Атактуу боксчу Майк Тайсон. Архив

Тайсон Жонсту тез утпаса иш чатак болот. КР боксчуларынын беттешке божомолу

618
(жаңыланган 11:58 06.09.2020)
Күзүндө ааламга атагы чыккан ардагер боксчулар Майк Тайсон менен Рой Жонстун кичүүсү рингде күч сынашканы турат. Sputnik агенттиги Кыргызстандагы белгилүү спортчулар менен машыктыруучулардан болжолдуу жеңүүчүнү жана беттештин жүрүшүн сурады.

Профессионалдык бокстун чеберлери Майк Тайсон менен Рой Жонстун беттеши 28-ноябрга белгиленген. Турнир буга чейин 12-сентябрда Калифорнияда болору айтылып, уюштуруучулар спорттук иш-чарадан түшүүчү кирешени арттыруу максатында кийинкиге жылдырышкан.

Эки спортчу тең рингге карьерасын жыйынтыктагандан кийин кайтып жатканын белгилей кетели. Майк Тайсон 2005-жылдан бери, ал эми Рой Жонс 2018-жылдан бери беттештерге чыга элек.

54 жаштагы Тайсон 58 жолу рингге чыккан. 50 атаандашын жеңген, анын 44үн нокаут менен уткан. Алты жолу утулса, эки кармашы өтпөй калган.

Атаандашы Россиянын жарандыгын алган америкалык мушкер, дүйнөнүн экс-чемпиону Рой Жонс 51 жашта. Спорттук жолунда 66 беттешин утуп, анын ичинде 47 атаандашын нокаут менен жеңген. Тогуз жолу жеңилүү ызасын тарткан.

Учурда дөө-шаа спортчулардын беттешин дүйнө эли кеп кылып жатканы маалым. Редакция бул боюнча Кыргызстандагы белгилүү спортчулар менен машыктыруучулардын пикирин укту. Алар беттештин жүрүшүн кандай элестетерин, ким утушу ыктымалдыгын жана жаш өтүп калган убакта рингге чыгуунун күңгөй-тескейи тууралуу айтып беришти.

Орзубек Назаров, дүйнөнүн жети жолку чемпиону:

Многократный чемпион СССР и мира по боксу Орзубек Назаров
© Sputnik / Табылды Кадырбеков
Дүйнөнүн жети жолку чемпиону Орзубек Назаров

— Бокс карып калган убакта алектене турчу спорт эмес. Боксту аркалаганда денени, организмди, ошондой эле психологиялык жактан мээни машыктырабыз. Ал эми жаш өтүп калганда мунун кесепети тийиши мүмкүн. Тайсон дагы, Жонс дагы акыркы беттештеринде кулап түшкөнүн билебиз. Бул жакшы жышаан эмес.

Интернеттен мелдеш атайын уюштурулган көргөзмө дегендей айтылып жатат. Бирок бокста мындай беттештердин болоруна ишенбейм. Бизде жадагалса спарринг дагы оңой эмес. Негизи башында ал жай башталып, соңунда чыныгы боксташууга айланып кетет. Анүстүнө Тайсондун соккусу аябай күчтүү. Азыркы машыгууларынын видеосунан дагы бул өзгөчөлүгү байкалып жатат. Экинчи жагынан анын беттешүүгө каалоосу күч болуп турат.

Майк Тайсон жана Рой Жонс беттешке кандай даярданып жатышат. Видео

Рой Жонс акыркы беттештеринде бир нече жолу кулап түшкөн. Бирок спортто "айнек ээк" деген түшүнүк бар. Бул соккудан жыгылгандарга карата айтылган сыпаттама сөз. Менимче, Жонстун ээги ошондой. Ал дагы азыр жаш кездегидей шамдагайлыгын, тез реакция кылган сапатын жоготкон жок.

Бирок Жонс жашыраак болгонуна карабастан Тайсондун жеңүү мүмкүнчүлүгү көбүрөөк. Себеби ал атаандашынан алдуу-кубаттуу, ошондой эле өжөр, бет алганынан кайтпаган киши.

