Генеральный секретарь Федерации паратхэквондо КР Азиз Боталиев во время фотосета

"Балам параспортчу менен чогуу машыкпайт" деген ата-энелер чыккан. Маек

(жаңыланган 18:53 23.11.2019)
Спорт эмне экенин билмек тургай, арип тааный элек кезинде Азиз Боталиевдин колуна тхэквондо боюнча машыктыруучунун визиткасы тиет. Туура 17 жылдан кийин ал сыйлыгы мол тажрыйбалуу спортчу гана болбостон, параспортчулардын машыктыруучусу да болуп чыгат.

КР Паратхэквондо федерациясынын башкы катчысы Азиз Боталиев параспортчулар, тагыраагы, майыптыгы бар спортчулар да мыкты боло аларын далилдөө үчүн беш окуучусунан баш тарткан.

— Машыктыруучулук үчүн өтө эле жаш көрүнөт экенсиз. Спорт менен качантан бери машыгасыз?

— 23 жаштамын, спортко аралашканыма 17 жыл болуп калды. Бул мезгил аралыгында бокс жана грэпплинг боюнча машыктым, бирок дал ушул тхэквондо түрү өзүмө жакын экенин аңдадым. Корей тилинен бул "беш кол, беш бут" деп которулат. Жашоо — бул дагы жол, аны кандай басып өтөрүбүз өзүбүзгө гана жараша: кандай максат коёбуз, кандай багытта алдыга жылабыз...

Генеральный секретарь Федерации паратхэквондо КР Азиз Боталиев во время фотосета
© Sputnik / Табылды Кадырбеков
Азиз Боталиев: бокс жана грэпплинг боюнча машыктым, бирок дал ушул тхэквондо түрү өзүмө жакын экенин аңдадым. Беш жыл мурун машыктыруучулукка кадам таштагам.

— Ата-энеңиздин багыты менен машыга баштадыңыз беле?

— Жок. Окууга да кире элек куракта болчумун, бирок окуучуларга көз салганды жакшы көрөр элем. Бир мектепке кирип бардым. Кире беришинде визитка таратып жатышыптыр, бирди алдым. Тамга тааныбагандыктан, ата-энеме алып келдим. Алар мага балдарды тхэквондо менен машыгууга чакырып жатышканын түшүндүрүп беришти. Мага жаңы бир нерседей туюлду, себеби каратэ менен кунг-фу тууралуу кинолордон эле укканбыз да. Анан мен да машыгууну чечтим. Болочок машыктыруучум менен ошентип тааныштык. Ал эми беш жыл мурун ал мага башкаларды машыктырууга мезгил жеткенин айтты.

— Эмнеге ден соолугунан мүмкүнчүлүгү чектелген адамдарды машыктыра баштадыңыз?

— Жаңы ыкмаларды өздөштүрүү үчүн дүйнөлүк чемпионаттардан видеолорду көп көрөм. Бир жолкусунда капыстан параспортчулардын беттешин көрүп калдым. Эч кандай айырмасы жок экен: дени сак адамдардай эле эки спортчу чыгып, мелдешет. Ошондон тарта Кыргызстанда паратхэквондону өнүктүрүү үчүн мүмкүнчүлүгү чектелген адамдарды да машыгууга тартууну чечтим. Саламаттыгы чың адамга спортко аралашуу өтө жеңил, "Эл эмне деп айтат? Мени не деп карашат?" дегендей, өзүн-өзү психологиялык чектөөлөр болбойт. Эки-үч ай жарыя берип турдум, бирок эч ким келбеди. Бизде машыккан балдардын ата-энелерине да кайрылдым. Ошентип алгачкы параспортчум Нишан Жайналиева менен тааныштык.

Кийин машыктыруучу Убайдула Тохтурбаевдин жетекчилиги менен КР Паратхэквондо федерациясын түптөдүк. Жетекчиси ошол киши. Ден соолугунан мүмкүнчүлүгү чектелген бардык адамдарды машыгууга чакыра кетейин. Машыгуулар Коммунаров жана Азовский көчөлөрүнүн кесилишинде (№41 мектеп), Карасаев көчөсүндө (№14 мектеп), Ленинград көчөсүндө (№75 мектеп), Токомбаев 31/1, Сүйөркулов көчөлөрүндө (№ 17 жана 62 мектептери), 3-кичирайондо (L Center спорткомплекси) жана 12-кичирайондо (№71 мектеп) өткөрүлөт. Айтмакчы, Нишан экөөбүз Азия чемпионатына катышып кайттык, мындан ары да алдыга гана умтулуу ниетиндебиз.

— Федерацияда канча киши машыгат?

