Двухкратный чемпион мира по грэпплингу среди юношей Нурсултан Куштарбек уулу на соревнованиях в Уфе

Дүйнө чемпионатында эки алтын уткан Нурсултан: агайым жок өзүмдү өзүм машыктырдым

9239
(жаңыланган 14:23 22.08.2021)
17 жаштагы Нурсултан Куштарбек уулу агайы жоктугуна байланыштуу жарым жылдан бери өз алдынча машыккан. Ошого карабай грэпплинг боюнча өспүрүмдөр арасындагы Дүйнө чемпионатында эки алтын медаль утуп алды. Мелдештер 13-14-август күндөрү Башкыртстандын Уфа шаарында өткөн.

Кыргызстандык балбан килемге 63 килограмм салмак категориясында чыгып өлкө намысын коргогон. Ал биринчи күнү Gi (кимонодо) дисциплинасында кармашып чемпиондукту багындырган. Эртеси No Gi (кимоносуз) дисциплинасында күч сынашып экинчи алтын медалын тагынды.

Бул Нурсултандын алгачкы жеңиши эмес. 2019-жылы Бишкекте өткөн Азия чемпионатынын баш байге ээси, ошол эле жылы Дүйнө чемпионатында (Москва) күмүш медаль алган эле.

Sputnik Кыргызстан агенттигинин кабарчысы Нурсултандын жеңиши, даярдыктары жана максаты тууралуу маек курду. 

Двухкратный чемпион мира по грэпплингу среди юношей Нурсултан Куштарбек уулу на церемонии награждения в Уфе
© Фото / Сейтек Толтоев
17 жаштагы Нурсултан Куштарбек уулу агайы жоктугуна байланыштуу жарым жылдан бери өз алдынча машыккан. Ошого карабай грэпплинг боюнча өспүрүмдөр арасындагы Дүйнө чемпионатында эки алтын медаль утуп алды

— Нурсултан, чемпион болушуңуз менен куттуктайбыз! Азыр деле сүйүнүү толкунунан чыга албай жүрсөңүз керек.

— Финалга чейинки беттештерде жеңсем да көп сүйүнгөн жокмун. Себеби бошобой аягына чейин күрөшүп, утушум керек болчу. Анан финалды утканда айтпаңыз, эмоцияларымды кармай албай, сүйүнүчтөн көз жашымды да токтото алган жокмун.

Посмотреть эту публикацию в Instagram

Публикация от Purple belt🥋 (@nursultan_jj)

— Азыр кайдасыз, эмне менен алексиз?

— Мелдештен кийин Москвада калдым. Машыгуумду бул жактан улантып жатам.

— Дүйнө чемпионатына машыгууларыңыз каякта өттү?

— Негизи көптөн бери даярданып жүргөм, Сокулукта залыбыз бар. Машыгуу учурунда бирөө сага жок дегенде бир жаңы нерсе үйрөтүп турбаса өсүү аябай кыйын болот. Ал эми мен акыркы убакта өзүмө өзүм машыктыруучу болдум. Анткени жарым жылдан бери агайым Самарбек Сабыржан уулу Америкада болуп калды. Өз алдынча машыккандыгым үчүн даярдыгым начар болуп, канааттанбай жаттым. Бирок ошентсе дагы агайым телефон аркылуу чалып көзөмөлдөп турду. Ыраазычылыгымды билдирем.

Бул чемпионатка келе жатканда алтын алам деген максат койгом. Канчалык көп мээнет кылсаң ошончолук жеңишке жакын болосуң. Тынбай аракет кылып, өзүмө ишенип, жараткандан да суранып келгем. Тилегим орундалганына шүгүр. 

Двухкратный чемпион мира по грэпплингу среди юношей Нурсултан Куштарбек уулу на соревнованиях в Уфе
© Фото / Сейтек Толтоев
Нурсултан: келечекте билим алып, архитектор адистигине тапшырып, мыкты үй куруучу болгум келет. Мен үчүн биринчи орунда окуу, андан кийин спорт

— Эң күчтүү атаандашыңыз ким болду?

— Албетте, коркуу сезими болбой койбойт экен. Grappling No Gi версиясында эң күчтүү атаандашым италиялык балбан болду. Мен башында ага 5:3 эсебинде утулуп жаткам. Ошол учурда жакындарымдын, агайымдын мага кандай ишенип, үмүт артканын, мага жумшаган мээнетин эстеп, өзүмдү колго алдым. Беттештин бүтөрүнө 37 секунда калганда атаандашымды оодарып 12:5 эсебинде озуп чыктым.

