Беттештин аяктаганы тууралуу ышкырык жаңырды. Монголия Кыргызстандын курама командасын 1:0 эсебинде утуп алды. Голду беттештин 34-мүнөтүндө атаандаштын чабуулчусу Мижиддорж Оюунбаатар стандарттык абалдан чыгарылган топту башы менен дарбазага багыттап гол киргизди. Бул беттештеги жалгыз жана монголдор үчүн жеңүүчү гол болду.
90-мүнөт Кыргызстандыктардын кезектеги чабуулу ийгиликсиз аяктады. Асмандагы топту Мирлан Мурзаев башы менен дарбазага багыттады. Дарбазачы топту тосуп алды.
Ар бир кагылышууда монгол оюнчулары чөпкө жатып алып жатышат. Анткени алар үчүн ар бир секунда маанилүү болуп турат.
Кайрат Жыргалбек уулу кезектеги чабуулда айып аянтына бийиктен чыгарып берген тобун дарбазачы кармап алды.
84-мүнөттө Кыргызстандын коргоочусу Тамерлан Козубаев атаандаштын чабуулчусуна каршы орой ойноп, сары айып кагазы менен жазаланды.
82-мүнөт. КР кезектеги бурчтан чыгарып берүү жасады. Бир катар талаштан соң Мустафа Юсупов башы менен дарбазага багыттаган тобун дарбазачы кармап алды.
Беттештин 73-мүнөтүндөгү Ак шумкарлардын кезектеги чабуулу коргоочулар тарабынан кайтарылды.
Гүлжигит Алыкуловдун ордуна Абай Боколеев кирди. Бүгүн кыргызстандык “Месси” күтүлгөндөй оюн көрсөтө алган жок.
Кыргызстандыктардын кезектеги чабуулун Фархат Мусабеков жасады. Тилекке каршы, топ дарбазадан сыртка кетти. Беттештин 70-мүнөтү жүрүп жатат.
КРдин башкы машыктыруучусу бир катар оюнчуларды алмаштырды. Жарым коргоочу Турсунали Рустамовдун ордуна Одилжон Абдрахманов, жарым коргоочу Эдгар Бернхарттын ордуна Ахледдин Исраилов кирди.
КР коргоочусу Мустафа Юсупов атаандашынын чабуулун эреже бузуу менен токтоткону үчү сары айып кагазы менен жазаланды. Беттештин 63-мүнөтү жүрүүдө.
Кыргызстандык оюнчулар кайрадан бурчтан чыгарып берүү мүкүнчүлүгүн алды.
11-катар санындагы монгол оюнчусу эрежеден сырт ойногону үчүн сары айып кагазын алды. Ал оюн токтотулгандан кийин убакытты созуу үчүн топту тээп салды.
55-мүнөт Ак шумкарлар кезектеги чабуулун жасап, бурчтан тебүү мүкүнчүлүгүн алды.
Монголия курамасынын 4 катар санындагы Дулгуун аттуу оюнчусу орой ойногону үчүн сары айып кагазын алды.
Экинчи тайм башталар замат монгол футболчулары бурчтан тебүү мүмкүнчүлүгүн алышты.
Бул улуттук курама команданын Дүйнө чемпионатына тандоо этабында Монголия командасы менен экинчи беттеши. 2019-жылдын 15-октябрында Улан-Батордогу беттеште Кыргызстан курамасы 2:1 эсебинде уткан. Анда голдорду кыргызстандыктардан Гүлжигит Алыкулов менен Мирлан Мурзаев киргизген.
Биринчи тайм аяктап, оюнчулар тыныгууга чыгышты. Биринчи таймда топко ээлик кылуу көрсөткүчү боюнча Кыргызстан курама командасы алда канча алдыда болду. 45 мүнөттүктүн ичинде көптөгөн чабуулдарды жасаганы менен голсуз аяктап жатты. Тилекке каршы азырынча 0:1 эсебинде атаандаш команда алдыда.
Биринчи бөлүккө эки мүнөт кошумча убакыт берилди.
44-мүнөттө Кыргызстан курамасынын кезектеги чабуулу ийгиликсиз аяктады.
Оюндун 43-мүнөтүндө стандарттык абалдан тебүү мүмкүнчүлүгү берилди. Дарбазадан 20 метрдей аралыктан Александр Мищенко тээп, таамайлык жетишкен жок.
Гүлжигит Алыкулов атаандаштын дарбазасына таамай топ тепти, бирок сокку жетишпей калды. Монгол дарбазачысы топту киргизбей кармап калды.
Тилекке каршы, оюндун 33-мүнөтүндө Монголия Кыргызстандын дарбазасына гол киргизди.
Каршылаш тарапка эки ирет гол киргизүүгө мүмкүнчүлүк болду.