Акжол Ажибеков, 17 жылдан бери машыктыруучулукту аркалап келет:

Заслуженный тренер Кыргызстана Акжол Ажибеков во время беседы на радио Sputnik Кыргызстан
© Sputnik / Асель Акматалиева
Машыктыруучу Акжол Ажибеков

— Тайсон менен Жонстун беттеши мени кызыктырбайт. Бокс жаатындагы адистер дагы кармашка көңүл бурбаса керек. Себеби бул жөн эле коммерциялык шоу. Эки боксчу тең карып калды, жылдыз болуп, атак-даңкка бөлөнүп турган замандары эбак өткөн.

Эгер беттеш өтүп калса, менин оюмча, Жонстун утуп чыгууга мүмкүнчүлүгү көбүрөөк болот. Анткени Тайсон узак дистанцияга чыдабайт, ал тез арада жеңип алууну көздөйт. Жонс рингде коргонуунун эң жакшы жолдорун өздөштүргөн. Ал "ойноп" беттешип отуруп, кармашууну узак аралыкка созгонго аракет жасайт.

Алмазбек Раимкулов, профессионалдык бокс боюнча АКШнын төрт жолку чемпиону:

Кыргызский боксер Алмазбек Раимкулов
© Sputnik / Табылды Кадырбеков
Профессионалдык бокс боюнча АКШнын төрт жолку чемпиону Алмазбек Раимкулов

— Рой Жонс менен Майк Тайсон спортчуларга мастер-класс көрсөтүү үчүн рингге чыкканы жатат деп ойлойм. Мындай куракта, албетте, көбү эле ден соолугун тобокелдикке салгысы келбейт. Бирок Америкада спорттун деңгээли кандай экенин билебиз, колдоо чоң болот.

Жонс рингде тез, шамдагай, техникасы күчтүү боксчу. Тайсон менен аралыкты сактап, жакын жолотпой беттешсе утушу мүмкүн. Ал эми Тайсон 1-2 раундда каршылашын өз стилинде сокку узатып, жерге жыгышы керек. Эгер алгачкы эки раунддун ичинде беттешти бүтүрүп салбаса, Жонс упай менен жеңишти алып кетиши ыктымал.

54 жаштагы Тайсон машыгууда укмуштуудай реакциясын көрсөттү. Видео

Данияр Жусубалиев, бокс боюнча улуттук курама команданын башкы машыктыруучусу:

Главный тренер Национальной сборной КР по боксу Данияр Джусубалиев
© Фото / из личного архива Данияа Джусубалиева
Бокс боюнча улуттук курама команданын башкы машыктыруучусу Данияр Жусубалиев

— Спортчулардын дөө-шаалары күзүндө бокстун чыныгы майрамын тартуулаганы турат. Алар жаш кезинде укмуш атак-даңкка бөлөнгөнүн жана рингдеги техникасы кандай болгонун билебиз. Бирок азыркы жашында ошентип беттеше алары белгисиз.

Менимче, шоу кылуу үчүн кармашты узакка созушат жана өздөрүн аяп, рингде айрым нерселерди кылбай коюшу мүмкүн. Ошондуктан жеңишти камсыздоодо экөөнүн мүмкүнчүлүгү бирдей эле. Бирок мен Тайсондун утарына ишенем, себеби ал чагылгандай тез иштейт, соккулары күчтүү.

Юрий Гагаринден Рой Жонско чейин. Ак калпак мырзаны көркүнө чыгарат

Акжол Сулайманбек уулу, WBA версиясы боюнча Азиянын үч жолку чемпиону:

Трехкратный чемпион КР по боксу Акжол Сулайманбек уулу во время интервью на радио Sputnik Кыргызстан
© Sputnik / Светлана Федотова
WBA версиясы боюнча Азиянын үч жолку чемпиону Акжол Сулайманбек уулу

— Мен Рой Жонс менен Майк Тайсондун беттешерине 100 пайыз ишенбейм, алар рингде жолукпай деле калышы ыктымал.

Эгерде кармашуу болсо упайдын эсеби менен Жонс, нокаут менен Тайсон утуп алат деп болжолдоп жатам. Негизи Майк ортодо көп убакыт тыным алып койду, ошондуктан анын атаандашында көбүрөөк мүмкүнчүлүк бар.