— 60 спортчу жана үч параспортчу. Мүмкүнчүлүгү чектелген адамдарга машыгуу маалында эч кандай жеңилдик бербейм, алар калган спортчулар менен бирдей машыгышат. Бул алардын өзүнө болгон ишенимин өрчүтөт. Мисалы, Нишан дени сак балдар менен машыкмак тургай, жигиттер менен мелдешке чыгат. Ал эми эң башында ага жалпы топто машыгарын айтканымда Нишан: "Мени не деп карашат?" — деп ыйлаган. Көп спортчулардан ата-энеси менин бул чечимиме ыраазычылыгын билдиришет. Саламаттыгы чың балдар параспортчуларга кандай мамиле кылыш керектигин түшүнүшөт, алар өздөрүнөн эч айырмаланбастыгын көрүп турушат.

Генеральный секретарь Федерации паратхэквондо КР Азиз Боталиев во время фотосета
© Sputnik / Табылды Кадырбеков
Боталиев: саламаттыгы чың балдар параспортчуларга кандай мамиле кылыш керектигин түшүнүшөт, алар өздөрүнөн эч айырмаланбастыгын көрүп турушат. Ал эми параспортчулар үчүн машыгуу жабдыктарын, форманы биз өз эсебибизден сатып алып беребиз. Азия чемпионатына баратканда 20 уюмга кайрылдык, бирок ошонун ичинен эки ишкана гана бизди колдоду.

— Чогуу машыктырууга караманча каршы ата-энелер барбы?

— Нишан жаңыдан федерацияга келгенде бир нече адам мага келип: "Бул кыз биздин балдар менен машыгабы? Чогуубу?" – дешти. Нишан дагы алардын балдарындай эле менин спортчум экенин айттым. Анан бардык ата-энелерге: "Кимде ким каршы болсо, коштошолу", — дедим. Ошентип беш спортчуну машыктыруудан баш тарттым. Бирок көп өтпөй алар натуура чечим экенин түшүнүп, кайра кайтууну суранышты. Уруксат бердим, себеби балдарда эмне айып? Бирок тарбиялануучулардын бир тобу башында эле бул демилгени кубатташкан.

— Ким каржылайт сиздерди?

— Эч ким. Параспортчулар үчүн машыгуу жабдыктарын, форманы биз өз эсебибизден сатып алып беребиз. Азия чемпионатына баратканда 20 уюмга кайрылдык, бирок ошонун ичинен эки ишкана гана бизди колдоду. Эл жетишкендиктери арбын спортчуларга көмөктөшкүсү келет. Бирок адам бизнес түптөгөндө дароо эле миллион табууга ашыкпайт эмеспи. Биздин өлкөнү эл аралык деңгээлде элге тааныта ала турган жөндөмдүү жарандар арбын, бирок алардын баары каржылык колдоого муктаж.

Паратхэквондо боюнча Азия чемпионатында Кыргызстанды жалгыз Нишан таанытып келди. Казакстандан 22, Өзбекстандан 20 спортчу катышты. Анан калса ар бир командада машыктыруучу, психотерапевт жана врач да жүрөт, ал эми Кыргызстандан Нишан экөөбүз гана барганбыз.

Белгилер:
машыгуу, майып, Кыргызстан, Азия чемпионаты
Тема боюнча
Дүйнө чемпиону Жолдошбеков: сыртка чыкканда чучук, кукси салып алабыз
Изабеков: Айсулуу Рио Олимпиадасынан кийин турмушка чыгам дегенде болбой койгонбуз
Кыргызстандык спортчу Дарья Маслова. Архивдик сүрөт

Дарья Маслова Тажикстандагы жарым марафондун жеңүүчүсү болду

(жаңыланган 18:17 17.04.2021)
Жөө күлүк 21 чакырымды бир сааттан ашык убакытта чуркап келген. Спортчунун машыктыруучусу ал бул аралыктагы көрсөткүчүн бир жарым мүнөткө жакшырта алганын айтты.

БИШКЕК, 17-апр. — Sputnik. Кыргызстандык спортчу Дарья Маслова Тажикстандагы эл аралык жарым марафондун жеңүүчүсү болду. Бул тууралуу Sputnik агенттигине спортчунун машыктыруучусу Татьяна Борисова билдирди.

Коңшу өлкөнүн борбору Душанбенин күнүнө арналган мелдеш бүгүн, 17-апрелде, өттү.

Маслова 21,1 чакырымды 1 саат 12 мүнөт 2 секундда чуркап келген. Натыйжада бул аралыктагы көрсөткүчүн бир жарым мүнөткө жакшырта алган. Күмүш медалды өзбекстандык Вероника Гришина, коло байгени тажикстандык Гаффорзода Зулхиджа алган.

