Кыргызстандын футболдук союзунун (КФС) президенти Канатбек Маматов

КР футболунун 100 жылдыгы, өлкөгө келчү Жанни Инфантино. КФС президентинин маеги

(жаңыланган 00:08 27.03.2021)
Быйыл 21-мартта Кыргызстанда футбол ойноло баштаганына 100 жыл болду. Өлкөдө бул күн жыл аягына чейин белгиленмекчи.

Кыргызстан футболунун бүгүнкү абалы, улуттук курама команданын Дүйнө чемпионатына, Азия кубогунун тандоо оюндарындагы мүмкүнчүлүгү тууралуу өлкөнүн футболдук союзунун (КФС) президенти Канатбек Маматов Sputnik Кыргызстан агенттиги менен баарлашты.

— Канатбек мырза, 21-мартта кыргыз футболунун тарыхына 100 жыл толду. Бул күн кандай белгиленди?

— Биз бул маанилүү датаны бир эле күн белгилеп, аны менен чектелип калбайлы деп чечтик. 2021-жылдын аягына чейинки спорттук иш-чараларыбыздын дээрлик баары ушул белгилүү күнгө арналып өтөт.

Өлкө футболуна эмгеги сиңген оюнчулар менен маектер уюштурулуп жатат. Биздин сайтта "Кыргыз футболу тууралуу 100 факты" деген рубрика ишке киргизилди. Анда апта сайын 100 жылдыктагы маанилүү фактылар жарыяланып жатат. Кыргызстанда алгачкы расмий футболдук беттеш 1921-жылдын 21-мартында ойнолуп, анда "Пишпек" (Фрунзе, Кыргызстан) менен "Верный" (Алматы, Казакстан) командалары беттешкен. Натыйжада 3:1 эсеби менен коноктор жеңишке жеткен. Ушул күн Кыргызстандын футбол тарыхынын башталган күнү катары саналып калган.

Мүмкүн дүйнөгө белгилүү футболчуларды чакырып, атайын футболдук беттеш өткөрөрбүз. Же 100 жылдыктын урматына "Достук" мелдеши уюштурулар. Бул багыттагы маселелер ар тараптуу каралып жатат. Жылдын соңунда футбол мыктыларын белгилеген Sport Awards сыйлыгынын ээлерин аныктайбыз. Бир сөз менен айтканда, быйылкы футболдук иш-чараларыбыздын баары ушул белгилүү күнгө арналат.

Первый футбольный матч на стадионе Спартак. 1921 год
© Фото / пресс-служба КФС
Кыргызстанда алгачкы расмий футболдук беттеш 1921-жылдын 21-мартында ойнолгон. Анда “Пишпек” (Фрунзе, Кыргызстан) менен “Верный” (Алматы, Казакстан) командалары беттешип, 3:1 эсеби менен коноктор жеңишке жеткен.

— Дүйнө чемпионатына, Азия кубогуна тандоо турунун буга чейин белгиленип, пандемиядан улам кийинкиге калган оюндары борборлоштурулган форматта Японияда өтмөй болду. Улуттук команда өткөн жылы бир да эл аралык оюн ойногон жок. Футболчулардын даярдыгы кандай?

— Курама команданын машыктыруучулар штабы былтыр күйөрмандарга жакшы оюн тартуулайбыз деген максат болгон. Тилекке каршы, ал орундалбай калды. Туура айтасыз, өткөн жылы биз Бишкекте бир да эл аралык мелдеш өткөрө алган жокпуз. Дүйнөнү каптаган коронавирус пандемиясынан улам тандоо турунун оюндары борборлоштурулган форматта өтө турган болду. Бул оюндарды Кыргызстанда өткөрөлү деп биз да сунуш киргизсек болмок. Оюнчуларыбыз өз жеринде, өз талаасында ойнойт эле. Бул бизге артыкчылык алып келмек. Бирок азырынча буга шартыбыз туура келбейт. Ал үчүн стадиондорубуз эл аралык талапка жооп бериши зарыл, жанында оюнга чейин машыгуучу талаа болушу керек...

