БИШКЕК, 21-мар. — Sputnik. Нооруз майрамына карата уюштурулган көк бөрү боюнча мелдештин биринчи лигасынын чемпиону Талас облусунун "Алкан-Ата" командасы болду. Оюн бүгүн, 21-мартта, Бишкектеги "Ак-Кула" ат майданында болду.
Финалдык беттеште "Алкан-Ата" командасы Бишкектин "Келечек" командасы менен ойногон. Жыйынтыгында "Алкан-Ата" командасы 1:5 эсебинде жеңишке жеткен.
Ал эми жогорку лигада "Ынтымак" менен "Достук" командалары чемпион аталышы үчүн күч сынашат.
Белгилей кетсек, 20-мартта биринчи жана жогорку лигада ойногондор арасында үчүнчү орун үчүн мелдеш болгон. Биринчи лигада үчүнчү орун үчүн "Соң-Көл" менен "Казарман" командалары ойноп, "Соң-Көл" 1 упай менен жеңишке жеткен. Жогорку лиганын үчүнчү орунуна "Көк жал" менен "Бакубат Талас" командалары ойноп, эсеп 1-7 эсебинде "Бакубат Талас" командасынын пайдасына аяктаган болчу.