Азат Усеналиев, бокс боюнча Азия чемпиону:

Кыргызстанец Азат Усеналиев (в синем) во время полуфинального боя с Ясурбеком Латиповым из Узбекистана на Азиатских играх в Джакарте. 31 августа 2018 года
© REUTERS / CATHAL MCNAUGHTON
Бокс боюнча Азия чемпиону Азат Усеналиев

— Бул кармашуу боюнча божомол кылуу азыр кыйын. Анткени ортодогу тыныгуудан кийин экөө азыр машыгууну жаш кездегидей алып кетип жатабы-жокпу, формасына келген-келбегени али белгисиз. Бирок мен Майк Тайсондун утуп чыгарына көбүрөөк ишенем. Себеби ал абдан күчтүү. Рой Жонс өзүнүн шамдагайлыгы менен белгилүү, бирок азыркы курагында андай сапатын көрсөтө алар-албасын билбейм.

Тайсон акулалар менен кармашканда. Шоунун видеосу

Боксчулар 4-раундга чейин бирдей эле беттеш көрсөтүп, андан кийинки раунддарда артыкчылыктары билине баштаса керек. Негизинен мындай куракта рингге чыгуу ден соолукка зыян деп эсептейм.

618
Белгилер:
шоу, ден соолук, божомол, турнир, бокс, беттешүү, Рой Жонс, Майк Тайсон
Тема боюнча
Майк Тайсон футболкасын айрып, массалык мушташка себепчи болду. Шоудагы видео
Америкалык мушкер Жастин Гэтжи. Архив

Гэтжи: Нурмагомедовдун бети-башын канга боёйм

318
(жаңыланган 19:12 23.09.2020)
Нурмагомедов менен Гэтжинин кармашы 24-октябрда өтүүчү UFC 254 мелдешинин башкы беттеши болмокчу.

БИШКЕК, 23-сен. — Sputnik. Америкалык мушкер Жастин Гэтжи UFC чемпиондугу үчүн россиялык Хабиб Нурмагомедов менен боло турган беттешин кандай пландап жатканын айтты. Бул тууралуу BJ Penn маалымат булагына таянып РИА Новости жазды.

Нурмагомедов менен Гэтжинин кармашы 24-октябрда өтүүчү UFC 254 мелдешинин башкы беттеши болмокчу. Гэтжи учурда Абсолюттук мушкерлер чемпионатынын жеңил салмактагы чемпиондук курунун утурумдук ээси болуп саналат.

"Мен Хабибдин оозун канжалатарымды билем. Мен анын өзүнүн токмоктолгонун көрсүн дейм. Анын буга жасаган реакциясын көргүм келет. Ал мендей келесоо эмес. Анын мушташуу ыкмасы канжалата сабаган көрүнүштөрдү камтыбайт. Өзүнүн канга боёлгон абалын көрүп калышы мүмкүн экени Нурмагомедовдун оюна да келбесе керек. Бул ал үчүн эч качан чечүүчү фактор болгон эмес", — деген Гэтжи.

Жастин Гэтжи ушул жылдын 9-майында мекендеши Тони Фергюсонду уткандан кийин россиялык мушкерге башкы атаандаш болгон. ММА спортунда Гэтжи 24 беттеш өткөрүп, анын 22син утуп, эки ирет жеңилүү ызасын тарткан.

Нурмагомедов октагондо Гэтжиден эмнеси менен айырмаланарын айтты

Ал эми Хабиб Нурмагомедов жалпысынан 28 беттешке чыгып, баарында жеңүүчү болгон. Акыркы ирет россиялык мушкер 2019-жылдын 8-сентябрында америкалык Дастин Порье менен октагонго чыгып, экинчи раундда муунтуу ыкмасы менен утуп, UFC чемпиону наамын экинчи ирет коргогон. Дагестандык спортчу учурда дүйнөдөгү эң абройлуу мушкерлер уюмунун жеңил салмактагы чемпиону.

318
Белгилер:
кур, чемпион, беттешүү, Хабиб Нурмагомедов, UFC, Жастин Гэтжи
Тема боюнча
UFC "Мушкерлер аралында" 5 мелдеш өткөрүп, бирине Хабиб Нурмагомедов чыгат
Манчестер Сити клубунун жарым коргоочусу Кевин Де Брюйне

Роналду да, Месси да жок. УЕФАнын "мыкты футболчусуна" үч талапкер тандалды. Видео

148
(жаңыланган 18:27 23.09.2020)
УЕФАнын мыкты футболчу сыйлыгы 2010-жылдан бери ыйгарылып келет. Анын тарыхында Криштиану Роналду менен Лионель Месси алгачкы жолу алдыңкы үчтүккө кирбей калды.

