. Дүкөндөн азыктарды да дыкаттык менен тандайм. Акча аягандык эмес, колдун тамагы жагат. Антон (Землянухин. — ред.) Таиландда жүргөндө кечке пицца жей берип ашказаны ооруп арыктап келген. Адамдын өзүнөн да. Мен тамакты 5-классыман бери жасайм. Апам жумушта кезинде карындашымды карап, ал ортодо картошка куурганга жетишчүмүн. 

Защитник сборной КР по футболу Азамат Байматов
© Фото / Эржигит Акаев
Азамат Байматов: адам жаш куракка же бирөөнүн айтканына кирип эрте үй-бүлө күтүп албашы керек. Сүйгөн адам келет, аны күтүш керек.

— Жалгыз жашагандан жадаган жоксузбу?

— Жашоо биз ойлогондой эмес. Бир жагынан кем болсо, экинчисинен кудай берет. Кыскасы жеке жашооң болбой калса, жумушуң жакшы жүрүшөп дегендей. Мен убагында шашып үйлөнүп алып, андан ары турмушумду алып кете албай койдум. Мындай абалды сыноо деп билем. Оор күндөрдөн башка түшкөн эки нерсе бар: мыкты экениңди далилдеп чыйраласың же өзүңдү таштап саласың. Мен чет өлкөдө клубдар менен иштешип алаксыдым деп ойлойм. Адам жаш куракка же бирөөнүн айтканына кирип эрте үй-бүлө күтүп албашы керек. Сүйгөн адам келет, аны күтүш керек.

— Өзүңүз деле үйлөнүүнү пландап жатсаңыз керек…

— Сүйлөшкөн кызым бар. Быйылкы жана эмдиги жылкы маанилүү мелдештерди бүтүрүп алсам үйлөнөм. 

Капитан сборной КР по футболу Азамат Байматов
© Фото / Култаев Артур
Азамат Байматов: сүйлөшкөн кызым бар. Быйылкы жана эмдиги жылкы маанилүү мелдештерди бүтүрүп алсам үйлөнөм.

— Социалдык тармакта баракчаларыңыз бар экендигин билем. Өзүңүз тууралуу пикирлерди окуйсузбу?

— WhatsApp, Instagram, ВКонтакте тармагында отурам. Биринчи Instagram баракчама жазылгандар 100 миңге жеткенде шылуундар талкалап кирип, акча талап кылып опузалаган болчу. Жооп кайтарган эмесмин. Азыр жаңысы менен иштешип жатам. Көңүлүм калса керек, көп деле активдүү эмесмин. Анда санда бир пост жазып, сүрөт жүктөйм. Негатив жазгандарды дароо блоктойм.

— Үч жыл мурдагы маектердин биринде "Футбол талаасында катаалмын. Бирок бышактап ыйлап сериал көргөн учурларым болот" деп айтыптырсыз. Жашоодо жумшак, аярсызбы?

— Жыл сайын спортто да, жашоодо да инсан катары калыптангым келет. Апам өзгөрдүң деп калат. Азыр байлыкка кызыкпайм. Биринчи кезекте ата-эне, туугандарың менен мамилени жакшыртууну, ден-соолугуңа кам көрүүнү көбүрөөк ойлоп калат экенсиң.

— Мага эки жыл мурда берген маегиңизде балдарын, жубайын жакшы көргөн Девид Бекхэмди кумир тутам депсиз. Ал дале күчүндөбү?

— Туруктуулук жагат. Ал тууралуу жаман пикир уга элекмин. Инсан, спортчу катары баа берем.

— Россияда футбол боюнча дүйнө чемпионаты кайнап жаткан учур. Кайсыл командага күйөрмандык кыласыз?

— Сегиз жылдан бери Испания курама командасын колдойм. 2010-жылы чемпион болгондо журналисттер менен мелдешип, команданын жеңишин утурлай чачымды сарыга боегом. Акыркы убактарда Испаниянын жолу болбой жүрөт, туура багытты алат деп ишенем. 

Футболисты сборной Кыргызстана и Индии во время матча на стадионе имени Долона Омурзакова в Бишкеке в рамках отбора на Чемпионат Азии — 2019
© Sputnik / Табылды Кадырбеков
Азамат Байматов: мыкты оюн көргөзсөк ири чемпионаттарга катыша алабыз

— Кыргызстан канча жылдан соң дүйнө чемпионатында ат салышышы мүмкүн?

— 2019-жылы январь айында Азия кубогунда алгачкы оюн көрсөтсөк, жайында төрт жылдан соң Катарда өтө турчу дүйнө чемпионатына талапкер командалардын мелдеши өтөт. Мыкты оюн көргөзсөк ири чемпионаттарга катыша алабыз.