Улуттук команданын даярдыгы тууралуу азырынча так кесе бир нерсе айтуу кыйын. Анткени учурда өлкөнүн ички чемпионаты өтүп жатат, биздин чет жактардагы футболчуларыбыз жергиликтүү чемпионаттарда ойношууда. Пандемия бүтө элек. Тандоо оюндарына дагы эки айдан ашык убакыт бар. Азыр кимдин даярдыгы канчалык болорун айтуу кыйын. Деген менен биз команда жетекчилиги менен такай пикир алышып, команданын абалын талкуулап турабыз. Курамдагы футболчуларды Япониядагы оюндарга азыртан тарта психологиялык жактан даярдоо, аларды шыктандыруу аракеттери көрүлүп жатат.

Мен кечээ эле башкы машыктыруучу Александр Крестинин менен сүйлөштүм. Ал киши негизги курамда бир катар өзгөрүүлөр болорун айтты. Айрым футболчулар командадан таптакыр кеткенин билдирди. Мурда алмашууда отургандардан, негизги курамга жаш футболчулар да киргенин маалымдады. Буюрса, акырындап жагдайга жараша даярдык жүрүп жатат.

Президент Кыргызского футбольного союза Канатбек Маматов
© Фото / пресс-служба КФС
Канатбек Маматов: Кыргызстанда алгачкы расмий футболдук беттеш 1921-жылдын 21-мартында ойнолуп, анда "Пишпек" (Фрунзе, Кыргызстан) менен "Верный" (Алматы, Казакстан) командалары беттешкен

— Тандоо турунда Кыргызстан командасы Бишкекте Мьянма курамасын 7:0 эсебинде уткан. Беттеш жең ичинен сүйлөшүлгөн деген шектенүүлөр айтылган болчу. Акыркы маалыматтар кандай болуп жатат?

— Негизи шектенүү атаандаштарга карата айтылган. Мьянма командасы Бишкектеги беттешке кандай даярдыкта чыгып, эмне максатты көздөгөнү белгисиз, бизди кызыктырбайт деле. Ал беттеште бизде жеңишти камсыздоо керек деген бир эле максат болгон. Ошондуктан команда ар тараптан мыкты даярдыкта чыккан. Коюлган тактикалык жана башка милдеттер, талаптар ийгиликтүү ишке ашырылып, анын натыйжасында жакшы жыйынтыкка жетишти.

Бул маалымат Мьянма тайпадагы Тажикстанды утуп алгандан кийин чыкты окшойт. Анткени КР Душанбеде жеңилүү ызасын тарткан. Ошондон улам шектенүүлөр пайда болсо керек. Анын бизге эч кандай тиешеси жок. Эмне менен бүткөнүн да билбейбиз. Дүйнөлүк футбол уюму (ФИФА) тарабынан бизге бир да сын, шектенүү айтылган эмес.

Президент Федерации футбола Кыргызстана Канатбек Маматов и главный тренер национальной сборной Александр Крестинин
© Фото / пресс-служба ФФКР
Канатбек Маматов: эл аралык оюндарды Кыргызстанда өткөрүүгө азырынча шартыбыз туура келбейт. Ал үчүн стадиондорубуз эл аралык талапка жооп бериши зарыл, жанында оюнга чейин машыгуучу талаа болушу керек...

— КФСтин 2026-жылы же 2030-жылы өтүүчү Дүйнө чемпионатына чыгуу боюнча иштелип чыккан стратегиясы бар экени айтылууда. Ушул тууралуу айта кетсеңиз...