Мага көбүнчө агайым дем-күч берет. Ал "сен алгач ыймандуу, анан акылдуу бала болушуң керек. Андан кийин гана чемпион болобуз" деп көп айтат.

— Күрөштүн эки түрүнөн тең жеңдиңиз. Кайсынысы сизге жеңилирээк болду?

— Кимоносуз күрөш мага аябай эле жеңил болду. Анткени мен көбүнчө кимоночон машыгам. Анын жанында кимоносуз оңой эле болуп калат экен.

Посмотреть эту публикацию в Instagram

Публикация от Purple belt🥋 (@nursultan_jj)

— Грэпплингге кантип аралашып калдыңыз эле, келип кайра кетип калгандар болот эмеспи, сизди эмне кармап калды?

— Грэпплингге келишиме Самарбек агайым себеп болгон. Ал айылга күрөш боюнча мелдештерди уюштуруп барып турчу. Аны көрүп күрөшкө болгон кызыгуум арта баштаган. Агайдын артынан ээрчип жүрүп аралашып калдым. Башка спорттун түрүнө караганда бул жакта ар кандай ыкмалар менен күрөшсөң болот, мага ошонусу жаккан.

— Балалыгыңыз боюнча да бир аз сөз кылалы. Кичинекейиңизден эле балдар менен күрөшөсүзбү?

— Мен Алай районунун Корул айылынан болом. Балалыгым ошол жакта өттү. Байкелерим күрөшчү, аларды көрүп чоңойдум. Ошондо эле күрөшкө аябай кызыгып калгам. Профессионалдуу болбосо да күрөшүп турчумун. Андан тышкары, футбол ойноп, ырдай койчу талантым да бар. Мектепте ар кандай кечелерде ырдап коём. 

Двухкратный чемпион мира по грэпплингу среди юношей Нурсултан Куштарбек уулу на соревнованиях в Уфе
© Фото / Сейтек Толтоев
Нурсултан: бир туугандарым күрөшкөнүмдү түз эфирден көрүп колдоп, ыйлап да отурушуптур. Менин жеңишим ата-энемдин да жеңиши. Алар карапайым эле адамдар. Атам уста, апам болсо үй кожойкеси

— Чемпионду тарбиялаган ата-эне эмне менен алектенет?

— Күрөшкөнүмдү түз эфирден көрүп колдоп, ыйлап да отурушуптур. Менин жеңишим ата-энемдин да жеңиши. Алар карапайым эле адамдар. Атам уста, апам болсо үй кожойкеси. Беш баланы чоңойтуп өстүрүштү. Мен алардын ортончусумун. Бир туугандарымдын арасынан мен эле спортко аралашкам. 2007-жылы Алайдан Кара-Балтага көчүп келгенбиз. Мектепти ал жактан окуп, кийин машыгуума байланыштуу мектебимди Сокулукка котордум. Быйыл 11-класс болом.

— Келечекте грэпплинг менен эле кетсем деп ойлойсузбу же башка кесиптин ээси болгуңуз келеби?

— Сабактарымды калтырбай, аракет кылып окуп жатам. Келечекте билим алып, архитектор адистигине тапшырып, мыкты үй куруучу болгум келет. Мен үчүн биринчи орунда окуу, андан кийин спорт. Бирок спортту эч качан таштабайм. Бул тармакта чоң максаттарым бар. Азия оюндарын жеңип, анан, буюрса, жиу-житсу олимпиадага кирсе андан да ийгиликтерди жараткым келет.

9239
Белгилер:
спорт, Грэпплинг, дүйнө чемпионаты, алтын, медаль
Тема боюнча
Акжол Махмудов качан үйлөнөт. Балбандын атасы Мухамед Махмудовдун видеомаеги
Мээрим Жуманазарова: атам калыңга миллион берсе да бербейм деп тамашалайт
Кыргызстандын футбол боюнча курама командасынын оюнчулары. Архив

Кыргызстандын футбол командасы FIFA рейтингинде алдыңкы жүздүккө илинди

243
(жаңыланган 15:51 16.09.2021)
Өткөн айда 99-орунда турган курама команда 102-катарга түшүп кеткен. Рейтингде жалпысынан 210 команда бар.