964
Белгилер:
жеке жашоо, клуб, маек, спорт, футбол, Азамат Байматов
Тема боюнча
Футболчу Айдана Оторбаева испаниялык клуб менен келишим түздү
Кызыктар эми болчудай... Футбол чемпионатын ким жеңет?
Футбол чемпионатындагы эң келишимдүү оюнчулардын сүрөттөрү
Кыргызстандык балбан Акжол Махмудов. Архив

Секирген атаандашын төбөгө көтөрүп уруп... КР балбандары жасаган укмуш ыкмалар. Видео

917
(жаңыланган 19:20 02.12.2020)
Sputnik Кыргызстан олимпиадага даярдык боюнча циклдүү чыгарылыштардын алкагында ата мекендик балбандардын атаандаштарын көтөрүп чапкан кооз ыкмаларын чогултту.

Быйыл коронавирус пандемиясы дүйнөнү каптап, көптөгөн иш-чаралар өтпөй калды. Анын катарында спорттун эң жогорку мелдештеринин бири, жай айына белгиленген Токио Олимпиадасы да 2021-жылга калтырылган.

Азыркы тапта беш кыргызстандык спортчунун лицензиясы бар бар. Суучул Денис Петрашов, жеңил атлетикадан 42,195 чакырымдык аралыкка чуркоодо жөө күлүк Юлия Андреева жана Дарья Маслова, грек-рим күрөшүнүн 87 килограмм салмактагы балбаны Атабек Азисбеков жана кыз-келиндер күрөшүнүн дүйнө чемпиону Айсулуу Тыныбекова жолдомо алышкан.

Учурда спортчуларыбыз Олимпиада оюндарына жолдомо ойнотулуучу мелдештерге кызуу даярдык көрүп жаткан чагы.

Дзюдо боюнча 2021-жылдын январь айында Катардын Доха шаарында Masters, февраль айында Израилде Grand Slam, апрель айында Кыргызстанда Азия чемпионаты, май айында Парижде Grand Slam жана июнь айында Венгрияда дүйнө чемпионаты өтөт.

Ал эми спорттук күрөштүн түрлөрүнөн (грек-рим, эркин жана кыз-келиндер күрөшү) март айында Кытайда жана апрель айында Болгарияда жолдомо берилүүчү ири мелдештер каралган.

Ата мекендик спортчулар дал ушул турнирлерден Олимпидага жолдомо алат деген үмүт чоң.

Sputnik Кыргызстан Олимпиадага даярдык боюнча циклдүү чыгарылыштардын алкагында ата мекендик дзюдо, эркин жана грек-рим күрөшүнүн балбандарынын 2016-2020-жылдар аралыгында күрөшүп, атаандаштарын көтөрүп чапкан керемет ыкмалардын жыйнагын сунуштайт.

Дзюдо

Дзюдо күрөшүнүн чебери Кубанычбек Айбек уулу 2019-жылы Японияда өткөн дүйнө чемпионатында 7-орунга жеткен. 60 килограмм салмакта күч сынашкан балбаныбыз үчүнчү айлампада монголиялык Дашдава Амартувшин менен кез келип, аны укмуштуудай ыкмага алып чапкан. Калыстар кыргызстандык балбандын ыкмасын иппон (таза жеңиш) деп баалаган.

Кубанычбектин бул ыкмасын Дүйнөлүк дзюдо уюму 2019-жылдагы мыкты иппондордун катарына кошкону маалым.

Ушул эле жылы Казакстандын Алматы шаарында өткөн Азия кубогу мелдешинде казакстандык Шерзод Давлатовду көтөрүп чапканы көрүүчүлөрдүн бүйүрүн кызыткан.

Посмотреть эту публикацию в Instagram

Публикация от @muhammed_umar_judo

Кыргызстандык дагы бир дзюдо чебери 81 килограмм салмакта күрөшкөн Владимир Золоев 2019-жылы Казакстанда өткөн Азия чемпионатында казакстандык Арман Махамбетовду үстүнөн ашыра алып чаап, уткан.

66 килограмм салмакта күрөшкө түшкөн кыргызстандык дагы бир дзюдочу Отар Бестаев Казакстанда өткөн эл аралык ири мелдеште чегинип качкан атаандашын жамбаштан ашыра көтөрүп чаап, өзгөчө ыкма жасаган.

Бул ыкма толук жеңишти камсыздай албаганы менен мыкты көрүнүш тартуулайт. Бестаев беттеште үстөмдүгүн улантып, аягында жеңишке жеткен.

Юрий Краковецкий - Кыргызстандын дзюдо спортунда өз орду бар балбан. 2016-жылы Бразилиянын Рио-де-Жанейро шаарында өткөн Жайкы олимпиада оюндарында украиналык Яков Хаммону жыкканда эсте каларлык ыкма жасаган.