— Ар бир өлкөнүн уюму алдына максат коюп, пландарды кабыл алат. Биз да 2030-жылга чейинки узак мөөнөттүү план кабыл алганбыз. Анда эң башкы максат — Дүйнө чемпионатына чыгуу болуп саналат. КР командасы дүйнөлүк аренага чыгып, оюн көрсөтсө бул биз үчүн чоң жетишкендик болот.

Бул үчүн көптөгөн эмгек, аракеттер көрүлүшү зарыл. Алар акырындап, кадам артынан кадам болуп кетиши керек. Биринчи кезекте футболду жайылтуу, өспүрүмдөр, жаштар курама командаларын чыңдоо, эл аралык деңгээлге чыгаруу, атаандаштыкты өстүрүп, ички чемпионатты күчтөндүрүү зарылчылыгы турат.

Мен жогоруда айтып кеттим, футболдук инфраструктурабыз начар, аны оңдоо, мүмкүнчүлүк болсо заманбап кылып жаңысын куруу керек. Машыктыруучуларды окутуу, даярдоо, аймактардагы өкүлчүлүктөрүбүздү өстүрүп, жаңы деңгээлге алып чыгуу сыяктуу тепкичтерден турган планыбыз бар.

— Бишкектин четинде 35 миң көрүүчүгө ылайыкташкан футболдук стадион, спорт сарай, заманбап муз аянтын жана олимпиадалык стандарттагы жабык бассейн куруу үчүн 30 гектар жер бөлүнгөнү айтылган. Соңку күндөрү ал жерге мамлекеттик кызматкерлер үчүн турак үй куруу аракеттери болуп жатканын жазып чыгышты. Буга карата кандай пикир айтасыз?

— Аталган жер аянты Жаштар иши, дене тарбия жана спорт агенттигине берилгени тууралуу боюнча менде да маалымат бар. Мамлекеттик кызматта иштегендер үчүн турак үйлөр курулары, административдик шаарча болору тууралуу мен да окуп калдым. Эми бул акыркы чечим эмес деп ойлойм.

Мен мамлекет башчы Садыр Жапаров спортту, өзгөчө футболду сүйгөн инсан экенин жакшы билем. Ошондуктан ал киши бул маселеге кайдыгер карабайт деп ойлойм. Эгерде бул иш чиеленишип, татаалдашып кеткен күндө деле өлкө башчысы башка жактан бизге, кыргыз спортуна заманбап шаарча куруп берет деп ишенем.

Президент Кыргызского футбольного союза Канатбек Маматов
© Фото / Адилет Бектуров
Канатбек Маматов: футболдук инфраструктурабыз начар, аны оңдоо, мүмкүнчүлүк болсо заманбап кылып жаңысын куруу керек. Машыктыруучуларды окутуу, даярдоо, аймактардагы өкүлчүлүктөрүбүздү өстүрүп, жаңы деңгээлге алып чыгуу сыяктуу тепкичтерден турган планыбыз бар

— Кыргызстандын футбол боюнча чемпионаты жанданды. Анын форматы жана катышкан командалардын саны боюнча кандай өзгөчөлүктөр бар?

— Чемпионатта былтыркыдай эле сегиз команда ойноп жатат. Былтыр пандемия болуп, чемпионат убактылуу токтотулган. Кийин жагдайдан улам Кант шаарында борборлоштурулган форматта өткөрдүк.

Быйыл, буюрса, план боюнча бара жатат. Төрт айлампада өтөт. Командалар өз үйүндө жана конокто ойношот. Жалпысынан 112 беттеш өтүшү керек. Анын жыйынтыгы менен өлкө чемпиону аныкталмакчы.

Ошондой эле Кыргызстандын кубогу мелдешин өткөрөбүз. Былтыр футболдон өлкө кубогу мелдеши да Кант шаарында өткөн болчу. Быйыл стандарттык негизде үйүндө-конокто беттештер болот. Турнирге премьер-лига, улуттук лига жана экинчи лиганын командалары катышат.