БИШКЕК, 16-сен. — Sputnik. Кыргызстандын футбол боюнча курама командасы Эл аралык футбол федерациясынын (FIFA) жаңыланган рейтингинде 98-орунду ээледи.

Өткөн айда 99-орунда турган курама команда 102-катарга түшүп кеткен. Рейтингде жалпысынан футбол боюнча 210 курама команда бар.

Ушул жылдын август айынын ортосунан бери ата мекендик команда Палестина жана Бангладештин курама командалары менен беттешип, экөөнү тең жеңген.

Палестинанын курама командасы 99-орунга илинген. Дүйнөлүк рейтингдин сап башында Бельгия турат. Андан кийин Бразилия, тизменин үчүнчү катарын англиялыктар ээлеген. Франция төртүнчү болсо, бешинчиде Италиянын курама командасы турат.

Азия боюнча рейтингдин сап башында турган Иран жалпы тизмеде 22-орунда. Япония экинчи болсо (26), Австралия үчүнчү (32) катарда. Кореялыктар төртүнчү (36), Катардын (43) командасы бешинчи орунду ээлеген.

Борбор Азия боюнча рейтингдин сап башында Өзбекстандын курама командасы турса (84), андан кийин эле Кыргызстан (98) бара жатат. Тажикстан (118), Казакстан (120), Түркмөнстан (130) кийинки сапта.

Эске алчу жагдай: Казакстандын курама командасы Азия футбол конфедерациясына эмес (AFC), Европа футбол ассоциациясынын биримдигине (UEFA) кирет.

243
Белгилер:
Кыргызстан, футбол, рейтинг, курама команда
Тема боюнча
Каз катар тизилип футбол көргөн аткаминерлер. Фотофакт
Кыргызстандык жаш футболчулар да Бангладеш командасын утуп алды
Кыргызстандык балбан кыз Айсулуу Тыныбекова. Архивдик сүрөт

Юкако Каваи жок. Тыныбекованын дүйнө чемпионатындагы атаандаштарынын тизмеси

9881
Спорттук күрөштүн түрлөрү боюнча дүйнө чемпионаты Норвегиянын Осло шаарында 2-10-октябрда өтөт. Айсулуу Тыныбекова 4-октябрда килемге чыгат.

БИШКЕК, 15-сен. — Sputnik. Кыргызстандык балбан кыз Айсулуу Тыныбекованын дүйнө чемпионатындагы атаандаштары анык болду. Мелдешке катыша турган спортчулардын тизмесин Бириккен күрөш дүйнөсү (United World Wrestling) уюму расмий жарыялады.

Спорттук күрөштүн (грек-рим, эркин жана кыздар күрөшү) түрлөрү боюнча дүйнө чемпионаты Норвегиянын баш калаасы Осло шаарында 2-10-октябрда өтөт. Кыз-келиндер мелдеши 4-октябрда башталат.

Айсулуу Тыныбекова 4-октябрда килемге чыгат. 62 килограмм салмакта күч сынашкан кыргыздын балбан кызы 2019-жылы Казакстандын Нур-Султан шаарында өткөн мелдеште жеңип алган чемпиондук титулун коргойт.

Ослодогу биринчиликке Тыныбекованын Олимпиада жана дүйнө чемпионатынын финалында кармашкан аттандаштары: япониялык Юкако Каваи жана болгариялык Мустафа Тайбе Юсейн катышпайт.

Балбан кыздардын тизмеси:

62 килограмм

  • Вероника ИВАНОВА (Беларусь);
  • Лаис Нуньес Оливейра (Бразилия);
  • Анна Пол Годинес Гонзал (Канада);
  • Луиза Хелга Герда Нимеш (Германия);
  • Сангит Сангит (Индия);
  • Нонока Озаки (Япония);
  • Аяулым Касымова (Казакстан);
  • Винрозе Аливиса (Кения);
  • Айсулуу Тыныбекова (Кыргызстан);
  • Хва Юнг Сен (Корея);
  • Алехандра Ромеро Бонилла (Мексика)
  • Болортуа Хурелхуу (Монголия)
  • Виктория Мириам Оеверби (Норвегия);
  • Катажина Мадровская (Польша);
  • Алина Касабиева (Россия);
  • Нилукши Надеша Переру Голамбейж (Шри-Ланка);
  • Жансу Аксой (Түркия);
  • Илона Прокопевнюк (Украина);
  • Кайла Миракл (АКШ).
9881
Белгилер:
Айсулуу Тыныбекова, кыз-келиндер күрөшү, дүйнө чемпионаты, атаандаштык
Тема боюнча
Айсулуу Тыныбекова баштаган балбан кыздар дүйнө чемпионатында күрөшөт
Кытайдын Тышкы иштер министри Ван И президент Садыр Жапаров менен жолукту