Грек-рим күрөшү

Грек-рим күрөшү көтөрүп чапкан ыкмаларга бай. Кыргызстандык балбан Акжол Махмудов 2016-жылы жаштар арасындагы дүйнө чемпионатында армениялык Махлас Амоянды адаттан тыш ыкма менен чапкан. Калыстар ыкма биринчи бөлүк бүткөндөн кийин жасалды деп эсепке алган эмес. Деген менен ыкма кооз болгон.

Махмудов 2018-жылы алгачкы ирет чоңдор мелдешине чыгып, Бишкектеги спорт сарайында өткөн Азия чемпионатын уткан. Финалдык беттеште казакстандык тажрыйбалуу балбан Демеу Жадраевди жамбашка алып чапкан. Бул учурда Акжол 4:0 эсебинде утулуп жаткан эле. Жасаган катуу чабуулунан буйтап качкан атаандашын ай-буйга келтирбей, күч менен мыкчып кармап туруп жасай алган.

Кыргызстандык балбан жеңишке жеткен. Бул ыкма беттештеги чечүүчү учур болгону менен баалуу.

Грек-рим күрөшүнүн балбаны Жоломан Шаршенбеков 2017-жылы Финляндиянын Тампере шаарында өткөн жаштар арасындагы дүйнө чемпионатында россиялык Эмин Сефиршаевди керемет ыкма менен чапкан.

Жоламан атаандашын секирген абалда кармап, төбөсүнө көтөрүп туруп чапкан ыкмасы мелдештин мыкты ыкмаларынын катарына киргизилген. Балбандар 55 килограмм салмакта күч сынашкан.

Шаршенбеков бул ыкмасы үчүн 4 упай алып, беттешти 12:1 эсебинде техникалык артыкчылык менен уткан.

Кыргызстандагы атактуу грек-рим күрөшүнүн балбаны, Азия оюндарында Кыргызстандын туусун көтөргөн спортчу Каныбек Жолчубековдун атаандаштарын керемет ыкма менен чапкан учурлары көп. Өткөн жылы Украинадагы эл аралык мелдеште эле бир канча кооз ыкмаларды жасаган. Анын катарында украиналык Игорь Курочкин аттуу балбанды артка алып чапкан (обратный) ыкмасы өзгөчө чеберчилик менен жасалган.

Каныбек 2019-жылы Казакстандын Нур-Султан шаарында өткөн дүйнө чемпионатында түркиянын балбаны Керем Камал менен кармашканда да мыкты ыкмаларды жасаган. Калыстын атаандаштын пайдасына кабыл алган чечимдерине карабай, беттештин экинчи бөлүгүндө түрк балбанын эки ирет көтөрүп чапкан. Экинчи ыкмасы мелдештеги эсте калардык ыкмалардан болгон.

Эркин күрөш

Аты айтып тургандай эле күрөштүн бул стилинде көтөрүп чапкан ыкма жасоо бир аз татаал. Деген менен балбандар учурун таап, спорт күйөрмандарына жагымдуу маанай тартуулашат.

2019-жылы 23 жашка чейинкилер арасындагы дүйнө чемпионатында 65 килограмм салмак категориясында күрөшкөн кыргызстандык балбан Эрназар Акматалиев АКШлык Жайдин Селсор Айрманды чапкан ыкмасы мелдештин көркүн ачкан. Эрназар акыркы секундаларда артка ийилип (прогиб) чапкан ыкмасы жеңиш алып келип, чейрек финалга чыккан.

Бириккен күрөш дүйнөсү (United World Wrestling) уюму Эрназар Акматалиевдин жасаган ыкмасын мелдештеги эң кооз ыкма деп тапкан.

Кыргызстандык дагы бир эркин күрөштүн балбаны Улукбек Жолдошбеков көтөрүп чабуу ыкмасынын чебери болуп саналат. Россиянын Дагестан Республикасында өткөн Али Алиев атындагы эл аралык мелдеште россиялык Артем Гебековду көтөрүп, үстүнөн ашыра алып чапкан.

Улукбектин 2019-жылы өткөн 23 жашка чейинкилердин арасындагы дүйнө чемпионатында түркиялык балбан Селехиддин Серт менен квалификациялык раундда кез келген. 6:2 эсебинде утулуп жатып, тик турган жерден мыкчып кармап, буралып чапкан.

Бул мелдеште Улукбек Жолдошбеков дүйнө чемпионатын утуп алган.

Бу саам кыргызстандык дзюдо, грек-рим жана эркин күрөш боюнча балбандардын айрым гана ыкмалары берилди. Токио олимпиадасы Кыргызстан үчүн жемиштүү болоруна тилектешпиз.