Президент Кыргызского футбольного союза Канатбек Маматов
© Фото / Адилет Бектуров
Канатбек Маматов: мыкты команда курап, жакшы натыйжага жетем дегендер болсо чет өлкөдөн оюнчуларды алып келип, аларга шарт түзүп, келишимин төлөшү керек. Мунун баары келип акчага такалат

— Мисалы, дүйнө чемпионатына тандоо турундагы атаандаштардын командалары көп. Япония Жей лига 18 команда, Тажикстан 10, Монголия 10... Ушундай жагдайда алар менен кантип татыктуу атаандашууга болот?

— Бул эң туура маселе. Ички чемпионаттын деңгээли жогору болгон өлкөнүн улуттук командасы күчтүү болот. Бизде бир нече жылдан бери 7-8 команда катышып келе жатат. Футболдук команданы түзүп, аны ар тараптуу камсыздоого оор иш. Оюнчулар менен машыктыруучулардын маянасын төлөө, башка жактарга барып ойноп келгени, баскан-турганы сыяктуу чыгымдарын көтөрүү өтө көп каражатты талап кылат.

Мыкты команда курап, жакшы натыйжага жетем дегендер болсо чет өлкөдөн оюнчуларды алып келип, аларга шарт түзүп, келишимин төлөшү керек. Мунун баары келип акчага такалат. Мен лигаларга катышкан командалардын санын көбөйтүүнүн эки жолун көрөм. Биринчи кезекте бийлик тараптан кызыгуу болушу керек. Ири бюджети бар мекемелерди команда түзүүгө чакырып, аларга кандайдыр бир жеңилдиктерди берүү керек. Маселен, демөөрчү ишканаларды, жеке инсандарды салыктан бошотуу сыяктуу иштер колго алынса жакшы болот. Ошондо кызыгуу жогорулайт.

Мисалы, Өзбекстанда мамлекеттик мекемелерди футболдук команда түзүүгө милдеттендирип койгон. Өлкө футболун өнүктүрүү үчүн Ислам Каримовдун доорунда эле атайын мыйзам кабыл алынган. Азыр аны заманга жараша жаңылап кайра кабыл алышты.

Биз да мамлекеттик бийлик менен бул багытта айрым аракеттерди көрүп жатабыз. Эми канчалык натыйжа чыгат, канчалык колдоо табабыз, аны алдыда көрөбүз. Аракеттер болуп жатат.

Президент Кыргызского футбольного союза Канатбек Маматов
© Фото / пресс-служба КФС
Канатбек Маматов: Жанни Инфантино дүйнөлүк футбол чөйрөсүндө өтө абройлуу киши. Анын келиши Кыргызстандын футболунун жанданып, жаңы деңгээлге чыгышына түрткү болот деп үмүттөнөбүз

— ФИФА өзүнө мүчө өлкөлөрдүн, анын ичинде Кыргызстандын футболун колдоо үчүн 1,5 миллион доллар каражат бөлгөнү маалым. Акча келдиби?

— Пандемия убагында зыянга учураган федерацияларды колдоо үчүн ФИФА 1,5 миллион доллар каражат жардам берүү чечимин кабыл алган. Анын бир миллиону эркектердин, ал эми 500 миң доллары кыз-келиндер футболун колдоого багытталган.

Бизге буга чейин 500 миң доллар келген. Ал каражатка өлкө кубогу, өспүрүмдөрдүн жана футзал боюнча өлкө чемпионаттары өткөрүлдү. Мындан сырткары, коронавируска каршы керектүү дары-дармек, жабдуулар алынган.

Дагы калган 500 миң боюнча КФСтин катчылыгы тийиштүү тараптарга атайын кат даярдап жатат. Бул ирет аймактардагы өкүлчүлүктөрдү колдоо, алардын инфраструктурасын жакшыртууга жумшайбыз деген пландарыбыз бар.

