БИШКЕК, 26-ноя. — Sputnik. Кыргызстандын футбол боюнча курама командасынын баасы соңку үч оюндан кийин өсүп, рекорд койду. Мындай жыйынтыкка беделдүү делген германиялык Transfermarkt.de басылмасынын маалыматынан улам келүүгө болот.
9-ноябрда кыргызстандыктар Ташкентте өткөн жолдоштук мелдеште Өзбекстандын командасы менен беттешип, 3:1 упай эсебинде утулуп калган. Андан кийин Бишкекте дүйнө чемпионатынын тандоо турунун алкагында эки оюн өткөрүп, Японияга 0:2 эсебинде жеңилсе, Тажикстан менен 1:1 эсебинде тең чыккан.
Мелдештерге чейин Кыргызстандын курама командасынын наркы 2 миллион 525 миң еврого бааланып, тизмеге 12 спортчу кирген. Бул рекорддук көрсөткүч болуп турган. Учурда улуттук команданын наркы 2 миллион 650 миң еврого чейин өсүп, ага 13 футболчу кирди.
Тизмеге ким кошулганы жана баа кантип жогорулаганы жазылган эмес.
Трансфердик баа:
- Валерий Кичин (капитан) — 1,5 миллион евро;
- Гүлжигит Алыкулов — 200 миң евро;
- Павел Матяш — 150 миң евро;
- Азамат Байматов менен Ахлетдин Исраилов — 125 миң евродон;
- Виталий Люкс менен Фархат Мусабеков — 100 миң евродон;
- Тамирлан Козубаев менен Миролимжон Ахмедов — 75 миң евродон;
- Эдгар Бернхардт, Алимардон Шүкүров, Акрам Умаров жана Бахтияр Дүйшөбеков — 50 миң евродон.
Ушул жылдын январь айындагы Азия кубогунун алдында КРдин командасы 2 миллион 75 миң еврого бааланган. Андан кийин наркы жогорулай баштаган.