Оюндун биринчи бөлүгү бүтөйүн деп калды. Кыргызстандыктар топту көбүрөөк көзөмөлдөп, техникага басым жасап атышат. Команда толук курамда чыкпай калганы сезилүүдө.
Дарбазачынын жоктугу футболчуларга психологиялык жактан кыйын болууда. Алар ката кетирип албайлы деп өтө абайлап жатышат окшойт.
Кайрат Жыргалбек уулу топ талашып атып атаандашын бет тушка тээп алды.
Жарым коргоочунун катасынан улам улуттук курама команданын дарбазасына гол кирип кете жаздады. Дарбазачы-коргоочу Айжар Акматов бул абалдан чыгууга көмөктөштү.
Монголиянын командасынын оюнчусу эреже бузгандыгы үчүн сары карта алды.
Кыргызстандын курама командасы топту көбүрөөк көзөмөлдөп, пас берип жатат. Азырынча эки тарап тең топ киргизе элек.
Футбол сүйүүчүлөрү Asia Mall соода борборуна футбол көрүүгө топтолду. Оюнду туруп көргөндөр да бар.
Кыргызстандык футболчулар атаандаштын дарбазасына эки ирет топ киргизгенге аракет кылып, бирок аз калганда ийгилик жылмайбай калып атты.
Кыргызстандык спортчулар катуу чабуул жасай баштады.
Кыргызстандын футбол боюнча курама командасынын машыктыруучулук штабы, администрация, оюнчу Бекжан Сагынбаев, дарбазачылар Эржан Токатаев, Кутман Кадырбеков жана Кашуба Валерий коронавируска шектелип оюндан четтеди. Бул тууралуу Кыргыз футбол союзу билдирди.
Мелдеш азыр Японияда өтүп, курама команда Монголия менен беттешет.
"Техникалык утулууга дуушар болуп калбаш үчүн дарбазачылар жок ойноого аргасызбыз. Ооруга шек жаратып жаткандар тууралуу беттешке аз убакыт калганда, эки саат мурун билдиришти. Командада бардыгынын тапшырган тестти таза чыккан болчу", — деп айтылат маалыматта.
Шартка байланыштуу коргоочу позициясындагы Айзар Акматов дарбазачы болот.
Бүгүн командалар экинчи ирет футбол талаасында жолугат. 2019-жылы 15-октябрда Кыргызстандын курама командасы Монголиянын футболчуларын 2:1 эсебинде жеңген. Мелдеш Улан-Батор шаарында өткөн.
Биринчи таймда улуттук курама командадан алгачкы топту Гүлжигит Алыкулов, экинчи голду Мирлан Мурзаев киргизген
Белгилей кетсек, дүйнөлүк чемпионатка тандоонун алкагында команда ар бир атаандашы менен экиден оюн өткөрөт. Бирөө өлкөсүндө, экинчиси каршылаш тараптын жеринде болот. Тайпалар арасындагы биринчи беттеш Улан-Батордо өтүп, кийинкисин Кыргызстандан ойношмок. Бирок пандемиядан улам бардык мелдештер Японияда өтүп калды. Ошондуктан бул оюндун ээси катары улуттук курама команда эсептелине берет.
Кыргызстандык футболчуларга UFC чемпиону Валентина Шевченко баштаган белгилүү адамдар колдоо сөзүн айтып, ийгилик каалады. Видеодон Футбол федерациясынын жетекчиси Канатбек Маматовду, Жаштар иши, дене тарбия жана спорт агенттигинин жетектчиси Канат Шабданбаевди, грек рим күрөшүнүн балбандары Атабек Азисбеков, Акжол Махмудов, Жоламан Шаршенбековду, дзюдочу Юрий Краковецкийди, актер Нурсултан Курсанали уулун жана башкаларды көрүүгө болот.
Улуттук курама команданын беттешке чейинки машыгуусу. Спортчулар бир нече күн мурун Японияга учуп барган.
Кыргызстан менен Монголиянын футболчуларынын беттеши Бишкек убактысы боюнча саат 13:00дө башталат. Шаардыктар оюнду Vefa Center жана Asia Mall соода борборлорунан көрө алышат. Түз эфирлерди КТРК Sport, Kyrgyz Sport TV жана Sportrecs платформасынан тапса болот.
Футбол боюнча улуттук курама команданын капитаны, жарым коргоочу Валерий Кичин бүгүнкү оюнга катышпайт. Бул тууралуу Кыргыз футбол союзу кабарлады.
Маалыматка караганда, 2019-жылы Кыргызстан Тажикстан менен ойногон учурда Кичин эки сары карточка алган. Буга байланыштуу Эл аралык футбол федерациясынын (ФИФА) Тартип комитети аны беттештен убактылуу четтеткен. Капитандык милдетти Мирлан Мурзаев аткарат.