Кыз-келиндер футболуна делген 500 миң доллар акчаны күтүп жатабыз. Ал бир гана кыздар футболуна, аны ар тараптуу өнүктүрүүгө жумшалат.

Бул жерде баса белгилеп кетчү жагдай, бизде 15 кишиден турган аткаруу комитети бар. ФИФАдан бөлүнгөн каражат ошол органдын уруксаты менен алынып, кайра эле анын сарпталганы боюнча отчёт берилет. Ага 30 кишиден турган конгресс көзөмөл кылат. Мындан сырткары, ФИФА атайын аудит жиберип, отчёт алышат.

Президент Кыргызского футбольного союза Канатбек Маматов с президентом ФИФА Джанни Инфантино
© Фото / пресс-служба КФС
ФС жетекчиси Канатбек Маматов ФИФА президенти Жанни Инфантино менен 2019-жылдын аягында жолугуп, аны Кыргызстанга чакырган. Ал киши 2020-жылдын апрель айында келүүнү убада кылган эле. Коронавирус пандемиясынан улам бул иш кийинкиге жылып кетти.

— Кыргызстанга ФИФА президенти Жанни Инфантино келерин айткан элеңиз. Пандемия, эпидемиологиялык кырдаалдан улам кийинкиге калтырылган болчу. Ал киши келмей болдубу?

— Мен Жанни Инфантино менен 2019-жылдын аягында жолугуп, Кыргызстанга келип кетиңиз деп чакыргам. Ал киши 2020-жылдын апрель айында келүүнү убада кылган эле. Коронавирус пандемиясынан улам бул сапар кийинкиге жылып кетти. Азыр деле сүйлөшүүлөр жүрүп жатат. Эгер өлкөбүздө эпидемиологиялык абал турукташып калса, анда ушул жылдын аягында ФИФА президенти бизге келип калышы мүмкүн.

Инфантино дүйнөлүк футбол чөйрөсүндө өтө абройлуу киши. Анын келиши Кыргызстандын футболунун жанданып, жаңы деңгээлге чыгышына түрткү болот деп үмүттөнөбүз.

Белгилер:
ФИФА, Канатбек Маматов, Кыргыз футбол союзу, футбол
Тема боюнча
Боронбекова: футболчу кыздардын көбү турмушка чыккандан кийин карьерасын токтотот
Кыргызстандык футболчу Тамирлан Козубаев россиялык клубга өттү
Кыргызстандык балбан кыз Мээрим Жуманазарова. Архивдик сүрөт

Мээрим Жуманазарова Олимпиадага жолдомо ойнотулган мелдештен күмүш байге утту

(жаңыланган 19:41 10.04.2021)
Мээрим Жуманазарова алгачкы кармашында эле кытайлык кыз менен кез келип жеңилип калган болчу. Кийинки баскычтарда өзүнүн мыкты экенин көрсөтүп, финалдык баскычка жетти.

БИШКЕК, 10-апр. — Sputnik. Кыргызстандык балбан кыз Мээрим Жуманазарова Олимпиада оюндарына жолдомо ойнотулган мелдеште күмүш медаль утту. Казакстандын Алматы шаарында өтүп жаткан мелдештин жүрүшүн United World Wrestling (Дүйнөлүк күрөш уюму) уюмунун расмий сайты түз алып көрсөтүүдө.

68 килограмм салмакта күч сынашкан Мээрим Жуманазарова финалда кытайлык Фэн Чжоу менен таймашып, упай айырмасында жеңилип калды.

Кыргызстандык балбан кыз жарым финалда индиялык Ниша Нишаны 13:3 эсебинде, таза техникалык артыкчылык менен уткан. Ага чейин чейрек финалда казакстандык атаандашы Жамила Бакбергенованы 10:3 эсебинде жеңген.

Эскерте кетсек, мелдеш ушул күндөрү Казакстандын Алматы шаарында өтүп жатат. Турнирдин финалына чыккан атлеттерге Токио Олимпиадасына лицензия берилет.