БИШКЕК, 23-сен. — Sputnik. "Манчестер Сити" клубунун жарым коргоочусу Кевин Де Брюйне, "Бавариянын" чабуулчусу Роберт Левандовски жана дарбазачысы Мануэль Нойер УЕФАнын 2019/2020-жылдагы мыкты футболчусу сыйлыгына башкы үч талапкердин катарына кирди. Бул тууралуу аталган уюмдун расмий сайтында айтылат.

УЕФАнын мыкты футболчу сыйлыгы 2010-жылдан бери ыйгарылып келет. Анын тарыхында Криштиану Роналду менен Лионель Месси алгачкы жолу алдыңкы үчтүккө кирбей калды.

Талапкерлер 2019/2020-жылы Чемпиондор лигасына жана Европа лигасына катышуучу клубдардын 80 машыктыруучусу, ошондой эле 55 журналист курамына кирген калыстардын добушу менен тандалган. Мында машыктыруучуларга өз клубунда ойногон футболчуларга добуш берүүгө уруксат берилген эмес.

Гүлжигит Алыкулов "Кайраттын" УЕФА мелдешиндеги голуна жардам берди. Видео

Европанын мыкты футболчусунун ысымы Чемпиондор лигасы мелдешинде өзгөчөлөнгөн футболчулар менен кошо 1-октябрда Ньон шаарында Чемпиондор лигасынын 2020/2021-жылдагы сезонуна чүчү кулак тартуу салтанатында айтылат.

Тандоого ылайык кийинки катарларда:

4. Лионель Месси (Барселона) 53 добуш

Неймар (Пари Сен-Жермен) 53 добуш.  Экөө бир сапта туруп калды.

5. Томас Мюллер (Бавария) 41 добуш

6. Килиан Мбаппе (Пари Сен-Жермен) 39 добуш

7. Тьяго Алькантара (Бавария) 27 добуш

8. Жошуа Киммих (Бавария) ) 26 добуш

9. Криштиану Роналду (Ювентус) 25 добуш алышкан.

148
Белгилер:
Чемпиондор лигасы, мыкты оюнчу, футбол
Тема боюнча
FIFA футбол командаларынын рейтингин жаңылап, Кыргызстан бир сапка көтөрүлдү
Топтун ордуна атаандашын бетке тепкен футболчу оюндан куулду. Видео
Манас эпосу. Архив

"Манас" эпосунун казак тилиндеги жаңы котормосу чыкты. Өзгөчөлүгү

0
(жаңыланган 21:43 24.09.2020)
Автор буга чейин Казакстанда басылып чыккан төрт томдук котормо эл арасында сейрек кездешерин жана балдарга анча түшүнүксүз экенин айткан.

БИШКЕК, 24-сен. — Sputnik. Белгилүү манасчы Баянгали Алимжанов "Манас" эпосунун казакча котормосунун жаңы версиясын тартуулады. Бул тууралуу "Казинформ" жазды.

Ага ылайык, 40 жылдан бери манас айтып келген Алимжановдо эпосту өз версиясында которуу идеясы былтыр жаралган.

Анын айтымында, казак жазуучусу Мухтар Ауэзовдун жетекчилиги алдында басылып чыккан төрт томдук котормо эл арасында сейрек кездешет жана балдарга анча түшүнүксүз.

Жолдошов: "Манас" кара сөз менен жазылса 500-600 китеп топтому чыкчудай

Алимжанов 100 миң сапты түшүнүү окурманга оңой эмес экенин белгилеген. Ошондой эле Кыргызстанда балдар үчүн "Манастын" бир томдугу чыкканын айта кеткен.

"Мен "Манасты" 67 күндүн ичинде толугу менен которуп бүттүм. Китептин өзгөчөлүгү — эпостун эң күчтүү, көркөм, поэтикалык үзүндүлөрү Манастын рухун чагылдырган прозада баяндалган. Эпосту кыскача, келечек муундарга түшүнүктүү тилде бергим келди. Манасты ар бир манасчы өзүнчө айтат. Эпостун сюжети бирдей болгону менен түрдүүчө берилет", — деген Алимжанов.

Китептин бет ачары Нур-Султандагы Достук үйүндө өткөн.

0
Белгилер:
котормо, Манас эпосу, Кыргызстан, Казакстан
Тема боюнча
"Боз кырдын ойгонушу: Чыңгыз Айтматов". Залкарга арналган китеп түрк тилинде чыкты