Кытай Кыргызстанга 100 млн. доллар жана миллион доза вакцина берүүгө даяр

0
(жаңыланган 23:02 16.09.2021)
Президент Садыр Жапаров Кытайдын тышкы иштер министри Ван И менен Душанбеде жолугуп, бир катар маселелерди талкуулады.

БИШКЕК, 16-сен. — Sputnik. Кытай өкмөтү Кыргызстандын социалдык-экономикалык өнүгүүсүн колдоо иретинде 650 миллион юань (100 миллион доллардын тегереги) менен коронавирустук инфекцияга каршы кытайлык вакцинанын 1 миллион дозасын берүүгө даяр. Бул тууралуу Кытайдын тышкы иштер министри Ван И президент Садыр Жапаров менен жолукканда билдирди.

Тараптар Душанбеде өтүп жаткан ЖККУнун Жамааттык коопсуздук кеңешинин саммити менен ШКУ башчыларынын отурумунун алкагында баарлашкан.

  • Президент Кыргызской Республики Садыр Жапаров принял члена Государственного совета, министра иностранных дел Китайской Народной Республики Ван И. 16 сентября 2021 года
    Кытайдын Тышкы иштер министри Ван И президент Садыр Жапаров менен жолукту
    © Пресс-служба президента КР / Султан Досалиев
  • Член Государственного совета, министр иностранных дел Китайской Народной Республики Ван И во время встречи с президентом КР Жапаровым
    Тараптар Душанбеде өтүп жаткан ЖККУнун Жамааттык коопсуздук кеңешинин саммити менен ШКУ башчыларынын отурумунун алкагында баарлашкан.
    © Пресс-служба президента КР / Султан Досалиев
1 / 2
© Пресс-служба президента КР / Султан Досалиев
Кытайдын Тышкы иштер министри Ван И президент Садыр Жапаров менен жолукту

Жапаров Кыргызстан Кытайды негизги соода инвестициялык өнөктөштөрдүн бири катары карай турганын жана биргелешкен инвестициялык долбоорлорду ишке ашырууга кызыкдар экенин билдирген.

Президент учурда өлкөдөгү инвестициялык климатты жакшыртуу боюнча активдүү чаралар көрүлүп жатканын кошумчалаган. Анын айтымында, кыргыз тарап эки өлкө ортосундагы туруктуу аба каттамдарын жандантууну маанилүү деп эсептейт.

Кытай — Кыргызстан — Өзбекстан темир жолунун курулушу боюнча да кеп болуп, Жапаров долбоорду ишке ашыруу Кыргызстан үчүн эле эмес, жалпы регион үчүн маанилүү экенин белгилеген.

"КЭР мамлекеттик кеңешинин мүчөсү, тышкы иштер министри Кытай өкмөтү өлкөнүн социалдык-экономикалык өнүгүүсүн колдоо иретинде Кыргызстанга 650 миллион юань (100 миллион АКШ долларынын тегерегинде) бөлүүгө даярдыгын айтты. Ошондой эле коронавирустук инфекцияга каршы кытайлык вакцинанын кошумча партиясын (1 миллион доза) жана медициналык каражаттарды берүү чечимин кабыл алганын билдирди", — деп айтылат маалыматта.

Мамлекеттик кеңештин мүчөсү Кытай тараптын автоунаа жолдорун куруу жана ирригациялык түйүндөрдү кеңейтүү тармактарында биргелешкен долбоорлорду ишке ашырууга кызыкдар экенин билдирген. Мындан сырткары, тараптар регионалдык коопсуздук маселелерин талкуулаган.

0
Белгилер:
Кыргызстан, Кытай, Садыр Жапаров, вакцина, каражат
Тема:
Коронавируска каршы эмдөө
Тема боюнча
3 млн. бет кап, коргоочу костюм. Кыргызстанга Кытайдан гумжардам келди