917
Белгилер:
Кыргызстан, ыкма, дзюдо, күрөш, спорт
Тема боюнча
Эркин жана грек-рим күрөшү боюнча Дүйнө кубогуна катышчу балбандар. Тизме
Атабек Азисбеков: Токио Олимпиадасында мен үчүн ыңгайсыз атаандаш болбойт
Жоламан Шаршенбеков UWW даңазалаган сальтосунун чоо-жайын айтты. Видео
Токио-2021дин программасы чыгып, Айсулуу 3-августта күрөшмөй болду
Кыргызстандык балбан Айсулуу Тыныбекова. Архив

Добуш берели! Айсулуу күрөш тарыхындагы мыкты балбан наамына талапкер болууда

895
(жаңыланган 14:45 02.12.2020)
Айсулуу Тыныбекова учурда олимпиада чемпиону, дүйнө биринчилигин бир нече жолу уткан россиялык Наталья Воробьева менен виртуалдык мелдештин чейрек финалында таймашып жатат.

БИШКЕК, 2-дек. — Sputnik. Бириккен күрөш дүйнөсү (United World Wrestling) уюму кыз-келиндер күрөшүнүн тарыхындагы эң мыкты балбанды аныктоо үчүн сурамжылоо өткөрүп жатат. Бул тууралуу Жаштар иши, дене тарбия жана спорт агенттиги билдирди.

Голосование за звание лучшего борца среди женщин всех времен в Instagram-аккаунте Объединенного мира борьбы (UWW).
© Фото / Instagram / unitedworldwrestling
Бириккен күрөш дүйнөсү (United World Wrestling) уюму кыз-келиндер күрөшүнүн тарыхындагы эң мыкты балбанды аныктоо үчүн сурамжылоо өткөрүп жатат

Талапкерлердин арасында олимпиада чемпиондору, дүйнө биринчилигин уткан кыздар менен кошо кыргызстандык балбан Айсулуу Тыныбекова дагы бар.

Уюштуруучулар мелдештин сеткасын түзгөн. Күйөрмандардын онлайн-добуш берүүсүнүн жыйынтыгы менен көп добуш алган спортчу кийинки баскычка өтөт.

Спорт агенттиги кыргызстандыктарды өлкөнүн сыймыгы Айсулуу Тыныбекованы колдоого чакырат.

Добуш берүү UWW уюмунун Instagram баракчасында жүргүзүлүп жатат. Күйөрмандар төмөнкү шилтеме аркылуу кирип, Айсулууга добуш бере алышат. Ал үчүн Stories бөлүмүнө кирүү керек. 

Посмотреть эту публикацию в Instagram

Публикация от Olympic Wrestling (@unitedworldwrestling)

Айсулуу Тыныбекова учурда олимпиада чемпиону, дүйнө биринчилигин бир нече жолу уткан россиялык Наталья Воробьева менен виртуалдык мелдештин чейрек финалында таймашып жатат.

Айсулуу Тыныбекова 62 клограммдагы балбандардын арасында дүйнөлүк рейтингде биринчи орунда турат.

895
Белгилер:
сурамжылоо, Айсулуу Тыныбекова, күрөш, кыздар
Тема боюнча
Тыныбекова баштаган балбан кыздар Стамбулда Дүйнө кубогуна даярданышууда
Дүйнөлүк күрөш уюму Айсулуу Тыныбекованы колдоого чакырды

Каракчылыкка шектүүнү Бишкекте спецназ кармады. Видео

0
(жаңыланган 23:09 02.12.2020)
Жабырлануучу аялдын айтымында, белгисиз адамдар үйгө кирип келип андагыларды ур-тепкиге алган. Ал эми жолдошун байлап салып, ири суммадагы акчаны алып кетишкен.

Бишкекте Криминалдык милициянын кызматкерлери спецназ жоокерлери менен биргеликте мыкаачылык менен кол салууга шектелген жаранды кармашты.

Кармоо учурундагы видеону Бишкек ШИИБинин маалымат кызматы жарыялады.

Маалыматка караганда, 8-октябрь күнү "Жер ынтымагы" конушундагы үйлөрдүн бири каракталган. Жабырлануучу аялдын айтымында, белгисиз адамдар үйгө кирип келип андагыларды ур-тепкиге алган. Ал эми жолдошун байлап салып, 5 500 доллар, 150 миң сом жана 60 миң сомдук алтын буюмдарды уурдап кетишкен.

Жазык кодексинин 202-беренесине (“Каракчылык”) ылайык сотко чейинки өндүрүш башталган.

Жыйынтыгында 32 жаштагы шектүү кармалып, убактылуу кармоо жайына киргизилди.

0
Белгилер:
шектүү, каракчылык, милиция, Бишкек
Тема боюнча
Уюшкан кылмыштуу топтун эки мүчөсүн кармаган видео жарыяланды