Ал эми эркектер арасында коло байгеге кыргызстандык Адилет Кыштакбеков ээ болгон.

Белгилер:
Адилет Кыштакбеков, чуркоо, марафон, Тажикстан, Дарья Маслова
Тема боюнча
Жөө күлүктөр Мария Коробицкая, Дарья Маслова Ташкент марафонунан алтын утушту

Кыргызстандык Эрназар Алматыдагы мелдеште мыкты ыкма жасаган спортчу болду. Видео

(жаңыланган 17:13 17.04.2021)
Бириккен күрөш дүйнөсү Кыргызстандын эркин күрөш боюнча балбаны Эрназар Акматалиевдин Алматыда өткөн лицензиялык турдагы таймаштарынын (чейрек финал, жарым финал жана финал) видеосун жарыялады.

Уюштуруучулар Акматалиевдин эркин күрөш боюнча спортчулардын арасынан ыкмаларды эң мыкты аткарганын айтышты.

65 килограмм салмакта күч сынашкан Акматалиев жарым финалда өзбекстандык тажрыйбалуу спортчу Ильяс Бекбулатов менен кармашты. Кыргыз балбаны 8:0 эсебинде утулуп жатканына карабай аракетин улантып, адегенде эки, анан төрт упайлык ыкма жасап, анын артынан эле атаандашынын далысын жерге тийгизип, таза жеңишке жеткен

Ал эми чейрек финалда түркмөн атлети Керим Ходжаковду 5:1 эсебинде жеңип алган.

Белгилер:
эркин күрөш, видео, мелдеш, Алматы, Эрназар Акматалиев
Тема боюнча
Аягына чейин кармашып. Эрназар Акматалиев Алматы мелдешинен алтын байге утту
Ири эсеп менен утулуп жатып жеңишке жеткен Акматалиевдин кубанган видеосу
Беларустун ички иштер министрлигинин кызматкерлери.Архивдик сүрөт

ФСБ: Лукашенкону өлтүрүүгө камданып, Беларуста төңкөрүш даярдагандар кармалды

(жаңыланган 03:18 18.04.2021)
Зенкович АКШ менен Польшада жүрүп келгенден кийин Москвадагы ресторандардын биринде беларустук генералдар менен жолугуп, пландалган аракеттердин ишке ашышы үчүн өлкө башында тургандардын көзүн тазалоо керектигин айткан.

БИШКЕК, 18-апр. — Sputnik. Москвадан 9-май күнү Беларусь президенти Александр Лукашенкону жок кылып, өлкөдө аскердик төңкөрүш жасоого камданып жүргөндөр кармалды. Бул тууралуу ФСБнын коомдук байланыш борборуна таянуу менен РИА Новости жазды.

Маалыматта колго түшүрүлгөндөр Беларусь менен Россиянын жарандыгын алган Юрий Зенкович менен беларусиялык Флександр Федута аттуу адамдар экени айтылат.

Россиянын атайын кызматы коңшу өлкөнүн Мамлекеттик коопсуздук комитети менен биргеликте иш алып барган.

"Беларустук кесиптештердин берген маалыматы боюнча, Зенкович менен Федута мессенжерлердин биринде аскердик төңкөрүштүн планын талкуулап, Москвада оппозициялык маанайдагы генералдар менен жолугууну көздөгөн", — деп айтылат кабарда.

Зенкович АКШ менен Польшада жүрүп келгенден кийин Москвадагы ресторандардын биринде беларустук генералдар менен жолугуп, пландалган аракеттердин ишке ашышы үчүн өлкө башында тургандардын көзүн тазалоо керектигин айткан. Түзүлгөн план боюнча радио жана теле борборлорду басып алып, ички аскер бөлүктөрүнүн жолун тосуу каралган. Күч структураларынын ишин токтотуу үчүн электр энергияны өчүрүү даярдалганы маалым болду.

Натыйжада конституциялык түзүлүш өзгөрүп, бийлик "Улуттук элдешүү комитетине" өтмөк.

Зенкович менен Федутага карата Беларустун тергөө органдары 357-беренесинин ("Мамлекеттик бийликти басып алууга аракет кылуу") негизинде иш алып барууда.

Белгилер:
бийлик, мамлекеттик төңкөрүш, Өлтүрүү, ФСБ, Александр Лукашенко, Россия, Беларусь
Тема боюнча
Лукашенконун уулуна генерал наамы берилди
Лукашенко Беларустагы митингдердин көпкө созулушуна пандемияны айыптады