Буга чейин 76 килограмм салмакта күрөшкөн Айпери Медет кызы бардык атаандаштарын утуп, чемпион болгон.

Ал эми 57 килограммда күрөшкөн Назира Марсбек кызы эки жолу удаасы менен жеңилип, байгелүү орун үчүн таймашуу укугунан четтеп калды.

Кечээ грек-рим балбандарынын арасында таймаш жүрүп, ата мекендик спортчулар Жоламан Шаршенбеков (60 килограмм), Акжол Махмудов (77 килограмм) жана Үзүр Жузупбеков Токио Олимпиадасына жолдомо алышкан.

Бүгүнкү күндө Кыргызстанда жалпысынан 12 лицензия болду. Буга чейин балбан Айсулуу Тыныбекова, Атабек Азисбеков, жөө күлүктөр Мария Коробицкая, Дарья Маслова жана Юлия Андреева, ошондой эле суучул Денис Петрашов жолдомо алышкан.

Белгилер:
финал, мелдеш, лицензия, олимпиада, Мээрим Жуманазарова, күрөш
Тема:
2021-жылы Токиодо өтө турган Олимпиада оюндары
Тема боюнча
Жеңилип, кайра өзүн колго алган Мээрим да Олимпиадага жолдомо утту. Видео
Сүйүнчү! Айпери каршылаштарын баш көтөртпөй жеңип, Олимпиадага жолдомо алды
Кыргызстандык балбан кыз Мээрим Жуманазарова. Архивдик сүрөт

Жеңилип, кайра өзүн колго алган Мээрим да Олимпиадага жолдомо утту. Видео

(жаңыланган 15:25 10.04.2021)
68 килограмм салмак категориясы боюнча финалда кыргызстандык кыз кытайлык Фэн Чжоу менен таймашат.

БИШКЕК, 10-апр. — Sputnik. Кыргызстандык балбан кыз Мээрим Жуманазарова да Олимпиада оюндарына жолдомо алды. Анын финалга чыкканы тууралуу маалымат United World Wrestling (Дүйнөлүк күрөш уюму) уюмунун расмий сайтына чыкты.

68 килограмм салмак категориясы боюнча финалда кыргызстандык кыз кытайлык Фэн Чжоу менен таймашат.

Жуманазарова жарым финалда индиялык Ниша Нишаны 13:3 эсебинде, таза техникалык артыкчылык менен утканын uww.asia уюму өзүнүн Instagram баракчасына чыгарды. 

Посмотреть эту публикацию в Instagram

Публикация от United World Wrestling Asia (@uww.asia)

Мээрим алгачкы кармашында кытайлык кыз менен беттешкен. Аны 5:3 эсебинде утуп жатып, кармаштын соңуна 14 секунда калганда 5:7 менен утулуп калды.

Ата мекендик спортчу кыз чейрек финалда казакстандык атаандашы Жамила Бакбергенованы 10:3 менен уткан.

Мелдеш ушул күндөрү Казакстандын Алматы шаарында өтүп жатат. Аталган чемпионатта финалга чыккан атлеттерге Токио Олимпиадасына лицензия берилет.

Эскерте кетсек, 76 килограмм салмакта күч сынашкан Айпери Медет кызы бардык атаандаштарын утуп, чемпион болду.

Ал эми 57 килограммда күрөшкөн Назира Марсбек кызы эки жолу удаасы менен жеңилип, байгелүү орун үчүн таймашуу укугунан четтеп калды.

Белгилер:
финал, мелдеш, лицензия, олимпиада, Мээрим Жуманазарова, күрөш
Тема:
2021-жылы Токиодо өтө турган Олимпиада оюндары
Тема боюнча
Сүйүнчү! Айпери каршылаштарын баш көтөртпөй жеңип, Олимпиадага жолдомо алды
Жоламан менен Акжол Олимпиадага лицензия берилчү мелдештин чемпиону болду. Видео
Премьер-министр Улукбек Марипов бүгүн авиабилеттерге бааны төмөндөтүү жана COVID-19 жок саякатта долбоорун ишке ашыруу маселеси боюнча кеңешме өткөргөн.

Марипов авиабилеттерди арзандатуу боюнча кеңешме өткөрүп, тапшырма берди

(жаңыланган 20:06 10.04.2021)
Өкмөт авиабилеттерге бааны төмөндөтүү, авиакаттамдардын санын жогорулатуу боюнча бардык күчүн жумшап жаткандыгы айтылат.

БИШКЕК, 10-апр. — Sputnik. Бир катар мамлекеттик ведомстволордун чабал ишинин натыйжасында чет өлкөгө бараткан жарандарга негиздеме жасоо бизнеске айланды. Бул тууралуу премьер-министр Улукбек Марипов билдирди.

Ал бүгүн авиабилеттерге бааны төмөндөтүү жана "COVID-19 жок саякатта" долбоорун ишке ашыруу маселеси боюнча кеңешме өткөргөн.

  • Премьер-министр Кыргызской Республики Улукбек Марипов провел совещание по вопросу снижения цен на авиабилеты и реализации проекта Путешествий без COVID.
    Премьер-министр Улукбек Марипов бүгүн авиабилеттерге бааны төмөндөтүү жана "COVID-19 жок саякатта" долбоорун ишке ашыруу маселеси боюнча кеңешме өткөргөн.
    © Фото / Пресс-служба правительства / Алишер Алиев
  • Премьер-министр Кыргызской Республики Улукбек Марипов провел совещание по вопросу снижения цен на авиабилеты и реализации проекта Путешествий без COVID.
    Ошондой эле ал өкмөт авиабилеттерге бааны төмөндөтүү, авиакаттамдардын санын жогорулатуу боюнча бардык күчүн жумшап жаткандыгын белгилеген.
    © Фото / Пресс-служба правительства / Алишер Алиев
1 / 2
© Фото / Пресс-служба правительства / Алишер Алиев
Премьер-министр Улукбек Марипов бүгүн авиабилеттерге бааны төмөндөтүү жана "COVID-19 жок саякатта" долбоорун ишке ашыруу маселеси боюнча кеңешме өткөргөн.
"Сиздердин аракетсиздигиңерден улам сапарга чыгууга муктаждыкты тастыктоочу "негиздеме" документти айрым ишкерлер бизнеске айлантып алды. Долбоорду 1-апрелден тарта ишке киргизишиңер керек эле. Биздин жарандар үчүн ЕАЭБ өлкөлөрүндө жүрүүгө мыкты мүмкүнчүлүк түзүлдү. Болгону ПЦР-анализ тапшырып, тийиштүү тиркемени көчүрүп алуу керек. Бирок эки лаборатория гана аталган анализди жасап, код бере алат. Эмне себептен лабораториялар аз камтылган?" — деп сурады Марипов.

Ошондой эле ал өкмөт авиабилеттерге бааны төмөндөтүү, авиакаттамдардын санын жогорулатуу боюнча бардык күчүн жумшап жаткандыгын белгилеген.

Аны менен катар премьер-министр анализдерди тапшырууга мүмкүн болгон лабораториялардын жана авиакаттамдардын санын жогорулатуу боюнча сунуш киргизүүгө тапшырма берди.

Бул маселе өлкө башчынын жеке көзөмөлүндө тургандыгын кошумчалаган.

Белгилер:
лаборатория, арзандатуу, авиабилет, Улукбек Марипов, өкмөт
Тема боюнча
Кыргызстандын жарандары Россияга негиздемеси жок кириши мүмкүн
Жапаров: Россияга каттаган рейстер менен авиабилет баасын өз көзөмөлүмө алдым